मरकुस 14 - Surgujia Bible

ईसू के मारे बर घात लगाथें

¹ दुई दिन कर पाछू, फसह अऊ बिगर खमीर कर रोटी कर तिहार होवईया रहीस, ओही घनी मुख याजक अऊ कानहूंन कर सिखोईया मन, ए मोका कर खोज में रहीन कि ईसू ला कईसे छल कएर के धरुवाए के माएर दारी।

² ओमन कहत रहीन, “एला तिहार कर दिन नई करी, कहों अईसना झईन होए कि मईनसे मन में भगदेर मएच जाए।”

³ त ईसू हर बैतनिय्याह गांव में समोन, जेला कुड़गा रोग रहीस ओकर घरे खाए बर बईठे रहीस, ओही जुआर एगोट सवांगीन हर संगमरमर कर चुकिया में जटामांसी कर ढेरेच महंगा आंतर तेल लेके आईस, ओहर चुकिया ला फोएर के आंतर तेल ला ईसू कर मूड़ ऊपरे रीकोए देहीस।

⁴ बकिन ओजग कर कोनो-कोनो मन रिसाए के एक दूसर ले कहे लागीन, “ए आंतर तेल ला बरबाद काबर करा?

⁵ काबरकि ए आंतर तेल ला साल भेर जेतना मजदूरी में कमाथें, ओतना पईसा में बेंच के गरीब मन ला, बांटल जाए सकत रहीस।” तेकर ओमन ओ सवांगीन ला ढेरेच दबकाए लागीन।

⁶ ईसू हर ओमन जग कहीस “ओके छोंएड़ देआ, ओके काबर परेसान करथा? ओहर तो मोर जग भलाई करीस हवे?

⁷ गरीब मन तुमन कर संगे हमेसा रहीं अऊ तुमन जब चाईहा, तब ओमन कर भलाई कएर सकथा, बकिन मंए तुमन कर संगे हमेसा नई रहूं।

⁸ जे कुछ ओहर कएर सकीस, ओहर करीस। ओहर मोर गाड़ल जाए कर तियारी में आगू ले मोर देंह में आंतर तेल ला लगाईस हवे।

⁹ मंए तुमन ला फूरोंच कहथों, सब दुनिया में कहों जग मोर सुघर खभेर कर परचार करल जाही, उहां ओकर ए काम कर चरचा भी ओकर सुरता में करल जाही।”

¹⁰ तेकर बारहों चेला में ले एक झन यहूदा इसकरोती हर ईसू के धरुवाए बर, मुख याजक मन जग गईस।

¹¹ ओमन एला सुईन के ढेरेच खुस होईन अऊ ओके रूपिया देहे बर राजू होए गईन, तेकर यहूदा ईसू ला धरूवाए बर मोका खोजे लागीस।

फसह तिहार में चेला मन कर संगे ईसू कर बियारी

¹² बिगर खमीर कर रोटी कर तिहार कर सुरू दिन, फसह तिहार कर भेंड़ी छउआ ला बलिदान करत रहीन। ईसू कर चेला मन ओकर जग पूछीन, “तंए कहां चाहथस कि हमरे जाए के फसह कर भोज खाए कर तियारी करी?”

¹³ ओहर अपन चेला मन ले दुई झन ला ए कहिके भेजीस “सहर में जावा अऊ तुमन एगोट गघरी में पानी डोहल मईनसे ला भेंठिहा, ओकर पाछू होए लेईहा।

¹⁴ अऊ ओहर जे घर में जाही, ओही घर कर मालीक जग कईहा, ‘गुरूजी कहीसे, मोर पहुना मन बर बईंगरा कहां हवे, जेमे मंए अपन चेला मन कर संगे, फसह कर भोज ला खाहूं?’

