मत्ती 22 - Surgujia Bible

बिहाओ भोज कर अहना

¹ ईसू हर फेर अहना में कहे लागीस।

² सरग कर राएज हर एगोट राजा कस हवे, जेहर अपन बेटा कर बिहाओ में नेवता देहीस।

³ ओहर अपन हरवाह मन ला भेजीस कि ओमन नेवताहारी मन ला बिहाओ भोज बर बलाए के लाने, बकिन नेवताहारी मन आए बर नई चाहींन।

⁴ तब ओहर तनीक अऊ हरवाह मन ला ए कहिके भेजीस, “नेवताहारी मन ला कहा कि भोज तियार होए गईसे, मोर बईला मन ला अऊ मोट-मोट पसू मन ला पूजे हवन अऊ सबेच चीज हर तियार होए गईसे, बिहाओ कर भोज में आवा।”

⁵ बकिन नेवताहारी मन ओकर नेवता में धियान नई देहीन अऊ इते-ऊते चएल देहीन, कोनो हर अपन खेत में अऊ कोनो हर अपन काम-बूता में।

⁶ बकिन बांचल नेवताहारी मन राजा कर हरवाह मन ला धरीन अऊ ओमन कर संगे मार-पीट करीन अऊ ओमन के मरुवाए दारीन।

⁷ तब राजा हर ढेरेच गुसाए गईस अऊ ओहर अपन सेना ला भेजीस अऊ ओ जनमरवा मन ला नास कएर देहीस अऊ ओमन कर सहर ला लेस देहीस।

⁸ तब राजा हर अपन हरवाह मन ला कहीस, “बिहाओ कर भोज तो तियार हवे, बकिन नेवताहारी मन एकर लाएक नईएं।

⁹ तेकर ले डगर कर चऊंक में जा अऊ तुमन ला जे मईनसे मन मिलहीं, ओ सबेच झेला भोज कर नेवता देआ”

¹⁰ त ओ हरवाह मन डगर में गईन अऊ ओमन ला बढ़िहां चाहे खराब जेमन मिलीन, ओ सबेच झन ला बलाए के ले लानीन अऊ बिहाओ कर मड़वा हर पहुना मन कर मारे भएर गईस।

¹¹ बकिन जब राजा हर पहुना मन ला देखे बर भीतरी आईस, त ओहर उहां एक झन मईनसे ला देखीस, जेहर देहल बिहाओ कर ओढ़ना ला नई पहिरे रहीस।

¹² त राजा हर ओके ला पूछीस, “ए संगी, बिहाओ कर ओढ़ना पहिरे बिगर तंए इहां कईसे आए गए।” ओ मईनसे हर कांही कहे बर नई सकीस।

¹³ तब राजा हर हरवाह मन ला कहीस, “एकर गोड़ हाथ ला बाएंध के एला बाहरी अंधार में फेंक देआ, जिहां मईनसे मन रोंथे अऊ अपन दांत चाबथें।

¹⁴ एकर बर बलाल मन तो ढेरेच हवें, बकिन चुनल मन ढेरेच थोरहें हवें।”

लगान देवाई कर बारे में सवाल

¹⁵ तब फरीसी मन जाए के बिचार करीन कि ओमन कईसे ईसू ला ओकरेच गोएठ में फसाई।

¹⁶ ओमन अपन चेला मन ला हेरोदी मन कर संगे ईसू जग ए पूछे बर भेजीन, “ए गुरू, हमरे जानथी कि तंए सचा हवस अऊ तंए सचाई कर संगे परमेस्वर कर डगर कर बारे में सिखाथस। तंए ककरो परवाह नई करस, काबरकि तंए ककरोच मूंह देखी नई करस।

¹⁷ त हमके ला बता कि तोर का बिचार हवे? रोमी महाराजा कएसर ला लगान देथी, ओहर ठीक हवे कि नही?”

¹⁸ बकिन ओमन कर खराब सोंच ला जाएन के ईसू हर कहीस, “ए ढोंगी मईनसे मन! तुमन काबर मोके ला फसाए बर करत हवा?

¹⁹ मोके ओ सिक्का ला देखावा, जेला तुमन लगान पटाए बर करत हवा।” ओमन ओकर जग एक ठे सिक्का ला लानीन।

²⁰ तेकर ईसू हर ओमन ला पूछीस, “एमें काकर चेहरा कर छाप अऊ नांव हवे?”

