लूका 23 - Surgujia Bible

राएजपाल पीलातूस कर आगू में ईसू

¹ तेकर सब दरबार कर मईनसे मन उईठ के, ईसू ला राएजपाल पीलातूस जग ले गईन।

² ओमन एकस कहीके, ओकर ऊपर दोस लगावत रहीन, “हमरे एके ला हमर मईनसे मन ला बहकात देखे हन, अऊ कहथे कि रोम कर महाराजा ला, लगान झईन देईहा अऊ अपने-आप ला मसीह अऊ राजा कहथे।”

³ राएजपाल पीलातूस हर ओके ला पूछीस, “का तंए यहूदी मन कर राजा लागस?” ईसू हर कहीस, “तंहीच तो कहत हस।”

⁴ तेकर राएजपाल पीलातूस हर, मुख याजक मन ला अऊ भीड़ ला कहीस, “मंए ए मईनसे में दोस लगाए कर कांहीच बात नई पाएं।”

⁵ बकिन ओमन अऊ जोर देके कहत रहीन, “एहर सबेच एहूदिया जिला कर मईनसे मन ला उपदेस देके, भड़कात हवे। एला ओहर गलील जिला में सुरू करे रहीस, अऊ अझेर इहां ले पहुंच गईस।”

⁶ ए बात ला सुईन के राएजपाल पीलातूस हर पूछीस, “का ए मईनसे हर गलील जिला कर लागे?”

⁷ जे घनी राएजपाल पीलातूस ला, ए पता चलीस कि ईसू हर हेरोदेस राजा कर जिला कर लागे, त ओके हेरोदेस राजा जग भेज देहीस, काबरकि ओ घनी हेरोदेस राजा हर यरूसलेम सहर में रहीस।

हेरोदेस राजा कर आगू में ईसू

⁸ हेरोदेस राजा हर ईसू ला देख के ढेरेच खुस होईस, काबरकि ओहर ढेरे दिन ले ईसू ला देखे बर करत रहीस, काबरकि ओकर बारे में ओहर सुने रहीस अऊ कोनो चमत्कार ईसू जग ले देखे बर करत रहीस।

⁹ हेरोदेस राजा हर ओकर जग ढेरेच बात ला पूछीस, बकिन ईसू हर ओके ला कांहीच नई बताईस।

¹⁰ मुख याजक मन अऊ कानहूंन कर सिखोईया मन ओ जग ठड़होए के, ओकर ऊपरे ढेरेच जोर देके दोस लगात रहीन।

¹¹ तेकर हेरोदेस राजा हर अपन सिपाही मन कर संगे, ईसू ला बईदनाम कएर के मजाक उड़ाईस अऊ राजा कस ओढ़ना पहिराए के, ओके राएजपाल पीलातूस जग वापिस भेज देहीस।

¹² ओही दिन ले पीलातूस अऊ हेरोदेस संगता बईन गईन; आगू ओमन एक दूसर कर दुसमन रहीन।

राएजपाल पीलातूस द्वारा ईसू ला मिरतु दंड

¹³ राएजपाल पीलातूस हर मुख याजक, अऊ दूसर अधिकारी मन ला अऊ मईनसे मन ला बलाईस;

¹⁴ अऊ कहीस, “तुमन ए मईनसे ला मोर जग ए कईह के, लाने हवा कि एहर मईनसे मन ला बहकाथे; अऊ सुना, मंए तुमन कर आगू में एके ला तजबीजें, बकिन एकर ऊपरे में कांहीच दोस ला नई पाएं, जेकस तुमन कहथा।

¹⁵ राजा हेरोदेस हर भी ओकर ऊपरे कांहीच दोस नई पाईस, अऊ एके ला मोर जग वापिस भेज देहीस अऊ सुना, एहर जान ले मारे लाएक, कांहीच गलती नई करीस हवे।

¹⁶ एकरले मंए एके ला कोड़ा मरुवाए के छोंएड़ देहत हों।”

¹⁷ (राएजपाल पीलातूस ला यहूदी मन कर फसह कर तिहार में, ओमन बर एक ठे कएदी ला, छोंड़े बर परत रहीस।)

¹⁸ ते घनी सब झे एके संगे किरलाए के कहीन, “एके ला माएर दे, अऊ हमर बर बरअबा ला छोंएड़ दे।”

¹⁹ बरअबा हर जेहल में रहीस, काबरकि ओहर यरूसलेम सहर में, रोमी सरकार कर बिरोध में लडाई-झगरा करे रहीस, अऊ कोनो मईनसे कर जान मारे रहीस

