मरकुस 12 - Surgujia Bible

कसरिहा किसान मन कर अहना

¹ फेर ईसू हर अहना में ओमन जग गोठियाए लागीस, “कोनो मईनसे हर एगोट अंगूर कर बारी लगाईस अऊ ओकर चाएरो कती घोरना घोरीस अऊ अंगूर कर रस ला निकाले बर एगोट ढोड़गा कोड़ीस अऊ एगोट माचा बनाईस, तेकर किसान मन ला अधियां देके ओहर परदेस चएल देहीस।

² जब पाके कर घरी आईस, ओहर अंगूर कर बांटा ला लेहे बर एगोट सेवक ला भेजीस।

³ बकिन ओ अधियांदार मन सेवक ला धईर के मारीन अऊ जुछा हाथ फिराए देहीन।

⁴ तेकर ओ मालीक हर अऊ दूसर सेवक ला ओमन जग भेजीस, बकिन ओमन ओके देख के ओकर मूड़ी ला मारीन, अऊ ओकर ढेरेच निंदा करीन।

⁵ फेर ओहर दूसर झेला अऊ भेजीस, त ओमन ओके माएर देहीन, तेकर ओहर ढेरेच झन ला भेजते रहीस अऊ ओमन कोनो ला मारीन अऊ कोनो ला मरुवाए दारीन।

⁶ अब ओकर जग भेजे बर एकेच झन बांचे रहीस, जेहर ओकर दुलरुवा बेटा रहीस, आखरी में ओहर ओहू ला ओमन जग ए सोंएच के भेजीस कि ओमन मोर बेटा कर माएन करहीं।

⁷ बकिन ओमन एक दूसर ला कहीन, ‘एही हर तो पाछू ए बारी कर हकदार होही, आवा, एके ला हमरे मरुवाए दारी, तेकर ए सब हक हर हमर होए जाही।’

⁸ अऊ ओमन ओला धएर के माएर मरुवाईन अऊ अंगूर कर बारी कर बाहरी फेंक देहीन।”

⁹ “तेकर ले जब अंगूर कर बारी कर मालीक हर आही त का करही? ओहर आए के अधियांदार मन ला मरुवाए देही अऊ अंगूर कर बारी ला दूसर झन ला दे देही।

¹⁰ का तुमन परमेस्वर कर किताब में ए बचन ला नई पढ़े हवा, ‘जे पखना ला राएज मीसतिरी मन बेकार समेझ लेहीन, ओही हर कोनहा कर मुख पखना बएन गईस।

¹¹ एहर परभू कती ले होईस अऊ हमर नजेर में अदभूद हवे’!”

¹² तेकर मुख याजक अऊ कानहूंन कर सिखोईया मन ओके ला बंदी बनाए बर चाहीन, काबरकि ओमन जानत रहीन, कि ओहर हमर बिरोध में ए अहना ला कहीस हे, बकिन ओमन भीड़ कर मईनसे मन ला डराईन, अऊ ओमन ओके छोंएड़ के चएल देहीन।

लगान देहे बर ठीक हवे कि नही

¹³ तेकर ओमन ईसू ला गोएठ में फंसाए बर ओकर जग फरीसी अऊ हेरोदी मन ला भेजीन।

¹⁴ ओमन आए के ओकर जग कहे लागीन, “ए गुरूजी, हमरे जानथी कि तंए सही हवस अऊ मईनसे मन का सोंचहीं एकर चिंता नई करस, काबरकि तंए मईनसे कर मूंह ला देख के नई गोठियास, बकिन परमेस्वर कर डगर ला सही-सही बताथस। त महाराजा केसर ला लगान देहे बर, कानहूंन कर अनुसार ठीक हवे कि नहीं?

¹⁵ हमरे देई कि नहीं?” बकिन ईसू हर ओमन कर कपट ला जाएन के ओमन जग कहीस, “तुमन मोके काबर फंसाए बर करत हवा? मोके एक ठे रोम देस कर सीका ला देआ मंए ओला देखहूं।”

¹⁶ ओमन देहीन अऊ ओहर ओमन ला पूछीस, “एमे काकर चेहरा कर छाप अऊ नांव हवे?” ओमन कहीन, “महाराजा कैसर कर।”

¹⁷ ईसू हर ओमन जग कहीस, “जेहर महाराजा कैसर कर हवे, ओला केसर के देआ अऊ जेहर परमेस्वर कर हवे, ओला परमेस्वर के देआ।” तब ओमन ओकर बात कर उपरे ढेरेच अचमहों करे लागीन।

अवईया जिनगी कर बात

¹⁸ फेर सदूकी दल कर लोग मन कथें कि जेमन मएर गईन हवें, ओमन फेर जी के नई उठें, ओमन में ले थोरोक झेमन आए के ईसू जग पूछीन,

¹⁹ “ए गुरूजी, मूसा हर हमर बर लिखीस हवे, अगर ककरो भाई बिगर लईका करे मएर जाए अऊ ओकर परानी रईह जाए, त ओकर भाई ओकर परानी संगे बिहाओ कएर ले अऊ अपन भाई बर लईका जनमाए।

²⁰ माएन लेआ कि सात भाई रहीन अऊ बड़खा भाई हर बिहाओ कएर के, बिगर लईका करे मएर गईस।

²¹ तब दूसर भाई हर अपन भाई कर परानी ला बिहाओ कएर लेहीस अऊ ओहू हर बिगर लईका करे मएर गईस अऊ तीसरोच भाई कर वईसनेच होईस।

²² त एही कस सातो भाई मन बिगर लईका करे मएर गईन, तेकर पाछू ओ सवांगीनोच हर मएर गईस।

²³ अब बतावा, जब मरल मईनसे मन जी उठहीं, त ओ सवांगीन हर काकर परानी होही, काबरकि ओहर तो सातो झन कर परानी होए गए रहीस।”