¹⁵ ओहर तुमन ला एगोट सजल-सजाल अऊ तियार करल बड़खा बईंगरा ला ऊपर छत में देखाही, उहां हमर बर तुमन भोज तियार करीहा।”

¹⁶ चेला मन निकेल के सहर में आईन अऊ जईसने ईसू हर ओमन जग कहे रहीस, ओइसने पाईन अऊ ओमन फसह कर भोज तियार करीन।

¹⁷ सांझ होईस, त ईसू हर बारहों चेला मन कर संगे आईस।

¹⁸ जब ओमन बईठ के खात रहीन, त ईसू हर कहीस, “मंए तुमन जग फूरोंच कहथों, कि तुमन में ले एक झन हर, जे मोर संगे खात हवे, मोके ला धरूवाही।”

¹⁹ चेला मन उदास होए के एक-एक झे ईसू जग पूछे लागीन, “का ओ मंए लागों?”

²⁰ ईसू हर कहीस, “तुमन बारहों झन में ले एक झन हवे, जेहर मोर संगे छिपा में हाथ डालत हवे।

²¹ जेकस मईनसे कर बेटा कर बारे में परमेस्वर कर किताब में लिखल हवे, ओही कस ओहर मरबे करही, बकिन हाय ओ मईनसे कर ऊपर, जेकर चलते ओहर पकड़वाल जाही! अगर ओ मईनसे कर जनम नई होए रतीस, त ओकर बर बढ़िहां होतीस।”

परभू भोज

²² जब ओमन खात रहीन, तब ओहर रोटी ला लेहीस अऊ आसीस माएंग के टोरीस अऊ चेला मन ला देहीस अऊ कहीस, “लेआ, एहर मोर देंह लागे।”

²³ फेर ओहर कटोरा ला लेके धनबाद करीस अऊ चेला मन ला देहीस अऊ चेला मन ओमे ले पीन।

²⁴ अऊ ओहर चेला मन जग कहीस, “एहर मोर लहू लागे, जेहर परमेस्वर अऊ ओकर मईनसे कर मझार कर करार ला पका करथे। एहर ढेरेच झन बर रिकोवल जाथे।

²⁵ मंए तुमन जग फूरोंच कहथों, अंगूर कर रस ला ओ दिन तक नई पीहूं, जब तक परमेस्वर कर राएज में नांवा रस ला नई पीहूं।”

²⁶ तेकर ओमन भजन गाए के बाहरी कती जैतून पहार ऊपरे गईन।

ईसू बताथे कि पतरस हर इनकार करही

²⁷ तेकर ईसू हर ओमन जग कहीस, “तुमन सब कोनो मोके छोंएड़ के भाएग जईहा, काबरकि लिखल हवे कि मंए चरवाह ला मारहूं अऊ भेंड़ी मन इते-ऊते होए जाहीं।

²⁸ बकिन मंए जी उठे कर पाछू, तुमन ले आगू गलील जिला में जाहूं।”

²⁹ पतरस हर ओकर जग कहीस, “सब कोनो तोके छोंएड़ के भागहीं त भागहीं, बकिन मंए तोके छोंएड़ के नई भागहूं।”

³⁰ ईसू हर ओकर जग कहीस, “मंए तोर जग फूरोंच कहथों कि आएज कर रातीच मुरगा कर दुई दाएर बासे कर आगू, तंए मोर तीन दाएर इनकार करबे।”

³¹ तेकर पतरस हर अऊ जोर देके कहीस, “अगर मोके तोर संगे मरे बर परही, तबो ले मंए तोर इनकार कभों नई करहूं।” एहीच कस सबेच झेमन कहीन।

ईसू गतसमनी बगीचा में पराथना करथे

³² फेर ओमन गतसमनी नांव कर बगीचा में गईन अऊ ईसू हर अपन चेला मन जग कहीस, “एजग बईठे रईहा जब ले मंए पराथना करत हवों।”

³³ त ओहर पतरस, याकूब अऊ यूहन्ना ला अपन संगे ले गईस अऊ ढेरेच अकबकाए गईस अऊ उदास होए लागीस,

³⁴ त ईसू हर ओमन जग कहीस, “मोर मन हर ढेरेच उदास हवे, इहां तक कि मंए मरे बर हवों, तुमन इहां रुका अऊ जागत रईहा।”

³⁵ तेकर ओहर तनिक आगू जाए के, भुईंया में गिर के पराथना करे लागीस कि अगर होए सके, त ए दुख कर घरी ला मोर ऊपर ले हटाए दे।

³⁶ अऊ कहीस, “ए अब्बा, ए मोर दाऊ, तोर ले तो सब कुछ होए सकथे, ए दुख कर कटोरा ला मोर जग ले हटाए दे, तबो ले मंए जईसना चाहथों ओईसना झईन होए, बकिन जईसना तंए चाहथस वईसना होए।”

³⁷ फेर ईसू हर अपन चेला मन जग आईस, त ओमन ला सूतत पाईस अऊ पतरस जग कहीस, “ए समोन, तंए सूतत हस? का तंए एको घरी जागे बर नई सके?

