लूका 3 - Surgujia Bible

यूहन्ना बतिस्मा देवईया कर सेवकाई

¹ एहर ओ समय कर बात हवे, जे घनी महाराजा तिबिरियुस हर पंदरा बछर ले बड़खा देस रोम में, राएज करत रहीस अऊ जे घनी पुंनतियुस पीलातूस हर, एहूदिया जिला कर राएजपाल रहीस अऊ गलील जिला में हेरोदेस हर, राएज करत रहीस अऊ ओकर भाई फिलीपुस हर, इतूरिया जिला अऊ तरखोनीतिस जिला में राएज करत रहीस, अऊ लिसानियास हर अबिलेने जिला में राएज करत रहीस,

² अऊ जे घनी हना अऊ काइफा, यरूसलेम में महायाजक रहीन, ते घनी परमेस्वर कर बचन हर, जकरयाह कर बेटा यूहन्ना जग पहुंचीस, ओ घनी ओहर सुनसान जघा में रहत रहीस।

³ ओही घनी यूहन्ना हर एरदन नदी कर ठांवें-ठांवें कर सब जिला में जाए के, ए परचार करे लागीस, तुमन अपन पाप ला छोंएड़ देआ, परमेस्वर जग आए जावा अऊ बतिस्मा लेआ, त पाप कर छमा मिलही।

⁴ यसायाह अगमजानी कर किताब में, यूहन्ना कर बारे में लिखल हवे, “सुनसान जघा में एक ठे चिकरोईया कर गोएठ हर सुनात हवे, कि परभू कर डगर ला तियार करा, ओकर बर सोज डगर बनावा।

⁵ सब घटीया मन ला भाएट देहल जाही, अऊ सब पहार अऊ टिकरा मन ला खालहे करल जाही, अऊ जेहर टेड़गा हवे, ओला सोज बनावल जाही, अऊ जेहर ऊंच खाल हवे, ओला समथर डगर बनावल जाही।

⁶ अऊ सब मईनसे मन, परमेस्वर कती ले भेजल, उद्धार करोईया ला देखहीं।”

⁷ जे भीड़ कर मईनसे मन, यूहन्ना जग बतिस्मा लेहे बर आत रहीन, ओमन जग ओहर एकस परचार करीस, (तुमन सांप कर जईसना खतरनाक अऊ कपटी हवा) “ए करेत सांप कर लईका मन, तुमन के कोन चेताए देहीस कि, परमेस्वर कर दंड ले भागा?

⁸ तुमन अपन जिनगी ले एला साबित कएर देआ, कि सहीच में तुमन अपन पाप ला छोंएड़ देहे हवा, अऊ परमेस्वर कती अपन मन ला लगाए हवा। एकस झईन सोंचा, कि हमर पूरखा अबराहम लागे अऊ हमके कांहीच नई होही, काबरकि परमेस्वर हर, ए पखनोच ले तो, अबराहम बर लईका बनाए सकथे।

⁹ अझरो ले रूख कर जएर में, परमेस्वर कर कोरोध कर टांगी मड़हाल हवे, एकरे बर जे-जे रूख हर सुघर फर नई फरही, ओला काएट के आगी में ढोए देहल जाही।”

¹⁰ तेकर मईनसे मन ओकर जग पूछीन, “त परमेस्वर कर, ए कोरोध ले बांचे बर हमरे का करी?”

¹¹ तेकर यूहन्ना हर ओमन ला कहीस, “जेकर जग दुई गोट अंगा हवे, ओहर ओके ला दे दे, जेकर जग एको ठन नईए, अऊ जेमन जग खाए बर हवे, ओहू हर वईसनेच करे।”

¹² लगान लेवईया मन भी बतिस्मा लेहे बर आईन, अऊ ओकर जग पूछीन, “ए गुरूजी, हमरे का करी?”

