लूका 12 - Surgujia Bible

फरीसी मन ले सवाचेती रईहा

¹ फेर जे घनी हजारो मईनसे मन कर भीड़ हर जुईट गईस, अऊ मईनसे मन एक दूसर ले इचटावत रहीन, ते घनी ईसू हर सबले आगू, अपन चेला मन ला कहीस, “फरीसी मन कर खमीर, जेहर ओमन कर कपट लागे, ओ कपट ले सवाचेती रईहा।”

² ओ दिन आवत हवे, जे घनी सबेच बात मन ला परगट करल जाही; अऊ जेहर लुकाल हवे, ओला मईनसे मन कर आगू बताल जाही।

³ एकरले, जेला तुमन अंधार में कहे हवा, ओला इंजोर में सूनल जाही, अऊ जेला तुमन बईंगरा कर भीतरी में टूरु-फुसु कहे हवा, ओला छानी ऊपर ले घोंसना करल जाही।

सिरीप परमेस्वर ले डरावा

⁴ ए मोर संगता मन, मंए तुमन ला फूरोंच कहथों कि जेमन तुमन कर देंह ला, माएर के मरुवाए देथें, अऊ ओकर पाछू कांही नई कएर सकें, ओमन के झईन डराईहा।

⁵ मंए तुमन ला चेताए के कहथों, कि तुमन ला काकर ठन डराए बर चाही, ओही के डरावा जेके ला मारे कर पाछू, नरक में डाले कर अधिकार हवे। हां, मंए तुमन जग कहथों, सिरीप ओही के डरावा।

⁶ का दुई पईसा में, पांच ठे गोरेला नई बेंचाए? तबो ले परमेस्वर हर, ओमन में ले एको झन ला नई बिसरे।

⁷ तुमन कर मूड़ कर, सबेच चुंदी हर गनल गईस हवे, एकरले तुमन झईन डरावा, तुमन तो ढेरेच गोरेला मन ले भी, परमेस्वर बर किमती हवा।

ईसू कर बात ला माने बर परही

⁸ मंए तुमन ला फूरोंच कहथों, जेमन मईनसे मन कर आगू में मोके माएन लेहीं, त मईनसे कर बेटा, परमेस्वर कर दूत मन कर आगू में, ओमन ला माएन लेहूं।

⁹ बकिन जे कोनो हर, मईनसे मन कर आगू में मोके इनकार करही, ओके परमेस्वर कर दूत मन कर आगू में इनकार करल जाही।

¹⁰ जे कोनो हर, मईनसे कर बेटा कर बिरोध में कोनो बात कही, त ओकर पाप हर छमा होए जाही, बकिन जेहर पबितर आत्मा कर निंदा करही, त ओकर पाप हर कभों छमा नई होही।

¹¹ जे घनी मईनसे मन तुमन ला, धरम सभा कर आगू में, अऊ सासन करोईया अऊ अधिकारी मन कर आगू में ले जाहीं, तब चिंता झईन करीहा, कि हमन कोन कस अऊ का जबाब देबो, आखिर का कहबो।

¹² काबरकि पबितर आत्मा हर, ओही घनी तुमन ला सिखाए देही, कि तुमन ला का कहे बर हवे।

एगोट धनी गंवार मईनसे कर अहना

¹³ फेर भीड़ में ले एक झन हर ईसू ला कहीस, “ए गुरूजी, मोर भाई ला कएह दे, कि दाऊ कर धन संपती ला, मोर संगे बांएट ले।”

¹⁴ त ईसू हर ओके ला कहीस, “ए भाई, कोन हर मोके तुमन कर नियाओ करोईया, अऊ संपती कर बंटोईया ठहराईस हवे?”

¹⁵ ते घनी ईसू हर ओमन ला कहीस, “तुमन सवाचेती रहा, अऊ सब मधे कर लालच ले, अपन-आप ला बचाए रहा, काबरकि ककरो जीवन हर, ओकर जग ढेरेच संपतीयो रहे ले, नई बांचही।”

¹⁶ फेर ईसू हर, ओमन जग एगोट अहना कहीस, “कोनो धनी कर खेत में ढेरेच फसल होईस।

¹⁷ तेकर ओहर अपन मन में बिचार करे लागीस, ‘मंए का करों, काबरकि ए फसल ला राखे बर, मोर जग एतना बड़खा कोठी नईए।’

¹⁸ अऊ ओहर कहीस, ‘मंए एकस करहूं, अपन कोठी ला टोएर के एकरले बड़खा कोठी बनाहूं, अऊ उहां अपन सब अनाज, अऊ धन संपती ला राखहूं।’

¹⁹ अऊ अपन मन ले कहूं, कि तोर जग ढेरेच बछर बरीक, ढेरेच संपती राखल हवे, सुख ले रह खा-पी अऊ मजा कर।

²⁰ बकिन परमेस्वर हर ओके ला कहीस, ‘ए गंवार! आएज राती तोर परान ला ले लेहल जाही, त जे धन ला तंए जोगाए के राखे हस, ओहर काकर होही?’

