मत्ती 27 - Surgujia Bible

ईसू ला पीलातूस कर आगू में लानथें

¹ जब बिहान होईस, त मुख याजक मन अऊ मईनसे मन कर अगुवा मन ईसू ला माएर दारे कर उपाए करीन।

² ओमन ईसू ला बांधीन अऊ ओके ले जाए के राएजपाल पीलातूस कर हाथ में सोंएप देहीन।

यहूदा इसकरोती हर फांसी लगाए लेथे

³ ईसू कर संगे धोखा देवईया यहूदा हर, जब देखीस कि ईसू ला दोसी ठहराल गईस हवे, त ओहर पछताईस अऊ ओहर मुख याजक अऊ अगुवा मन ला चांदी कर तीस ठन सिक्का ला फिराए देहीस,

⁴ अऊ कहीस, “मंए पाप करे हवों, काबरकि एगोट निरदोस मईनसे ला मारे बर, ओकर संगे धोखा करे हवों।” बकिन ओमन कहीन, “हमके का? एला तंहीं जान।”

⁵ तेकर यहूदा हर ओ चांदी कर सिक्का ला मंदिर में फेंक के चएल देहीस, अऊ जाए के फांसी लगाए लेहीस।

⁶ मुख याजक मन ओ सिक्का ला उठाईन अऊ कहीन, “ए पईसा ला खजाना में राखे बर ठीक नईए, काबरकि एहर लहू कर दाम लागे।”

⁷ एकरे बर ओमन ओ पईसा ले कुमहार कर खेत ला बेसाए कर फईसला करीन, तेमेकि ओ जघा हर परदेसी मन ला गाड़े बर काम आए।

⁸ एकर चलते ओ खेत ला आएज ले, लहू कर खेत कहल जाथे।

⁹ एही कस यिरमियाह अगमजानी कर द्वारा कहल बचन हर पूरा होईस, “ओमन ओ चांदी कर तीस सिक्का मन ला ले लेहींन, जेला इसराएली मईनसे मन ओकर दाम ठहराए रहीन,

¹⁰ अऊ ओमन ओ पईसा ले कुमहार कर खेत ला बेसाए लेहीन, जेकस परभू मोके अगींया देहे रहीस।”

पीलातूस हर ईसू ठन सवाल पूछथे

¹¹ जब ईसू हर राएजपाल कर आगू में ठड़होए रहीस, त राएजपाल हर ओकर जग पूछीस, “का तंए ए यहूदी मन कर राजा लागस?” ईसू हर ओके ला जबाब देहीस, “हवो, तंए खुद कहत हस।”

¹² जब मुख याजक मन अऊ अगुवा मन ईसू कर उपरे दोस लगात रहीन, त ओहर कांही जबाब नई देहीस।

¹³ तब पीलातूस हर ईसू ला कहीस, “का तंए नई सुनत हस कि ओमन तोर उपरे कईसना दोस लगात हवें।”

¹⁴ बकिन ईसू हर पीलातूस ला ओकर आरोप कर कोनो जबाब देहीस, एकरे ले राएजपाल हर ढेरेच अचरज होईस।

पीलातूस हर ईसू के मीरतू दंड कर हुकूम देथे

¹⁵ राएजपाल कर ए रीती रहीस, कि फसह कर तिहार कर घरी में, ओहर एक झन कएदी ला जेला मईनसे मन चाहत रहीन, ओला छोंएड़ देहत रहीस।

¹⁶ ओ समय में बरअबा नांव कर एगोट नामी डांकू जेहल में रहीस।

¹⁷ जब भीड़ हर जूटे रहीस, त राएजपाल पीलातूस हर भीड़ कर मईनसे मन जग पूछीस, “तुमन काके ला चाहत हा कि मंए ओला तुमन बर छोंएड़ देवों, बरअबा ला आखिर ईसू ला जेहर मसीह कहल जाथे।”

¹⁸ काबरकि पीलातूस हर जानत रहीस, कि ओमन जलन कर चलते ईसू ला धरुवाईन हवें।

¹⁹ जब पीलातूस हर नियाओ कर सिहासन में बईठे रहीस, त ओकर घरदारीन हर ओकर जग ए खभेर भेजीस, “ओ बेकसूर मईनसे कर संगे कांही झईन करबे, काबरकि आएज मंए सपना में ओकर चलते ढेरेच दुख उठाए हवों।”

²⁰ मुख याजक मन अऊ अगुवा मन भीड़ कर मईनसे मन ला भड़काईन कि ओमन पीलातूस जग ले बरअबा ला छोंड़े कर अऊ ईसू ला माएर दारे कर मांग करें।

²¹ त राएजपाल हर ओमन ला फेर पूछीस, “ए दुनो मन ले तुमन काके ला चाहथा, कि तुमन बर छोंएड़ देवों?” त ओमन कहींन बरअबा ला।

²² त पीलातूस हर ओमन ला पूछीस, “तब मंए ईसू कर का करों, जेके ला मसीह कहल जाथे, ओमन सब झन जबाब देहीन, एके कुरूस ऊपरे चघाल जाए।”

