मत्ती 17 - Surgujia Bible

ईसू कर रूप बदलथे

¹ छव दिन कर पाछू ईसू हर पतरस, याकूब अऊ याकूब कर भाई यूहन्ना ला अपन संगे लेहीस, अऊ ओमन ला अकेला एगोट ऊंच पहार ऊपरे ले गईस।

² उहां ओमन कर आगू में ईसू कर रूप हर बदेल गईस, अऊ ओकर चेहरा हर बेर कस चमकत रहीस अऊ ओकर ओढ़ना हर इंजोर कस उजर होए गईस।

³ तब उहां चेला मन कर आगू में मूसा अगमजानी अऊ एलियाह अगमजानी परगट होईन अऊ ओमन ईसू कर संगे गोठियावत रहीन।

⁴ एला देख के पतरस हर ईसू ला कहीस, “ए परभू, एहर बढ़िहां हवे कि हमरे एजग हवन। अगर तोर इछा होही, त मंए तीन ठे झाला बनाहूं एगोट तोर बर, एगोट मूसा बर अऊ एगोट एलियाह बर।”

⁵ जब ओहर गोठियावत रहीस, त एगोट चमकत बदरी हर ओमन ला ढांएक लेहीस अऊ ओ बदरी ले एकस अवाज आईस, “एहर मोर दुलरुवा बेटा लागे। मंए एकरले ढेरेच खुस हवों। एकर बात ला सुना।”

⁶ चेला मन एला सुनीन अऊ खपोंईया भुईयां में गिर गईन अऊ ओमन ढेरेच डराए गईन।

⁷ त ईसू हर आईस अऊ ओमन ला छुई के कहीस, “उठा झईन डरावा।”

⁸ अऊ जब ओमन ऊपरे कती ला देखीन, त ओमन के ईसू कर छोंएड़ अऊ कोनो नई दिखीस।

⁹ जब ओमन पहार ले उतरत रहीन, त ईसू हर ओमन ला हुकुम देहिस, “जब तक मंए मईनसे कर बेटा मरल में ले जी नई उठहूं, तब तक तुमन जेला देखेहा ओला कोनो के झईन बतईहा।”

¹⁰ तब चेला मन ओकर ठे पूछिन, “त फेर कानहूंन कर सिखोईया मन काबर कथें कि मसीह कर आए ले आगू एलियाह ला आए बर जरूरी हवे?”

¹¹ ईसू हर जबाब देहीस, “एलियाह हर जरूर आए के ओहर सब जाएत ला ठीक करही।

¹² बकिन मंए तुमन ला कहथों कि एलियाह हर आए चुकीसे अऊ मईनसे मन ओके नई चिन्हींन। बकिन ओमन जईसना चाहीन, वईसनेच ओकर संगे करीन। एही कस मंए मईनसे कर बेटा ओमन कर हाथ ले दुख उठाहूं।”

¹³ तब चेला मन समझिन कि ईसू हर ओमन ठे यूहन्ना बतिस्मा देवईया कर बारे में कहत रहीस।

ईसू हर मिरगी मारल एगोट लईका ला चंगा करथे

¹⁴ जब ओमन भीड़ जग आईन, त एगोट मईनसे हर ईसू जग आईस अऊ ओकर आगू में गोड़े गिर के कहीस,

¹⁵ “ए परभू, मोर बेटा कर उपरे दया कर। ओके मिरगी मारथे अऊ ओकर चलते ढेरेच दुख होथे अऊ ओहर बार-बार आगी अऊ पानी में गिर जाथे,

¹⁶ मंए ओके तोर चेला मन जग लाने रहें, बकिन ओमन ओके ठीक करे बर नई सकीन।”

¹⁷ ईसू हर जबाब देहीस, “ए बिस्वास नई करोईया मन अऊ ढीठ मईनसे मन, मंए तुमन कर संगे कब तक रहूं, अऊ कब तक मंए तुमन कर सहत रहूं, ओ लईका ला मोर जग लाना।”

¹⁸ ईसू हर ओ दुस्टआत्मा ला डांटीस अऊ ओहर ओमे ले निकेल गईस, अऊ ओ लईका हर ओहीच घनी चंगा होए गईस।

¹⁹ जब ईसू एके झन रहीस तब चेला मन ओकर जग आए के पूछिन, “हमरे ओला काबर निकाले नई सकेन?”

²⁰ ईसू हर ओमन ला कहीस, काबरकि तुमन कर बिस्वास हर ढेरेच कम हवे। मंए तुमन ला फूरोंच कहथों कि अगर तुमन कर बिस्वास हर सेरसों कर बिहनोच कर बरोबर होतीस, त तुमन ए पहार ला कहता “इहां ले कगराए के उहां चले जा” त ओहर कगराए जातीस। तुमन बर कोनो बात हर असंभव नई होही।

²¹ (बकिन ए मधे कर चीज हर सिरीप पराथना अऊ उपास कर द्वारा निकलथे।)

अपन मिरतु अऊ जी उठाई कर बारे में ईसू हर फेर अगमबानी करथे

²² जब चेला मन गलील में रहीन, त ईसू हर ओमन ला कहीस, “मंए मईनसे कर बेटा, मईनसे मन कर हाथ में धरवाल जाहूं।

²³ ओमन मोके माएर दारहीं, बकिन तीसर दिन मंए जी उठहूं।” एला सुईन के चेला मन ढेरेच उदास होईन।

²⁴ जब ईसू अऊ ओकर चेला मन कफरनहूम में आईन, त मंदिर कर लगान लेवईया मन पतरस ठे आए के पूछिन, “का तुमन कर गुरू हर मंदिर कर लगान नई दे?”

²⁵ ओहर कहीस, “हवो देथे।” जब पतरस हर घर कर भीतरी आईस, त ओकर पूछे कर आगू ईसू हर कहीस, “ए समोन तंए का सोंचथस? ए धरती कर राजा मन काकर ठे लगान लेथें? अपन खुद कर मईनसे मन ठे आखिर दूसर झन ठे?”

²⁶ तेकर पतरस हर कहीस, “दूसर झन ठे।” तब ईसू हर ओके कहीस, “तब तो अपन खुद कर मईनसे मन ला लगान देहे बर नई परही।

²⁷ बकिन हमरे ओमन ला ठेंस पहुंचाए बर नई चाहथी, तेकर ले तंए नदी में जा अऊ बंसी खेल। जे मछरी हर आगू बाझही, ओला धरबे अऊ ओकर मूंह ला खोलबे, त तोके एक ठन सीका मिलही, ओला लेके मोर अऊ तोर कती ले ओमन के लगान दे देबे।”