मत्ती 18 - Surgujia Bible

सरग राएज में सबले बड़े कोन

¹ ओ समय चेला मन ईसू जग आए के पूछिन, सरग कर राएज में सबले बड़खा कोन हवे?

² ईसू हर एगोट छोटे लईका ला बलाईस, त ओमन कर मझारे ठढूवाए के कहीस,

³ “मंए तुमन ला फूरोंच कहथों कि जब ले तुमन नई बदलिहा अऊ लईका मन कस नई बनिहा, तब तक तुमन सरग कर राएज में जाए नई सकीहा।

⁴ तेकर ले जे कोनो हर अपन-आप ला ए लईका मन कस नरम करथे, ओही हर सरग कर राएज में सबले बड़खा हवे।

⁵ अऊ जे कोनो हर मोर नांव में एगोट अईसन छोटे लईका ला अपनाथे, ओहर मोके अपनाथे।

पाप कर परीछा कर बारे में सिक्छा

⁶ बकिन जेहर मोर ऊपरे बिस्वास करोईया ए छोटे मन ले कोनोच ला पाप में गिराथे, त ओकर बर बढ़ियां होतीस कि ओकर ढेंटू में जनता ला टाएंग के अऊ ओके समूंदर में ढकेल देहल जातीस।

⁷ संसार बर हाय! काबरकि ए संसार हर मईनसे मन ला पाप करवाथे। पाप करे कर मोका तो आबेच करही। बकिन हाय, ओ मईनसे ला जेकर द्वारा पाप आथे।”

⁸ “अगर तोर गोड़ आखिर हाथ हर तोके पाप करुवाथे, त ओला काएट के फेंक दे, काबरकि दुनो हाथ आखिर दुनों गोड़ कर संगे नरक कर आगी जेहर नई बिताए, ओमें जाए ले सुघर हवे कि ठूठा चाहे खोरा होए के अमर जिनगी में जाए।

⁹ तोर आंएख हर तोके पाप करुवाथे, त ओला निकाएल के फेंक दे, दुनो आंएख कर संगे नरक कर आगी में जाए ले सुघर हवे कि कनवा होए के अमर जिनगी में जाए।”

भुलाल भेंड़ी कर अहना

¹⁰ “सुना, तुमन ए छोटे में ले कोनो के बेकार झईन समझिहा, काबरकि मंए तुमन ला कहथों कि एमन कर दूत मन सरग में मोर दाऊ कर आगू में हमेसा रथें।

¹¹ (काबरकि मंए मईनसे कर बेटा भुलाल मन ला बचाए बर आए हों।)

¹² तुमन का सोंचथा? अगर कोनो मईनसे जग सव ठन भेंड़ी हवें अऊ ओमे ले एक ठे भेंड़ी हर भुलाए जाथे, त का ओ निनानबे भेंड़ी मन ला पहार उपरे छोंएड़ के ओ एगोट भुलाल भेंड़ी ला खोजे बर नई जाए?

¹³ अऊ अगर ओ भेंड़ी हर ओके मिल जाथे, त मंए तुमन ला फूरोंच कहथों कि ओहर निनानबे भेंड़ी जेमन भुलाए नई रहीन ओकरो ले ढेर आनंद ओहर ओ भुलाल भेंड़ी बर मनाही।

¹⁴ अईसनेच सरग में तुमन कर दाऊ हर नई चाहथे, कि ए छोटे मन ले एकोच झन नास होएं।

जेहर गलती करीसे ओकर संगे कईसे रहबे

¹⁵ अगर तोर भाई हर तोर बिरोध में कांही गलती करथे, त जा अऊ ओकर गलती ला बता, अऊ ए बात हर सिरीफ तुमन दुनो झन कर मझार में रहे। अगर ओहर तोर बात ला माएन लेथे, त तंए अपन भाई ला पाए लेहे।

¹⁶ अगर ओहर तोर बात ला नई मानही, त अपन संगे एक झन आखिर दुई झन मईनसे मन ला ले जा, तेमेकि दुई झन चाहे तीन झन कर गवाही ले हर एक बात हर साबित होए जाए।

¹⁷ अगर ओहर ओमनोच कर बात ला नई सुनही, त तंए ए बात ला कलीसिया ला बताए दे, अगर ओहर कलीसियोच कर बात नई सुनही, त तंए ओके गैर यहूदी चाहे लगान लेवईया सहींक समझ ले।”