²¹ ओमन कहीन “रोमी राजा कर।” तब ईसू हर ओमन ला कहीस, “जेहर रोमी राजा कर हवे, ओला रोमी राजा ला देआ, अऊ जेहर परमेस्वर कर हवे, ओला परमेस्वर ला देआ।”

²² एला सुईन के ओमन अचमहों में पईर गईन अऊ ईसू ला छोंएड़ के चएल देहीन।

जी उठे कर बारे में सवाल

²³ ओहीच दिन तनीक सदूकी मन ईसू जग आईन, जेमन ए कथें कि मरे कर पाछू मईनसे मन फेर जी के नई उठें। ओमन ईसू जग एगोट सवाल पूछीन,

²⁴ “ए गुरू, मूसा हर कहीसे कि अगर कोनो मईनसे हर बिगर लईका कर मएर जाथे, त ओकर भाई हर ओ अदावेंन ठे बिहाओ कएर ले अऊ अपन मरल भाई बरीक लईका जनमाए।

²⁵ मान लेआ कि सात ठे भाई रहीन, पहिलो हर बिहाओ करीस, बकिन ओहर बिगर लईका करे मएर गईस अऊ अपन परानी ला अपन भाई बर छोंएड़ देहीस।

²⁶ दूसर अऊ तीसर भाई ला लेके सबेच भाई कर संगे अईसनेच होईस अऊ सातो कर सातो भाई मन मएर गईन।

²⁷ आखरी में ओ सवांगीनोच हर मएर गईस।

²⁸ तेकर ले मरल में ले जी उठे कर पाछू, ओहर सातो भाई में ले काकर परानी होही? काबरकि ओ सातो झेमन ओकर ठे बिहाओ करे रहीन।”

²⁹ त ईसू हर ओमन ला जबाब देहीस, “तुमन भुलाए गए हवा, काबरकि परमेस्वर कर किताब अऊ परमेस्वर कर सामर्थ ला नई जाना?

³⁰ काबरकि जेमन मरल में ले जी उठहीं, ओमन कर सादी बिहाओ नई होही, बकिन ओमन सरग में सरगदूत मन कस होहीं।

³¹ मरल में ले जी उठे कर बारे में परमेस्वर हर तुमन ला का कहीस हवे, का तुमन एला नई पढ़े हवा?

³² कि मंए अबराहम कर परमेस्वर, इसहाक कर परमेस्वर अऊ याकूब कर परमेस्वर लागों। ओहर मरल मन कर नहीं, बकिन जीयत मन कर परमेस्वर लागे।”

³³ एला सुईन के भीड़ कर मईनसे मन ईसू कर उपदेस ले ढेरेच अचमहों होईन।

सबले बड़खा अगींया

³⁴ जब फरीसी मन सुनीन कि ईसू हर सदूकी मन ला चुप कराए देहीस हवे, त ओमन एक जघा जूटीन।

³⁵ ओमन में ले एक झन जेहर कानहूंन कर सिखोईया रहीस, ओहर ईसू ला परखे बर एगोट सवाल पूछीस,

³⁶ “ए गुरू, मुसा कर कानहूंन कर अनुसार सबले बड़खा अगींया कोन हर हवे?”

³⁷ ईसू हर ओके ला कहीस, “तंए अपन परभू परमेस्वर ला अपन सबेच हिरदय, अऊ अपन सबेच परान ले अऊ अपन पूरा मन ले मया कर।

³⁸ एही हर पहिलो अऊ सबले बड़खा अगींया लागे।

³⁹ अऊ दूसर अगींया एहर लागे कि अपन परोसी ला अपनेच कस मया कर।

⁴⁰ एही दुई ठन अगींया हर सबेच कानहूंन अऊ अगमजानी मन कर आधार हवे।”

मसीह काकर बेटा लागे

⁴¹ जब फरीसी मन उहां जूटे रहीन, त ईसू हर ओमन ला पूछीस,

⁴² “मसीह कर बारे में तुमन का सोंचथा? ओहर काकर बेटा लागे?” त ओमन कहीन, “दाऊद कर बेटा।”

⁴³ ईसू हर ओमन ला कहीस “त फेर दाऊद हर पबितर आत्मा में होए के ओके ला ‘परभू’ काबर कहथे?

⁴⁴ परभू हर, मोर परभू जग कहीस, मोर जवनी हाथ कती बईठ, जब तक कि मंए तोर बईरी मन ला तोर गोड़ कर खालहे नई कएर देवों।

⁴⁵ जब दाऊद हर ओके परभू कहथे, त फेर ओहर दाऊद कर बेटा कईसे होए सकथे?”

⁴⁶ कोनोच हर ओके कांही जबाब देहे नई सकीन अऊ ओ दिन ले कोनो हर ओकर जग कांही पूछे कर हिमेत नई करीन।