²³ पीलातूस हर पूछीस, “काबर? ओहर का गलती करीसे?” फेर ओमन अऊ किरलाए के कहींन, “एके ला कुरूस में चघावा।”

²⁴ जब पीलातूस हर देखीस कि ओकर ठे कांही नई होए सकथे, बकिन अऊ जोर से हल्‍ला होवथे, त ओहर पानी लेहीस, अऊ भीड़ कर आगू में अपन हाथ ला धोए के कहीस, “मंए ए बेकसूर मईनसे कर मीरतू कर दोसी ना हवों, एकर जिमेदार तुमन खुद हवा।”

²⁵ सबेच मईनसे मन जबाब देहीन, “एकर मीरतू कर दोस हमर अऊ हमर लईका छउवा उपरे होही।”

²⁶ तब पीलातूस हर ओमन बरीक बरअबा ला छोंएड़ देहीस, अऊ ईसू ला कोड़ा मरवाईस अऊ ओके कुरूस उपरे चघाए बर, मईनसे मन कर हाथ में सोंएप देहीस।

सिपाही मन ईसू कर मजाक ऊड़ाथें

²⁷ तब राएजपाल कर सिपाही मन ईसू ला राएजपाल कर महल में ले गईन अऊ सिपाही मन कर पूरा दल ओकर एक भांवेर जूटीन।

²⁸ त ओमन ईसू कर ओढ़ना ला उतारीन अऊ ओके लाल रंग कर ओढ़ना पहिराईन।

²⁹ अऊ कंटा कर एगोट मुकुट बनाए के ओकर मूड़ी उपरे खपकाईन। अऊ ओकर जवनी हाथ में एक ठन लाठी धराए देहीन अऊ ओकर आगू में गोड़े गिरीन अऊ ए कहिके ओकर मजाक उड़ाईन, “ए यहूदी मन कर राजा तोके जोहार।”

³⁰ ओमन ओकर उपरे थूंकीन अऊ लाठी में ओकर मूड़ी ला मारे लागीन।

³¹ ईसू कर हंसी उड़ाए कर पाछू, ओमन ओकर ओ ओढ़ना ला उताएर लेहीन अऊ ओके ओकर खुद कर ओढ़ना ला पहिराए देहीन, तेकर ओमन ओके कुरूस में चघाए बर ले गईन।

ईसू ला कुरूस ऊपरे चघाथें

³² जब ओमन सहर ले बाहरी निकलत रहीन, त ओमन ला कुरेन गांव कर समोन नांव कर एक झन मईनसे मिलीस। ओमन ओके जबरजसती कुरूस ला डोहाईन।

³³ तब ओमन गुलगुता नांव कर एगोट जघा में आईन, (जेकर मतलब हवे खोपड़ी कर जघा)

³⁴ उहां ओमन ईसू ला अंगूर कर रस में करू रस मेराए के पीए बर देहीन। ईसू हर ओला चिखीस, बकिन ओला पीए बर नई चाहीस।

³⁵ जब ओमन ईसू ला कुरूस उपरे चघाए देहीन, तेकर ओकर ओढ़ना ला बांटे बर चिट्ठी डालीन अऊ ओकर अनुसार ओढ़ना ला बांएट लेहीन।

³⁶ तब ओमन उहां बईठ के ओकर पहरा देहे लागीन।

³⁷ अऊ ओकर मूड़ी ऊपरे ओकर दोस पतर लिख के टाएंग देहीन, जेमे एकस लिखे रहीन, “एहर यहूदी मन कर राजा ईसू लागे।”

³⁸ ईसू कर संगे दुई झन डांकू मन ला कुरूस में चघाल गए रहीन, एक झन हर ओकर जवनी कती अऊ दूसर झन हर ओकर डेरी कती।

³⁹ उहां कर अवईया जवईया मन, अपन मूड़ी ला हीलाए-हीलाए के ईसू कर निंदा करत रहीन।

⁴⁰ ओमन कहत रहीन, “अरे मंदिर ला गिराए के ओला तीन दिन में बनोईया, तंए अपन आप ला बचाए ले, अगर तंए परमेस्वर कर बेटा लागस, त कुरूस ऊपरे ले उतेर आ।”

⁴¹ अईसनेच मुख याजक मन अऊ कानहूंन कर सिखोईया मन अऊ अगुवा मन, ए कहिके ओकर मजाक उड़ात रहीन।

⁴² “एहर आने झेमन ला बचाईस, त फेर एहर अपन-आप ला नई बचाए सके। एहर तो इसराएल कर राजा लागे। अझेर एहर कुरूस ऊपरे ले उतेर के आए जाए, तब हमरे एकर ऊपरे बिस्वास करबो।

⁴³ एहर परमेस्वर कर उपरे बिस्वास करथे, अगर परमेस्वर हर चाहथे, त एला बचाए ले काबरकि एहर कहे रहीस, मंए परमेस्वर कर बेटा लागों।”

⁴⁴ अईसनेच ओ डांकूवोच मन, जेमन ओकर संगे कुरूस में चघाल गए रहीन, ओकर निंदा करीन।

ईसू कर मिरतु

⁴⁵ ओ घरी मझेनी कर जुआर करीबन बारह बजे ले लेके, तीन बजे तक सबेच धरती कर ऊपरे अंधार छाए रहीस।

⁴⁶ करीब तीन बजे ईसू हर जोर से किरलाए के कहीस, “एली, एली, लमा सबकतनी। जेकर मतलब होथे, ए मोर परमेस्वर, ए मोर परमेस्वर, तंए मोके काबर छोंएड़ देहे?”

