लूका 7 - Surgujia Bible

सुबेदार कर बिस्वास

¹ जे घनी ईसू हर, मईनसे मन जग ए सब उपदेस ला सिखाए दारीस, त कफरनहूम गांव में गईस।

² उहां रोमी सेना कर सुबेदार कर एगोट दुलरुवा दास रहीस, जेहर बेमारी ले मरोईया रहीस।

³ ओ सुबेदार हर ईसू कर बारे में सुईन के, यहूदी मन कर तनिक मुखिया मन ला, ओकर जग बिनती करे बर भेजीस, कि आए के मोर दास ला चंगा कएर दे।

⁴ ओ यहूदी मुखिया मन ईसू कर ठांवें आईन, अऊ ईसू जग ढेरेच बिनती कएर के कहे लागीन, “ओहर तोर मदेत कर लाएक हवे, कि तंए ओकर बर एही कस कर,

⁵ काबरकि ओहर हमर यहूदी मईनसे मन जग मया करथे, अऊ ओही हर, हमर धरम सभा कर घर ला बनवाईस हवे।”

⁶ ईसू हर ओमन कर संगे गईस, बकिन जे घनी ईसू ओकर घर कर ठांवें पहुंच गए रहीस, त सुबेदार हर, अपन संगता मन ला ए कहे बर ओकर जग भेजीस, “ए परभू, तंए परेसान झईन हो, काबरकि मंए एकर लाएक नई हों, कि तंए मोर घरे आओ।

⁷ एकरे ले कि मंए तोर जग आए कर लाएक नई हों, बकिन तंए सिरीप कएह दे, त मोर दास हर जरूर चंगा होए जाही।

⁸ मंहू सासन कर अधीन में हों, अऊ सिपाहीयो मन मोर अधीन में हवें, अऊ एक झन ला कहथों, ‘जा’ त ओहर जाथे, अऊ दूसर झन ला कहथों, ‘आ’ त ओहर आथे, अऊ अपन कोनो दास ला कहथों, कि ‘एला कर’ त ओहर करथे।”

⁹ एला सुईन के ईसू हर अचमहों होए गईस, अऊ ईसू हर फिर के अपन पाछू आवत भीड़ ला, कहीस, “मंए तुमन ला कहथों कि, ए गैर यहूदी में जे बिस्वास ला मंए देखें, अईसना बिस्वास ला इसराएल में भी कहों नई पाएं।”

¹⁰ त भेजल मईनसे मन, ओ जग ले घरे फिर के, ओ दास ला चंगा होवल पाईन।

ईसू एगोट अदावेंन कर मरल बेटा ला जीयाथे

¹¹ तेकर पाछू, ईसू हर अपन चेला मन कर संगे, नाईन नांव कर एगोट गांव में गईस। अऊ एगोट बड़खा भीड़ हर ओकर संगे जात रहीस।

¹² जे घनी ईसू हर गांव कर दुरा में पहुंचीस, त देखीस कि, मईनसे मन एगोट मुरदा ला बाहरी माटी देहे बर ले जात रहीन। ओहर अपन दाई कर एकेच ठन बेटा रहीस। ओकर दाई हर अदावेंन रहीस, अऊ ओ सहर कर एगोट बड़खा भीड़ हर, ओकर दाई कर संगे रहीस।

¹³ ओके देख के परभू हर, सोगे होईस अऊ ओके ला कहीस, “झईन रो।”

¹⁴ तेकर ईसू हर ठांवें आए के, अरथी ला छुईस, अऊ कंधा देवईया मन ठड़होए गईन, तेकर ईसू हर कहीस, “ए जवान, मंए तोके कहथों, उईठ जा।”

¹⁵ तेही घनी ओ मरल हर उईठ बईठीस, अऊ गोठियाए लागीस, ईसू हर ओके, ओकर दाई ला सोंएप देहीस।

¹⁶ एला देख के ओ सब झन कर ऊपरे डर भीन गईस, अऊ ओमन परमेस्वर कर बड़ाई कएर के कहे लागीन, “हमर मझारे एगोट बड़खा अगमजानी हर उठीसे, अऊ परमेस्वर हर अपन मईनसे मन कर मदेत करे बर आईसे।”

¹⁷ ईसू कर बारे में, ए खभेर हर सबेच एहूदिया जिला अऊ ओकर आस-पास कर सबेच गांव में फईल गईस।

यूहन्ना बतिस्मा देवईया कर सवाल

¹⁸ ईसू हर जे जाएत ला करे रहीस, ओकर बारे में यूहन्ना कर चेला मन ओके ला बताईन।

¹⁹ तेकर यूहन्ना हर, अपन दुई ठे चेला मन ला, ईसू जग ए पूछे बर भेजीस, “का अवईया मसीह तंही लागस, कि हमरे कोनो दूसर झन कर डगर देखी?”