²⁰ बकिन राएजपाल पीलातूस हर ईसू ला छोंड़े बर करत रहीस, तेकर ले मईनसे मन ला फेर समझाईस,

²¹ बकिन ओमन किरलाए के कहे लागीन, “ओके ला कुरूस में चघाए दे, ओके ला कुरूस में चघाए के मरुवाए दे।”

²² राएजपाल पीलातूस हर ओमन ला तीसर तोर ले कहीस, “काबर? ए मईनसे हर का गलती करीस हवे? मंए एकर ऊपरे जान ले मारे लाएक कांहीच गलती नई पाएं हों, एकरे बर मंए एके ला कोड़ा लगवाए के छोंएड़ देहथों।”

²³ बकिन ओमन रोसे किरलाए-किरलाए के कहत रहीन, कि ओके ला कुरूस में चघाए दे, अऊ ओमन कर किरलाई कर जीत होईस।

²⁴ राएजपाल पीलातूस हर ओमन कर मांग ला माएन लेहीस।

²⁵ राएजपाल पीलातूस हर ओ आदमी ला छोंएड़ देहीस, जेला लड़ाई-झगरा अऊ जान मारे कर चलते जेहल में हूरके रहीन, (एहर ओही आदमी रहीस जेके ला छोंड़े कर मांग ओमन करत रहीन) अऊ ईसू ला ओमन कर हाथ में सोंएप देहीस कि ओमन जेकस चाहें, ओकस करें।

ईसू ला कुरूस में चघाईन

²⁶ जे घनी ईसू ला ले जात रहीन, ते घनी ओमन कुरेनी सहर कर समोन नांव कर एगोट मईनसे ला, गांव कती ले आवत देखीन अऊ ओके ला धएर के, ईसू कर कुरूस ला डोहाए देहीन कि ओला ईसू कर पाछू-पाछू ले चले।

²⁷ मईनसे मन कर ढेरेच बगरा भीड़ हर, ईसू कर पाछू जात रहीन अऊ ओ भीड़ में ढेरे अकन सवांघीनो मन रहीन, जेमन ओकर बर छाती पीट-पीट के, रोवत रहीन।

²⁸ ईसू हर ओमन कती ला देख के कहीस, “ए यरूसलेम कर बेटी मन, मोर बर झईन रोवा; बकिन तुमन अपन बर अऊ अपन लईका मन बर रोवा।

²⁹ काबरकि सुना, एकस दिन आवत हवे, जे घनी मईनसे मन कहीं, ‘धन्य हवें, ओमन जेमन बांझ हवें अऊ कभों आसापती नई होईन हवें, अऊ अपन छाती ले कभों दूध नई पीयाईन हवें।’

³⁰ ओ घनी ओमन बड़खा पहार मन जग कहे लागहीं, ‘हमर ऊपरे गिर जा अऊ घूंटरा मन जग कहे लागहीं कि हमके मन ला तोएप ले।’

³¹ काबरकि अगर ओमन कंचा रूख कर संगे एकस करत हवें, त झुरा रूख कर संगे अऊ का नई करहीं?”

³² ओमन ईसू कर संगे अऊ दुई झन अपराधी मन ला, मरुवाए बर ले जात रहीन।

³³ जे घनी ओमन ओ जघा में पहुंचीन, जे जघा ला खोपड़ी कथें, त ओजग ईसू ला अऊ ओ दुनो अपराधी मन ला, ओकर संगे कुरूस में चघाए देहीन, एक झेला ओकर जवनी कती अऊ दुसर झेला ओकर डेरी कती।

³⁴ तेकर ईसू हर कहीस, “ए दाऊ, एमन ला तंए छमा कएर देबे, काबरकि एमन नई जानें कि एमन का करत हवें।” तेकर सिपाही मन चिट्ठी डाएल के, ईसू कर ओढ़ना ला बांएट लेहीन।

³⁵ मईनसे मन ठड़होए के देखत रहीन अऊ यहूदी मन कर अधिकारी मन ए कहीके, ईसू कर मजाक उड़ाईन, “एहर आने झन ला बचाईस, अगर एहर परमेस्वर कती ले भेजल मसीह हवे, अऊ ओकर चुनल हवे, त अपन-आप ला बचाए ले।”

³⁶ सिपाहीयो मन ईसू कर ठांवें आए के, ओकर मजाक उड़ाईन अऊ अमट मेरावल अंगूर कर रस ला देके के कहत रहीन,

