लूका 9 - Surgujia Bible

ईसू अपन बारह परेरीत मन ला भेजथे

¹ एक दिन ईसू हर, अपन बारह झन चेला मन ला एक संगे बलाईस अऊ, ओमन ला सब दुस्टआत्मा मन ला निकाले कर, अऊ बेमरीहा मन ला चंगा करे कर, सक्ति अऊ अधिकार देहीस।

² अऊ ओमन ला परमेस्वर कर राएज कर बारे में परचार करे बर, अऊ बेमरीहा मन ला चंगा करे बर भेजीस।

³ ईसू हर ओमन ला कहीस, “तुमन डगर बर लाठी, झोला, रोटी, रुपीया-पईसा अऊ दुई गोट अंगा झईन धरीहा।

⁴ जे घनी तुमन कोनो गांव में जईहा, त उहां ककरो एगोट घर में रईहा, जब ले ओ गांव ले बिदा नई होईहा।

⁵ जे कोनो तुमन कर खभेर ला नई मानही, त तुमन ओ गांव ले निकले घनी, परभू ओमन ला एक दिन जरूर दंड देही, एला बताए बर, अपन गोड़ कर धुररा ला झरराए राखीहा।”

⁶ तेकर ओमन निकेल के, गांव-गांव में सुघर खभेर ला सुनावत, अऊ सबेच जघा कर बेमरीहा मन ला, ठीक करत जात रहीन।

हेरोदेस कर चिंता

⁷ गलील कर राजा हेरोदेस अंतिपास हर, ईसू कर काम कर चरचा सुईन के घबराए गईस, काबरकि तनिक झेमन कहीन कि यूहन्ना बतिस्मा देवईया, जेहर मएर गए रहीस, ओहर जी उठीस हवे,

⁸ अऊ तनिक झेमन कहीन, कि एलियाह देखार देहीसे, अऊ तनिक दूसर झेमन कहीन, कि आगू कर अगमजानी मन में ले, कोनो हर फेर जी उठीस हवे।

⁹ बकिन हेरोदेस राजा हर कहीस, “मंए तो यूहन्ना कर मूड़ी ला पुजवाए देहे रहें, त अब एहर कोन लागे, जेकर बारे में मंए एकस अचमहों कर गोएठ ला सुनत हों?” अऊ ओहर ईसू ला देखे कर कोसिस करे लागीस।

ईसू पांच हजार मईनसे मन ला खवाथे

¹⁰ तेकर जे घनी परेरीत मन फिर के आईन, त जे जाएत ओमन करे रहीन, ओ सब जाएत ला ईसू के बताए देहीन, त ईसू ओमन ला अलगे कएर के, बेतसएदा नांव कर एगोट सहर में ले गईस।

¹¹ बकिन भीड़ कर मईनसे मन जाएन गईन, कि ईसू हर आईस हवे, तेकर ओमन ईसू कर पाछू होए लेहीन, त ईसू हर खुसी-खुसी ओमन जग मिलीस, अऊ ओमन जग परमेस्वर कर राएज कर, गोएठ बात करे लागीस अऊ जे बेमरीहा मन चंगा होए बर चाहत रहीन, ओमन ला चंगा करीस।

¹² जे घनी बेर बुड़े लागीस, त बारहों परेरीत मन आए के ईसू ला कहीन, “तंए ए भीड़ ला बिदा कर, तेमेकि चाएरो कती कर गांव, अऊ बस्ती में जाए के रहे बर, अऊ खाए बर जुगाड़ करें, काबरकि एजग हर सुनसान हवे।”

¹³ ईसू हर ओमन ला कहीस, “तुहींच मन एमन ला खाए बर देआ।” तेकर ओमन कहीन, “हमर जग तो पांच ठे रोटी, अऊ दुई गोट मछरी कर छोंएड़ अऊ कांही नईए, बकिन अगर हमन जाए के, ए सब मईनसे मन बर खाए बर बेसाए लानबो, त पूईर सकथे।”

¹⁴ ओमन करीबन पांच हजार सवांग रहीन। तेकर ईसू हर अपन चेला मन ला कहीस, “ए मईनसे मन ला, पचास-पचास कर पांएत में बईठाए देआ।”

