मरकुस 15 - Surgujia Bible

ईसू ला राएजपाल पीलातूस जग लानीन

¹ बड़े बिहाने यहूदी अगुवा मन अऊ यहूदी कानहूंन कर सिखोईया मन अऊ मुख याजक मन अऊ पूरा महा सभा मिल के बात बिचार करीन, तेकर ईसू ला बंधूआए के ओमन राएजपाल पीलातूस कर हाथ में सोंएप देहीन।

² पीलातूस हर ईसू जग पूछीस, “का तंए यहूदी मन कर राजा लागस?” ईसू हर जबाब देहीस, “तंए खुद कहत हस।”

³ मुख याजक मन ईसू कर उपरे ढेरेच बात कर दोस लगात रहीन।

⁴ पीलातूस हर ईसू जग पूछीस, “का तंए कांही जबाब नई देअस, देख, एमन तोर उपरे ढेरेच बात कर दोस लगात हवें?”

⁵ ईसू हर फेर कांहीच जबाब नई देहीस, एला देख के पीलातूस हर ढेरेच अचमहों होईस।

ईसू कर मीरतू दंड कर अगियां

⁶ तिहार कर घरी में पीलातूस हर कोनो एक झे कएदी ला, जेला मईनसे मन चाहत रहीन, ओला ओमन बर छोंएड़ देहत रहीस।

⁷ बरअबा नांव कर एक झन कएदी हर जेहल में रहीस, जेहर रोमी सरकार कर बिरोध में लड़ाई-झगरा करे रहीस अऊ कोनो मईनसे ला मरुवाए देहे रहीस।

⁸ अऊ मईनसे कर भीड़ हर ऊपर जाए के पीलातूस जग बिनती करे लागीन, “जईसना तंए हमर बर करत आए हस, ओइसने कर।”

⁹ पीलातूस हर कहीस, “का तुमन चाहथा कि मंए तुमन बर यहूदी मन कर राजा ला छोंएड़ देवों?”

¹⁰ काबरकि ओहर जानत रहीस कि मुख याजक मन ईसू ला इसगा करे कर चलते धरुवाईन हवें।

¹¹ बकिन मुख याजक मन मईनसे मन ला उकसाईन कि बरअबेच ला ओमन बर छोंएड़ दे।

¹² एला सुईन के पीलातूस हर ओमन जग फेर पूछीस “त जेला तुमन यहूदी मन कर राजा कहथा, ओकर मंए का करों?”

¹³ तेकर ओमन फेरेच किरलाए के कहे लागीन, “कि ओके कुरूस में चघाए के मरुवाए दे”

¹⁴ बकिन पीलातूस हर ओमन ला कहीस, “काबर, एकर में का दोस हवे?” बकिन ओमन अऊ किरलाए के कहीन, “ओला कुरूस में चघाए के मरुवाए दे।”

¹⁵ तेकर पीलातूस हर भीड़ ला खुस करे बर बरअबा ला छोंएड़ देहीस अऊ ईसू के कोड़ा मरुवाए के कुरूस में चघाए बर सोंएप देहीस।

ईसू कर मजाक उड़ाथें

¹⁶ सिपाही मन ईसू के राएजपाल कर गढ़ी कर भीतर, अंगन में ले गईन अऊ सिपाही मन कर सबेच दल ला बलाईन।

¹⁷ तेकर ओमन ईसू ला भंटा रंग कर ओढ़ना ला पहिराईन अऊ कंटा कर मुकुट बनाए के ओकर मूड़ी में पहिराईन,

¹⁸ अऊ ओमन ईसू कर मझाक उड़ाए के ओके जोहारे लागीन, “ए यहूदी मन कर राजा, पालंगी।”

¹⁹ ओमन ओकर मूड़ ला बड़खा लाठी में मारत रहीन अऊ ओकर ऊपरे थूंके लागीन अऊ ठेहुनाए के ओके जोहारे लागीन।

²⁰ जब ओमन ओकर मजाक कएर दारीन, तेकर ओकर उपरे ले भनटा रंग कर ओढ़ना ला उताएर के, ओकरेच ओढ़ना ला पहिराईन, अऊ ओके ला कुरूस में चघाए बर बाहरी कती ले गईन।

ईसू ला कुरूस में चघाथें

²¹ कुरेन गांव कर समोन जेहर सिकंदर अऊ रूफूस कर दाऊ रहीस, ओहर गांव कती ले आवत रहीस, त ओमन ओके धएर के, ईसू कर कुरूस ला डोहे बर कहीन।

²² ओमन ईसू के गूलगूता नांव कर जघा में ले गईन, जेकर मतलब हवे, “खोपड़ी” कर जघा।

²³ उहां ईसू के मूर दावा मेराल अंगूर कर रस देहे लागीन, बकिन ओहर ओला नई पीस।

²⁴ तब ओमन ईसू ला कुरूस उपरे चघाईन अऊ ओकर ओढ़ना बर चिट्ठी बांटीन कि काके ला का मिलही अऊ ओमन ओकर ओढ़ना ला बांएट लेहीन।

