याकूब 4 - Surgujia Bible

परमेस्वर कर बस में हो जावा

¹ तुमन कर मझारे लड़ाई अऊ झगरा कहां ले आए गईस? का ओही रीझ-रंग कर ईछा ले नई आईस, जेमन तुमन कर भीतरी में लड़त-भिड़त रथें?

² तुमन कोनो चीज ला पाए कर असरा करथा अऊ तुमन के नई मिले, तुमन मईनसे कर हतिया करथा अऊ डाह करथा अऊ कांही नई पावा, तबोले तुमन लड़था अऊ झगरा बाझ था। तुमन अपन ईछा कर चीज ला नई पावा, काबरकि परमेस्वर ठन ले नई मांगा।

³ तुमन मांगथा अऊ नई पावा, काबरकि तुमन बुरा ईछा ले मांगथा कि ओला अपन रीझ-रंग में उड़ाए देआ।

⁴ ए बेभिचार करोईया मन, का तुमन नई जाना कि ए संसार ले मया कराई कर मतलब, परमेस्वर ठन ले बएर कराई हवे? जे कोनो हर संसार कर संगता होए बर चाहथे, ओहर अपन-आप ला परमेस्वर कर बैरी बनाथे।

⁵ का तुमन ए समझथा कि पबितर किताब हर अनभनिया कथे, “जे आत्मा ला परमेस्वर हर हमर भीतरी बसाईसे, ओहर ए लालसा करथे कि हमरे सिरीप परमेस्वर ला ही मया करी?”

⁶ बकिन ओहर तो ढेरेच किरपा देथे, तेकर ले परमेस्वर कर किताब में अईसना लिखल हवे, “परमेस्वर घमंडी मन कर बिरोध करथे, बकिन नरम मईनसे मन कर ऊपरे किरपा करथे।”

⁷ एकरे ले तुमन परमेस्वर कर बस में होए जा; अऊ सैतान कर सामना करा, त सैतान हर तुमन जग ले भाएग जाही।

⁸ परमेस्वर कर ठांवे आवा, त ओहू हर तुमन कर ठांवे आही। ए पापी मईनसे मन, अपन जिनगी ला सुद्ध करा अऊ जेमन परमेस्वर अऊ मईनसे ला, फुरमा करे बर चाहथें, ओहू मन अपन हिरदय ला पबितर करें।

⁹ दुखी होवा अऊ सोक करा अऊ रोवा। तुमन कर हंसी हर सोक में अऊ तुमन कर आनंद हर उदासी में बदेल जाए।

¹⁰ परभू कर आगू में नरम बना, त ओहर तुमन के बढ़ाही।

दूसर कर ऊपरे ओरहन झईन लगावा

¹¹ ए भाई-बहिन मन, एक दूसर कर बईदनामी झईन करीहा, जेहर अपन भाई कर बईदनामी करथे, चाहे भाई कर उपरे ओरहन लगाथे, ओहर कानहूंन कर बईदनामी करथे अऊ कानहूंन कर उपरे ओरहन लगाथे, त तंए कानहूंन कर अनुसार चलोईया नहीं, बकिन ओकर नियाओ करोईया ठहरे।

¹² बकिन कानहूंन कर देवईया अऊ नियाओ करोईया तो एकेच झे हवे अऊ ओहर परमेस्वर लागे, जेकर जग बचाए कर अऊ नास करे कर सामर्थ हवे, बकिन तंए कोन लागस, जेहर अपन परोसी कर ऊपरे ओरहन लगाथस?

घमंड कर बिरोध में चेतावनी

¹³ तुमन एकस कथा, “आएज चाहे काएल, हमरे कोनो आने सहर में जाए के ओजग एक बछर रहबो अऊ काम-धंधा कएर के पईसा कमाबो।”

¹⁴ तुमन एला नई जाना कि काएल तुमन कर जिनगी में का होही। तुमन तो भांप कस हवा, जेहर तनीक जुआर बर दिखथे, तेकर मेंटाए जाथे।

¹⁵ एकर बदले तुमन के एकस कहेक चाही, “कहों परभू चाही, त हमन जीयत रहबो अऊ ए काम चाहे, ओ काम ला करबो।”

¹⁶ बकिन अब तुमन अपन डींग मारथा अऊ घमंड करथा, अईसना सब घमंड हर गलत हवे।

¹⁷ एकरले जे कोनो हर भलाई करे बर जानथे अऊ नई करे, त ओकर बर एहर पाप हवे।