इबरानी 4 - Surgujia Bible

परमेस्वर कर मईनसे मन कर बिसराम

¹ परमेस्वर कर बिसराम में हलके कर बात-जबान हर अझर ले बनल हवे, तेकर ले हमके ला सवाचेती रहे बर चाही, ताकि तुमन में ले कोनो हर ओमें हलके ले छुईट झईन जाए।

² काबरकि हमूच मन ला इसराएली मन कस सुघर खभेर सुनाल गईस हे, बकिन जे खभेर ला ओमन सुनीन, ओकर ले ओमन ला कांही फयदा नई होईस, काबरकि जेमन एला सुईन के बिस्वास करीन, ओमने कस एहू मन बिस्वास कर संगे एला नई अपनाईन।

³ सिरीप हमीच मन जेमन बिस्वास करे हन, ओ बिसराम में हलकथन, आने झेमन कर बारे में परमेस्वर हर कहीस हवे, “मंए अपन गुसा में किरिया खाएं कि ओमन मोर बिसराम में कभों नई हलके पाहीं।” परमेस्वर कर काम तो ओहीच समय पूरा होए गए रहीस, जब ओहर संसार ला बनाईस।

⁴ काबरकि पबितर किताब हर, सातवां दिन कर बारे में एकस कहथे, “परमेस्वर हर सातवां दिन अपन सब काम ला पूरा कएर के बिसोईस।”

⁵ अऊ एजग फेर एकस कथे, “ओमन मोर बिसराम में कभों हलके नई पाहीं।”

⁶ एहर पका हवे कि तनिक झेमन ला ओ बिसराम में हलके बर हवे, बकिन जेमन ला पहिले सुघर खभेर सुनाल गए रहीस, ओमन एमे हलके नई सकीन, काबरकि ओमन परमेस्वर कर अगियां ला नई मानीन।

⁷ तेकर ले परमेस्वर हर ओकर बिसराम में हलके बर एगोट अऊ समय ठहराईस अऊ ओ समय आएज हवे, ढेरेच समय कर बाद ओहर दाऊद राजा कर जरिये, एकर बारे में कहीस अऊ ओहर पबितर किताब में आगू ले लिखल हवे, “अगर आएज तुमन ओकर गोएठ ला सुनीहा, त अपन मन ला कठोर झईन करीहा।”

⁸ फुरोंच में यहोसू हर इसराएली मन ला बिसराम देहे रहतीस, त परमेस्वर हर बाद में दूसर बिसराम कर दिन कर बारे में नई गोठियातीस।

⁹ एकरे बर अब जाएन लेआ कि परमेस्वर कर मईनसे मन बर एगोट बिसराम बांचीस हवे।

¹⁰ काबरकि जेहर परमेस्वर कर बिसराम में हलकथे, ओहू हर परमेस्वर कस अपन काम ला पूरा करके बिसराम में हलकीस हवे।

¹¹ तेकर ले आवा, अब हमरे ओ बिसराम में हलके कर पूरा-पूरा कोसिस करी, ताकि एकस झईन होए कि कोई मईनसे हर, ओ इसराएली मन कस अगियां ला नई माएन के गिर पड़े।

¹² काबरकि परमेस्वर कर बचन हर जीयत अऊ सक्तिदार हवे। एहर दुई धारी तलवाएर ले भी ढेरेच चोंख हवे अऊ जीव अऊ आत्मा, जोड़ अऊ गुदा मन ला अलग-अलग कएर के आर-पार बेध देथे। अऊ एहर मईनसे कर मन कर बिचार अऊ ईछा ला जांचथे।

¹³ सिरिस्टी कर कोनोच चीज हर परमेस्वर कर नजर ले लुकाईस नईए। ओकर आंएख कर आगू में सब चीज मन खुला अऊ परगट हवें अऊ ओही परमेस्वर ला हमके अपन लेखा देहे बर परही।

ईसू हमर दयालू महायाजक लागे

¹⁴ हमर एक महान महायाजक हवे, मनेकि परमेस्वर कर बेटा ईसू, जेहर अगास मन ले होए के गईसे, त आवा, हमरे अपन बिस्वास में बजर बने रही जेला हमरे मानथी।

¹⁵ हमर महायाजक हर, हमर कमजोरी मन में हमर संगे खड़ा रहिके जरूर मदेत कएर सकथे, काबरकि ओहर सब बात मन में हमर कस परखल गईस, तबोले ओहर पाप नई करीस।

¹⁶ तेकर ले आवा, हमरे किरपा कर सिंहासन कर ठावें हिमेत करके चली, ताकि जरूरत कर घरी में हमरे, परमेस्वर कर दया अऊ किरपा ला पाए सकी।