¹³ यूहन्ना हर ओमन ला कहीस, “अपन काम में ईमानदार रहा, रोमी सरकार हर तुमन ला, जेतना लेहे कर अधिकार देहीसे, ओकर ले अगराहा झईन लेईहा।”

¹⁴ तनिक सिपाहीयो मन ओकर जग पूछीन, “हमरे का करी?” यूहन्ना हर ओमन ला कहीस, “ककरो जग जबरजसती झईन करीहा, अऊ ककरो ऊपरे झूठ-मूठ कर बईदनामी झईन करीहा, अऊ अपन मजदूरी में संतोस करीहा।”

¹⁵ सबेच मईनसे मन मसीह कर आए कर असरा करत रहीन, अऊ सब मईनसे मन अपन-अपन मन में, यूहन्ना कर बारे में सोंचत रहीन, कि का एही तो मसीह ना लागे?

¹⁶ तेकर यूहन्ना हर ओ सब झन ला कहीस, “मंए तो तुमन ला पानी ले बतिस्मा देहथों, बकिन जेहर अवईया हवे, ओहर मोरो ले बड़खा अऊ ढेरेच महान हवे, कि मंए तो ओकर पनही कर बांधल डोरा ला छोरोवईया, एगोट गुलाम बने कर लईकोच नई हों, ओहर तुमन ला पबितर आत्मा, अऊ आगी ले बतिस्मा देही।

¹⁷ ओकर सुपा ओकर हाथ में हवे, अऊ ओहर अपन कोठार ला, बढ़िहां ले सफा करही, अऊ गहूं ला अपन कोठी में राखही, बकिन बूसा ला ओ आगी में लेस देही, जे आगी हर कभों नई बिताही।”

¹⁸ अऊ एही कस ढेरेच चेताए के यूहन्ना हर, मईनसे मन ला मसीह कर आए कर बारे में, सुघर खभेर ला सुनात रहीस।

¹⁹ राजा हेरोदेस हर अपन भाई कर परानी, हेरोदियास ला राखे रहीस, अऊ एकर संगे-संगे अऊ ढेरेच घिनक कामो ला करे रहीस, तेकर ले यूहन्ना हर, सब कर आगू में ओके ला घुड़काईस।

²⁰ तेकर ले राजा हेरोदेस हर यूहन्ना ला जेहल में हुरेक देहीस। एहर तो ओकर एक ठे अऊ बड़खा गलती रहीस।

यूहन्ना बतिस्मा देवईया हर ईसू ला बतिस्मा देथे

²¹ जेहल में जाए कर आगू, एक दिन यूहन्ना हर मईनसे मन ला बतिस्मा देहत रहीस, तेही घनी ईसू हर भी बतिस्मा लेके पराथना करत रहीस, त अगास हर उघेर गईस,

²² अऊ पबितर आत्मा हर देंह कर रूप लेके, परेंवा कस ओकर ऊपरे उतरीस, अऊ सरग ले परमेस्वर कर गोएठ हर सुनाईस, “तंए मोर दुलरुवा बेटा लागस, मंए तोर ले ढेरेच खुस हवों।”

ईसू कर पूरखा मन कर सूची

²³ जे घनी ईसू हर अपन सेवा ला सुरू करीस, ओ घनी ओहर करीबन तीस बछर कर रहीस, अऊ (जेकस मईनसे मन समझत रहीन) कि ईसू हर यूसुफ कर बेटा रहीस, अऊ यूसुफ हर एली कर बेटा,

²⁴ अऊ एली हर मत्तात कर बेटा, अऊ मत्तात हर लेवी कर बेटा, अऊ लेवी हर मलकी कर बेटा, अऊ मलकी हर एना कर बेटा, अऊ एना हर यूसुफ कर बेटा,

²⁵ अऊ युसूफ हर मतियाह कर बेटा अऊ मतियाह हर आमोस कर बेटा, अऊ आमोस हर नहूम कर बेटा, अऊ नहूम हर असलयाह कर बेटा, अऊ असलयाह हर नोगह कर बेटा,

