मत्ती 8 - Surgujia Bible

ईसू हर कोढ़ी मईनसे ला सुध करथे

¹ जे घनी ईसू हर पहार ले उतरीस, त एगोट बड़खा भीड़ हर ओकर पाछू होए गईस।

² तब एक झे कुड़गा रोगीया हर ओकर ठन आईस अऊ ईसू कर गोड़े गिर के कहीस, “ए परभू, अगर तंए चाहबे, त मोके सुध कएर सकत हस।”

³ ईसू हर अपन हाथ ला ओकर कती लमाईस अऊ छुई के कहीस, “मंए चाहथों, तंए सुध होए जा।” अऊ तुरतेंच ओ मईनसे हर कुड़गा बेमारी ले सुध होए गईस।

⁴ तेकर ईसू हर ओके कहीस, “सुन, तंए सुध होए हस, एला ककरो जग झईन कहबे। बकिन जा अऊ अपन आप ला याजक ला देखा, अऊ मूसा कर कानहूंन कर अनुसार भेंट चघा, तेमेकि मईनसे मन जाने कि, तंए कुड़गा बेमारी ले ठीक होए गए हस।”

रोमी सेना कर अधिकारी कर बिस्वास

⁵ जे घनी ईसू हर कफरनहूम सहर में आईस, त एक झे रोमी सेना कर अधिकारी हर ओकर ठन आईस अऊ ओकर ठन बिनती कएर के कहीस,

⁶ “ए परभू, मोर सेवक ला लकवा माएर देहीसे अऊ ओहर घर में पड़ीसे अऊ अड़बड़ दुख भोगत हवे।”

⁷ त ईसू हर ओके कहीस, “मंए जाहूं अऊ ओके चंगा करहूं।”

⁸ तब ओ रोमी सेना कर अधिकारी हर जबाब देहीस, “ए परभू, मंए एकर लाएक नई हों कि तंए मोर घरे आ, बकिन सिरीप एक आखर कईह दे, त मोर सेवक हर चंगा होए जाही।

⁹ काबरकि मंहू सासन कर अधीन में हों अऊ सिपाहीयो मन मोर अधीन में हवें। जब मंए एक झन ला कथों, ‘जा!’ त ओहर जाथे अऊ दूसर झन ला कथों, ‘आ!’ त ओहर आथे। जब मंए अपन सेवक ला कथों, ‘एला कर!’ तब ओहर करथे।”

¹⁰ एला सुईन के ईसू हर अचमहों होईस अऊ जेमन ओकर पाछू-पाछू आवत रहीन, ओमन ला ओहर कहीस, “मंए तुमन ला फूरोंच में कहथों कि ए गैर यहूदी में जे बिस्वास ला मंए देखें, अईसना बिस्वास इसराएल में कहोंच ला नई पाएं।

¹¹ मंए तुमन ला कहत हों कि ढेरेच झन मईनसे मन, पूरब अऊ पछिम खुंट ले आहीं अऊ अबराहम, इसहाक अऊ याकूब कर संगे सरग राएज कर भोज में सामिल होहीं।

¹² बकिन जेमन सरग राएज कर हकदार बने बर करहीं, ओमन ला बाहरी अंधार में डाएल देहल जाही, जिहां ओमन रोहीं अऊ अपन दांत चाबहीं।”

¹³ तेकर ईसू हर, ओ रोमी सेना कर अधिकारी ला कहीस, “जा, जईसना तंए बिस्वास करे हस, वईसनेच तोर बर होही।” अऊ ओकर सेवक हर ओहीच घरी चंगा होए गईस।

ईसू ढेरेच झेमन ला चंगा करथे

¹⁴ जब ईसू हर पतरस कर घर में आईस, त ओहर देखीस कि पतरस कर सास हर जर कर मारे खटीया में सुतीसे।

¹⁵ त ईसू हर ओकर हाथ ला छुईस अऊ ओकर जर हर उतेर गईस अऊ ओहर उईठ के ओकर सेवा-सतकार करे लागीस।

¹⁶ जब सांझ होईस, त दूस्ट आत्मा धरल ढेरेच मईनसे मन ला ईसू जग लानीन। ईसू हर सिरीप एगोट अगियां ले ओ दुस्टआत्मा मन ला निकाएल देहीस, अऊ सबेच बेमरीहा मन ला चंगा करीस।

