मत्ती 5 - Surgujia Bible

पहार ऊपरे ईसू कर उपदेस

¹ जब ईसू हर ए भीड़ ला देखीस, त ओहर एगोट पहार ऊपरे चएघ के बईठ गईस, तेकर ओकर चेला मन ओकर जग आईन।

² अऊ ओहर अपन चेला मन ला, ए कहिके उपदेस देहे लागीस।

³ धन्य हवें ओमन, जेमन आत्मा में दीन हवें, काबरकि सरग कर राएज ओमने कर हवे।

⁴ धन्य हवें ओमन, जेमन सोक करथें, काबरकि ओमन ला सांती देहल जाही।

⁵ धन्य हवें ओमन, जेमन नरम सुभाव कर हवें, काबरकि ओमन धरती कर हकदार होहीं।

⁶ धन्य हवें ओमन, जेमन परमेस्वर कर ईछा बरीक भूखे अऊ पियासे हवें, काबरकि ओमन अघाए जाहीं।

⁷ धन्य हवें ओमन, जेमन दयालू हवें, काबरकि ओमन कर उपरे दया करल जाही।

⁸ धन्य हवें ओमन, जेमन कर हिरदय हर सुध हवे, काबरकि ओमन परमेस्वर ला देखहीं।

⁹ धन्य हवें ओमन, जेमन मेल-जोल कराथें, काबरकि ओमन परमेस्वर कर लईका कहाहीं।

¹⁰ धन्य हवें ओमन, जेमन परमेस्वर कर ईछा ला पूरा करे कर चलते सताल जाथें, काबरकि सरग कर राएज ओमन कर हवे।

¹¹ धन्य हवा तुमन, जब मईनसे मन मोर चलते तुमन कर बेजती करथें, तुमन ला सताथें अऊ झूठ-मूठ कर तुमन कर बिरोध में, सब मधे कर घिनक गोएठ मन ला गोठियाथें।

¹² ते घनी आनंद मनईहा अऊ खुस रईहा, काबरकि सरग में तुंहर बर बड़खा इनाम राखल हवे। एकरले कि ओमन तो, तुमन ले आगू कर अगमजानी मन ला एहीच कस सताए रहीन।

नोन अऊ इंजोर कर अहना ला ईसू सीखाथे

¹³ तुमन सबेच मईनसे मन बर, नोन कस हवा बकिन अगर नोन कर सवाद हर खतम होए जाही, त ओला फेर कईसे नोनछीर बनाल जाही? त फेर ओहर कोनो काम कर नई रईह जाए। ओला बाहरी फेंक देथें अऊ सिरीप मईनसे मन कर गोड़ तरी कुंचाए बर होए जाथे।

¹⁴ तुमन संसार कर इंजोर लागा, जे सहर हर पहार कर उपरे बसीस हवे, ओहर लुकाए नई सके।

¹⁵ अऊ मईनसे मन, ढेबरी ला बाएर के ओला टुकनी कर तरी नई ढांपे, बल्कि ओला अवंठा में मढ़ाथें, तेकर ओहर घर कर सब मईनसे मन ला इंजोर देथे।

¹⁶ ओही कस तुमन कर इंजोर हर मईनसे मन कर आगू में चमके, ताकि ओमन तुमन कर बढ़िहां काम ला देख के सरग में रहोईया, तुमन कर दाऊ कर माएन-मरजाद करें।

ईसू हर मूसा कर कानहूंन ला पूरा करथे

¹⁷ एकस झईन सोंचीहा कि मंए मूसा कर कानहूंन चाहे अगमजानी मन कर बात ला खतम करे बर आए हों, मंए ओमन ला खतम करे बर नहीं, बल्कि पूरा करे बर आए हों।

¹⁸ काबरकि मंए तुमन ला फूरोंच कहथों, कि अगास अऊ धरती कर खतम होए कर आगू, मूसा कर कानहूंन कर एगोट छोटे आकछर चाहे बिंदुवो हर जरूर पूरा होए जाही।

