मत्ती 13 - Surgujia Bible

बिहन बुनोईया कर अहना

¹ ओहीच दिन ईसू घर ले निकेल के बड़खा दह कर धरी में जाए के बईठ गईस।

² तब ओकर चाएरो कती एतना बड़खा भीड़ जुईट गईस कि ओके एगोट डोंगा में चएघ के बईठे बर परीस अऊ सबेच मईनसे मन दह कर धरी में ठड़होए रहीन।

³ तेकर ईसू हर ओमन ला अहना में ढेरेच बात ला बताईस, “सुना, एक झन किसान हर बिहन बुने बर निकलीस,

⁴ बुनत घरी चटिक बिहन हर डगर कर धरी में गिरीस अऊ चराई मन आए के खाए देहीन।

⁵ चटिक बिहन हर पखनोरीया भुईयां में गिरीस, जिहां ओला बगरा माटी नई भेंटाईस, ओ बिहन मन हालू जाएम गईन, काबरकि उहां माटी हर गहील नई रहीस।

⁶ बकिन जब बेर उगीस, त ओमन भुरटाए गईन अऊ जएर नई धरीन, तेकर चलते ओमन झुराए गईन।

⁷ चटिक बिहन मन भूंदरा कर मझार में गिरीन अऊ ओ भूंदरा मन बाएड़ के ओमन ला ठेल देहीन।

⁸ बकिन चटिक बिहन मन बढ़िहां भुईयां कर उपरे गिरीन अऊ फर लानीन कोनो सवो गुना कोनो साठ गुना कोनो तीस गुना।

⁹ जेमन सुने बर तियार हवा, ओमन सुन लेआ अऊ समझ लेआ।”

ईसू अहना मन में काबर गोठियाथे

¹⁰ तेकर चेला मन ईसू कर लिघे आए के ओकर जग पूछीन, “तंए मईनसे मन जग अहना में काबर गोठियाथस?”

¹¹ ओहर जबाब देहिस, “तुमन ला सरग राएज कर भेद कर बात मन ला समझे कर बूधी देहल गईसे। बकिन दूसर झेमन ला नई देहल हवे।

¹² काबरकि जेकर जग हवे ओके ला अऊ देहल जाही अऊ ओकर जग ढेरेच बगरा होए जाही, बकिन जेकर जग नईए ओकर जग ले, ओहू ला ले लेहल जाही, जेला ओहर सोंचथे कि ओकर लागे।

¹³ मंए ओमन ठे अहना में एकरले गोठियाथों, काबरकि ओमन देखथें, बकिन सहीच में नई देख पावें, अऊ सुनथें तबो ले सहीच में नई सुनें अऊ नई समझें।

¹⁴ ओमन कर बारे में यसायाह अगमजानी कर ए बात हर पूरा होथे, तुमन जरूर सुनीहा, बकिन कभों नई समझिहा अऊ तुमन जरूर देखीहा बकिन तुमन के कभों नई सुझही।

¹⁵ काबरकि ए मईनसे मन कर दिमाग हर मोट होए गईसे, अऊ एमन अपन कान ले कम सुनथें, अऊ एमन अपन आंएख ला मुईंद लेहीन हवें, नहीं तो एमन अपन आंएख ले देखतीन, अऊ कान ले सुनतीन, अऊ अपन दिमाग ले समझतीन, अऊ मोर कती फिरतीन, त मंए एमन के चंगा कएर देतें।

¹⁶ बकिन तुमन कर आंखी मन धन्य हवें कि ओमन देखथें अऊ, तुमन कर कान मन धन्य हवे काबरकि ओमन सुनथें।

¹⁷ मंए तुमन ला फूरोंच कहथों, कि जे चीज ला तुमन देखत हा ओला ढेरेच अगमजानी अऊ धरमी मईनसे मन देखे बर चाहत रहीन, बकिन देखे नई सकीन अऊ जे गोएठ ला तुमन सुनत हा, ओला ओमन सुने बर चाहत रहीन बकिन सुने बर नई सकीन।”

बिहन बुनोईया अहना कर मतलब

¹⁸ ईसू हर फेर कहीस “अब तुमन बिहन बुनोईया किसान कर अहना कर मतलब ला सुना।

¹⁹ जब कोनो मईनसे हर सरग राएज कर बचन ला सुनथे अऊ ओला नई समझे, त जे बचन हर ओकर हिरदय में बूनल रथे, ओला ओ दुस्ट सैतान हर छीन लेथे। एहर ओही बिहन लागे, जेहर डगर कर धरी में बूनल गए रहीस।

²⁰ अऊ जे बिहन हर पखनोरिया भुईयां में गिरे रहीस, ओहर ओ मईनसे लागे, जेहर बचन ला सुनथे अऊ तुरतेंच ओला आनंद कर संगे माएन लेथे।