²⁶ अऊ नोगह हर मात कर बेटा, अऊ मात हर मतियाह कर बेटा, अऊ मतियाह हर सीमी कर बेटा, अऊ सीमी हर योसेख कर बेटा, अऊ योसेख हर योदाह कर बेटा,

²⁷ अऊ योदाह हर यूहन्ना कर बेटा, अऊ यूहन्ना हर रेसा कर बेटा, अऊ रेसा हर जरूबाबिल कर बेटा, अऊ जरूबाबिल हर सालतिएल कर बेटा, अऊ सालतीएल हर नेरी कर बेटा,

²⁸ अऊ नेरी हर मलकी कर बेटा, अऊ मलकी हर अदी कर बेटा, अऊ अदी हर कोसाम कर बेटा, अऊ कोसाम हर इलमोदाम कर बेटा, अऊ इलमोदाम हर एर कर बेटा,

²⁹ अऊ एर हर एसू कर बेटा, अऊ एसू हर इलाजार कर बेटा, अऊ इलाजार हर ओरीम कर बेटा, अऊ ओरीम हर मत्तात कर बेटा, अऊ मत्तात हर लेवी कर बेटा,

³⁰ अऊ लेवी हर समोन कर बेटा, अऊ समोन हर यहूदा कर बेटा, अऊ यहूदा हर यूसुफ कर बेटा, अऊ यूसुफ हर ओनान कर बेटा, अऊ ओनान हर इलयाकीम कर बेटा,

³¹ अऊ इलयाकीम हर मलेआह कर बेटा, अऊ मलेआह हर मिननाह कर बेटा, अऊ मिननाह हर मतता कर बेटा, अऊ मतता हर नातान कर बेटा, अऊ नातान हर दाऊद कर बेटा,

³² अऊ दाऊद हर यिसै कर बेटा अऊ, यिसै हर ओबेद कर बेटा, अऊ ओबेद हर बोअज कर बेटा, अऊ बोअज हर सलमोन कर बेटा, अऊ सलमोन हर नहसोन कर बेटा,

³³ अऊ नहसोन हर अमीनादाब कर बेटा, अऊ अमीनादाब हर अदमीन कर बेटा, अऊ अदमीन हर अरनी कर बेटा, अऊ अरनी हर हीसतरोन कर बेटा, अऊ हीसतरोन हर फिरिस कर बेटा, अऊ फिरिस हर यहूदा कर बेटा,

³⁴ अऊ यहूदा हर याकूब कर बेटा, अऊ याकूब हर इसहाक कर बेटा, अऊ इसहाक हर अबराहम कर बेटा, अऊ अबराहम हर तीरह कर बेटा, अऊ तीरह हर नाहोर कर बेटा,

³⁵ अऊ नाहोर हर सरूग कर बेटा, अऊ सरूग हर रऊ कर बेटा, अऊ रऊ हर फिलिग कर बेटा, अऊ फिलिग हर एबीर कर बेटा, अऊ एबीर हर सिलह कर बेटा,

³⁶ अऊ सिलह हर केनान कर बेटा, अऊ केनान हर अरपछद कर बेटा, अऊ अरपछद हर सेम कर बेटा, अऊ सेम हर नूह कर बेटा, अऊ नूह हर लिमिक कर बेटा,

³⁷ अऊ लिमिक हर मथूसिलह कर बेटा, अऊ मथूसिलह हर हनोक कर बेटा, अऊ हनोक हर इरिद कर बेटा, अऊ इरिद हर महललेल कर बेटा, अऊ महललेल हर केनान कर बेटा,

³⁸ अऊ केनान हर एनोस कर बेटा, अऊ एनोस हर सेत कर बेटा, अऊ सेत हर आदम कर बेटा, अऊ आदम हर परमेस्वर कर बेटा रहीस।