याकूब 2 - Surgujia Bible

ककरो संगे भेद-भाव झईन करीहा

¹ ए मोर भाई-बहिन मन, जे घनी तुमन महिमा ले भरल, हमर परभू ईसू मसीह कर ऊपरे बिस्वास करथा, त ककरो संग भेद-भाव झईन करीहा।

² कहों कोनो मईनसे हर, सोना कर मूंदी अऊ सुघर ओढ़ना पहिर के, तुमन कर सभा में आए अऊ एगोट गरीबोच मईनसे हर, मईलाहा चिरहा फटहा ला पहिर के आए,

³ अऊ तुमन ओ सुघर ओढ़ना पहिरल, मईनसे कर मूंह ला देख के कईहा, “तंए ओठन बढ़िहां जघा में बईठ जा अऊ ओ गरीब मईनसे ला कईहा, तंए एजग ठड़होए रह, चाहे मोर गोड़ जग बईठ जा।”

⁴ त का तुमन आपस में भेद-भाव नई करा अऊ खराब बिचार ले नियाओ करोईया नई ठहरा?

⁵ ए मोर दुलरुवा भाई-बहिन मन सुना, का परमेस्वर हर, ए संसार कर गरीब मन ला नई चुनीसे कि बिस्वास में धनी अऊ ओ राएज कर हकदार बएन जाएं, जेकर बात-जबान परमेस्वर हर ओमन ठन करीसे, जेमन ओकर जग मया करथें?

⁶ बकिन तुमन ओ गरीब कर माएन-मरजाद नई करा; का धनी मईनसे मन, तुमन ऊपरे जोर-जुलूम नई करें अऊ का एहीच मन, तुमन ला कोट-कछेरी में घिसलाए-घिसलाए के नई लेजें?

⁷ का ओमन ईसू मसीह कर, ओ सुघर नांव कर निंदा नई करें, जेकर तुमन लागा?

⁸ कहों तुमन पबितर किताब में लिखल, परमेस्वर कर राएज कर ए कानहूंन ला फूरोंच में पूरा करथा, “तंए अपन परोसी संगे, अपनेच कस मया कर” त तुमन बढ़िहां करथा।

⁹ बकिन कहों तुमन भेद-भाव करथा, त पाप करथा अऊ परमेस्वर कर कानहूंन हर, तुमन के दोसी ठहराथे।

¹⁰ काबरकि जे कोनो हर सबेच कानहूंन ला मानथे, बकिन एकेच गोट बात में झूंईक जाथे, त ओहर सबो बात में दोसी ठहरही।

¹¹ काबरकि परमेस्वर हर ए कहीस हे, “तंए बेभिचार झईन करबे,” ओही परमेस्वर हर एहू ला कहीसे कि कोनो मईनसे कर हतिया झईन करबे। एकरले कहों बेभिचार तो नई करे, बकिन हतिया करे, त तंए कानहूंन कर टोरईया ठहरे।

¹² तुमन ओ मईनसे मन कस गोठियावा अऊ कामो ला करा, जेमन कर नियाओ हर, ओ कानहूंन कर अनुसार होही, जेमे छुटकारा मिलथे।

¹³ काबरकि जेहर दया नई करे, ओकर नियाओ परमेस्वर हर बिगर दया कर करही, दया हर तो नियाओ कर ऊपरे जय पाथे।

बिस्वास अऊ करम

¹⁴ ए मोर भाई-बहिन मन, कहों कोनो मईनसे हर कथे कि ओहर बिस्वास करथे, बकिन बिस्वास कर अनुसार काम नई करे, त एकस करे ले का फयदा? का एकस बिस्वास हर, कभों ओकर उद्धार कएर सकथे?

¹⁵ कहों कोनो भाई चाहे बहिन उघरा हवे अऊ ओमन ला सगर दिन खाए बर नई मिले,

¹⁶ अऊ तुमन में ले कोनो हर ओके ला कही, “खुस रह, गरम रह, पेट भेर खाए ले,” बकिन जे जाएत हर देंह बर जरूरी हवे, ओमन ला नई देईहा, त का फयदा?

¹⁷ वइसने बिगर करम कर बिस्वास हर, अपन-आप में मरल बिसवास कस हवे।

¹⁸ बकिन कोनो हर कईह सकथे, “तोर ठन बिस्वास हवे अऊ मोर ठन करम हवे, तंए अपन बिस्वास ला मोके बिगर करम कर देखा अऊ मंए अपन बिस्वास ला मोर करम कर द्वारा तोके देखाहूं।”

¹⁹ तोके बिस्वास हवे कि एकेच ठन परमेस्वर हवे, त तंए ठीक करथस, दुस्ट आत्मोच मन एकस बिस्वास करथें अऊ कांपथें।

²⁰ बकिन ए मूरुख, तंए एला नई जानस कि करम बिना बिस्वास हर अनभनिया हवे।

²¹ जब हमर दाऊ अबराहम हर, अपन बेटा इसहाक ला बेदी में चघाईस, त का ओहर अपन करम कर चलते, परमेस्वर कर देख में धरमी नई ठहरीस?

²² अऊ तंए देख लेहे कि ओकर बिस्वास हर, ओकर करम कर संगे काम करत रहीस अऊ ए करम कर चलते, ओकर बिस्वास हर पूरा होईस।

²³ एही कस पबितर किताब कर ए बचन हर पूरा होईस, “अबराहम हर परमेस्वर कर उपरे बिस्वास करीस अऊ बिस्वास कर जरिये परमेस्वर ओके धरमी ठहराईस;” अऊ एकर चलते ओहर “परमेस्वर कर संगता” कहाईस।

²⁴ तुमन देख लेहा कि मईनसे सिरीप बिस्वासेच ले नहीं, बलकि अपन करम ले धरमी ठहरथे।

²⁵ ओहीच कस राहाब बेसीया हर, जब ओहर खभरीहा मन ला अपन घरे जघा देहीस अऊ आने डगर ले बिदा करीस, त का ओहर अपन करम ले धरमी नई ठहरीस?

²⁶ जेकस देंह हर आत्मा बिना मरल हवे, वईसनेच बिस्वास हर करम कर बिना मरल हवे।