मत्ती 20 - Surgujia Bible

अंगूर बारी कर बनिहार मन कर अहना

¹ सरग राएज हर ओ मालीक नियर हवे, जेहर बिहाने घर ले निकलीस, तेमेकि अपन अंगूर कर बारी में बनिहार मन ला बूता में लगाए।

² ओहर बनिहार मन ला रोज दिन कर, बनी में काम करे बर तय करीस अऊ ओमन ला अपन अंगूर कर बारी में भेजीस।

³ करीब नौ बजे ओहर बाहरी निकलीस अऊ आने झेमन ला बजार में फालतू ठड़होवल देखीस,

⁴ त ओहर ओमन ला कहीस, “तुंहूच मन मोर अंगूर कर बारी में जावा अऊ जेतना बनी होही, मंए तुमन ला देहूं।”

⁵ त ओहूच मन गईन। ओहर करीब बारह बजे अऊ तीन बजे दूसर दाएर फेर बाहरी निकलीस अऊ अईसनेच करीस।

⁶ ओहर सांझ जुआर करीब पांच बजे फेर बाहरी निकलीस अऊ उहां तनीक झेमन ला फालतू ठड़होवल देखीस, त ओहर ओमन ला कहीस, “तुमन काबर इहां दिन भेर ले फालतू ठड़होए हवा?”

⁷ ओमन जबाब देहीन, “काबरकि कोनो हर हमके ला बनी करे बर नई राखीस।” ओहर ओमन ला कहीस, “तुंहूच मन मोर अंगूर कर बारी में जावा।”

⁸ जब सांझ होईस, त अंगूर कर बारी कर मालीक हर अपन संपती कर देख रेख करोईया मुंसी ला कहीस “बनिहार मन ला बलाओ अऊ आखरी में अवईया बनिहार मन ले सुरू कएर के आगू कर अवईया बनिहार मन तक सब झेला बनी दे दे।”

⁹ जे बनिहार मन सांझ जुआर करीब पांच बजे बूता में लगाल गए रहीन, ओमन आईन अऊ ओमन में ले सबेच झन ला दिन भेर कर बनी मिलीस।

¹⁰ अऊ जे बनिहार मन आगू बूता में लगाल गए रहीन, जब ओमन आईन, त सोंचीन कि ओमन ला बगरा मिलही। बकिन ओहूच मन ला ओतनेच बनी मिलीस।

¹¹ जब ओमन ला बनी मिलीस, त ओमन मालीक कर उपरे कुड़कुड़ाए लागीन।

¹² अऊ कहीन, “ए मईनसे मन ला आखरी में बूता में लगाल गए रहीस अऊ एमन सिरीप एक घंटा बूता करिन हवें, तबो ले तंए एमन ला हमर बरोबर बनी देहे हस, जब कि हमरे दिन भेर बूता कर भार उठाएन अऊ ढेरेच घाम सहे हन।”

¹³ बकिन ओहर ओमन में ले एक झन ला जबाब देहीस, “ए संगी, मंए तोर संग अनियाए नई करत हवों। का तंए एक दिन कर बनी में बूता करे बर राजी नई होए रहे?

¹⁴ अपन बनी ला ले अऊ जा। ए मोर इछा हवे कि पाछू का आवल बनिहार मन ला ओतनेच देवों जेतना कि तुमन ला देहे हवों।

¹⁵ का मोके ए अधिकार नईए कि मंए अपन पईसा ला जईसना चाहूं वईसना करों? का मंए भलाई करथों, तेकर बर तंए इसगात हस?

¹⁶ एही कस जेमन पाछू हवें, ओमन आगू होए जाहीं अऊ जेमन आगू हवें, ओमन पाछू होए जाहीं।”

ईसू हर फेर अपन मिरतु अऊ जी उठाई कर अगमबानी करथे

¹⁷ यरूसलेम सहर ले जात घनी ईसू हर, अपन बारहों चेला मन ला अलगे ले गईस अऊ डगर में ओमन ला कहीस,

¹⁸ “सुना, हमरे यरूसलेम सहर में जात हन अऊ मंए मईनसे कर बेटा, मुख याजक अऊ कानहूंन कर सिखोईया मन कर हाथे धरुवाल जाहूं, ओमन मोके मरुवाए बर दोसी ठहराहीं,

