मत्ती 26 - Surgujia Bible

ईसू ला मारे कर योजना बनाथें

¹ ए सब बात ला कहे कर पाछू, ईसू हर अपन चेला मन ला कहीस,

² जेकस तुमन जानथा कि दुई दिन कर पाछू, फसह कर तिहार मनाल जाही अऊ मंए मईनसे कर बेटा, मोके कुरूस ऊपरे चघाए बर सोंएप देहल जाही।

³ तब मुख याजक मन अऊ मईनसे मन कर अगुवा मन, काइफा नांव कर महायाजक कर महल में जूटीन।

⁴ अऊ ओमन बिचार करे लागीन कि कईसे, ओमन छल-कपट कएर के ईसू के धरी अऊ ओके माएर दारी।

⁵ बकिन ओमन कहीन, “हमके एला तिहार कर घरी में नई करे बर चाही, कहों अईसन झईन होए कि मईनसे मन में दंगा होए जाए।”

बएतनियाह गांव में ईसू कर उपरे आंतर तेल ला लगाथें

⁶ जब ईसू हर बैतनिय्याह गांव में कुड़गा रोगी समोन कर घरे रहीस,

⁷ त एगोट सवांगीन हर संगमरमर कर सीसी में ढेरेच दाम कर आंतर तेल ला लेके आईस अऊ जब ईसू हर खाना खात रहीस, त ओ सवांगीन हर ईसू कर मूड़ी उपरे ओला रीकोए देहीस।

⁸ एला देख के चेला मन ढेरेच गुसा होईन अऊ कहीन, “एला काबर बरबाद करीस?

⁹ ए आंतर तेल ला बढ़ियां दाम में बेंच के, ओ रुपिया ला लेके गरीब दुखी मन में बांटल जाए सकत रहीस।”

¹⁰ ईसू हर जाएन गईस कि ओमन का कहत हवें, तेकर ले ओहर ओमन ला कहीस “तुमन ए सवांगीन ला काबर ढेरेच परेसान करथा? ओहर मोर बर सुघर काम करीस हवे।

¹¹ गरीब मईनसे मन तो तुमन कर संगे हमेसा रहीं, बकिन मंए तुमन कर संगे हमेसा नई रहों।

¹² ओहर मोर देंह कर उपरे जे आंतर तेल ला लगाईस, त ओहर एला मोर गाड़े जाए कर तियारी में करीस हवे।

¹³ मंए तुमन ला फूरोंच कहथों कि सबेच संसार में कहोंच ला ए सुघर खभेर कर परचार करल जाही, उहां ए सवांगीन कर कामोच ला ओकर सुरता में बताल जाही।”

यहूदा हर ईसू ला धरुवाए बर योजना बनाथे

¹⁴ तब यहूदा इसकरोती जेहर बारह चेला मन ले एक झन रहीस, मुख याजक मन जग गईस,

¹⁵ अऊ ओमन ला कहीस, “अगर मंए ईसू ला तुमन कर हाथ में धरुवाए देहूं, त तुमन मोके का देईहा?” त ओमन यहूदा ला चांदी कर तीस ठे सीका देहीन।

¹⁶ ओ समय ले ईसू ला धोखा ले धरुवाए बर यहूदा हर मोका खोजत रहीस।

ईसू अपन चेला मन कर संगे फसह तिहार कर भोज खाथे

¹⁷ बिगर खमीर कर रोटी कर तिहार कर पहिलो दिन, चेला मन ईसू जग आईन अऊ पूछीन, “तंए कहां चाहथस कि हमरे तोर बर फसह कर तिहार कर भोज ला खाए बर तियारी करबो?”

¹⁸ ईसू हर ओमन ला कहीस, “सहर में जाए घरी तुमन ला एक झेन मईनसे भेंटाही, त ओके ला कईहा, ‘गुरू हर कहीस हवे कि मोर समय हर ठांवें आए गईस हवे। मंए फसह कर तिहार ला अपन चेला मन कर संगे तोर घर में मनाए बर चाहथों।’”

¹⁹ जईसना ईसू हर अगींया देहे रहीस, वईसनेच चेला मन करीन अऊ फसह तिहार कर भोज ला तियार करीन।

²⁰ जब सांझ होईस, त ईसू हर अपन बारहों चेला मन कर संगे, खाना खाए बर बईठीस।

²¹ अऊ जब ओमन खात रहीन, त ईसू हर कहीस, “मंए तुमन ला फूरोंच कहथों कि तुमन में ले एक झन हर मोके धोखा देही।”

²² एला सुईन के चेला मन ढेरेच उदास होईन अऊ एक-एक कएर के ओकर जग पूछे लागीन, “का ओ मंए तो ना लागों परभू?”