²⁴ ईसू हर ओमन जग कहीस, “तुमन कर पबितर किताब हर का सिखाथे ओला नई जानथा अऊ परमेस्वर कर सामर्थ ला भी नई जानथा? एकरले भटेक गए हवा।

²⁵ बकिन जेमन मरल में ले जी उठहीं, ओ सवांग अऊ सवांगीन मन कर सादी बिहाओ नई होही, बकिन ओमन सरग में सरगदूत मन कस होहीं।

²⁶ मरल कर पाछू जी उठे कर बारे में तुमन का नई जानथा, मूसा कर किताब में झाड़ी कर किसा ला नई पढ़े हवा कि परमेस्वर हर ओकर जग कहीस, मंए अबराहम कर परमेस्वर अऊ इसहाक कर परमेस्वर अऊ याकूब कर परमेस्वर लागों?

²⁷ परमेस्वर मरल मन कर नहीं, बकिन जीयत मन कर परमेस्वर लागे, तुमन ढेरेच भटेक गए हवा।”

सबले बड़खा अगियां

²⁸ ओमन बहस करत रहीन ते घरी एगोट कानहूंन कर सिखोईया हर ओजग आईस। ओहर ए जाएन के कि ईसू हर ओमन ला सुघर जबाब देहीस, तेकर ले ओकर जग पूछीस, “सबले बड़खा अगियां कोन हर लागे?”

²⁹ ईसू हर ओके जबाब देहीस, “सबले बड़खा अगियां एहर लागे, ए इसराएली मन सुना, परभू हमर परमेस्वर हर एकेच झन परभू लागे।

³⁰ अऊ तुमन परभू परमेस्वर ला अपन पूरा मन अऊ अपन पूरा परान ले अऊ अपन पूरा बुधी अऊ अपन पूरा सक्ति कर संगे मया करीहा।

³¹ अऊ दूसर सबले बड़खा अगियां ए लागे, ‘तुमन अपन परोसी ला अपने कस मया करीहा।’ एकरले बड़खा अऊ कोनो अगियां नईए।”

³² त ओहर ईसू जग कहीस, “ए गुरूजी, ढेरेच सुघर बात हवे, तंए सहीच कहे। परमेस्वर एकेच ठन हवे अऊ ओके छोंएड़ कोई दूसर परमेस्वर नईए।

³³ अऊ ओके अपन पूरा मन अऊ अपन पूरा परान अऊ अपन पूरा बुधी अऊ अपन पूरा सक्ति कर संगे मया करबे अऊ अपन परोसी ला अपनेच जईसना मया करबे, एहर सब होमबली अऊ बलिदान ले बएढ़ के हवे।”

³⁴ ईसू हर देखीस कि ओहर समेझ बूझ के जबाब देहीस, तेकर ले ओके कहीस, “तंए परमेस्वर कर राएज ले दुरीहां नई हस।” अऊ फेर कोनो ला ईसू जग कांही पूछे कर हिमेत नई होईस।

मसीह दाऊद कर संतान लागे

³⁵ फेर ईसू हर परमेस्वर कर मंदिर कर अंगन में उपदेस देहत रहीस, त पूछीस, “कानहूंन कर सिखोईया मन कईसे में कथें कि मसीह हर दाऊद राजा कर संतान लागे?

³⁶ दाऊद राजा हर खुद पबितर आत्मा में होए के कहीसे, परभू हर मोर परभू जग कहीस, जब तक मंए तोर बईरी मन ला तोर गोड़ कर तरी नई कएर देहूं तब तक मोर जवनी कती में बईठ।”

³⁷ “दाऊद राजा हर तो खुद ओला परभू कथे, त फेर ओकर बेटा कहां ले होही?” त भीड़ कर मईनसे मन ओकर गोएठ ला ढेरेच खुसी ले सुनत रहीन।

³⁸ ईसू हर ओमन ला सिखाए के कहीस, “कानहूंन कर सिखोईया मन ले सवाचेती रईहा, ओमन लमा-लमा ओढ़ना पहिर के इते-ऊते बूले बर चाहथें, अऊ बजार में मरजाद कर संगे जोहार चाहथें,

³⁹ अऊ ओमन धरम सभा में मुख आसन में बईठे बर अऊ खाए कर जुआर ओमन माएन-मरजाद कर जघा में बईठे बर चाहथें।

⁴⁰ ओमन अदावेंन मन कर धन दौलत ला लुईट लेथें अऊ दूसर के देखाए बर ढेरेच जुआर ले पराथना करथें, एमन ढेरे भारी दंड ला पाहीं।”

गरीब अदावेंन कर दान

⁴¹ ईसू हर परमेस्वर कर मंदिर कर दान पेटी कर आगू में बईठ के देखत रहीस कि मईनसे मन पईसा कईसे चघाथें अऊ धनी मन ढेरेच धन चघाईन।

⁴² त एगोट गरीब अदावेंन हर आए के, दुई गोट तांमा कर सीका ला चघाईस।

⁴³ तेकर ओहर अपन चेला मन ला अपन जग बलाए के कहीस, “मंए तुमन जग फूरोंच कहथों कि ए गरीब अदावेंन हर दान पेटी में सब झन ले बगरा भेंट चघाईस हवे;

⁴⁴ काबरकि ओमन अपन बगरा धन में ले भेंट देहीन हवें, बकिन ए सवांगीन हर ढेरेच गरीब हवे, तबो ले जिनगी जीए बर जे जाएत ओकर जग रहीस, ओ सब जाएत ला दे देहीस।”