²¹ बकिन अपन में जएर नई धरे कर चलते, ओहर चटिक समय बर ठहरथे। बकिन जब बचन कर चलते आफेत अऊ सताव आथे, त ओहर तुरतेंच बचन ले दुरिहां होए जाथे।

²² जे बिहन हर भूंदरा कर मझारे बूनल गए रहीस, एहर ओ मईनसे लागे जेहर बचन ला सुनथे, बकिन जिनगी कर फिकर अऊ धन कर लालच हर, बचन ला दबाए देथे अऊ ओहर फर नई लाने।

²³ जे बिहन ला बढ़िहां भुईयां में बूनल गए रहीस, एहर ओ मईनसे लागे जेहर बचन ला सुनथे अऊ ओला समझथे अऊ ओहर जरूर फर लानथे, कोनो हर सवो गुना, कोनो हर साठ गुना अऊ कोनो हर तीस गुना।”

जंगली बिहन कर अहना

²⁴ ईसू हर ओमन ला एगोट अऊ अहना सुनाईस, “सरग कर राएज हर ओ मईनसे कस हवे, जेहर अपन खेत में बढ़िहां बिहन ला बुनीस।

²⁵ बकिन जब मईनसे मन सूतत रहीन, त ओ मईनसे कर बईरी हर आईस अऊ गंहू कर मंझार में जंगली बिहन ला बुईन के चएल देहीस।

²⁶ जब गंहू हर जामीस अऊ बाएल फूटीस, त जंगली गांछियो हर दिखे लागीस।

²⁷ तब ओ खेत कर मालीक कर सेवक मन ओकर ठन आए के ओके ला कहीन, मालीक का तंए अपन खेत में बढ़िहां बिहन नई बुने रहे? त फेर ए जंगली गांछी मन कहां ले आए गईन।”

²⁸ ओहर ओमन ला कहीस, “ए कोनो बईरी कर काम लागे। तेकर सेवक मन ओकर ठे पूछिन, का तंए चाहथस कि हमरे जाए के ओ जंगली गांछी मन ला उखाएड़ देई?”

²⁹ खेत कर मालिक हर कहीस, “नही, काबरकि जंगली गांछी ला उखाड़त घरी होए सकथे कि तुमन ओकर संगे गंहूओच ला उखाएड़ दारीहा।

³⁰ लुवाई कर घरी तक दुनो ला संगे-संगे बाढ़े देआ, लुवाई कर घरी मंए लुवईया मन ला कहूं कि आगू जंगली गांछी मन ला सकेला अऊ लेसे बर ओमन ला भिंडा बांएध लेआ। तब गंहू ला सकेल के मोर कोठार में ले लाना।”

सरसों कर बिहन अऊ खमीर कर अहना

³¹ ईसू हर ओमन के एगोट अऊ अहना सुनाईस, “सरग कर राएज हर सेरसों कर एगोट बिहन कस हवे, जेला लेके एगोट मईनसे हर अपन खेत में बुनीस।

³² सेरसों कर बिहन हर तो सब बिहन ले छोटे रथे, बकिन जब एहर बाड़थे, त सब साग-पान ले बड़खा होए जाथे अऊ अईसन रूख बएन जाथे कि अगास कर चराई मन आए के रहे बर एकर डार में खोंता बनाथें।”

³³ ईसू हर ओमन ला एगोट अऊ अहना सुनाईस, “सरग कर राएज हर खमीर कस हवे, जेला कोनो सवांगीन हर ले जाए के, तीन पसेर पिसान में तब तक मेराईस जब तक कि ओ सब पिसान हर खमीर होए गईस।”

³⁴ ईसू हर मईनसे मन जग ए सब बात ला अहना में कहीस, अऊ बिगर अहना कर ओहर ओमन ठे कांही नई कहत रहीस।

³⁵ अईसना करे कर चलते ओहर अगमजानी कर द्वारा परमेस्वर कर कहल ए बात ला पूरा करीस: मंए अहना में गोठियाहूं। मंए ओ बात मन ला बताहूं जेहर संसार कर सिरजे कर समय ले लूकाईसे।

जंगली बिहन कर अहना कर मतलब

³⁶ तब ईसू हर भीड़ ला छोंएड़ के घरे गईस अऊ ओकर चेला मन ओकर जग आए के कहीन, “खेत कर जंगली बिहन कर अहना कर बारे में हमके ला समझाए दे।”

³⁷ ईसू हर ओमन ला जबाब देहिस, “जे मईनसे हर बढ़िहां बिहन ला बुनीस ओहर मईनसे कर बेटा लागे।

³⁸ खेत हर संसार लागे अऊ बढ़िहां बिहन मन सरग राएज कर संतान लागें। जंगली बिहन मन दुस्ट सैतान कर संतान लागें।