³⁸ जागत रहा अऊ पराथना करते रहा कि तुमन परीछा में झईन परा। आत्मा तो तियार हवे, बकिन देंह हर कमजोर हवे।”

³⁹ ओहर चएल गईस अऊ आगू जेकस पराथना करे रहीस, ओही गोएठ ला कहिके फेर पराथना करीस।

⁴⁰ जब ईसू हर आईस, त चेला मन ला सूतत पाईस, काबरकि ओमन कर आंएख हर नींद में माते रहीस। ओमन नई जानत रहीन कि ओके ला का जबाब देई।

⁴¹ ओहर तीसरा दाएर आए के ओमन जग कहीस, “अब तुमन सूतत रहा अऊ बीसोवत रहा, बस! ओ घरी हर आए पहुंचीस हवे; सुना, मईनसे कर बेटा पापी मन कर हाथ में धरूवाल जाही।

⁴² उठा! चला चली। देखा, मोर धरोईया मन लिघे आए पहुंचीन हवें।”

ईसू ला धरुवाईन

⁴³ ओहर एला कहतेच रहीस, त ओहीच घनी बारहों चेला में ले एक झे यहूदा इसकरोती हर आईस, ओकर संगे मुख याजक मन, कानहूंन कर सिखोईया मन अऊ अगुवा मन कर भेजल एगोट बड़खा भीड़ हर तलवाएर अऊ लाठी धएर के आईन।

⁴⁴ ईसू कर धरुवईया हर ओमन ला ए बताए रहीस, कि जेके मंए चुमहूं, ओहीच हर रही। ओला धएर के सवाचेती ले, ले जईहा।

⁴⁵ जब यहूदा आईस, त तुरतेंच ईसू जग जाए के कहीस, “ए गुरूजी” अऊ ओके चुमहीस।

⁴⁶ तेकर ओमन ईसू ला धएर के ले गईन।

⁴⁷ तेकर ईसू कर चेला मन ले एक झन हर, अपन तलवाएर ला निकालीस अऊ महायाजक कर सेवक कर कान ला काएट देहीस।

⁴⁸ ईसू हर ओमन जग कहीस, “का तुमन मोके डांकू जाएन के पकड़े बर तलवाएर अऊ लाठी लेके निकले हवा?

⁴⁹ मंए तो तुमन संगे रहिके सगर दिन मंदिर में उपदेस देहत रहें अऊ तुमन मोके नई पकड़ा, बकिन एहर एकर बर होईस कि परमेस्वर कर किताब कर बचन हर पूरा होए।”

⁵⁰ तेकर सबेच चेला मन ओके छोंएड़ के भाएग गईन।

⁵¹ एगोट जवान हर उघरा देंह में मलमल कर चदर ला ओएढ़ के ओकर पाछू होए लेहीस, जब मईनसे मन ओके ला धरीन,

⁵² त ओहर चदर ला छोंएड़ के उघरा भाएग गईस।

दोस लगोईया मन कर आगू में ईसू ला लानीन

⁵³ ओमन ईसू ला महायाजक जग ले गईन, त सब मुख याजक मन, अगुवा मन अऊ यहूदी कानहूंन कर सिखोईया मन ओजग जुईट गईन।

⁵⁴ तब पतरस हर दुरीहां ले ओकर पाछू-पाछू महायाजक कर अंगन कर भीतरी ले गईस, त पहरादार मन कर संगे बईठ के आगी तापे लागीस।

