मत्ती 2 - Surgujia Bible

गियानी मन ईसू जग भेंटाथें

¹ जब हेरोदेस राजा हर एहूदिया जिला में राएज करत रहीस, तब उहां कर बेतलहेम गांव में ईसू कर जनम होईस, त पूरब दिसा कर देस ले, तरईया मन कर बारे में जनोईया तनीक गियानी मन यरूसलेम सहर में आईन अऊ ओमन मईनसे मन ठे पूछे लागीन,

² “ओ लईका कर जनम कहां होईसे, जेहर यहूदी मन कर राजा लागे? काबरकि हमरे पूरब दिसा में ओकर जनम कर बारे में जानकारी देवईया तरईया ला देखे हवन अऊ ओकर पांव परे बर आए हवन।”

³ एला सुईन के हेरोदेस राजा अऊ यरूसलेम कर जमेच मईनसे मन घबराए गईन।

⁴ राजा हर सब मुख याजक मन ला अऊ कानहूंन कर सिखोईया मन ला, एक जघा में बलाईस अऊ ओमन ला पूछीस “मसीह कर जनम कहां होए बर चाही?”

⁵ ओमन कहीन, “एहूदिया जिला कर बेतलहेम गांव में होही, काबरकि अगमजानी हर अईसने लिखीस हवे कि

⁶ ए यहूदिया जिला कर बेतलहेम गांव, तंए यहूदा परदेस कर बड़े सहर मन ले कोनोच मधे ले छोटे नई हवस, काबरकि तोर में ले एक झन सासन करोईया निकलही, जेहर मोर परजा इसराएल कर देख-रेख करही।”

⁷ तब हेरोदेस राजा हर ओ गियानी मन ला कले-कस बलाईस अऊ ओमन जग पूछीस “तरईया हर ठीक कोन घरी दिखे रहीस?”

⁸ तब ओहर ओमन ला ए कहिके बेतलहेम भेजीस, “जावा ओ लईका कर बारे में सही-सही पता लगावा, अऊ जब ओहर तुमन के भेंटाए जाही; त मोके खभेर कएर देईहा, तेमेकि मंहूच जाए के ओकर पांव परहूं।”

⁹ त ओमन राजा कर बात ला सुईन के, अपन डगर में चएल देहीन अऊ जे तरईया ला ओमन पूरब दिसा में देखे रहीन, ओहर ओमन कर आगु-आगु गईस अऊ ओ जघा कर ऊपरे में जाए के ठहेर गईस; जिहां लईका हर रहीस।

¹⁰ जब ओमन ओ तरईया ला देखीन, त ढेरेच फुरमा होईन।

¹¹ घर कर भीतरी जाए के, ओमन ओ लईका ला ओकर दाई मरियम कर संगे देखीन अऊ भुईयां में गिर के लईका कर पांव परीन। तेकर अपन-अपन थईला ला छोएर के सोना, लोबान अऊ गंधरस कर भेंट चघाईन।

¹² अऊ परमेस्वर हर ओमन ला सपना में चेतावनी देहीस कि हेरोदेस ठन झईन जईहा, एकरे ले ओमन आने डगर में अपन देस फिर गईन।

ईसू कर परिवार हर मिसर देस कती भागथे

¹³ जब ओ गियानी मन चएल देहींन, तब परभू कर एगोट दूत हर सपना में यूसुफ ला देखार देहीस अऊ ओके कहीस, “उठ, लईका अऊ ओकर दाई ला लेके मिसर देस में भाएग जा। अऊ जब तक मंए नई कहूं; तब तक तंए उहेंच रहबे, काबरकि हेरोदेस राजा हर ओ लईका ला मरुवाए बर खोजवईया हवे।”

¹⁴ तब यूसुफ उठीस, अऊ रातीच जुआर लईका अऊ ओकर दाई ला लेके मिसर देस में चएल देहीस।

¹⁵ अऊ ओहर हेरोदेस कर मरत तक उहें रहीस। एकर बर कि जे बात ला परभू हर अपन अगमजानी कर द्वारा कहे रहीस, ओहर पूरा होए “मंए अपन बेटा ला मिसर देस ले बलाएं।”

¹⁶ जब हेरोदेस राजा हर देखीस कि ओ गियानी मन, ओकर ठे धोखा करीन हवें, त ओहर ढेरेच रिसे होईस अऊ ओहर मईनसे मन ला भेज के, ओ गियानी मन कर बताल समय कर अनुसार बेतलहेम अऊ ओकर अगल-बगल गांव कर सबेच लईका जेमन दुई साल अऊ ओकर ले छोटे रहीन, ओमन के माएर देहीन।

¹⁷ तब जे बात ला यिरमियाह अगमजानी कर द्वारा कहल गए रहीस, ओहर पूरा होईस:

¹⁸ रामाह में रोए कर अऊ ढेरेच दुख कर अवाज सुनाई देहीस, राहेल हर अपन लईका मन बर रोवत रहीस, अऊ ओ नई चाहत रहीस कि कोनोच हर ओके चुपवाए, काबरकि ओकर लईका मन मएर गए रहीन।

ईसू कर परिवार हर मिसर देस ले फिरथे

¹⁹ हेरोदेस राजा कर मरे कर पाछू, परभू कर एगोट दूत हर, मिसर देस में यूसुफ ला सपना में देखार देहीस।

²⁰ अऊ कहीस, “उठ! लईका अऊ ओकर दाई ला लेके इसराएल देस में चले जा, काबरकि जेमन ए लइका ला माएर दारे कर कोसिस करत रहीन, ओमन मएर गईन हवें।”

²¹ यूसुफ हर उठीस, अऊ लइका अऊ ओकर दाई मरियम ला लेके इसराएल देस में चएल देहीस।

²² बकिन जब ओहर एला सुनीस कि अरखीलाउस हर अपन दाऊ हेरोदेस कर जघा में एहूदिया जिला में राएज करत हवे, त ओहर उहां जाए बर डराईस। फेर सपना में परमेस्वर ले चेतावनी पाए के ओहर गलील जिला में चएल देहीस,

²³ अऊ ओहर उहां जाए के नासरत नांव कर एगोट सहर में बएस गईस, एकर बर कि जे बात हर अगमजानी मन कर द्वारा कहल गए रहीस, ओहर पूरा होए कि ईसू हर नासरी कहाही।