इबरानी 9 - Surgujia Bible

धरती कर तंबू में अराधना कर नियम

¹ पहिले कर करार में अराधना बर नियम अऊ अईसना पबितर जघा भी रहीस, जेहर ए धरती कर रहीस।

² एगोट तंबू बनाल गईस, एकर पहिले कर छिना में दीवट, मेज अऊ परमेस्वर ला चघाल रोटी रहीस, ए छिना हर पबितर जघा कहात रहीस।

³ दूसर परदा कर पाछू में एगोट अऊ छिना रहीस, जेला सबले पबितर जघा कहत रहीन,

⁴ ओमें धुप जलाए बर सोना कर बेदी अऊ सोना कर पानी चघाल करार कर बकसा रहीस। ए बकसा में मना ले भरल सोना कर डूबहा, हारून कर लाठी, जेमें फूल अऊ फर आए गए रहीस अऊ पखना कर पटिया मन रहीन, जेमें दस गोट अगियां लिखल रहीस।

⁵ ओ बकसा कर ऊपरे परमेस्वर कर महिमा ला देखोईया करूब मन रहीन, जेमन पछताप कर जघा ला छांए करे रहीन। एमन ला एक-एक करके बताए बर अझे मोका नईए।

⁶ एही कस हर एक चीज मन ला तियार कएर के, राखल गए रहीस अऊ याजक मन पबितर तंबू कर पहिला छिना में सगर दिन जाए के, अपन सेवा करत रहीन।

⁷ बकिन सिरीप महायाजक हर ही, पबितर तंबू कर दूसर छिना में साल में सिरीप एकेच दाएर लहू ला लेके जात रहीस अऊ ओ लहू ला ओहर खुद अपन अऊ मईनसे मन कर पाप बर, जे पाप ला बिगर जाने करे रहीन, परमेस्वर ला चघात रहीस।

⁸ एकर जरिये पबितर आत्मा हर, ए देखाथे कि जब तक पबितर तंबू कर पहिला छिना हर माड़हल हवे, तब तक सबले पबितर जघा में जाए कर डगर हर परगट नई होईसे।

⁹ ए पबितर तंबू हर आएज कर समय बर एगोट नमूना लागे, जेहर ए बताथे कि जे भेंट अऊ बलिदान मन ला चघात रहीन, ओहर अराधना करोईया मन कर मन ला पूरा तरह ले सुद्ध नई कएर सके।

¹⁰ काबरकि ओमन सिरीप खाए पीए कर चीज अऊ कए मधे कर सुद्ध होए कर रीती-रीवाज लागें, ए सब हर बाहरी नियम लागे, जेहर सिरीप ओ समय तक लागू होथे, जब परमेस्वर हर नावा कानहूंन लागू करही।

मसीह कर लहू कर सामर्थ

¹¹ बकिन अझे मसीह हर, अवईया बढ़िहां चीज मन कर महायाजक कर रूप में आईस, त ओहर अउरेच बड़खा अऊ बढ़िहां सिद्ध तंबू में ले होए के गईस, जेहर मईनसे कर हाथ कर बनाल ना हवे, मनेकि एहर सिरजल चीज में ले ना हवे।

¹² मसीह हर सबले पबितर जघा में सब कर सेंथी, एकेच दाएर बोकरा अऊ बछवा मन कर लहू कर संगे नई गईस, बकिन अपन खुद कर लहू ला लेके गईस अऊ एही कस ओहर हमर बर हमेसा कर छुटकारा लानीस।

¹³ बोकरा अऊ बईला मन कर लहू अऊ लेसल बछवा मन कर राख ला, असुद्ध मईनसे मन कर ऊपरे छिंटे जाए ले, ओमन ला बाहरी रूप ले पबितर करल जाथें,

¹⁴ त मसीह कर लहू, जेहर हमेसा कर आत्मा कर द्वारा परमेस्वर कर आगू में अपन-आप ला, निरदोस बली कर रूप में भेंट चघाईस, ओ लहू हर तुमन कर बिवेक ला मिरतु कती ले जवईया काम ले जरूर सुद्ध करही, ताकि तुमन जीयत परमेस्वर कर सेवा कएर सका।