¹⁸ “मंए तुमन ला फूरोंच कहथों कि जे जाएत तुमन धरती में बांधिहा, ओहर सरग में बंधाही अऊ जे जाएत ला तुमन धरती में खोलीहा, ओहर सरग में खुलही।

¹⁹ मंए तुमन ला फेर कहथों, अगर तुमन में ले दुई झन मईनसे, एक मन होए के धरती में कोनो बात बर पराथना करीहा, त मोर दाऊ जेहर सरग में हवे, ओ काम ला तुमन बर पूरा कएर देही।

²⁰ काबरकि जिहां दुई झन आखिर तीन झेमन मोर नांव में जुटथें, उहां मंए ओमन कर मझारे रथों।”

छमा नई करोईया सेवक कर अहना

²¹ तेकर पतरस हर ईसू जग आईस अऊ पूछीस, “ए परभू, अगर मोर भाई हर मोर बिरोध में पाप करथे, त मंए ओके कए दाएर ले छमा करहूं? का सात दाएर ले?”

²² ईसू हर ओके कहीस, “मंए तोके नई कहथों कि सिरीप सात दाएर ले बल्कि सात दाएर कर सत्तर गुना तक छमा कर।

²³ एकरे ले सरग राएज हर ओ राजा नियर हवे, जेहर अपन सेवक मन ठे हिसाब लेहे बर चाहीस।

²⁴ जब ओहर हिसाब लेहे लागीस, त ओकर आगू में एक झन मईनसे ला लानल गईस, जेहर ओकर लाखो करोड़ो रुपिया करजा लेहे रहीस।

²⁵ बकिन ओहर करजा ला भरे बर नई सकत रहीस, तेकर ले ओकर मालीक हर हुकुम देहीस कि ओके अऊ ओकर घरदारीन ला अऊ ओकर लईका मन ला अऊ जे जाएत ओकर जग हवे, ओ सब जाएत ला बेंच देहल जाए अऊ करजा ला चुकता करल जाए।”

²⁶ एला सुईन के सेवक हर मालीक कर गोड़े गिर के बिनती करीस, “ए परभू, मोर बर कयास कर, मंए तोर सबेच करजा ला चुकाए देहूं।”

²⁷ तेकर मालीक हर ओकर उपरे सोगे होईस, अऊ ओकर करजा ला छमा कएर देहीस अऊ ओके छोंएड़ देहीस।

²⁸ “बकिन जब ओ सेवक हर बाहरी निकलीस, त ओकर एगोट संगता सेवक हर भेंटाईस, जेकर ऊपरे ओकर एक सौ चांदी कर सिक्का कर करजा रहीस। अऊ ओहर ओके धरिस, अऊ ओकर ढेटू ला मसेक के कहीस, ‘तोर ऊपरे मोर जेतना करजा हवे, ओला चुकाए दे।’

²⁹ त ओकर संगता सेवक हर गोड़े गिर के ओकर जग बिनती करे लागीस, ‘मोर बर कयास कर मंए तोर सब करजा ला चुकता कएर देहूं।’

³⁰ बकिन ओहर नई मानीस अऊ ओ मईनसे ला तब तक जेहल में डलवाए देहीस, जब तक ओकर करजा ला चुकता नई कएर देहीस।

³¹ जब आने सेवक मन ए सब बात ला देखीन, त ओमन ढेरेच उदास होईन अऊ अपन मालीक ठे जाए के सबेच बात ला बताए देहीन।

³² तेकर ओकर मालीक हर ओ सेवक ला बलाईस अऊ कहीस, ‘ए दुस्ट सेवक, मंए तोर सबेच करजा ला छमा कएर देहें, काबरकि तंए मोर ठे बिनती करे।

³³ तेकर ले जेकस मंए तोर उपरे दया करें, वइसनेच तोर संगता सेवक कर उपरे तोके दया करे बर नई चाही का?’

³⁴ गुसाए के ओकर मालीक हर, ओके सजा देवईया मन कर हाथ में सोंएप देहीस अऊ तब तक ओहर ओमन कर हाथ में रहीस, जब तक कि ओहर सब करजा ला चुकाए नई देहीस।”

³⁵ ए अहना कहे कर पाछू ईसू हर फेर कहीस “एही कस अगर तुमन में ले सबेच झन अपन भाई बहिन ला अपन पूरा हिरदय ले छमा नई करीहा, त सरग कर मोर दाऊवोच हर तुमन सबेच झन ठे अईसनेच करही।”