इबरानी 5 - Surgujia Bible

सबले बढ़िहां महायाजक

¹ काबरकि हर एक महायाजक मईनसे मन ले चुनल जाथे अऊ ओहर मईनसेच मन बर, परमेस्वर कर सेवा करे बर ठहराल जाथे कि ओहर परमेस्वर ला भेंट अऊ पाप ले छुटकारा मिले बर बली चघाए।

² जेमन बिगर जाने गलती करके भटक जाथें, ओमन कर संगे ओ महायाजक हर सोगे होए सकथे, काबरकि ओहर खुद कमजोरी में छेंकाईस हवे।

³ एकर चलते ओके मईनसे मन कर पाप कर छुटकारा बरीक अऊ खुद कर पाप बरीक भी बली चघाए बर जरूरी हवे।

⁴ कोनो हर खुद ए महायाजक कर पद ला नई ले, ए काम बर ओकर बुलावा परमेस्वर कर द्वारा होए बर चाही, जेकस कि हारून हर बलाल गए रहीस।

⁵ वईसने मसीह हर भी महायाजक बने कर आदर ला अपन आप ले नई लेहीस, बकिन परमेस्वर हर ओके देहीस, जेहर ओकर जग कहे रहीस, “तंए मोर बेटा लागस, अब मंए तोर दाऊ बन गए हवों”

⁶ एही कस ओहर दूसर जघा में भी कथे, “जेकस मलिकीसिदक हर महायाजक कर सेवा करीस, ओही कस, तंए हमेसा बर एगोट याजक लागस।”

⁷ मसीह हर धरती में रहीस, त ओहर चिकेर-चिकेर के अऊ आंसू बहाए बहाए के, परमेस्वर जग पराथना अऊ बिनती करीस, जेहर ओके मिरतु ले बचाए सकत रहीस अऊ परमेस्वर कर अधीन रहे कर चलते, ओहर ओकर बिनती ला सुनीस।

⁸ परमेस्वर कर बेटा होए के भी ओहर दुख उठाए-उठाए के ओकर अगियां ला माने बर सिखीस।

⁹ एकर चलते ओहर सिद्ध होए गईस, तब ओहर ओकर अगियां मनोईया सब झन बर, हमेसा कर उद्धार कर जरिया बन गईस।

¹⁰ जेकस मलिकीसिदक हर महायाजक कर सेवा करीस, ओही कस सेवा करे कर पद ला परमेस्वर हर मसीह ला देहीस।

बिस्वास ले भटक झईन जईहा

¹¹ एकर बारे में हमके ला ढेरेच गोएठ कहे बर हवे, बकिन एला समझाए बर मुसकील हवे, काबरकि तुमन कर समझ हर ढेरेच कमजोर हवे।

¹² फुरोंच में ए समय तक तो, तुमन ला गुरू होए जाए बर चाहे रहीस, तबोले एहर जरूरी होए गईसे कि कोई तुमन ला परमेस्वर कर बचन कर, सुरू कर बात मन ला फेर सिखाए, तुमन तो एकस होए गए हवा कि तुमन ला बड़े मन कस ठोस भोजन कर बदले, अभीयोंच ले लईका मन कस गोरस कर जरूरत हवे।

¹³ जेहर गोरस पीके जीथे, ओहर भलाई अऊ बुराई कर बात ला पहिचान नई सके, काबरकि ओहर लईका हवे।

¹⁴ बकिन ठोस भोजन हर तो बड़े मन बर लागे, जेमन लगातार अभियास कर चलते भलाई अऊ बुराई कर पहिचान करे में पका होए गईन हवें।