²³ ईसू हर जबाब देहीस, “जेहर मोर संगे कटोरा में अपन हाथ डालीस हवे, ओहीच हर मोके धोखा देही।

²⁴ जेकस मंए मईनसे कर बेटा कर बारे में पबितर किताब में लिखल हवे, मंए मरबे करहुं बकिन हाय, ओ मईनसे कर उपरे, जेहर मईनसे कर बेटा ला धोखा देही, ओ मईनसे बर बढ़िहां होतीस कि ओकर जनम होले झईन रहतीस।”

²⁵ तब यहूदा जेहर ईसू ला धोखा देवईया रहीस, ईसू ला कहीस, “ए गुरुजी! का ओ मईनसे मंए लागों।” ईसू हर ओके कहीस, “हवो, एला तंए खुदेच कह देहे हस।”

परभू-भोज

²⁶ जब ओमन खात रहीन, त ईसू हर रोटी लेहीस अऊ परमेस्वर ला धनबाद देके ओला टोरीस अऊ अपन चेला मन ला देके कहीस, “लेआ अऊ खा, एहर मोर देंह लागे।”

²⁷ तेकर ओहर अंगूर कर रस भरल कटोरा ला लेहीस अऊ परमेस्वर ला धनबाद देहीस अऊ चेला मन ला ए कहिके कटोरा ला देहिस, “एमे ले तुमन सब झन पीया।

²⁸ काबरकि एहर मोर लहू लागे जेकर चलते, परमेस्वर हर तुमन कर संगे ओकर करार ला पका करथे, जेहर एकर बर रिकोवल जाथे, कि ढेरेच मईनसे मन ला पाप कर छमा मिले।

²⁹ मंए तुमन ला फूरोंच कहथों कि मंए अंगूर कर रस ला ओ दिन तक नई पीहूं, जब तक कि मंए तुमन कर संगे मोर दाऊ कर राएज में नांवा अंगूर कर रस ला पी नई लेहूं।”

³⁰ तेकर ईसू अऊ ओकर चेला मन, एक ठन भजन गाए के जैतून पहार कर उपरे चएल देहीन।

पतरस कर इनकार करे कर अगमबानी

³¹ तेकर ईसू हर चेला मन ला कहीस, “आएज राती तुमन सबेच झन मोके छोंएड़ के भाएग जईहा, काबरकि पबितर किताब में लिखल हवे, मंए चरवाहा ला मारहूं अऊ झूंड कर भेंड़ मन छितिर-छान होए जाहीं।

³² फेर मंए जी उठे कर पाछू तुमन ले आगू गलील परदेस में जाहूं।”

³³ तब पतरस हर ईसू ला कहीस, “चाहे सब झन तोके छोंएड़ के भाएग जाहीं, त भाएग जाहीं, बकिन मंए तोके कभों नई छोंडो।

³⁴ ईसू हर ओके जबाब देहीस, मंए तोके ला फूरोंच कहथों, आजेच राएत के मुरगा बासे कर आगू, तंए मोर तीन दाएर इनकार करबे।”

³⁵ त पतरस हर कहीस, “चाहे तोर संगे मोके मरोच बर परही, तबो ले मंए तोर कभों इनकार नई करहूं।” अऊ आने सब चेला मन अईसनेच कहीन।

गतसमनी बगीचा में ईसू पराथना करथे

³⁶ तेकर ईसू हर अपन चेला मन कर संगे, गतसमनी नांव कर एगोट जघा में गईस अऊ ओमन ला कहीस, “तुमन इहां बईठे रहा तब ले मंए उहां पराथना करे बर जाथों।”

³⁷ ओहर पतरस अऊ भाई जबदी कर दुई झन बेटा मन ला, अपन संगे ले गईस अऊ ईसू कर मन हर दुखी अऊ उदास होए लागीस।

³⁸ तेकर ओहर ओमन ला कहीस, “मोर आत्मा हर ढेरेच बेयाकुल होवत हवे, अईसना लागथे कि मोर परान हर निकेल जाही। तुमन इहां ठहरा अऊ मोर संगे जागत रहा।”

³⁹ त दम भर आगू जाए के ईसू हर भुईंया में खंपाए के, एकस पराथना करीस, “ए मोर दाऊ अगर होए सके, त तंए ए बड़खा दुख कर कटोरा ला मोर जग ले हटाए दे, तबो ले मोर नहीं बकिन तोर इछा पूरा होए।”

⁴⁰ तेकर ओहर अपन चेला मन ठन आईस अऊ ओमन ला सूतत देखीस, त पतरस ला कहीस, “का तुमन मोर संगे एको घरी जागे नई सका?”