¹⁵ तेकर ले मसीह हर एगोट नांवा करार कर अगुवा-मझुवा लागे, ताकि जेमन बलाल गईन हवें, ओमन ओ अमरकाल तक बने रहोईया हक ला पाए सकें, ए अमर काल तक बने रहोईया हक कर बात-जबान, परमेस्वर हर पहिले ले करीस हवे। अब मसीह हर अपन मिरतु कर जरिये, ओमन कर अपराध मन ले छुटकारा देहीस, जेला पहिले कर करार कर समय करल गए रहीस।

¹⁶ जब कोनो हर वसीयत लिखथे अऊ मएर जाथे, तब ओकर हकदार बर ए जरूरी हवे कि ओहर वसीयत करोईया कर मिरतु ला साबित करे।

¹⁷ काबरकि वसीयत हर तब लागू होथे, जब ओकर लिखोईया हर मएर जाथे। जब तक ओहर जीयत रथे, तब तक वसीयत कर कोई मतलब नई रहे।

¹⁸ एकरे चलते आगू कर करार हर भी लहू बहाए ले ही लागू होए रहीस।

¹⁹ जब मूसा हर सबो मईनसे मन ला कानहूंन में बताल, हर एक अगियां ला पएढ़ के सुनाए चुकीस, तब ओहर पानी कर संगे बछवा अऊ बोकरा मन कर लहू, लाल ऊन अऊ जूफा कर डार लेहीस अऊ एमन ला कानहूंन कर किताब कर ऊपरे अऊ सबो मईनसे मन कर ऊपरे छिंट देहीस।

²⁰ अऊ कहीस, “एहर ओ करार कर लहू लागे, जेला पालन करे कर अगींया परमेस्वर हर तुमन ला देहीस हवे।”

²¹ एही कस, मूसा हर पबितर तंबू में अऊ अराधना कर सब चीज कर उपरे लहू ला छिंटीस।

²² फुरोंच में मूसा कर कानहूंन कर हिसाब ले, सबो चीज हर लहू कर जरिये सुद्ध करल जाथे अऊ बिगर लहू बहाए पाप कर छमा नई होए।

मसीह कर बलिदान हर पाप ले सुद्ध करथे

²³ सरग कर चीज मन कर नकल ला, (मनेकि पबितर तंबू अऊ ओकर चीज मन) ए बलिदान मन कर जरिये, सुद्ध करे बर जरूरी हवे, त सरग कर चीज मन ला खुद एकरले अऊ बढ़िहां बलिदान कर जरिए, सुद्ध करे बर अऊ ढेरेच जरूरी हवे।

²⁴ काबरकि मसीह हर मईनसे मन कर हाथ ले बनावल, ओ पबितर जघा में नई हलकीस, जेहर असली पबितर जघा कर नमूना रहीस, बकिन ओहर सरग में ही हलकीस, ताकि अब हमर बर ओहर परमेस्वर कर आगू में परगट होए।

²⁵ महायाजक हर, हर साल लहू ला लेके सबले पबितर जघा में हलकत रहीस, जेहर ओकर अपन लहू नई रहत रहीस, बकिन मसीह ला ओही कस बार-बार अपन-आप ला बली चघाए कर जरूरत नईए।

²⁶ अगर एकस होतीस, त जब ले संसार हर रचल गईस, तब ले आएज तक मसीह ला केतना बार दुख उठाए बर परतीस। बकिन ओहर अब ए जुग कर आखरी में, सब कर सेंथी एकेच दाएर परगट होईस, ताकि अपन खुद कर बलिदान कर द्वारा पाप ला दूर करे।

²⁷ जेकस कि मईनसे मन बर एक बार मराई अऊ ओकर बाद ओकर नियाओ होवाई तय हवे।

²⁸ ओही कस मसीहोच हर, अपन-आप ला एक दाएर बलिदान कएर देहीस कि ओहर ढेरेच मईनसे मन कर पाप ला दूर करे अऊ ओहर दूसर दाएर परगट होही, त ओहर पाप ला दूर करे बर नहीं, बलकि ओमन कर उद्धार करे बर परगट होही, जेमन उत्सुक होए के ओकर डगर ला जोहत रथें।