²¹ एहीच कस ओहू मईनसे हर हवे, जेहर अपन बर धन जूटाथे, बकिन परमेस्वर कर संगे ओकर बढ़िहां रिस्ता नईए।”

धन अऊ अधिकार कर बारे में परभू सिक्छा देथे

²² फेर ईसू हर अपन चेला मन ला कहीस, “तेकर ले मंए तुमन ला फूरोंच कहथों, कि रोज दिन अपन जिनगी कर चिंता झईन करीहा, कि हमन का खाबो अऊ का पहिरबो।

²³ काबरकि भोजन ले परान, अऊ ओढ़ना ले देंह हर बईड़ के हवे,

²⁴ कऊंआ मन ला देखा, ओमन नई बुने अऊ नई लुएं, अऊ ओमन कोठी में अनाज ला नई राखें, तबो ले परमेस्वर हर ओमन ला खवाथे। तुमन कर कीमत हर परमेस्वर बरीक तो, ओ चराईयो मन ले केतना बईड़ के हवे।

²⁵ का तुमन चिंता कएर के, अपन जिनगी ला, एको तनिक बड़हाए सकत हवा? बिलकूल नहीं।

²⁶ एतना छोटे काम ला तुमन करे नई सका, त अऊ बड़खा काम कर चिंता काबर करथा?”

²⁷ “जंगल कर फूल मन ला देखा, कि ओमन कईसे बाड़थें, ओमन मेहनत नई करें, अऊ ओमन ओढ़ना नई बनाएं, तबो ले मंए तुमन ला फूरोंच कहथों, कि बादसाह राजा सुलेमानोच हर, अपन सबेच धन संपती रहीयो के, ए फूल मन कस सुघर सफरे नई सकीस।

²⁸ अगर परमेस्वर हर एतना बढ़िहां, ए फूल मन ला पहिराथे, जेमन आएज हवें अऊ काएल आगी में लेसल जाहीं, त तुमन बिस्वास काबर नई करा, कि परमेस्वर हर तुंहू मन ला एकरो ले बढ़िहां पहिराही?

²⁹ अऊ तुमन ए बात कर खोज में झईन रईहा, कि का खाबो कि का पीबो, अऊ तुमन ए बात मन कर चिंता झईन करीहा।

³⁰ काबरकि जेमन परमेस्वर ला नई जाने, ओमन ए सब जाएत कर खोज में रथें, बकिन तुमन कर दाऊ परमेस्वर हर जानथे, कि तुमन ला ए सब जाएत कर जरूरत हवे।

³¹ बकिन सबले आगू, परमेस्वर कर राएज ला खोजा, त ए सब जाएत हर तुमन ला मिल जाही।”

³² “ए छोटे भेंड़ मन कर झूंड, झईन डरावा, काबरकि तुमन कर दाऊ ला एहर बढ़िहां लागीस, कि तुमन ला अपन राएज में राखही।

³³ अपन धन संपती ला बेंच के दान कएर देआ, अऊ अपन बर अईसना पईसा कर थईला बनावा, कि जेहर नई जूनहाए, मनेकि सरग में अईसन धन संपती जुटावा, जेहर नई सीराए, अऊ जेकर ठांवें चोर नई जाए सके, अऊ ओला दीयां नई खाए।

³⁴ काबरकि जिहां तोर खजाना रही, उहां तोर मन हर भी लगे रही।”

परभू कर दुबारा अवाई बर तियार रहा

³⁵ परमेस्वर कर काम करे बरीक, कनिहां ला बाएंध के, दिया ला बाएर के, हमेसा तियार रईहा।

³⁶ अऊ तुमन ओ मईनसे मन कस बना, जेमन अपन मालीक कर डगर देखत रथें, कि ओहर बिहाओ ले कब फिर के आही, अऊ दुरा ला कब खटखटाही, कि ओकर बर दुरा ला हालूच के उघारी।

³⁷ धन्य हवें ओ दास मन, जेमन ला ओमन कर मालीक हर आए के जागल पाथे, मंए फूरोंच कहथों, कि ए मालीक हर कनिहां बाएंध के ओमन कर सेवा करही, अऊ खाए बर बईठाही, अऊ ठांवें आए के परोसही।

³⁸ अगर ओहर आधा राती, नहीं तो भिनसरहा जुआर आही, त ओ दास मन ला जेमन ला जागत पाही, त ओ दास मन धन्य हवें।

³⁹ बकिन तुमन एला जाएन लेआ, कि अगर घर कर मालीक हर जानतीस, कि चोर कोन घरी आही, त ओहर जागत रतीस, अऊ अपन घर में चोरी होए नई देतीस।

⁴⁰ तंहू मन हमेसा तियार रहा, काबरकि जे घनी ला तुमन सोंचे भी नई रईहा, ओही घनी मंए मईनसे कर बेटा आए जाहूं।

