इबरानी 8 - Surgujia Bible

नावा करार कर महायाजक

¹ अब जे गोएठ ला हमरे कहथी, ओमे ले सबले खास बात एहर लागे कि हमर एगोट अईसना महायाजक हवे, जेहर सरग में महान परमेस्वर कर सिंहासन कर जवनी कती बईठीस हवे,

² अऊ ओहर ओ पबितर जघा में, मनेकि सरग कर सचा तंबू में सेवा करथे अऊ ए पबितर तंबू हर तो, कोनो मईनसे कर द्वारा नहीं बकिन परभू कर द्वारा ठड़हुवाल हवे।

³ हर एक महायाजक हर, भेंट अऊ बलिदान चघाए बर ठहराल जाथे, तेकर ले ए महायाजक बर जरूरी हवे कि ओकरो जग चघाए बर कुछ रहे।

⁴ अगर ओहर धरती में रतीस, त कभों याजक नई होतीस, काबरकि मूसा कर कानहूंन कर अनुसार, भेंट चघाए बर तो याजक मन हवें।

⁵ ओमन याजक कर रूप में जे पबितर जघा में सेवा करथें, ओहर सरग कर पबितर जघा कर एगोट नकल अऊ छांए लागे। एकर चलते जब मूसा हर अराधना कर पबितर तंबू ला बनोईया रहीस, त ओके ला परमेस्वर ले एकस चेतावनी मिलीस, “देख, तंए सब जाएत ला ओ नमूना कर अनुसार बना, जेला मंए पहार कर ऊपरे तोके देखाए रहें।”

⁶ बकिन अब जे सेवा मसीह ईसू ला मिलीसे, ओहर ओ याजक मन कर सेवा ले बढ़िहां हवे। अब ओहर जुनहा करार ले अऊ बढ़िहां करार कर अगुवा-मझुवा लागे। ए नावा करार हर बढ़िहां बात-जबान मन कर ऊपरे बनल हवे।

⁷ अगर पहिला करार में कांही कमी नई होतीस, त दूसर करार कर जरूरत ही नई परतीस।

⁸ बकिन परमेस्वर हर, ओ जुनहा करार में कमी पाईस अऊ कहीस, “परभू हर कथे सुना, ओ समय हर आवत हे, जब मंए इसराएल कर घराना कर संगे अऊ यहूदा कर घराना कर संगे एगोट नावा करार करहूं।

⁹ एहर ओ करार सहींक नई होही, जेला मंए ओमन कर पूरखा मन संगे, ओ घरी में करे रहें, जे घरी मंए ओमन कर हाथ ला धएर के ओमन ला मिसर देस ले निकाएल के ले लाने। परभू हर ए बात ला कथे: ओमन मोर करार कर पालन नई करीन, एकर बर मंए ओमन कर खियाल नई राखें।

¹⁰ फेर परभू हर कथे कि जे करार मंए ओ दिन मन कर पाछू, इसराएल कर घराना कर संगे करहूं, ओहर एहर लागे कि मंए अपन कानहूंन ला ओमन कर मन में डालहूं, अऊ ओला ओमन कर हिरदय में लिखहूं। मंए ओमन कर परमेस्वर होहुं अऊ ओमन मोर मईनसे होहीं।

¹¹ कोनो अपन परोसी ला ए नई सिखाही चाहे कोनो अपन भाई-बहिन मन ला, ए नई कही कि तंए परभू ला जान, काबरकि छोटे ले लेके बड़े तक ओ सब झेमन मोके जानहीं।

¹² मंए ओमन उपरे दया करहूं अऊ ओमन कर अपराध ला छमा करहूं, अऊ ओमन कर पाप ला फेर कभों सुरता नई करहूं।”

¹³ ए करार ला “नावा करार” कएह के, परमेस्वर हर पहिला करार ला बिगर काम कर ठहराईस अऊ जे चीज हर जूनहा अऊ बिगर काम कर होए जाथे, ओहर हालू मेटाए जाही।