⁵⁵ मुख याजक मन अऊ सब भीड़ कर मईनसे मन ईसू के माएर दारे बर ओकर बिरोध में गवाह खोजे लागीन, बकिन नई पाईन।

⁵⁶ ढेरेच झेमन ओकर बिरोध में झूठा गवाही देहत रहीन, बकिन ओमन कर गवाही हर मेल नई खाईस।

⁵⁷ तब तनिक झेमन ठड़होए के ओकर बिरोध में ए झूठा गवाही देहीन।

⁵⁸ “हमन एके एकस कहत सुने हन, ‘मंए ए हाथ कर बनावल मंदिर ला गिराए देहूं अऊ तीन दिन में दूसर बनाए देहूं, जेहर हाथ कर बनावल नई रही।’”

⁵⁹ तबो ले ओमन कर गवाही हर मेल नई खाईस।

⁶⁰ तेकर महायाजक हर मझार में ठड़होए के ईसू जग पूछीस, “का तंए कोनो जबाब नई देअस? देख, ए मईनसे मन तोर बिरोध में का गवाही देहत हवें?”

⁶¹ बकिन ईसू हर कले-कस रहीस अऊ कांही जबाब नई देहीस। महायाजक हर ओके फेर पूछीस, “का तंए धन्य परमेस्वर कर बेटा मसीह लागस?”

⁶² ईसू हर कहीस, “मंए लागों। अऊ तुमन मईनसे कर बेटा ला सबले सक्तिसाली कर जवनी कती बईठल अऊ अगास कर बदरी में आवत देखीहा।”

⁶³ तब महायाजक हर अपन ओढ़ना ला चीर के कहीस, “अब हमन ला अऊ गवाह मन कर जरूरत नईए।

⁶⁴ तुमन परमेस्वर कर निंदा जेला एहर करत हवे ओला सुने हवा। तुमन कर का बिचार हवे?” ओमन सबेच झे ओके दोस लगाए के कहीन कि एहर माएर दारे कर लाएक हवे।

⁶⁵ तब कोनो मन तो ओकर उपरे थूंके लागीन अऊ कोनो हर ओकर मूंह ला थोपे लागीन अऊ ओके मुटका मारीन अऊ कहे लागीन, “अगमबानी कर, तोके कोन मारीस?” अऊ पहरादार मन ओके धएर के झापड़ मारीन।

पतरस हर ईसू कर इनकार करथे

⁶⁶ जब पतरस हर खालहे अंगन में रहीस, त महायाजक कर दासी मन ले एक झे हर ओजग आईस,

⁶⁷ अऊ पतरस ला आगी तापत देख के, ओके एक ढींट देखीस अऊ कहीस, “तंहूच तो ओ ईसू नासरी कर संगे रहे।”

⁶⁸ बकिन पतरस हर इनकार करके कहीस, “मंए नई जानों अऊ नई समझों कि तंए का कहत हस।” ए कहिके बाहरी दुरा में निकेल गईस अऊ मुरगा हर बासीस।

⁶⁹ ओ दासी हर पतरस ला देख के जेमन ओकर लिघे ठड़होए रहीन, ओमन जग फेर कहे लागीस, “एहर तो ओमन में ले एक झन लागे।”

⁷⁰ बकिन ओहर फेर इनकार करीस, तनिक जुआर ले जेमन ओजग ठड़होए रहीन, तेमन फेर पतरस जग कहे लागीन, “जरूर तंए ओमन में ले एक झन लागस, काबरकि तहुंच गलील कर लागस।”

⁷¹ तेकर पतरस हर अपन आप ला सराप देहे लागीस अऊ झूठा किरिया खाए के कहे लागीस, “मंए ओ मईनसे ला नई जानों, जेकर बारे में तुमन गोठियावत हवा।”

⁷² तेकर तुरतेंच मुरगा हर दूसर दाएर बासीस अऊ पतरस के हालुच ईसू कर कहल गोएठ हर सुरता आईस, “मूरगा कर दुई दार बासे ले आगू, तंए तीन दाएर मोर इनकार करबे।” अऊ पतरस हर ए बात ला सोंएच के दुखी होईस अऊ सिसेक-सिसेक के रोए लागीस।