⁴¹ जागते रहा अऊ पराथना करतेच रहा, तेमेकि तुमन परीछा में झईन पड़ा, आत्मा हर तो तियार हवे, बकिन देंह हर कमजोर हवे।

⁴² ईसू हर दुसर दाएर गईस अऊ ए पराथना करीस, “ए मोर दाऊ! कहों, ए दुख कर कटोरा हर मोर पिये बिगर नई टएल सके, त फेर तोर इछा हर पूरा होए।”

⁴³ जब ईसू वापिस आईस, त अपन चेला मन ला फेर सूतत पाईस, काबरकि ओमन कर आंएख हर नींद में माते रहीस।

⁴⁴ एकरे ले ओहर ओमन ला छोंएड़ के एक दाएर फेर पराथना करे बर गईस अऊ ओहीच बात ला कहिके तीसर दाएर पराथना करीस।

⁴⁵ तेकर ओहर चेला मन जग आईस अऊ ओमन ला कहीस, “का तुमन अझेर ले सूतत हवा अऊ बीसोवत हवा, देखा, ओ घरी हर ठांवें आए गईस हवे अऊ मईनसे कर बेटा हर पापी मन कर हाथ में धोखा ले धरुवाए जवईया हवे।

⁴⁶ उठा, हमरे चली! देखा, मोके धोखा देवईया हर आवत हवे।”

ईसू के धरथें

⁴⁷ जब ईसू हर ए बात ला कहतेच रहीस, त यहूदा जेहर बारहों परेरीत मन ले एक झन रहीस, ओहर आईस अऊ ओकर संगे मईनसे मन कर ढेरेच बड़खा भीड़ रहीस अऊ मईनसे मन तलवाएर अऊ लाठी धरे रहीन, एमन ला मुख याजक मन अऊ मईनसे मन कर अगुवा मन भेजे रहीन।

⁴⁸ धोखा देवईया हर ओमन ला आगू ले ए चिन्हा बताए देहे रहीस कि “जेला मंए चुमहूं, ओहीच मईनसे हर रही, ओके धएर लेईहा।”

⁴⁹ तेकर यहूदा हर तुरतेंच ईसू जग आईस अऊ कहीस, “ए गुरुजी, जोहार! अऊ ओहर ईसू ला चुमहीस।”

⁵⁰ ईसू हर ओके कहीस, “ए संगी, जे काम बर तंए आए हस, ओला कर।” तब मईनसे मन आईन अऊ ओके ला धएर के बंदी बनाए लेहीन।

⁵¹ तब ईसू कर संगता में ले एक झन हर तलवाएर ला निकालीस अऊ महायाजक कर सेवक कर ऊपरे चलाए के, ओकर कान ला काएट देहीस।

⁵² ईसू हर ओके कहीस, “अपन तलवाएर ला अपन मीयान में राख, काबरकि जेमन तलवाएर चलाथें, ओमन तलवाएर ले मारल जाहीं।

⁵³ का तंए नई जानस कि मंए अपन दाऊ जग बिनती कएर सकथों अऊ ओहर मोर बर अझरेच सरगदूत कर बारह बड़े-बड़े सएनीक दल ले बगरा भेज देही।

⁵⁴ बकिन अगर मंए एकस करहूं, त पबितर किताब कर ए बात हर पूरा कईसे होही, जेहर ए कहथे कि ए बात ला एही कस होए बर जरूरी हवे?”

