लूका 18 - Surgujia Bible

बिगर निरास होए हमेसा पराथना करा

¹ बिगर निरास होए हमेसा पराथना करे बर, ईसू हर अपन चेला मन जग ए अहना ला कहीस,

² “कोनो सहर में एगोट नियायधीस रहत रहीस, जेहर परमेस्वर ला नई डरावत रहीस, अऊ कोनो मईनसे कर परवाह नई करत रहीस।

³ ओहीच सहर में एगोट अदावेंन रहत रहीस, जेहर घरी-घरी आए के ओकर जग कहत रहीस, मोर ऊपर होवल अनियाए कर पलटा में मोके नियाओ चाही।

⁴ तनिक समय तक तो, ओहर अदावेंन कर बात ला नई सुनीस, तेकर फेर ओहर अपन मन में सोंचीस, कि मंए तो परमेस्वर ला नई डराओं, अऊ कोनो मईनसे मन कर परवाह नई करों,

⁵ तबो ले ए अदावेंन हर मोके ढेरेच तंग करथे। एकरे ले मंए ओकर बात में धियान देहूं, कि ओके ला नियाओ मिले, काबरकि ओहर घरी-घरी बिनती कएर के मोके ला ढेरेच परेसान करथे।”

⁶ तेकर परभू हर कहीस, “सुना, ए कसरीहा नियायधीस ले कांही सीखा।

⁷ पाछू ओहू हर, सही नियाओ करीस; एकस हवे, त परमेस्वर हर अपन चुनल मईनसे मन कर, नियाओ जरूर करही, जेमन राएत दिन ओके चीकरत रथें, अऊ ओमन कर मदेत करे में अबेर नई करही।

⁸ मंए तुमन ला फूरोंच कहथों, परमेस्वर झटेच के ओमन कर नियाओ करही। तबो ले मंए मईनसे कर बेटा जब आहूं, त का धरती में बिस्वास ला पाहूं?”

फरीसी अऊ लगान लेवईया कर अहना

⁹ फेर ईसू हर, जेमन अपन-आप ला परमेस्वर कर देख में, सुघर जिनगी जीवईया समझत रहीन, अऊ दूसर झन ला अनभनिया जानत रहीन, ओमन बर ए अहना ला कहीस,

¹⁰ “एक दिन दुई झन मईनसे मन, परमेस्वर कर मंदिर में पराथना करे बर गईन, एगोट फरीसी मईनसे रहीस, अऊ दूसर हर लगान लेवईया रहीस।

¹¹ फरीसी हर ठड़होए के अपन मन में, ए पराथना करत रहीस, ‘ए परमेस्वर, मंए तोर धनबाद करथों कि मंए आने मईनसे मन कस ठगलबरा, पाप करोईया, बेभिचार करोईया नई हवों, अऊ मंए ए लगान लेवईयोच कस नई हवों।

¹² मंए हप्ता में दुई दाएर उपास रथों, मंए अपन सबेच कमाई कर दसवां हिसा ला तोके देथों।’

¹³ बकिन लगान लेवईया हर दुरीहां ठड़होए रहीस, अऊ आंएख ला उठाए के, सरग कती ला देखोच कर हिमेत नई करीस, बकिन ओहर अपन छाती ला पीट-पीट के कहीस, ‘ए परमेस्वर, मंए पापी हों, मोर ऊपर दया कर।’

¹⁴ मंए तुमन जग कहत हों, कि एही पापी मईनसे कर ऊपरे परमेस्वर हर फुरमा होईस, अऊ ओहर अपन घरे गईस। बकिन ओ फरीसी कर संगे एकस नई होईस, काबरकि जेहर अपन-आप ला बड़खा समझही, ओहर छोटे करल जाही, अऊ जेहर अपन-आप ला छोटे समझही, ओहर बड़खा करल जाही।”

ईसू हर लईका मन ला आसीस देथे

¹⁵ फेर मईनसे मन अपन-अपन लईका मन ला, ईसू जग लाने लागीन, कि ओहर ओमन कर ऊपरे हाथ मढ़ाए के आसीस दे, बकिन जब चेला मन देखीन, त ओमन ला दबकाए लागीन।

¹⁶ ईसू हर लईका मन ला ठांवें बलाए के कहीस, “लईका मन ला मोर जग आए देआ अऊ ओमन ला झईन रोका, काबरकि परमेस्वर कर राएज हर अईसने मन कर हवे।

¹⁷ मंए तुमन ला फूरोंच कहथों, कि जे कोनो हर परमेस्वर कर राएज ला, लईका कस नई अपनाही, त ओहर कभोंच ओमे ढूके नई पाही।”

अमर जिनगी पाए कर उपदेस

¹⁸ फेर कोनो यहूदी नेता हर ईसू जग पूछीस, “ए सबले बढ़िहां गुरू, अमर जिनगी ला पाए बर, मंए का करों?”