⁴¹ तेकर पतरस हर कहीस, “ए परभू, ए अहना ला सिरीप हमर बर कहथस कि सब झन बर।”

⁴² परभू हर कहीस, “बिस्वास लाएक अऊ बूईधमान दास ओहर हवे, जेकर मालीक हर, ओके ला अपन कमीया मन कर ऊपरे, मुखिया ठहराए कि ओमन ला, सही समय में खाए बर दे।

⁴³ अगर ओ मालिक हर आए के देखथे कि, ओकर दास हर अपन काम ला, जिमेदारी ले करथे, त ओके इनाम देही।

⁴⁴ मंए तुमन ला फूरोंच कहथों, कि मालीक हर ओ दास ला, अपन सबेच संपती कर जिमेदारी देही।

⁴⁵ बकिन अगर ओ दास हर सोंचही, कि मोर मालीक हर आए में अबेर करत हवे, त ओहर मालीक कर आने दास-दासी मन ला मारे-पीटे लागही, अऊ खाए पीके दरूहा होए लागही।

⁴⁶ तब ओ दास कर मालीक हर, एगोट अईसना दिन में आही, जब ओहर अपन मालीक कर डगर नई देखत रही, अऊ ओकर आए कर समयोच ला ओहर नई जानत रही, त मालीक हर ओ सेवक ला, ढेरेच दंड देके जे जग बिस्वास नई करोईया मन रहीं, ओजग भेज देही।

⁴⁷ ओ सेवक, जेहर अपन मालीक कर ईछा ला जानत रहीस, अऊ तियार नई रहीस, अऊ अपन मालीक कर ईछा कर अनुसार काम नई करीस, त ओहर ढेरेच मार खाही।

⁴⁸ बकिन जेहर मालीक कर ईछा ला, बिगर जाने मार खाए लाएक काम करही, ओहर थोरहें मार खाही। एकरे ले जेके ला ढेरेच देहल गईसे, ओकर जग ले ढेरेच मांगल जाही, अऊ जेके ला ढेरेच सोंपल गईसे, ओकर जग ले अऊ ढेरेच लेहल जाही।”

ईसू कर कारन फूट होवथे

⁴⁹ मंए धरती में आगी लगाए बर आए हों, अऊ ए मोर एतना ईछा हवे कि अझरे ले आगी हर बरे लागतीस।

⁵⁰ मोके तो एगोट बतिस्मा लेहे बर हवे, अऊ जब ले ओहर पूरा नई होए जाही, तब ले मंए ढेरेच परेसानी में हों।

⁵¹ का तुमन ए समझथा, कि मंए धरती में मेल-मिलाप कराए बर आए हों? मंए तुमन ला कहथों नहीं, बल्कि फूट डाले बर आए हों।

⁵² काबरकि अब ले एक परिवार कर, पांच झन कर मझार में फूट होही, तीन झन मोर कती होहीं, अऊ दुई झन मोर बिरोध में होहीं अऊ एहीच कस दुई झन मोर कती होहीं, अऊ तीन झन मोर बिरोध में होहीं।

⁵³ दाऊ हर बेटा कर संगे, अऊ बेटा हर दाऊ कर संगे बिरोध करही, दाई हर बेटी संगे, अऊ बेटी हर दाई कर संगे बिरोध करही, अऊ सास हर बहूरीया कर संगे, अऊ बहूरीया हर सास कर संगे बिरोध करही।

समय कर चिन्हा

⁵⁴ ईसू हर भीड़ ला कहीस, “जे घनी तुमन बदरी ला पछीम कती ले चघत देखथा, त तुमन झटेच के कहथा, कि पानी बरसही अऊ ओही कस होथे।

⁵⁵ अऊ जे घनी दखिन कती ले बईहर ला चलत देखथा, अऊ तुमन कहथा गरमी हर बड़ही, अऊ ओहीच कस होथे।

⁵⁶ ए कपटी मन, तुमन धरती अऊ अगास कर रंग-रूप ला देख के, जाएन जाथा कि का होही, बकिन ए जुग में का होवथे, तेकर भेद ला काबर नई चिन्हा?”

⁵⁷ “तुमन अपनेच मन में फईसला काबर नई कएर लेआ, कि सच काहर हवे?

⁵⁸ जे घनी तुमन अपन बिरोधी कर संगे, कोट-कछेरी में हाजीर होए बर जात हवा, त डगरेच में ओकर जग ले छुटे कर उपाए कएर लेआ, एकस झईन होए कि ओहर तुमन के, नियाओ करोईया कर आगू में घींच के ले जाए, अऊ नियाओ करोईया हर तुमन के सिपाही ला दे दे, अऊ ओ सिपाही हर तुमन ला जेहल में हुरेक दे।

⁵⁹ मंए तुमन ला फूरोंच कहथों, कि जब तक तुमन एक-एक पईसा भएर नई देईहा, तब तक उहां ले छुटे नई पईहा।”