¹⁵ त ओमन ओहीच कस करीन, अऊ सब झेला बईठाए देहींन।

¹⁶ तेकर ईसू हर पांच गोट रोटी ला, अऊ दुई गोट मछरी ला धरीस, अऊ सरग कती ला देख के, परमेस्वर कर धनबाद करीस, अऊ टोएर-टोएर के अपन चेला मन ला देहत गईस, कि ओमन मईनसे मन ला परोसें।

¹⁷ तेकर सब झन खाए के अघाए गईन अऊ चेला मन, बांचल टुटका ला बारह ठे पथिया में भरीन।

पतरस हर ईसू ला मसीह मानथे

¹⁸ एक दिन ईसू हर एके झन पराथना करत रहीस, अऊ ओकर चेला मन ओकर संगे रहीन, त ईसू हर ओमन जग पूछीस, “मईनसे मन मोके का कथें?”

¹⁹ ओमन जबाब देहीन, तनिक मईनसे मन कथें, “यूहन्ना बतिस्मा देवईया, अऊ तनिक झेमन एलीयाह, अऊ तनिक झेमन कथें कि जूनहा अगमजानी में ले, कोनो हर जी उठीस हवे।”

²⁰ तेकर ईसू हर ओमन जग पूछीस, “बकिन तुमन मोके का कहथा?” त पतरस हर जबाब देहीस, “परमेस्वर कती ले भेजल मसीह।”

²¹ तब ईसू हर ओमन ला अगियां देके कहीस, एला कोनोच के झईन बतईहा।

²² फेर ईसू ओमन ला कहीस, “मंए मईनसे कर बेटा, जरूर ढेरेच दुख सहूं, अऊ यहूदी मुखिया मन, अऊ मुख याजक मन, अऊ कानहूंन कर सिखोईया मन, मोके नई पतियाहीं अऊ माएर देहीं, अऊ मंए तीसर दिन में जी उठहूं।”

ईसू कर चेला बने कर मतलब

²³ तेकर ईसू ओमन ला कहीस, “जे कोनो मोर चेला बने बर चाहथे, ओके अपन ईछा ला छोंड़े बर परही, अऊ सगर दिन अपन कुरूस उठाए के, मनेकि दुख सएह के मोर पाछू में चले।

²⁴ अगर तुमन अपन जिनगी ला बचाए बर चईहा, त तुमन अमर जिनगी ला गंवाए देईहा। बकिन अगर तुमन मोर बर, अपन जिनगी ला गंवाए देईहा, त तुमन अमर जिनगी ला पाए जईहा।

²⁵ अगर कोनो मईनसे हर सबेच संसार ला पाए के, परमेस्वर कर संगे अमर जिनगी ला गंवाए दारही, त ओके का फयदा होही?

²⁶ जे कोनो हर मोके अऊ मोर गोएठ ले लजाही, त मंए मईनसे कर बेटा, जे घनी अपन दाऊ कर, अऊ पबितर सरगदूत मन कर महिमा संगे आहूं, त ओमन जग लजाहूं।

²⁷ मंए तुमन ला फूरोंच कहथों, कि जेमन एजग ठड़होईन हवें, एमन में ले कोनो एकस हवें, कि जब ले परमेस्वर कर राएज ला देख नई लेहीं, तब ले नई मरहीं।”

ईसू कर रूप हर बदलीस

²⁸ ए बात हर होए कर करीबन आठ दिन कर पाछू, ईसू हर पतरस, यूहन्ना अऊ याकूब कर संगे पराथना करे बर पहार में गईन।

²⁹ जे घनी ओ पराथना करतेच रहीस, त ओकर चेहरा कर रूप हर बदेल गईस, अऊ ओकर ओढ़ना हर ढेरेच उजर होए के चमके लागीस।

³⁰ त तुरतेंच दुई ठे मईनसे मन, ओकर जग परगट होए के गोठियात रहीन, अऊ ओमन तईहा जुग कर अगमजानी मूसा अऊ एलीयाह रहीन।

³¹ ओमन महिमा कर संगे दिखत रहीन। ईसू कर मरे कर बारे में गोठियात रहीन, जेला ओके यरूसलेम में पूरा करे बर रहीस।

