इबरानी 3 - Surgujia Bible

ईसू हर मूसा ले महान हवे

¹ तेकर ले ए भाई-बहिन मन, परमेस्वर हर तुमन ला अपन मईनसे होए बर चुईन लेहीसे। एकरे ले अपन धियान ईसू कर ऊपरे लगावा, जेला परेरीत अऊ महायाजक कर रूप में अपनाथी।

² जेकस कि मूसा हर परमेस्वर कर घर कर सब मईनसे मन ला, बिस्वास लाएक होए के सेवा करीस, ओही कस ईसू हर भी बिस्वास लाएक होए के, परमेस्वर कर सेवा करीस, जेहर ओके ला ठहराईस।

³ जेकस कि घर कर बनोईया हर घर ले बएढ़ के, आदर कर लाएक समझल जाथे, ओही कस ईसू हर मूसा ले बएढ़ के, आदर कर लाएक समझल गईस।

⁴ काबरकि हर एक घर ला कोई न कोई तो बनाथे, बकिन सब जाएत ला परमेस्वरेच हर बनाईस हवे।

⁵ मूसा तो परमेस्वर कर घर कर सब मईनसे मन ला, बिस्वास लाएक होए के सेवा करीस कि जे बात मन ला परमेस्वर हर अवईया समय में बतोईया रहीस ओकर गवाही दे।

⁶ बकिन मसीह हर बेटा कर रूप में परमेस्वर कर घर कर मईनसे ला, बिस्वास लाइक होए के सेवा करीस, अगर हमरे अपन हिमेत अऊ अपन भरोसा में बने रहबो, जेकर बारे में हमरे बड़ाई करथी, त हमरे ओकर घराना लागी।

अबिस्वास कर बिरोध में चेतावनी

⁷ एकरले जेकस पबितर आत्मा हर कथे, “अगर आएज तुमन ओकर गोएठ ला सुनीहा,

⁸ त अपन हिरदय ला कठोर झईन करीहा, जेकस कि तुमन कर पूरखा मन परीछा कर दिन सुनसान जघा में, परमेस्वर ला गुसा देवाए के करे रहीन।”

⁹ परमेस्वर हर कहीस, “उहां तुमन कर पूरखा मन मोके ला जांचीन अऊ परखीन, अऊ चालीस बछर तक मोर काम ला देखीन।

¹⁰ एकरे चलते मंए ओ पीढ़ी कर मईनसे मन ले नराज रहें, अऊ मंए कहें, एमन कर मन हर हमेसा भटकते रथे, अऊ एमन मोर डगर ला नई जानीन।”

¹¹ तब मंए गुसाए के किरिया खाएं, “ओमन मोर बिसराम में कभों हलके नई पाहीं।”

¹² ए भाई-बहिन मन, सवाचेती रहा, तुमन में ले ककरो अबिस्वासी अऊ घिनक हिरदय झईन होए कि जेहर तुमन ला, जीयत परमेस्वर ले दुरिहां हटाए के ले जाए।

¹³ बकिन जे दिन तक आएज कर दिन कहल जाथे, सगर दिन एक दूसर के समझावत रहा, ताकि तुमन में ले कोई मईनसे हर, पाप कर छल में पएड़ के कठोर झईन होए जाए।

¹⁴ जे भरोसा हर, हमर जग सुरू में रहीस, अगर हमरे ओमें आखरी तक मजबूत बने रहबो, त हमरे मसीह कर संगे भागीदार होए जाबो।

¹⁵ जेकस कि पबितर किताब हर कथे, “अगर आएज तुमन ओकर गोएठ ला सुनीहा, त अपन हिरदय ला कठोर झईन करीहा, जेकस कि इसराएली मन परमेस्वर ला गुसा देवाए के करे रहीन।”

¹⁶ भई ओमन कोन रहीन, जेमन परमेस्वर कर गोएठ ला सुनीन अऊ ओके गुसा देवाईन? का ओ सब मईनसे मन नई रहीन, जेमन ला मूसा हर मिसर देस ले निकाएल के लानीस?

¹⁷ अऊ काकर जग परमेस्वर हर चालीस बछर ले नाराज रहीस? का ओ मईनसे मन ले नहीं, जेमन पाप करीन अऊ ओमन कर लास हर सुनसान जघा में पड़े रहीस?

¹⁸ अऊ ओहर किरिया खाएके काकर जग कहीस कि एमन मोर बिसराम में कभों हलके नई सकहीं? का सिरीप ओमन जग, जेमन ओकर अगियां ला नई मानीन?

¹⁹ एही कस हमरे देखथी कि ओमन अपन अबिस्वास कर चलते हलके नई सकीन।