¹⁹ एकरे बर जे कोनो हर ए अगियां मन कर, छोटे ले छोटे एगोट बातोच ला नई माने अऊ आने झेमन ला भी अईसने करे बर सिखाथे, ओहर सरग कर राएज में सबले छोटे समझल जाही, बकिन जेहर ए अगियां मन ला मानथे अऊ आने झेमन ला सिखाथे ओहर सरग कर राएज में महान समझल जाही।

²⁰ काबरकि मंए तुमन ला कहथों, तुमन परमेस्वर ला फुरमा करे बर जे काम करथा, ओ काम हर फरीसी अऊ कानहूंन कर सिखोईया मन कर काम ले बएढ़ के नई होही, त तुमन सरग कर राएज में कभों नई जाए सकीहा।

छमा अऊ मेल-मिलाप करा

²¹ “तुमन सुईन दारे हवा कि पहिले जुग कर मईनसे मन जग कहल गए रहीस, कि हतिया झईन करीहा अऊ अगर कोनो हतिया करथे, त ओहर कचहरी में दंड कर भागी होही।

²² बकिन मंए तुमन ला कहथों कि अगर कोनो हर अपन भाई-बहिन कर ऊपरे गुसा करथे, त ओहर कचहरी में दंड कर भागी होही। जे कोनो हर अपन भाई-बहिन कर बेजती करथे, त ओके धरम सभा कर आगू में जबाब देहे बर परही। बकिन जे कोनो हर अपन भाई-बहिन ला कहथे ‘ए मुरुख’ त ओके ला नरक कर आगी में दंड पाए कर खतरा होही।”

²³ “एकरे बर अगर तंए बेदी में अपन भेंट ला चघावत हस अऊ ओजग तोके सुरता आथे कि तोर भाई-बहिन कर मन में, तोर बर कांही बिरोध हवे,

²⁴ त उहां बेदी कर आगू में, अपन भेंट ला छोंएड़ दे अऊ पहिले जाए के, अपन भाई-बहिन जग मेल-मिलाप कर ले, तेकर पाछू आए के अपन भेंट ला चघा।

²⁵ जब तंए अपन बिरोधी कर संगे कचहरी में जात हस, त डगर में ओकर जग ले मेल-मिलाप कर उपाय कएर ले। एकस झईन होए कि ओहर तोके नियाओ करोईया कर आगू में घींच के ले जाए, अऊ नियाओ करोईया हर तोके सिपाही ला दे दे, अऊ ओ सिपाही हर तोके ला जेहल में हुरेक दे।

²⁶ मंए तुमन ला फूरोंच कहथों, कि जब तक तुमन एक-एक पईसा भएर नई देईहा, तब तक उहां ले छुटे नई पईहा।”

छिनारी कर बिरोध में सिक्छा

²⁷ “तुमन सुईन दारे हवा कि, ए कहल गए रहीस, ‘छिनारी झईन करीहा।’

²⁸ बकिन मंए तुमन ला कहत हों कि, जे कोनो हर कोई सवांगीन ला खराब नजेर ले देखथे, त ओहर अपन मन में ओकर जग छिनारी कएर चुकीस।

²⁹ अगर तोर जवनी आंएख हर तोके पाप में परे कर कारन बनथे, त ओला निकाएल के फेंक दे। तोर बर एहर बढ़ियां होतीस, कि तोर अपन देंह कर एगोट अंग ला गंवाए दे, अऊ तोर समुचा देंह हर नरक में झईन डालल जाए।

³⁰ अऊ कहों तोर जवनी हाथ हर तोके पाप में परे कर कारन बनथे, त ओला काएट के फेंक दे। तोर बर एहर बढ़ियां होतीस, कि अपन देंह कर एक ठे अंग ला गंवाए दे, अऊ तोर समुचा देंह ला नरक में झईन डालल जाए।”

तलाक कर विरोध में सिक्छा

³¹ “एहू कस कहल गईसे कि जे कोनो हर अपन घरदारीन ला छोंएड़ देथे, त ओहर ओके तियाग पत्र जरूर दे।