³² ओही घनी पतरस अऊ ओकर संगता मन नींद में माते रहीन, अऊ जे घनी जागीन, त ओमन ईसू कर महिमा, अऊ ओकर संगे दुई ठे मईनसे मन ला ठड़होवल देखीन।

³³ जे घनी ओ दुनो झे ईसू जग ले जाए लागीन, त पतरस हर ईसू जग कहीस, “ए मालीक, हमरे एजग रहतेन, त ढेरेच बढ़िहां होतीस, एकरे ले हमरे तीन गोट झाला बनाबो, एगोट तोर बर, एगोट मूसा बर, अऊ एगोट एलियाह बर।” पतरस नई जानत रहीस, कि ओहर का कहथे।

³⁴ ओहर ए कहतेच रहीस, तेहीच घनी, बदरी हर आए के ओमन ला ढांएप लेहीस, अऊ जे घनी ओमन बदरी में ढपाए लागीन, त डराए गईन

³⁵ ते घनी ओ बदरी ले एगोट गोएठ सुनाईस, “एहर मोर चुनल बेटा लागे, एकर गोएठ ला सुना।”

³⁶ ए गोएठ ला सुईन के ओमन इते-ऊते ला देखे लागीन, त ओजग ईसू कर छोंएड़ अऊ कोनोच के नई पाईन, त ओमन चुप होए गईन, अऊ जे जाएत ओमन देखे रहीन, ओकर बारे में ढेरेच दिन ले ककरो जग गोएठ बात नई करीन।

दुस्टआत्मा धरल लईका ला ईसू चंगा करथे

³⁷ तेकर दूसर दिन, ईसू अऊ ओकर तीन ठे चेला मन पहार ले उतरीन, त एगोट बड़खा भीड़ ईसू जग मिले बर आईस।

³⁸ सुना, ओ भीड़ में ले एगोट मईनसे हर किरलाए के कहीस, “ए गुरूजी, मंए तोर जग बिनती करथों, कि मोर बेटा कर ऊपरे दया कएर के ओके बचाए ले, काबरकि ओ मोर एकेच ठन बेटा हवे।

³⁹ सुन, एगोट दुस्टआत्मा हर ओके धरथे, अऊ ओहर अचाकन किरलाए उठथे, अऊ दुस्टआत्मा हर ओके अईसना मूरकेटथे, कि ओकर लार गंजार निकले लागथे, अऊ ओके सताथे अऊ ढेरेच मुसकिल ले छोंड़थे।

⁴⁰ मंए तोर चेला मन जग बिनती करें, कि ओमन ओ दुस्टआत्मा ला निकाएल दें, बकिन निकाले बर नई सकीन।”

⁴¹ ईसू हर जबाब देहीस, “ए बिस्वास नई करोईया, अऊ भटकल मईनसे मन, मंए केतना दिन ले तुमन कर संगे रहूं, अऊ तुमन कर गोएठ ला सहत रहूं? तोर बेटा ला एजग लान।”

⁴² जे घनी ओमन लईका ला लानत रहीन, तेहीच घनी ओ दुस्टआत्मा हर ओके पटेक के मुरकेट देहीस, बकिन ईसू हर दुस्टआत्मा ला डांटीस, अऊ लईका ला ठीक कएर के ओकर दाऊ ला सोंएप देहीस।

⁴³ तेकर सबेच मईनसे मन, परमेस्वर कर बड़खा सामर्थ कर काम ला देख के, अकचकाए गईन। बकिन जे घनी सब मईनसे मन ओ काम ला, जेला ईसू करत रहीस, देख के अचमहों होए गईन। त ईसू हर अपन चेला मन ला कहीस

ईसू हर, अऊ एक दाएर अपन मिरतु कर अगमबानी करथे

⁴⁴ “तुमन ए गोएठ ला धियान लगाए के सुना, अऊ सुरता करा, काबरकि मंए, मईनसे कर बेटा अपन दुसमन मन कर हाथ में धरुवाए जाए बर हों।”

⁴⁵ बकिन चेला मन, जे गोएठ ला ईसू हर गोठियात रहीस ओला नई समझत रहीन, अऊ ए बात हर ओमन जग ले लुकाए रहीस, तेमेकि ओमन एला झईन जाएन पाएं, अऊ ओमन ए गोएठ कर बारे में, ईसू जग पूछे बर डरावत रहीन।

कोन बड़खा हवे

⁴⁶ फेर चेला मन में ए बहस होए लागीस, कि हमन में ले सबले बड़खा कोन हवे?

