मत्ती 14 - Surgujia Bible

यूहन्ना बतिस्मा देवईया कर मिरतु

¹ ओ घनी में राजा हेरोदेस हर ईसू कर बारे में सुनीस,

² अऊ ओहर अपन सेवक मन ला कहीस, “एहर यूहन्ना बतिस्मा देवईया लागे, ओहर मरल में ले जी उठीसे, एकर चलते ओहर ए अचरज कर काम कएर सकथे।”

³ हेरोदेस हर अपन भाई फिलीपुस कर परानी हेरोदियास कर चलते, यूहन्ना ला धरवाए के बंदी बनाए रहीस अऊ ओके जेहल में हुरकूवाए देहे रहीस।

⁴ काबरकि यूहन्ना हर हेरोदेस ला कईयो दाएर कहे रहीस, अपन भाई कर परानी ला रखाई तोर बर कानहूंन कर अनुसार ठीक नईए।

⁵ तेकर ले हेरोदेस हर यूहन्ना ला माएर दारे बर चाहत रहीस, बकिन ओहर मईनसे मन ला डरात रहीस, काबरकि मईनसे मन यूहन्ना ला एगोट अगमजानी मानत रहीन।

⁶ तेकर, जब हेरोदेस कर जनम दिन आईस, त हेरोदियास कर बेटी हर, पहुना मन कर आगू में नाचीस अऊ हेरोदेस ला खुस कएर देहीस।

⁷ तब हेरोदेस हर किरिया खाए के ए जबान देहीस, “जे जाएत तंए मांगबे मंए तोके देहूं।”

⁸ त ओहर अपन दाई कर फुसलाए में आए के कहीस, “यूहन्ना बतिस्मा देवईया कर मूड़ी ला एगोट छिपा में इहां मोर जग मंगवाए दे।”

⁹ एला सुईन के राजा हर ढेरे दुखी होईस, बकिन अपन किरिया ला जेला अपन पहुना मन कर आगू में खाए रहीस ओकरे चलते ओहर हुकुम देहीस कि एला यूहन्ना कर मूड़ी ला दे देआ।

¹⁰ ओहर सिपाही मन ला जेहल में भेज के यूहन्ना कर मूड़ी ला पूजवाए देहीस।

¹¹ ओमन मूड़ी ला एगोट छिपा में लानीन अऊ ओ नोनी ला दे देहीन अऊ ओहर ओ मूड़ी ला अपन दाई ठन ले गईस।

¹² तेकर यूहन्ना कर चेला मन आईन अऊ ओकर लास ला ले जाए के माटी दे देहीन, तेकर ओमन जाए के ईसू ला ए खभेर सुनाईन।

ईसू हर पांच हजार सवांग मन ला खाना खवाथे

¹³ जब ईसू हर ए खभेर ला सुनीस, त डोंगा में चएघ के, ओहर एके झन उहां ले एगोट सुनसान जघा में चएल देहिस। जब मईनसे मन ला ए बात कर पता चलीस, त ओमन सहर मन ले निकेल के रेंगतेच ओकर पाछू में होए लेहीन।

¹⁴ जब ईसू हर डोंगा ले उतरीस, त ओ जग एगोट बड़खा भीड़ ला देखीस, त ईसू हर ओमन कर उपरे सोगे होईस अऊ ओमन कर मझार में जेमन बेमरीहा रहीन ओमन ला चंगा करीस।

¹⁵ जब सांझ होए लागीस, त चेला मन ओकर लिघे आए के कहीन, “एहर एगोट सुनसान जघा हवे अऊ ढेरेच अबेर होवथे, तंए मईनसे मन ला भेज दे। तेमेकि ओमन गांव मन में जाए के अपन बर भोजन बेसाए सकें।”

¹⁶ ईसू हर ओमन ला कहीस, “एमन ला जाए कर जरूरत नईए, तुहींच मन एमन ला कांही खाए बर देआ।”

¹⁷ ओमन ईसू ला कहीन, “इहां हमर जग सिरीप पांच गोट रोटी अऊ दुगोट मछरी हवे।”