³² बकिन मंए तुमन ला कहथों कि जे कोनो हर छिनारी कर छोंएड़ अऊ कोनो कारन ले अपन घरदारीन ला छोंएड़ देथे, त ओहर ओके ला छिनारी करुवाथे, अऊ जे कोनो हर कोई तियागल सवांगीन ठन बिहाओ करथे, त ओहर ओकर संगे छिनारी करथे।”

किरिया झईन खईहा

³³ “तुमन एकस सुने हवा कि हमर पूरखा मन जग कहल गए रहीस, कि तुमन झूठ-मूठ कर किरिया झईन खईहा, बकिन परभू कर आगू में करल जबान ला पूरा करीहा।

³⁴ बकिन मंए तुमन ला कहथों कि कभों किरिया झईन खईहा, सरग कर किरिया झईन खईहा, काबरकि ओहर परमेस्वर कर सिंहासन लागे।

³⁵ अऊ धरती कर किरिया झईन खईहा, काबरकि ओहर परमेस्वर कर गोड़ कर चऊंकी लागे, अऊ यरूसलेम कर किरिया झईन खईहा, काबरकि ओहर महाराजा कर सहर लागे।

³⁶ अपन मुड़ कर किरिया झईन खईहा, काबरकि तुमन एकोच ठन चुंदी ला उजर आखिर करिया नई कएर सका।

³⁷ तुमन कर गोएठ हर फरी-फरी होए बर चाही, हां कर हां अऊ नहीं कर नहीं, एकरले बगरा जे जाएत हर होथे, ओहर सैतान कती ले होथे।”

पलटा झईन लेआ

³⁸ तुमन सुने हवा कि ए कहल गए रहीस, आंएख कर पलटा में आंएख अऊ दांत कर पलटा में दांत,

³⁹ बकिन मंए तुमन ला कहथों कि तुमन कोनो खराब मईनसे कर बिरोध झईन करीहा। अगर कोनो तुमन कर जवनी गाल में झापड़ मारथे, त ओके अपन दूसरोच गाल ला दे देईहा।

⁴⁰ अगर कोनो तुमन कर उपरे मुकदमा चलाए के तुमन कर अंगा ला लेहे बर करथे, त ओके अपन चदर ला भी दे देईहा।

⁴¹ अगर कोनो हर तुमन ला जबरजसती एक कोस ले जाथे, त ओकर संगे दुई कोस चएल देईहा।

⁴² जेहर तुमन जग मांगथे, ओके देआ अऊ जे तुमन जग उधारी मांगथे, ओके मना झईन करीहा।

बईरी मन जग मया करा

⁴³ “तुमन सुने हवा कि ए कहल गए रहीस, अपन परोसी जग मया करीहा, अऊ अपन बईरी मन जग बएर करीहा।

⁴⁴ बकिन मंए तुमन ला कहथों कि अपन बईरी मन ला मया करा, अऊ जेमन तुंमन ला सताथें, ओमन बर पराथना करा।

⁴⁵ तेमेकि तुमन अपन सरग कर दाऊ कर लईका बएन जावा, ओहर घिनक अऊ बढ़िहां दुनो मईनसे मन कर उपरे बेर कर इंजोर ला चमकाथे, अऊ धरमी अऊ पापी दुनो मईनसे मन कर उपरे पानी ला बरसाथे।

⁴⁶ अगर तुमन ओमन के मया करथा; जेमन तुमन के मया करथें, त तुमन ला का इनाम मिलही? काबरकि लगान लेवईयोच मन तो अईसना करथें।”

⁴⁷ “अगर तुमन सिरीप अपन भाईच-बहिन मन ला जोहार करथा, त आने झेमन ले, तुमन का बड़खा काम करथा? का गैर यहूदी मईनसोच मन एकस नई करें?

⁴⁸ एकरे ले तुमन सिद्ध बना, जेकस कि सरग में रहोईया तुमन कर दाऊ हर सिद्ध हवे।”