मत्ती 28 - Surgujia Bible

ईसू मरल में ले जी उठीस

¹ पबितर दिन कर पाछू, एतवार कर बड़े बिहाने मरियम मगदलीनी अऊ दूसर मरियम मठ ला देखे बर गईन।

² अचाकन एक बड़े भारी भुईडोल होईस, काबरकि परभू कर एगोट दूत हर सरग ले उतरीस अऊ मठ कर पखना ला ढलगाए के ओकर उपरे बईठ गईस।

³ ओकर रूप हर अगास कर बिजली सहींक चमकत रहीस अऊ ओकर ओढ़ना हर बरफ कस उजर दिखत रहीस।

⁴ पहरादार मन ओकर डरे थर-थर कांपे लागीन अऊ मरल कस होए गईन।

⁵ तेकर सरगदूत हर सवांगीन मन ला कहीस, “झईन डरावा, काबरकि मंए जानत हों कि तुमन ईसू ला खोजत हा, जेला कुरूस उपरे चघाल गए रहीस।

⁶ ओहर एजग नईए ‘ओहर जी उठीस हवे, जेकस कि ओहर कहे रहीस, आवा अऊ ओ जघा ला देखा जिहां ओके राखल गए रहीस।

⁷ अब तुमन तुरतेंच जाए के ओकर चेला मन ला, ए बतावा कि ओहर मरल में ले जी उठीस हवे, अऊ ओहर तुमन ले आगू गलील जिला में जाथे, तुमन ओके ऊहां देखिहा।’ जेला मंए तुमन ला बताए हों, ओला सुरता करीहा।”

⁸ तेकर ओ सवांगीन मन, तुरतेंच मठ ले चएल देहींन। ओमन डराए गए रहीन अऊ खुसी ले भएर गए रहीन, त ओमन चेला मन ला बताए बर कुदीन।

⁹ ओमन कर जाए घरी हबक ले ईसू हर ओमन ठन भेंटाईस अऊ कहीस, “खुस रहा।” ओमन ओकर जग आईन अऊ गोड़े गिर के ओके जोहारीन।

¹⁰ तेकर ईसू हर ओमन ला कहीस, “झईन डरावा। जावा अऊ मोर भाई मन ला कहा कि ओमन गलील जिला में जाएं उहां ओमन मोके देखहीं।”

¹¹ जब सवांगीन मन डगर में रहीन, त तनिक पहरादार मन सहर में गईन अऊ जे जाएत होए रहीस, ओ सबेच बात ला मुख याजक मन ला बताईन।

¹² तेकर मुख याजक मन, अगुवा मन कर संगे मिल के एक योजना बनाईन। ओमन सिपाही मन ला ढेरेच अकन पईसा देके कहीन,

¹³ “तुमन मईनसे मन ला ए कईहा, कि ‘जब हमरे राती सूते रहेन, त ओकर चेला मन आईन अऊ ओकर लास ला चोराए के ले गईन।’

¹⁴ अगर तुमन कर ए बात हर राएजपाल तक पहुंचही, त हमरे ओके समझाए देबो अऊ तुमन ला मुसीबत ले बचाए लेबो।”

¹⁵ पहरादार मन पईसा ले लेहीन अऊ जेकस ओमन के सिखाल गए रहीस, वईसनेच करीन अऊ ए बात हर यहूदी मन कर मंझारे में आएज तक फईलीस हवे।

ईसू कर महान अगियां

¹⁶ तेकर गियारहो चेला मन गलील जिला कर, ओ पहार ऊपरे गईन, जिहां जाए बर ईसू हर ओमन ला कहे रहीस।

¹⁷ अऊ जब ओमन ईसू ला देखीन, त ओकर अराधना करीन। बकिन कोनो-कोनो कर मन में संका होईस।

¹⁸ तब ईसू हर ओमन जग आईस अऊ कहीस, “सरग में अऊ धरती कर ऊपरे मोके पूरा अधिकार देहल गईस हवे।

¹⁹ एकरे ले जावा अऊ सबेच जाति कर मईनसे मन ला मोर चेला बनावा अऊ ओमन ला दाऊ, बेटा अऊ पबितर आत्मा कर नांव में बतिस्मा देआ,

²⁰ अऊ ओमन ला ओ सबेच बात मन ला माने बर सिखावा, जेकर अगियां मंए तुमन ला देहे हवों। अऊ सुरता करा, मंए संसार कर आखरी तक सगर दिन तुमन कर संगे रहूं।”