इबरानी 7 - Surgujia Bible

मलिकीसिदक याजक

¹ ए मलिकीसिदक हर सालेम देस कर राजा अऊ सबले बड़खा परमेस्वर कर याजक रहीस। जब अबराहम हर राजा मन ला हरुवाए के फिरत रहीस, त एही मलिकीसिदक हर ओकर ठन भेंट करीस अऊ ओके आसीस देहीस।

² अबराहम हर ओके सब जाएत कर दसवां हिंसा देहीस। मलिकीसिदक नांव कर मतलब हवे, “धरमीपन मनेकि सही नियाओ ले राएज करोईया राजा” ओहर “सालेम” कर राजा भी लागे, जेकर मतलब हवे, “सांती” कर राजा।

³ ओकर दाई-दाऊ आखिर ओकर पूरखा मन कर कोई पता नईए। ओकर जनम कर न तो सुरू हवे अऊ न आखरी हवे। ओहर परमेस्वर कर बेटा सहींक, हमेसा बर एगोट याजक बने रथे।

⁴ तुमन ओला देखा कि ओहर केतना महान रहीस, काबरकि हमर पूरखा अबराहम हर लड़ाई में लुटल सबले बढ़ियां चीज कर दसवां हिसा ओके ला देहीस।

⁵ मूसा कर कानहूंन हर अगींया देथे कि लेवी कर बंस में ले, जेमन याजक कर पद पाथें, ओमन ला अपन बंस कर दूसर भाई मन ले दसवां हिसा लेहे बर चाही, ए मईनसे मन अबराहम कर बंस ले हवें, तबोले दसवां हिसा लेहे बर परथे।

⁶ बकिन मलिकीसिदक हर लेवी कर बंस कर नई रहीस, तबोले ओहर अबराहम ले दसवां हिसा लेहीस अऊ ओके आसीस देहीस। एही अबराहम ला परमेस्वर ले बात-जबान मिले रहीस।

⁷ ए बात में कोनो संका नईए कि जेहर छोटे हवे, ओहर अपन ले बड़े कर आसीस पाथे।

⁸ अऊ इहां तो दसवां हिसा, लेवी बंस कर मईनसे मन लेथें, लेवी बंस कर मईनसे मन तो नास होवईया मईनसे लागें, तबोले दसवां हिसा लेथें, बकिन मलिकीसिदक कर बारे में तो पबितर किताब हर गवाही देथे कि ओहर जीयत हवे।

⁹ त हमरे एहू कस कएह सकथी, कि लेवी जेहर दसवां हिसा लेथे। ओहर अबराहम कर जरिये दसवां हिसा देहीस।

¹⁰ काबरकि जब मलिकीसिदक हर अबराहम ठे भेंट करीस, ओ घरी एक परकार से लेवी हर अपन दाऊ कर देंह में रहीस।

ईसू हर मलिकीसिदक सहींक हवे

¹¹ इसराएली परजा मन ला, लेवी मन कर याजक पद कर जरिये, कानहूंन मिले रहीस। अगर याजक पद कर उदेस हर लेवी याजक पद कर द्वारा पूरा होईस हवे, त एगोट दूसर याजक ला हारून कर परिवार ले नहीं, बकिन मलिकीसिदक कर परिवार में ले आए कर जरूरत बिलकुल नई रहीस।

¹² काबरकि जब याजक कर पद हर बदेल जाथे, त मूसा कर कानहूंन ला भी बदले बर जरूरी हवे।

¹³ हमर ईसू जेकर बारे में ए सबो बात हर कहल जाथे, ओहर आने गोती कर लागे अऊ ओ गोती में ले कोनोच हर अझे तक याजक कर रूप में बेदी कर सेवा नई करीन हवें।

¹⁴ काबरकि ए बात हर सफा हवे कि हमर परभू हर यहूदा कर गोती में ले आईस हे अऊ ए गोती कर बारे में मूसा हर याजक पद कर कांहीच चरचा नई करीस हे।

¹⁵ अगर मलिकीसिदक सहींक, एगोट दूसर याजक हर आथे, त हमर ए बात हर अऊरेच सफा होए जाथे।

¹⁶ ओहर अपन पूरखा मन कर कानहूंन कर आधार में याजक नई बनीस, बकिन ओहर अमर जिनगी कर सक्ती कर अनुसार याजक बनीस।

¹⁷ काबरकि ओकर बारे में एकस गवाही देहल गईस हे, “जेकस मलिकीसिदक हर महायाजक कर सेवा करीस, ओही कस तंए हमेसा बर एगोट याजक लागस।”

¹⁸ एही कस, पहिला अगींया ला हटाए देहल गईस, काबरकि ओहर कमजोर अऊ बेकार रहीस,

¹⁹ (काबरकि मूसा कर कानहूंन हर, कोनोच बात ला ओकर पूरा उदेस में लाने बर काम नई करीस) बकिन अब एगोट बढ़िहां आसा देहल गईसे, जेकर चलते हमरे परमेस्वर कर ठावें जाए सकत ही।

²⁰ अऊ ईसू ला किरिया कर संगे, एगोट महायाजक कर रूप में ठहराल गईस, बकिन दूसर झेमन ला बिगर कोई किरिया खाए, महायाजक कर रूप में ठहराल गईस।

²¹ बकिन परमेस्वर हर अपन किरिया कर द्वारा ईसू ला याजक बनाईस। जेकस कि पबितर किताब हर कथे, तंए जुग-जुग बर एगोट याजक लागस, “परभू हर ए किरिया खाईस अऊ ओहर अपन मन ला नई बदले।”

²² ए किरिया कर कारन ईसू हर परमेस्वर कर संगे एगोट अऊ बढ़िहां करार कर जमानतदार ठहरीस।

²³ पहिले तो ढेरेच याजक मन रहीन, ओमन ला मिरतु हर अपन पद में बने रहे बर नई देहत रहीस।

²⁴ बकिन ईसू हर हमेसा बर जीयत रथे, एकरले ओकर याजक पद हर हमेसा बर हवे।

²⁵ एकर चलते जेमन ओकर जरिये परमेस्वर जग आथें, ओहर ओमन कर पूरा-पूरा उद्धार कएर सकथे, काबरकि ओहर ओमन बर बिनती करे बर हमेसा जीयत हवे।

²⁶ एही कस महायाजक हर हमर जरूरत ला पूरा करथे, जेहर पबितर अऊ निरदोस अऊ सुद्ध हवे। ओहर पापी मन ले अलग हवे अऊ सरग ले भी ऊंच उठाल गईस हवे।

²⁷ दूसर महायाजक मन पहिले अपन पाप मन बर अऊ फेर मईनसे मन कर पाप मन बर, बलिदान चघात रहीन। ईसू ला एकर जरूरत नई रहीस, काबरकि जब ईसू हर अपन-आप ला ओमन कर पाप बर बली चघाईस, तब ओहर ए काम ला हमेसा बरीक, एकेच दाएर में पूरा कएर देहीस।

²⁸ काबरकि मूसा कर कानून हर तो, ओ मईनसे मन ला महायाजक कर रूप में ठहराथे, जेमन ला ढेरे मधे कर कमजोरी हवे, बकिन परमेस्वर कर किरिया, जेहर मूसा कर कानहूंन कर पाछू आईस, ओहर ओ बेटा ला याजक ठहराईस, जेहर हमेसा बर सिद्ध बनाल गईस हे।