²⁰ ओमन ईसू जग आए के कहीन, “यूहन्ना बतिस्मा देवईया हर, हमन ला तोर जग ए पूछे बर भेजीस हवे, कि का अवईया मसीह तंही लागस, कि हमन कोनो दूसर झन कर डगर देखी?”

²¹ ओही घनी ईसू हर ढेरेच बेमरीहा, अऊ दुखलीहा मन ला चंगा करीस, अऊ दुस्टआत्मा धरल मईनसे मन ला छोंड़ाईस, अऊ ढेरेच अकन अंधा मन ला आंएख देहीस,

²² अऊ ईसू हर ओमन ला कहीस, “जे जाएत ला तुमन देखेहा अऊ सुनेहा, ओला जाए के यूहन्ना ला बताए देआ, कि अंधा मन देखथें, लंगड़ा मन रेंगथें-बूलथें, कोढ़ी मन सुध करल जाथें, भईरा मन सुनथें, मरल मन ला जियाल जाथें, अऊ गरीब मन ला सुघर खभेर सूनाल जाथे।”

²³ धन्य हवें ओमन, जेमन बिस्वास करथें कि अवईया मसीह मंहीच लागों।

²⁴ जे घनी यूहन्ना कर भेजल चेला मन, ओजग ले चएल देहीन, त ईसू हर यूहन्ना कर बारे में, मईनसे मन जग कहे लागीस, “तुमन सुनसान जघा में का देखे बर गए रहा? का बईहर ले हिलत सन कर पौधा कस एगोट कमजोर मईनसे ला?

²⁵ त फेर तुमन का देखे बर गए रहा? का महंगा कपड़ा पहिरल मईनसे ला? सुना, जेमन महंगा कपड़ा पहिरथें, अऊ सूख-बीलास में रथें, ओमन सुनसान जघा में नहीं, बकिन राएज गढ़ी में रहथें।

²⁶ त फेर का देखे बर गए रहा? का कोनो अगमजानी ला? हओ, मंए तुमन ला कहथों, कि ओहर अगमजानीयो मन ले बड़खा हवे।

²⁷ एहर ओही लागे, जेकर बारे में परमेस्वर कर किताब में लिखल हवे, कि ‘सुन, मंए अपन खभरीहा ला तोर आगु-आगु भेजथों, जेहर तोर आगू में डगर ला तियार करही।’

²⁸ मंए तुमन ला कहथों, कि अझेर ले जेतना झेमन, सवांगीन मन ले जनमीन हवें, ओमन में यूहन्ना ले बड़खा कोनो नईए, बकिन जेहर परमेस्वर कर राएज में सबले छोटे हवे, ओहर यूहन्ना ले बड़खा हवे।”

²⁹ ए गोएठ ला सुईन के, सब मईनसे मन अऊ लगान लेवईयो मन, यूहन्ना कर बतिस्मा लेके, परमेस्वर कर डगर ला सचा माएन लेहीन।

³⁰ बकिन फरीसी मन अऊ यहूदी कानहूंन कर सिखोईया मन, यूहन्ना जग बतिस्मा नई लेहीन, अऊ अपन बारे में परमेस्वर कर योजना ला नकाएर देहीन।

³¹ “मंए, ए पीढ़ी कर मईनसे मन कर तुलना काकर संगे करों? कि एमन काकर कस हवें?