⁴⁷ बकिन ईसू हर, ओमन कर मन कर बिचार ला जाएन गईस, अऊ एगोट लईका ला धईर के, अपन आगू में ठड़हुवाए देहीस,

⁴⁸ अऊ ओमन जग कहीस, “जे कोनो मोर नांव में, ए लईका ला अपनाथे, ओहर मोके अपनाथे, अऊ जे कोनो मोके अपनाथे, ओहर मोर दाऊ जेहर मोके भेजीस हवे ओके ला अपनाथे, काबरकि तुमन में ले जेहर सबले छोटे हवे, ओही हर सब झन ले बड़े हवे।”

⁴⁹ एला सुईन के यूहन्ना हर ईसू जग कहीस, “ए गुरूजी, हमरे एगोट मईनसे ला, तोर नांव ले दुस्टआत्मा ला निकालत देखेन, हमरे ओके रोकेन काबरकि ओहर हमर संगे होए के, तोर पाछू में नई चले।”

⁵⁰ बकिन ईसू हर कहीस “ओके झईन रोका, काबरकि जेमन तुमन कर बिरोध में नईएं, ओमन तुमन कती हवें।”

सामरी मन कर द्वारा ईसू कर बिरोध

⁵¹ जे घनी ईसू कर सरग में जाए कर दिन हर, ठांवें आए गए रहीस, त ओहर यरूसलेम जाए कर बिचार ठाएन लेहीस।

⁵² ईसू हर अपन जाए कर आगू, सामरी मन कर एगोट गांव में अपन खभरीहा मन ला भेजीस, कि ओकर आए बर जघा तियार करें।

⁵³ तेकर ओमन ऊहां पहुंचीन, बकिन उहां कर मईनसे मन ओकर सवागत नई करीन, अऊ वापिस फिराए देहीन, काबरकि ओमन जाएन गईन, कि ईसू यरूसलेम सहर कती जाथे।

⁵⁴ एला देख के ईसू कर चेला, याकूब, अऊ यूहन्ना हर कहीन, “ए परभू, का हमन सरग ले आगी गिराए के, एमन ला भसम कएर देई?”

⁵⁵ बकिन ईसू हर, पाछू कती देख के ओमन ला घुड़काईस अऊ कहीस “तुमन नई जानत, हवा कि तुमन का कहत हवा, काबरकि मईनसे कर बेटा, मईनसे मन कर परान ला नास करे बर नहीं, बलकि परान ला बचाए बर आईस हे।”

⁵⁶ फेर ओजग ले ओमन कोनो दूसर गांव में चएल देहींन।

ईसू कर चेला बने कर कीमत

⁵⁷ जे घनी ओमन डगर में जात रहीन, त कोनो हर ईसू ला कहीस, “जिहां-जिहां तंए जाबे, मंहू तोर पाछू-पाछू जाहूं।”

⁵⁸ फेर ईसू हर कहीस, “सिटका मन कर रहे बर माड़ा, अऊ अगास कर चराई मन बर तो खोंता रथे, बकिन मंए, मईनसे कर बेटा मोर बर बिसोए कर जघोच नईए।”

⁵⁹ ईसू हर दूसर झन ला कहीस, “मोर पाछू होए ले।” त ओहर कहीस, “ए परभू, मोके जाए दे, कि मंए आगू मोर मरल दाऊ ला माटी दे आओं।”

⁶⁰ ईसू हर ओके ला कहीस, “मरल मन ला अपन मुरदा ला गाड़े दे, बकिन तंए जाए के, परमेस्वर कर राएज कर बारे में परचार कर।”

⁶¹ फेर अऊ एक झन हर कहीस, “ए परभू, मंए तोर चेला बएन जाहूं, बकिन आगू मोके जाए दे, कि अपन घर कर मईनसे मन जग ले, बिदा लेके आओं।”

⁶² ईसू हर ओके ला कहीस, “जे कोनो हर नांगर कर मुठीया ला धएर के, पाछू कती ला देखथे, ओहर परमेस्वर कर राएज कर लाएक नईए।”