¹⁹ त ईसू हर ओकर जग कहीस, “तंए मोके सबले बढ़िहां काबर कथस? सिरीप परमेस्वर कर छोंएड़ अऊ कोनो सबले बढ़िहां नईए।

²⁰ तंए परमेस्वर कर ए अगियां मन ला तो जानथस, ‘बेभिचार झईन करीहा, ककरो जान झईन लेईहा, चोरी झईन करीहा, झूठा गवाही झईन देईहा, अऊ अपन दाई-दाऊ मन कर माएन-मरजाद करीहा।’”

²¹ ओहर एला सुईन के कहीस, “ए सबेच ला तो, मंए अपन लरीक पन ले मानत आथों।”

²² तब ईसू हर कहीस, “अझरो ले तोर में एगोट बात कर कमी हवे, तंए अपन सबेच जाएत ला बेंच दे, अऊ गरीब मन में बांएट दे, अऊ आए के मोर पाछू होए ले, त तोके सरग में धन मिलही।”

²³ ओ नेता हर एला सुनीस, त ओकर जीव हर ढेरेच छोटे होए गईस, काबरकि ओहर ढेरेच धनी रहीस।

²⁴ ईसू हर ओके ला देख के कहीस, “धनी मन ला परमेस्वर कर राएज में जाए बर, केतना कठिन हवे।

²⁵ एगोट ऊंट ला सूजी कर बेधा में ढूके बर कठिन हवे, ओकरो ले ढेरेच कठिन हवे, धनी मन ला सरग राएज में जाए बर।”

²⁶ जेतना झेमन ए बात ला सुनीन, ओमन ईसू जग पूछीन, “त कोन उद्धार पाए सकत हवे?”

²⁷ ईसू हर जबाब देहीस, “जे बात हर मईनसे मन ले नई होए सके, ओहर परमेस्वर ले होए सकथे।”

²⁸ पतरस हर कहीस, “सुन, हमरे तो तोर पाछू होए बर, अपन सब जाएत ला छोंएड़ देहे हन।”

²⁹ तेकर ईसू हर कहीस, “मंए तुमन ला फूरोंच कहथों, कि जेमन अपन घर, परानी, अऊ दाई-दाऊ, अऊ अपन भाई बहिन, अऊ लईका-छऊआ मन ला, परमेस्वर कर राएज बर छोंएड़ देहीन हवें,

³⁰ ओमन ए जिनगी में ढेरेच बगरा आसीस पाहीं, अऊ अवईया जुग में अमर जिनगीयोच ला पाहीं।”

ईसू अपन मिरतु कर अगमबानी करथे

³¹ तेकर ईसू हर बारह परेरीत मन ला, एक धरी ले जाए के कहीस, “सुना, हमन यरूसलेम सहर में जाथन, अऊ जेतना बात मंए मईनसे कर बेटा मोर बारे में, जूनहा अगमजानी मन लिखीन हवें, ओ सबेच हर पूरा होही।

³² काबरकि मोके, गैर यहूदी मन कर हाथ में सोंएप देहीं, अऊ ओमन मोर हंसी उड़ाहीं, अऊ मोर निंदा करहीं, अऊ मोर उपरे थूंकहीं।

³³ अऊ ओमन मोके कोड़ा मारहीं, अऊ मोके ला मरुवाए देहीं, बकिन तीसर दिन में मंए जी उठहूं।”

³⁴ बकिन ओ परेरीत मन, ए कोनोच बात ला नई समझीन, अऊ ए गोएठ कर मतलब हर ओमन ले लुकाल रहीस, अऊ जे गोएठ हर कहल गए रहीस, ओहर ओमन कर समझ में नई आईस।

अंधा भीखारी ला ईसू आंएख देथे

³⁵ जे घनी ईसू हर, एरिहो सहर कर लिघे पहुंचीस, त उहां एगोट अंधा मईनसे हर सड़क कर धरी में, बईठ के भीख मांगत रहीस।

³⁶ ओ अंधा हर भीड़ कर रेंगे कर अवाज ला सुईन के पूछीस, “एजग का होवथे?”

³⁷ ओमन ओके बताईन, “नासरत गांव कर ईसू ए डगर ले जाथे।”

³⁸ तेकर अंधा हर किरलाए के कहीस, “ए ईसू, दाऊद कर संतान, मोर ऊपरे दया कएर दे।”

³⁹ जेमन आगु-आगु जात रहीन, ओमन ओके दबकाए लागीन, कि तंए कले रह, बकिन ओ अंधा हर अऊर जोर ले किरलाए के कहीस, “ए दाऊद कर संतान, मोर ऊपरे दया कएर दे।”

⁴⁰ तेकर ईसू हर ठड़होए गईस, अऊ ओ अंधा ला, अपन जग लाने बर अगियां देहीस, अऊ जब ओहर लिघे आईस, त ईसू हर ओके ला पूछीस,

⁴¹ “मंए तोर बर का करों?” ओहर कहीस, “ए परभू, मंए देखे बर करथों।”

⁴² ईसू हर ओकर जग कहीस, “तंए देखे लाग, तोर बिस्वास हर तोके चंगा करीस हवे।”

⁴³ तेहीच घनी ओहर झटेच के देखे लागीस, अऊ परमेस्वर कर बड़ाई करत-करत ईसू कर पाछू होए लेहीस, अऊ सबेच मईनसे मन भी ओके देख के, परमेस्वर कर बड़ाई करीन।