²⁵ ओमन ईसू ला कुरूस में चघाईन, ओ घनी दिन कर करीबन नवो बजे रहीस।

²⁶ अऊ ओकर बिरोध में एकस चिट्ठी लिख के ओकर उपरे टंगवाए देहीस, “यहूदी मन कर राजा।”

²⁷ ओमन ईसू कर संगे दुई झन डांकू मन ला कुरूस में चघाईन, एक झन ला ओकर जवनी कती अऊ दूसर ला ओकर डेरी कती।

²⁸ (तब पबितर किताब कर ओ बचन “ओहर पापी मन कर संगे गनाही” ओहर पूरा होईस।)

²⁹ अऊ डगर रेंगोईया मन, अपन मूड़ी ला हिलाए-हिलाए के ओकर निंदा करत कहत रहीन, “ए मंदिर कर गिरोईया अऊ तीन दिन में बनोईया!

³⁰ कुरूस ले उतेर के अपन आप ला बचाए ले।”

³¹ ओईसनेच मुख याजक मन अऊ कानहूंन कर सिखोईयो मन, ओकर मजाक उड़ाए के एक दूसर ले कहीन, “एहर आने झेमन ला बचाईस, बकिन अपन आप ला बचाए नई सकत हवे।

³² ए इसराएल कर राजा, मसीह, अब कुरूस ले उतेर आ कि हमरे देख के बिस्वास करी।” अऊ जेमन ला ओकर संगे कुरूस ऊपरे चघाल गए रहीन, ओहूच मन ओकर निंदा करत रहीन।

ईसू कर मिरतु

³³ मझेनी कर घरी में सबेच देस में अंधार छाए गईस अऊ अंधार करीबन तीसर जुआर तक रहीस।

³⁴ तीसर जुआर ईसू हर रोसे चिकेर के कहीस, “इलोई, इलोई, लमा सबकतनी?” जेकर मतलब हवे, “ए मोर परमेस्वर, ए मोर परमेस्वर, तंए मोके काबर छोंएड़ देहे हस?”

³⁵ जेमन ओजग ठड़होए रहीन, ओमन में ले तनिक झेमन ओला सुईन के कहीन, “सुना, ओहर एलियाह ला चिकरत हवे।”

³⁶ अऊ एक झन हर कुदत रुवा ला अमट मेरावल अंगूर कर रस में बोएथ के अऊ लाठी में लपेट के ओके ला पीए बर देहीस अऊ ओहर दूसर झेमन ला कहीस, “रुईक जा, हमरे देखबो कि एलियाह हर एके ला बचाए बर आथे कि नहीं।”

³⁷ तेकर ईसू हर रोसे किरलाए के अपन परान ला छोंईड़ देहीस।

³⁸ त परमेस्वर कर मंदिर कर परदा हर ऊपर ले खालहे तक चीराए के दुई टुटका होए गईस।

³⁹ अऊ जे सुबेदार हर ओजग ठड़होए रहीस, जब ओहर ईसू ला किरलाए के परान छोंड़त देखीस, त कहीस, “फूरोंच में ए मईनसे हर परमेस्वर कर बेटा रहीस।”

⁴⁰ तनिक सवांगीनो मन दुरीहां ले देखत रहीन, ओमन में मगदलीनी कर रहोईया मरियम, छोटे याकूब अऊ योसेस कर दाई मरियम अऊ सलोमी मन रहीन।

⁴¹ जब ईसू हर गलील जिला में रहत रहीस, त ए सवांगीन मन ओकर पाछू होए लेहे रहीन अऊ ओकर सेवा-जतन करत रहीन। अऊ ढेरेच सवांगीनो मन, जेमन ओकर संगे यरूसलेम ले आए रहीन, ओहू मन ओ जग रहीन।

ईसू ला मठ में राखथें

⁴² ओ दिन हर तियारी कर दिन रहीस, जेहर बिसोए कर दिन ले पाछू होथे, एकरले जब सांझ होए गईस,

⁴³ त अरमतियाह कर रहोईया यूसुफ हर आईस, जेहर बड़खा सभा कर सदस रहीस अऊ परमेस्वर कर राएज कर डगर देखत रहीस। ओहर हिमेत कएर के पीलातूस जग गईस अऊ ईसू कर लास ला मांगीस।

⁴⁴ पीलातूस हर एला सुईन के अचमहों होईस कि ईसू हर एतना हालू कईसे मएर गईस, एकरले पीलातूस हर सिपाही ला बलाए के पूछीस, “का एके मरे ले केतना जुआर होवथे?”

⁴⁵ जब ओहर सिपाही कर जरिये, ईसू कर मरे कर खभेर ला जाएन लेहीस, त लास ला यूसुफ ला देहे देहीस।

⁴⁶ तब यूसुफ हर एगोट मखमल कर चदर ला बेसाए के लानीस अऊ ईसू कर लास ला उताएर के ओही चदर में लपेटीस अऊ एगोट चटाएन कर कोड़ल मठ में राखीस अऊ मठ कर दुरा में एगोट पखना ला ढांएप देहीन।

⁴⁷ मगदलीनी कर रहोईया मरियम अऊ योसेस कर दाई मरियम देखत रहीन कि ईसू कर लास ला कहां राखीन हवें।