⁵⁵ ओहीच घनी ईसू हर भीड़ कर मईनसे मन ला कहीस, “का तुमन मोके डांकू समेझ के, तलवाएर अऊ लाठी धएर के मोके धरे बर आए हवा। रोज दिन मंए मंदिर में बईठ के उपदेस देहत रहें, त तुमन मोके नई धरा।

⁵⁶ बकिन ए सबेच बात हर एकरले होईस कि अगमजानी मन कर लिखल बचन हर पूरा होए” तेकर सब चेला मन ईसू ला छोंएड़ के भाएग गईन।

ईसू ला महा सभा कर आगू में लेजीन

⁵⁷ जेमन ईसू ला धरे रहीन ओमन ओके ला महायाजक काइफा जग ले गईन, जिहां कानहूंन कर सिखोईया अऊ मईनसे मन कर अगुवा मन जूटे रहीन।

⁵⁸ बकिन पतरस हर दुरीहां ले ईसू ठन पाछू-पाछू, महायाजक कर अंगन तक गईस, त भीतरी जाए के पहरादार मन कर संगे बईठ गईस, एला देखे बर कि ओजग आखरी में का होही।

⁵⁹ तब मुख याजक मन अऊ बड़खा सभा कर सबेच मईनसे मन, ईसू कर बारे में झूठा गवाही खोजत रहीन, तेमेकि ओके माएर दारें।

⁶⁰ बकिन ढेरेच ठगलबरा गवाह मन आईन, तबो ले कुछ नई पाईन।

⁶¹ आखरी में दुई झन गवाह मन आईन अऊ कहीन, “ए मईनसे हर कहीस हवे, मंए परमेस्वर कर मंदिर ला गिराए के अऊ तीन दिन में ओला फेर बनाए सकथों।”

⁶² तेकर महायाजक हर ठड़होईस अऊ ईसू ला कहीस, “ए मईनसे मन तोर बिरोध में जे गवाही देहत हवें, का तंए ओकर जबाब नई देहस?”

⁶³ बकिन ईसू हर कलेकस रहीस, त महायाजक हर ईसू ला कहीस, “मंए तोके जीयत परमेस्वर कर कसम देहत हवों, अगर तंए परमेस्वर कर बेटा मसीह लागस त हमके ला बता।”

⁶⁴ ईसू हर ओके कहीस, “तंए तो खुद कएह देहे। बकिन मंए तुमन ला कहत हवों कि एकर पाछू तुमन मईनसे कर बेटा ला सबले सक्तिसाली कर जवनी कती बईठल देखीहा अऊ अगास कर बदरी में आवत देखीहा।”

⁶⁵ ए बात ला सुईन के महायाजक हर अपन ओढ़ना ला चिरिस अऊ कहीस, “ए परमेस्वर कर निंदा करत हवे, हमके ला अब कोनो गवाह कर जरूरत नईए? तुमन अझरेच सुनेहा कि एहर परमेस्वर कर निंदा करत हवे।”

⁶⁶ तुमन कर का बिचार हवे, त ओमन जबाब देहीन, “एहर मिरतु कर दंड कर लाएक हवे।”

⁶⁷ तेकर ओमन ईसू कर मूंह में थूंकीन अऊ ओके घुसा मारीन, दूसर झेमन झांपड़ माएर के कहीन,

⁶⁸ “ए मसीह अगमबानी कएर के बता कि तोके ला कोन मारीस?”

पतरस हर ईसू कर इनकार करथे

⁶⁹ ओ जुआर पतरस हर बाहरी अंगन में बईठे रहीस, त एगोट दासी हर पतरस जग आईस अऊ कहीस, “तंए गलील कर रहोईया ईसू कर संगी लागस।”

⁷⁰ बकिन ओहर ओ सब झन कर आगू में इनकार करीस अऊ कहीस, “मंए नई जानों कि तंए का कहत हस।”

⁷¹ तेकर पतरस हर बाहरी दुरा में गईस, उहां एगोट आने दासी हर ओके देखीस अऊ उहां कर ठड़होवल मईनसे मन ठे कहीस, “एहु मईनसे हर तो नासरत कर ईसू कर संगे रहीस।”

⁷² पतरस हर किरिया खाए के फेर इनकार करीस अऊ कहीस, “मंए ओ मईनसे ला नई जानों।”

⁷³ तनिक जुआर कर पाछू, जेमन उहां ठड़होए रहीन ओमन पतरस जग आईन अऊ कहीन, “सहीच में तंए ओ मईनसे मन ले एक झन हवस, काबरकि तोर बोली ले ए बात कर पता चलथे।”

⁷⁴ तब पतरस हर अपने-आप ला कोसे लागीस अऊ किरिया खाए के कहीस, “मंए ओ मईनसे ला नई जानों।” अऊ तुरतेंच मुरगा हर बासीस।

⁷⁵ तब पतरस ला ईसू कर कहल गोएठ कर सुरता आईस, “मुरगा बासे कर आगू, तंए तीन दाएर मोर इनकार करबे।” अऊ ओहर बाहरी जाए के कलेप-कलेप के रोए लागीस।