³² ओमन, ओ बजार में बईठल लईका मन कस हवें, जेमन एक दूसर ला चिकेर के कहथें, ‘हमरे तुमन बर बसुरी बजाएन, अऊ तुमन नई नाचा, हमरे दुख कर गीत गाएन, बकिन तुमन नई रोया।’

³³ काबरकि यूहन्ना बतिस्मा देवईया हर, अंगूर कर रस ला कभों नई पीस, अऊ ओहर उपास करत रहीस। बकिन तुमन कहथा, कि ओकर ऊपरे दुस्टआत्मा हवे।

³⁴ मंए, मईनसे कर बेटा खात पीयत आए हों, अऊ तुमन कहथा, ‘देखा, एहर तो पेटहा अऊ पियकड़ मईनसे, लगान लेवईया अऊ आने पापी मन कर संगता लागे।’

³⁵ बकिन जेमन परमेस्वर कर गियान कर पाछू चलथें, ओकर जिनगी कर चलते ओही गियान हर, सचा ठहराल गईसे।”

एक झन पपहीन सवांगीन हर परभू ईसू कर ऊपरे आंतर तेल लगाथे

³⁶ फेर कोनो फरीसी मईनसे हर, ईसू ला अपन घरे खाए बर नेवता देहीस अऊ ईसू हर ओ फरीसी कर घरे जाए के, खाए बर बईठीस।

³⁷ ओ सहर में एगोट पपहीन सवांगीन रहीस, ओके ए पता चलीस कि, ईसू हर ओ फरीसी कर घरे खाए बर बईठीसे, तेकर ओहर संगमरमर कर सीसी में आंतर तेल ला लानीस,

³⁸ त ओहर ईसू कर पाछू, ओकर गोड़ जग रोवत ठड़होए गईस। अऊ अपन आंसू ले ईसू कर गोड़ ला भिजाए लागीस, अऊ अपन चुंदी ले पोंछीस अऊ ओकर गोड़ ला चुम-चुम के आंतर तेल ला लगाईस।

³⁹ एला देख के, ओ फरीसी जेहर ईसू ला बलाए रहीस, अपन मन में सोंचे लागीस, “अगर एहर अगमजानी होतीस, त जाएन जातीस कि एहर, जेहर ओके छुअथे, ओहर कोन अऊ कईसना सवांगीन हवे, काबरकि ओहर तो पपहीन हवे।”

⁴⁰ ईसू हर ओके जबाब देहीस, “ए समोन, मोके तोर जग कांही कहे बर हवे।” ओहर कहीस, “ए गुरूजी, कह।”

⁴¹ ईसू हर ओके ला कहीस, “कोनो सेठ हर, दुई झन मईनसे ला करजा देहे रहीस, एक झन ला पांच सौ दिनार, अऊ दूसर झेला पचास दिनार।

⁴² जे घनी ओमन दुनो झन ठे करजा पटाए बर कांही नई रहीस, त ओहर दुनो झन ला छमा कएर देहीस। एकरले ओमन में ले, कोन ओकर जग ढेरेच मया करही?”

⁴³ ओ समोन फरीसी हर जबाब देहीस, “मोर समझ में ओहर, जेकर ढेरेच करजा हर माफ होईस।” ईसू हर ओके ला कहीस, “तंए ठीकेच कहे।”

⁴⁴ अऊ ईसू हर ओ सवांगीन कती ला देख के समोन ला कहीस, “का तंए ए सवांगीन ला देखत हस? मंए तोर घरे आएं, बकिन तंए मोके गोड़ धोए बर पानी नई देहे, अऊ एहर मोर गोड़ ला अपन आंसू में भिजाए के, अपन चुंदी ले पोंछीस।

⁴⁵ तंए मोके नई चुमहे, बकिन जब ले मंए आए हों, तब ले एहर मोर गोड़ ला चुमहत हवे।

⁴⁶ तंए मोर मूड़े तेल नई चुपराए, बकिन एहर मोर गोड़ में आंतर तेल चुपराईस हवे।

⁴⁷ तेकर ले मंए तोर जग कहथों, कि एकर पाप जेहर ढेरेच रहीस, ओहर छमा होईस, एकर बर एहर ढेरेच मया करीस, बकिन जेकर थोरहें छमा होईसे, ओहर थोरहें मया करथे।”

⁴⁸ अऊ ईसू हर सवांगीन ला कहीस, “तोर पाप हर छमा होईस।”

⁴⁹ तेकर जेमन ओकर संगे खाए बर बईठे रहीन, ओमन अपन-अपन मन में सोंचे लागीन, “एहर कोन लागे, जेहर पापोच छमा करथे?”

⁵⁰ बकिन ईसू हर सवांगीन ला कहीस, “तोर बिस्वास हर, तोके पाप कर दंड ले बचाए लेहीस हवे, सूघरे-सूघर चएल जा।”