⁴⁷ जेमन ओ जग ठड़होए रहीन, ओमे ले तनीक झेमन एला सुईन के कहीन, “एहर एलियाह ला बलावत हवे।”

⁴⁸ फेर ओमन में ले एक झन हर कुदत एगोट रुवा ला अमट मेरावल अंगूर कर रस में बोएथ के अऊ एगोट लाठी में लपेट के ओके ला पीए बर देहीस।

⁴⁹ बकिन दूसर झेमन कहीन, “ओला रहे दे, आवा हमरे देखी, एलियाह हर एके बचाए बर आथे कि नहीं।”

⁵⁰ तेकर ईसू हर रोसे किरलाए के अपन परान ला छोंएड़ देहीस।

⁵¹ अऊ ओहीच घनी मंदिर कर परदा हर, ऊपरे ले खालहे तक चिराए के दुई टुटका होए गईस। धरती हर डोएल गईस अऊ चटाएन हर चटेक गईस।

⁵² मठ मन उघेर गईन अऊ ढेरेच पबितर मईनसे मन कर लास मन जी उठीन।

⁵³ ओमन मठ में ले बाहरी निकलीन अऊ ईसू कर जी उठे कर पाछू, ओमन पबितर सहर में गईन अऊ ढेरेच झेमन ला दिखीन।

⁵⁴ जब सुबेदार अऊ ओकर संगी जेमन ईसू कर पहरा देहत रहीन, भुईडोल अऊ सब घटना ला देखींन, त ढेरेच डराए गईन अऊ ओमन कहीन, “सहीच में एहर परमेस्वर कर बेटा रहीस।”

⁵⁵ उहां ढेरेच सवांगीनोच मन रहीन, जेमन दुरीहां ले देखत रहीन, ओमन ईसू कर सेवा करे बर गलील परदेस ले ओकर संगे-संगे आए रहीन।

⁵⁶ ओमन में ले मरियम मगदलीनी, याकूब अऊ यूसुफ कर दाई मरियम अऊ जबदी कर बेटा मन कर दाई रहीन।

ईसू कर गाड़े जवाई

⁵⁷ जब सांझ होईस, त अरमतियाह सहर ले एक झन धनी मईनसे हर आईस, ओकर नांव यूसुफ रहीस अऊ ओहर खुद ईसू कर चेला रहीस।

⁵⁸ ओहर पीलातूस ठन जाए के ईसू कर लास ला मांगीस, त पीलातूस हर ईसू कर लास ला ओके देहे कर हुकुम देहीस।

⁵⁹ यूसुफ हर लास ला लेहीस अऊ एक ठन नांवा मलमल कर चदर में लपेटीस,

⁶⁰ अऊ ओला अपन खुद कर नांवा मठ में राएख देहीस, जेला ओहर चटाएन ला काएट के बनुवाए रहीस, तब ओहर एक ठन बड़खा पखना ला मठ कर दुरा में टेकाए देहीस, तेकर ओजग ले चएल देहीस।

⁶¹ मरियम मगदलीनी अऊ दूसर मरियम ओजग मठ कर आगू में बईठे रहीन।

ईसू कर मठ में पहरा

⁶² ओकर दूसर दिन, जेहर तियारी कर दिन कर पाछू कर दिन रहीस, मुख याजक मन अऊ फरीसी मन पीलातूस जग गईन।

⁶³ अऊ कहीन, “ए महाराज हमके ला सुरता हवे कि, ओ धोखा देवईया हर जीयत रहीस, त कहे रहीस कि तीन दिन कर पाछू मंए जी उठहूं।”

⁶⁴ एकरले हुकुम दे कि तीसरा दिन तक ओ मठ कर पहरा करल जाए। अईसना झईन होए कि ओकर चेला मन आएं, अऊ ओकर लास ला चोराए के ले जाएं अऊ मईनसे मन ला कहें कि ओहर मरल में ले जी उठीस हवे। तब ए आखरी धोखा हर आगू कर धोखा ले अऊ खराब होही।

⁶⁵ त पीलातूस हर ओमन ला कहीस, “तुमन पहरादार मन ला ले जाए सकत हा। जावा अऊ जेकस तुमन पहरा कएर सकथा ओइसने करा।”

⁶⁶ तब ओमन गईन अऊ मठ कर पखना ऊपरे मोहर लगाईन अऊ पहरादार मन ला बईठाए के ओमन मठ कर पहरा करीन।