मत्ती 19 - Surgujia Bible

तलाक कर बारे में सिक्छा

¹ ए बात मन ला कहे कर पाछू, ईसू हर गलील जिला ले चएल देहिस अऊ एरदन नदी कर ओ पार एहूदिया जिला कर सिवाएन में आईस।

² त एगोट बड़खा भीड़ हर ओकर पाछू होए लेहीस अऊ ईसू हर उहां बेमरीहा मन ला चंगा करीस।

³ तनिक फरीसी मन ईसू ला परखे बर ओकर जग आईन अऊ ओमन ईसू ठन पूछिन, “का कोनोच कारन ले अपन परानी ला छोंएड़ देवाई ठीक हवे?”

⁴ ईसू हर जबाब देहीस, “का तुमन परमेस्वर कर बचन ला नई पढ़े हवा कि संसार कर रचोईया हर ओमन ला सुरूच ले, नर अऊ नारी कएर के बनाईस हवे।

⁵ तेकर ओहर कहीस, ‘एकर चलते मईनसे हर अपन दाई-दाऊ ला छोंएड़ के अपन घरदारिन जग मेराए जाही अऊ ओमन दुनों झन एक देंह कस होए जाहीं।’

⁶ तेकर ले ओमन अब दुई नहीं बकिन एक देंह हवें। एकरे ले जेमन ला परमेस्वर हर एक संग जोड़ीसे, ओके ला मईनसे हर अलगे झईन करे।”

⁷ त ओमन ईसू ला कहीन, “त फेर मूसा हर ए हुकुम काबर देहीसे कि मईनसे हर अपन परानी ला तलाक कर चिट्ठी देके ओके छोंएड़ दे।”

⁸ तब ईसू हर ओमन ला जबाब देहीस, “तुमन कर कठोर मन कर चलते मूसा हर तुमन ला अपन परानी ला छोंड़े बर हुकूम देहिस, बकिन सिरजे कर सुरू ले अईसना नई रहीस।

⁹ मंए तुमन ला कहथों कि कोनो मईनसे हर अपन घरदारिन ला छिनारी करे कर कारन छोएड़ सकत हे। बकिन कोनो दूसर कारन ले अपन परानी ला छोंएड़ के आने सवांगीन ठे बिहाओ करथे, त ओहूच हर छिनारी करथे।”

¹⁰ चेला मन ईसू ला कहीन, “अगर सवांग अऊ सवांगीन कर हालत हर अईसनेच हवे, त कोनो के बिहाओ नई कराई हर बढिहां हवे।”

¹¹ बकिन ईसू हर ओमन ला कहीस, सब मईनसे मन ए सिक्छा ला माने नई सकें। एला सिरीप ओहीच मन माने सकथें, जेमन ला ए बरदान देहल गईसे।

¹² काबरकि तनीक हिजड़ा मन एकस हवें, जेमन अपन दाई कर पेट ले हिजड़ा जनमीन हवें। तनीक झेमन ला मईनसे मन, हीजड़ा बनाए देहीन हवें, बकिन तनीक मईनसे मन सरग राएज बरीक बिहाओ नई करीन हवें। जेहर ए बात ला माएन सकथे, ओहर माने।

ईसू अऊ छोटे लईका मन

¹³ तब मईनसे मन लईका मन ला ईसू जग लानीन, तेमेकि ईसू हर ओमन कर उपरे अपन हाथ ला राखे अऊ ओमन बर पराथना करे। बकिन चेला मन ओमन ला डांटीन।

¹⁴ बकिन ईसू हर कहीस, “लईका मन ला मोर जग आए देआ अऊ ओमन ला झईन रोका, काबरकि सरग कर राएज हर अईसनेच मन बर हवे।”

¹⁵ अऊ ओहर लईका मन कर उपरे अपन हाथ राखीस अऊ उहां ले चएल देहीस।

एगोट धनी जवान हर ईसू जग भेंटाथे

¹⁶ तेकर एगोट मईनसे हर ईसू जग आईस अऊ पूछीस, “ए गुरू, मंए का भलाई कर काम करों कि अमर जिनगी पाओं?”

¹⁷ ईसू हर ओके कहीस, “तंए मोर जग भलाई कर बारे में काबर पूछथस? सिरीप एकेच झन भला हवे। अगर तंए अमर जिनगी में जाए बर चाहथस, त अगींया मन ला पालन कर।”

¹⁸ ओ मईनसे हर पूछीस “कोन अगींया मन ला?” ईसू हर कहीस, “हतिया झईन करबे, छिनारी झईन करबे, चोरी झईन करबे, झूठा गवाही झईन देबे,

¹⁹ अपन दाई-दाऊ कर माएन-मरजाद करबे अऊ अपन परोसी ला अपनेच कस मया करबे।”

²⁰ तेकर ओ जवान हर ईसू ला कहीस, “ए सबेच बात ला मंए मानत आथों, मोर में अऊ कोनो बात कर कमी हवे?”

²¹ ईसू हर ओके कहीस “अगर तंए सिद्ध बने बर चाहत हस, त जा अपन धन ला बेंच दे अऊ ओला गरीब मन में बांएट दे, अऊ तोके सरग में धन मिलही। तेकर आओ अऊ मोर पाछू होए ले।”

²² बकिन जब ए बात ला ओ जवान हर सुनीस, त ओहर ढेरेच उदास होए के चएल देहिस, काबरकि ओहर ढेरेच धनी रहीस।

²³ तब ईसू हर अपन चेला मन ला कहीस, “मंए तुमन ला फूरोंच कहथों, धनी मन ला सरग कर राएज में जाए बर ढेरेच कठिन हवे।

²⁴ मंए तुमन ला फेरेच कहथों, एगोट ऊंट ला सूजी कर बेधा में ढूके बर कठिन हवे, ओकरो ले ढेरेच कठिन हवे, धनी मन ला परमेस्वर कर राएज में जाए बर।”

²⁵ ए बात ला सुईन के चेला मन ढेरेच अचमहों होईन अऊ कहीन, “तब काकर उद्धार होए सकथे?”

²⁶ ईसू हर ओमन कती देखीस अऊ कहीस, “मईनसे मन ले तो एहर नई होए सके, बकिन परमेस्वर ले सब कुछ होए सकथे।”

²⁷ तब पतरस हर ईसू ला कहीस, “सुन, हमरे तो सबेच जाएत ला छोंएड़ के, तोर पाछू होए लेहे हन, त हमके ला का मिलही?”

²⁸ ईसू हर ओमन ला कहीस, “मंए तुमन ला फूरोंच कहथों, कि जब संसार हर नांवा होही अऊ मंए मईनसे कर बेटा महिमा कर अपन सिहासन में बईठहूं, त तुहूंच मन जेमन मोर पाछू में चलत हवा, बारह ठन सिहासन में बईठ के, इसराएल कर बारह गोती कर नियाओ करीहा।

²⁹ अऊ जे कोनो हर मोर बरीक अपन घर-दुवार आखिर भाई-बहिन आखिर दाई-दाऊ आखिर लईका-छउआ आखिर खेती बारी ला छोंएड़ देहीसे, ओहर सौ गुना पाही अऊ ओहर अमर जिनगी कर हकदार होही।

³⁰ बकिन ढेरेच झन, जेमन अपन आप ला अझेर महान समझथें, ओमन सरग कर राएज में छोटे होए जाहीं अऊ ढेरेच झन, जेमन अझेर अपन आप ला छोटे समझथें, ओमन सरग राएज में महान होए जाहीं।”