¹⁷ एही कस यसायाह अगमजानी कर द्वारा कहल, ए बचन हर पूरा होईस कि ओहर हमर कमजोरी ला ले लेहीस अऊ हमर रोग मन ला दूर करीस।

ईसू कर चेला बने कर कीमत

¹⁸ जब ईसू हर अपन कती भीड़ ला आवत देखीस, त ओहर अपन चेला मन ला दह कर ओ पार जाए कर हुकुम देहीस।

¹⁹ तेकर मूसा कर कानहूंन कर, एगोट सिखोईया हर ईसू जग आए के कहीस, “ए गुरू, तंए जिहां कहों ला जाबे, मंहूच तोर पाछू-पाछू जाहूं।”

²⁰ त ईसू हर ओके ला कहीस, “सिटका कर रहे बर माड़ा, अऊ अगास कर चराई मन बर तो खोंता रथे, बकिन मंए, मईनसे कर बेटा मोर बर बिसोए कर जघोच हर नईए।”

²¹ एक झन अऊ चेला हर ओकर ठन कहीस, “ए परभू, मोके जाए दे, जब मोर दाऊ हर मरही तब ओके माटी काठी देके आहूं।”

²² ईसू हर ओके कहीस “तंए मोर पाछू होए ले, अऊ मरल मन ला अपन मुरदा गाड़े दे।”

ईसू हर गररा-घांटा ला सांत करथे

²³ तेकर जे घनी ईसू हर डोंगा में चएढ़ गईस, त ओकर चेलोच मन ओकर संगे गईन।

²⁴ अचाकन दह में बड़े भारी गररा-घांटा आईस अऊ डोंगा हर पानी कर लहरा ले भरे लागीस, बकिन ईसू हर सूतत रहीस।

²⁵ त चेला मन ईसू ठन गईन अऊ ओके ला उठाए के कहीन, “ए परभू हमके बचा, हमरे पानी में बुईड़ जाथी।”

²⁶ त ईसू हर ओमन ला कहीस “ए थोरहें बिस्वास करोईया मन, तुमन एतना काबर डरात हवा?” तेकर ओहर उठीस अऊ गररा-घांटा अऊ पानी कर लहरा ला घुड़काईस अऊ सबेच हर सांत होए गईस।

²⁷ एला देख के चेला मन अचमहों में पएर गईन अऊ कहीन, “एहर कोन किसीम कर मईनसे लागे कि गररा-घांटा अऊ पानी कर लहरोच मन ओकर हुकूम ला मानथें।”

ईसू हर दुस्टआत्मा धरल मईनसे ला चंगा करथे

²⁸ जब ईसू हर दह कर ओ पार गदरेनियों इलाका में आईस, त दुई झन मईनसे, जेमन में दुस्टआत्मा रहीन, मरघेटिया ले निकेल के ओकर कती आईन। ओमन एतना बदमास रहीन कि कोनो मईनसे हर ओ डगर में आए जाए नई सकत रहीन।

²⁹ ओमन किरलाए के कहीन, “ए परमेस्वर कर बेटा, तंए हमर काम में अड़ंगा झईन डाल, का तंए परमेस्वर कर ठहराल समय ले आगू, हमके ला इहां दंड देहे बर आए हस?”

³⁰ ओमन ले तनीक दुरीहां में बरहा मन कर एगोट बड़खा लेंहड़ हर चरत रहीस।

³¹ ओ दुस्टआत्मा मन ईसू ठन बिनती करके कहीन, “अगर तंए हमके ला निकालत हस, त हमके ला ओ बरहा मन कर लेंहड़ में भेज दे।”

³² ईसू हर ओमन ला कहीस, जावा, तेकर ओ दुस्ट आत्मा मन, ओ मईनसे मन ले निकेल के बरहा मन में समाए गईन अऊ बरहा मन कर सबेच लेंहड़ हर करखा ले कुईद के, बड़खा दह में जाए गिरीन अऊ पानी में बूईड़ मरीन।

³³ त बरहा चरोईया मईनसे मन, भाएग गईन अऊ सहर में जाए के ओ दुस्टआत्मा धरल मईनसे मन ठन जे जाएत होईस ओ सबेच बात ला बताईन।

³⁴ तेकर सहर कर सबेच मईनसे मन, ईसू जग भेंट करे बर आईन अऊ जब ओमन ओके देखीन, त ओकर ठन बिनती कएर के कहीन, “तंए हमर सिवाएन ले चले जा।”