³⁷ “अगर तंए यहूदी मन कर राजा लागस, त अपन-आप ला बचाए ले।”

³⁸ अऊ ईसू कर कुरूस कर ऊपरे लिखल रहीस, “एहर यहूदी मन कर राजा लागे।”

मन फिरोईया डांकू

³⁹ ओ जग कुरूस में ठोंकल अपराधी में ले, एक झन हर ईसू कर निंदा कएर के कहीस, “का तंए मसीह ना लागस? त फेर अपन-आप ला अऊ हमके ला बचाओ।”

⁴⁰ बकिन दूसर अपराधी हर, ओके ला दबकाए के कहीस, “का तंए परमेस्वर ला नई डरावस? तंहूच तो ओहीच दंड ला पावत हस,

⁴¹ अऊ हमरे तो नियाओ कर अनुसार, सही सजा पावत हन, काबरकि हमरे जेकस काम करे हन, ओही कस सजा पावत हन, बकिन ए मईनसे हर, कांहीच गलती नई करीसे।”

⁴² तब ओहर कहीस, “ए ईसू, जब तंए अपन राएज में राजा बएन के आबे, त मोर सुरता करबे।”

⁴³ ईसू हर ओके ला कहीस, “मंए तोके फूरोंच कहथों कि आएज तंए मोर संगे, सरगलोक में होबे।”

ईसू कर मिरतु

⁴⁴ ओ मझेनी कर जुआर करीबन बारह बजे रहीस, तेहीच घनी ले तीन बजे दिन तक, सबेच देस में अंधार छाए रहीस,

⁴⁵ काबरकि बेर हर इंजोर नई देहत रहीस। अचाकन मंदिर कर परदा हर, मझार ले चिराए के दुई टुटका होए गईस,

⁴⁶ तेकर ईसू हर जोर से चिकेर के कहीस, “ए दाऊ, मंए अपन आत्मा ला तोर हाथ में सोंपत हों।” अऊ एकस कहीके ईसू हर मएर गईस।

⁴⁷ जे घनी रोमी सेना कर एगोट सुबेदार हर, ओ जग जे जाएत होए रहीस ओला देखीस, त परमेस्वर कर बड़ाई करे लागीस अऊ कहीस, “फूरोंच में ए मईनसे हर बिगर कसूर कर रहीस।”

⁴⁸ जब ओजग देखे बर जूटल मईनसे मन, जे जाएत होए रहीस ओला देख के रोवत अऊ छाती पीटत, अपन घरे फिरीन।

⁴⁹ बकिन ईसू कर सब जान-पहिचान कर मईनसे मन, अऊ गलील जिला ले ओकर पाछू-पाछू आए रहीन, ते सवांगीन मन दुरीहां ले ठड़होए के, ए सब जाएत ला देखत रहीन।

ईसू कर लास ला मरघेटिया में राखथें

⁵⁰ ओही घनी उहां यूसुफ नांव कर एगोट मईनसे रहीस, जेहर यहूदी दरबार कर मुखिया रहीस। ओहर सुघर अऊ परमेस्वर कर देख में, सुघर जिनगी जीवईया रहीस।

⁵¹ यूसुफ हर एहूदिया जिला कर अरमतियाह सहर कर रहीस, अऊ परमेस्वर कर राएज ला अगुरत रहीस। जे यहूदी मन ईसू ला कुरूस में चघाईन, ओमन कर काम अऊ फईसला ले ओहर खुस नई रहीस।

⁵² यूसुफ हर राएजपाल पीलातूस जग जाए के, ईसू कर लास ला मांगीस,

⁵³ अऊ ओके कुरूस ले उताएर के, मलमल कर चदर में लपेटीस अऊ एगोट मठ में राखीस, जेला पखना ला कोएड़ के बनाए रहीन, अऊ ओमे कोनोच लास ला कभों नई राखे रहीन।

⁵⁴ ओ दिन हर पबितर दिन कर तियारी करे कर दिन रहीस, अऊ पबितर दिन हर सुरू होए बर रहीस।

⁵⁵ जे सवांगीन मन गलील जिला ले ईसू कर पाछू-पाछू आए रहीन, ओमन यूसुफ कर संगे जाए के, ओ मठ ला देखीन अऊ एहू ला देखीन कि ईसू कर लास ला कईसे राखीन हवें।

⁵⁶ तेकर सवांगीन मन फिर के खुसबू दार तेल अऊ आंतर तेल ला बनाईन। फेर पबितर दिन में परमेस्वर कर अगियां कर अनुसार ओमन बिसोईन।