³⁹ अऊ जे बईरी हर एमन ला बुनथे, ओहर सैतान लागे। लुवाई हर संसार कर आखरी लागे अऊ लुवईया मन सरगदूत लागें।

⁴⁰ जेकस जंगली गांछी मन ला सकेल के आगी में बाएर देथें, वईसने संसार कर आखरी समय में होही।

⁴¹ मईनसे कर बेटा हर अपन सरगदूत मन ला भेजही अऊ ओमन ओकर राएज कर ओ सबेच झन ला जूटाहीं, जेमन मईनसे मन कर पाप कर कारन बनथें अऊ जेमन बुरा काम करथें।

⁴² सरगदूत मन ओमन ला आगी कर भठी में डाएल देहीं, जिहां ओमन रोहीं अऊ अपन दांत चाबहीं।

⁴³ तब परमेस्वर कर देख में सुघर जिनगी जिवईया मन, अपन दाऊ कर राएज में बेर कस चमकहीं। जेमन सुने बर तियार हवा, ओमन सुन लेआ अऊ समझ लेआ।”

लुकावल खजाना अऊ मोती कर अहना

⁴⁴ सरग कर राएज हर एगोट खेत में लुकावल खजाना कस हवे, जेला एगोट मईनसे हर पाईस अऊ ओहर ओला फेर लुकाए देहीस, तब ओहर खुसी कर मारे गईस अऊ अपन सबेच जाएत ला बेंच के ओ खेत ला बेसाए लेहीस।

⁴⁵ फेर सरग कर राएज हर एगोट रोजगरिहा कस हवे, जेहर सुघर मोती कर खोज में रथे।

⁴⁶ जब ओके एक ठन महंगा मोती मिल जाथे, त ओहर अपन सबेच जाएत ला बेंच के ओ मोती ला बेसाए लेथे।

जाल कर अहना

⁴⁷ ईसू हर फेर कहीस “फेर सरग कर राएज हर एगोट बड़खा जाल कस हवे, जेला समुंदर में डालल गईस अऊ ओमे सबेच मधे कर मछरी बाएझ गईस।

⁴⁸ जब जाल हर भएर गईस, त मछुवारा मन जाल ला घींच के धरी में लानीन, तेकर ओमन बईठ गईन अऊ बढ़िहां मछरी ला निमाएर के भांड़ा में राखीन अऊ खराब मछरी मन ला फेंक देहीन।

⁴⁹ संसार कर आखरी समय में अईसनेच होही, सरगदूत मन आहीं अऊ दुस्ट मईनसे मन ला धरमी मईनसे मन ले अलगे करहीं,

⁵⁰ अऊ ओमन ला आगी कर भठी में डाएल देहीं। उहां ओमन रोहीं अऊ अपन दांत चाबहीं।”

⁵¹ तेकर ईसू हर अपन चेला मन ला पूछीस, “का तुमन ए सब गोएठ ला समझा?” त ओमन कहीन “हवो”

⁵² ईसू हर ओमन ला कहीस, “एकरे ले, मुसा कर कानहूंन कर सबेच सिखोईया, जेहर सरग कर राएज कर सिक्छा पाए दारीस हे, ओहर एगोट घर कर मालिक कस हवे, जेहर अपन भंडार ले नांवा अऊ जूनहा चीज मन ला निकालथे।”

नासरत गांव कर मईनसे मन ईसू ला नई पतियाईन

⁵³ जब ईसू हर ए सब अहना ला सुनाए दारीस, तेकर उहां ले चएल देहिस।

⁵⁴ ओहर अपन सहर में आईस अऊ मईनसे मन ला ओमन कर धरम सभा कर घर में सिक्छा देहे लागीस, मईनसे मन ओकर उपदेस ला सुनके अचमहों होए गईन अऊ कहीन, “एके ला ए बुधी अऊ ए अचमहों कर काम करे कर सामर्थ कहां ले मिलीस।

⁵⁵ का एहर बढ़ई कर बेटा ना लागे? का एकर दाई कर नांव मरियम ना लागे? का याकूब, यूसुफ, समोन अऊ यहूदा एकर भाई ना लागें।

⁵⁶ अऊ का एकर सबेच बहिन मन हमर मझार में नई रहें? फेर ए मईनसे ला ए सब हर कईसे मिलीस?”

⁵⁷ अऊ एही कस ओमन ओकर ठोकर कर कारन होईन, बकिन ईसू हर ओमन ला कहीस, “कोनो अगमजानी हर अपन सहर अऊ अपन घर में माएन-मरजाद नई पाए, बकिन दूसर सब जग पाथे।”

⁵⁸ मईनसे मन बिस्वास नई करे कर चलते ओहर ओजग ढेरेच सामर्थ कर काम नई करीस।