¹⁹ तेकर गैर यहूदी मन कर हाथ में सोंएप देहीं, ओमन मोर मजाक उड़ाहीं, मोके कोड़ा में मारहीं अऊ कुरूस में चघाए के मरुवाए देहीं, बकिन मंए तीसर दिन में जी उठहूं।”

ईसू हर सेवा करे बर सिखाथे

²⁰ तेकर जबदी कर बेटा मन कर दाई हर, अपन बेटा मन कर संगे ईसू जग आईस अऊ ओकर आगू में गोड़े गिर के कुछ मांगे लागीस।

²¹ ईसू हर ओके कहीस “तंए का चाहथस?” ओहर कहीस, “तंए जबान दे कि तोर राएज में, ए मोर दुनो बेटा मन एक झन तोर जवनी कती अऊ दूसर हर तोर डेरी कती बईठें।”

²² ईसू हर ओमन ला कहीस, “तुमन नई जानत हा कि तुमन का मांगत हा, जे दुख कर कटोरा में ले मंए पीवईया हवों, का तुमन ओला पी सकथा?” ओमन कहीन “हमरे पी सकथी।”

²³ ईसू हर ओमन ला कहीस, “तुमन मोर दुख अऊ तकलीफ ला जरूर सईहा, बकिन कोनो ला मोर जवनी आखिर डेरी कती बईठाए कर अधिकार देवईया मंए नईयों, एहर तो ओमने बर हवे, जेमन बर मोर दाऊ हर तियार कएर के राखीस हवे।”

²⁴ जब ओ दसो चेला मन एला सुनींन, त ओ दुनों भाई मन कर ऊपरे ढेरेच गुसाए गईन।

²⁵ तेकर ईसू हर ओ सब झन ला अपन जग बलाए के कहीस, “तुमन जानत हा कि जेमन गैर यहूदी मन कर राजा होथें, ओमन अपन मईनसे मन कर उपरे अधिकार जमाथें अऊ ओकर ले बड़खा अधिकारीयो मन अपन मईनसे मन कर उपरे अधिकार जमाथें।

²⁶ बकिन तुमन कर मझार में अईसना नई होए बर चाही, बलकि तुमन में ले जेहर बड़े बने बर चाहथे, ओहर तुमन कर सेवक बने।

²⁷ अऊ जेमन तुमन ले आगू होए बर चाहथें, ओमन तुमन कर दास बने,

²⁸ जईसना कि मईनसे कर बेटा हर अपन सेवा करुवाए बर नई आईस, बकिन ओहर सेवा करे बर आईस अऊ ढेरे झेमन ला छोंड़ाए बर, अपन परान ला पलटा में देहे बर आईस।”

दुई झन अंधा मन ला ईसू चंगा करथे

²⁹ जब ईसू अऊ ओकर चेला मन एरीहो सहर ले निकलत रहीन, त एक बड़खा भीड़ हर ओमन कर पाछू होए लेहीस।

³⁰ सड़क कर धरी में दुई झन अंधा मईनसे मन बईठे रहीन अऊ जब ओमन सुनीन कि ईसू हर ओ सड़क में जाथे, त ओमन किरलाए के कहीन, “ए परभू, दाऊद कर संतान, हमर ऊपरे दया कर।”

³¹ त भीड़ कर मईनसे मन ओमन ला दबकाईन अऊ ओमन ला कलेकस रहे बर कहीन, बकिन ओमन अऊ किरलाए के कहीन, “ए परभू, दाऊद कर संतान हमर ऊपरे दया कर।”

³² तब ईसू हर रुईक गईस अऊ ओमन ला बलाए के पूछीस, “तुमन का चाहत हा कि मंए तुमन बर करों?”

³³ ओमन कहीन, “ए परभू, हमरे देखे बर चाहथन।”

³⁴ तेकर ईसू हर ओमन कर उपरे सोगे होए के ओमन कर आंएख मन ला छुईस अऊ तुरतेंच ओमन देखे लागीन अऊ ओमन ईसू कर पाछू होए लेहीन।