¹⁸ ईसू हर ओमन ला कहीस, “ओमन ला इहां मोर जग लाना।”

¹⁹ तब ईसू हर मईनसे मन ला घांस में बईठे बर कहीस, ओ पांच ठन रोटी अऊ दुई ठन मछरी ला लेहीस; अऊ सरग कती ला देख के ओहर परमेस्वर कर धनबाद करीस, अऊ रोटी मन ला टोएर-टोएर के चेला मन ला देहीस अऊ चेला मन मईनसे मन ला देहीन।

²⁰ ओ सब झेमन खाए के अघाए गईन, त चेला मन बांचल खोंचल टुटका ला भएर के बारह टुकनी उठाईन।

²¹ अऊ जेमन खाईन, ओमे सवांगीन अऊ लईका मन ला छोंएड़ के करीबन पांच हजार सवांग मन रहीन।

ईसू हर पानी कर ऊपरे रेंगथे

²² एकर पाछू ईसू हर तुरतेंच अपन चेला मन ला डोंगा में चघाईस कि ओमन ओकर ले आगू, दह कर ओ पार जाएं अऊ ओहर मईनसे मन ला बिदा करीस।

²³ त मईनसे मन ला बिदा करे कर पाछू, ईसू हर एके झन पराथना करे बर पहार ऊपरे गईस अऊ सांझ होईस, त ओहर उहां एके झन रहीस।

²⁴ ओ घनी डोंगा हर भुईयां ले ढेरेच दुरिहां में रहीस अऊ पानी कर लहरा में डगमगात रहीस, काबरकि हवा हर ओकर उलटा चलत रहीस।

²⁵ भिनसरहा तीन बजे अऊ छव बजे कर मंझारे में ईसू हर, दह कर उपरे रेंगत चेला मन जग आईस।

²⁶ जब चेला मन ईसू ला दह में रेंगत देखीन, त ओमन डराए गईन अऊ कहीन, “एहर भूत लागे।” अऊ ओमन डर कर मारे किरलाए लागीन।

²⁷ तेकर ईसू हर तुरतेंच ओमन ठे गोठियाईस, “हिमेत धरा मंए लागों, झईन डरावा।”

²⁸ पतरस हर ओके जबाब देहिस, “ए परभू, अगर तंहीच लागस, त मोके पानी कर ऊपरे तोर ठे आए कर हुकुम दे।”

²⁹ ईसू हर कहीस, “आ!” तेकर पतरस हर डोंगा ले उतरीस अऊ पानी में रेंगत ईसू कती जाए लागीस।

³⁰ बकिन जब ओहर गररा ला देखीस, त ओहर डराए गईस अऊ पानी में बुड़े लागीस, त किरलाए के कहीस, “ए परभू, मोके बचा।”

³¹ ईसू हर तुरतेंच अपन हाथ ला लमाए के ओके धएर लेहीस अऊ कहीस, “ए थोरहें बिस्वास करोईया, तंए संका काबर करे?”

³² जब ओ दुनों झन डोंगा में चएघ गईन, त गररा हर थएम गईस।

³³ तब जेमन डोंगा में रहीन ओमन ईसू कर गोड़े गिर के कहीन, “सहीच में तंए, परमेस्वर कर बेटा लागस।”

गनेसरत इलाका में रोगी मन ला चंगा करथे

³⁴ ओमन बड़खा दह कर ओ पार गईन अऊ गनेसरत इलाका में पहुंचीन।

³⁵ उहां कर मईनसे मन, ईसू के चिन दारीन अऊ ओमन आस-पास कर सबेच गांव में खभेर भेजवाए देहीन, तेकर मईनसे मन सबेच बेमरिहा मन ला ईसू ठे लानीन।

³⁶ अऊ ओकर ठे बिनती करीन, “ए बेमरीहा मन ला तोर ओढ़ना कर अंचरोच ला सिरीप छुए दे।” अऊ जेतना झेमन ओके छूईन ओ सबेच झेमन चंगा होए गईन।