इबरानी 13 - Surgujia Bible

परमेस्वर ला कईसे खुस करे बर हवे

¹ भाई-बहिन कस एक दूसर ले मया करत रहा।

² सेवा-सतकार करे बर झईन भुलाईहा, काबरकि कईयो झेमन अईसना कएर के, अनजाने में सरगदूत मन कर सेवा-सतकार करीन हवें।

³ अऊ जेमन जेहल में हवें, ओमन कर खियाल रखा, एकस सोंएच के कि तुहूंच मन ओमन कर संगे कैदी हवा, जेमन कर संगे गलत बेवहार करल जाथे, ओमन कर भी खियाल एकस सोंएच के राखा, कि तुमन ओ दुख ला खुदेच सहथा।

⁴ बिहाओ हर, सबो मईनसे मन में आदर कर बात समझल जाए, घरदार अऊ घरदारीन एक दूसर कर छोएड़ अऊ ककरो संगे गलत सबंध झईन राखें, काबरकि परमेस्वर हर ओमन कर नियाओ करही, जेमन बेभिचारी हवें अऊ आने झेमन कर संगे गलत सबंध राखथें।

⁵ तुमन अपन-आप ला रूपिया पईसा कर मोह माया ले दुरिहां राखीहा अऊ जे जाएत तुमन जग हवे, ओतनेच में संतोस करा, काबरकि परमेस्वर हर कहीसे, “मंए तोके ला कभों नई छोंड़ो अऊ तोके ला कभों नई तियागों।”

⁶ एकरले हमन पका भरोसा कर संगे ए कईह सकथन, “परभू हर मोर मदेत करोइया लागे, मंए नई डराओं, मईनसे हर मोर का कएर सकथे?”

⁷ अपन ओ अगुवा मन कर खियाल राखा, जेमन तुमन ला परमेस्वर कर बचन सुनाईन। ओमन कर बारे में धियान लगाए के सोंचा कि ओमन कईसे जिनगी जीयत रहीन अऊ मरीन अऊ ओमन कर बिस्वास कर नकल करा।

⁸ ईसू मसीह हर काएल अऊ आएज अऊ जुग-जुग बर एकेच सहींक हवे।

⁹ कईयो मधे कर अनजान गलत उपदेस कर चलते, भरमाए झईन जईहा। एहर बढ़िहां हवे कि हमर हिरदय हर भोजन ले नहीं, बलकि परमेस्वर कर किरपा में बजर होए जाए। जुनहा करार कर भोजन कर नियम मन ला पालन करे ले, एमन ला कोनो फयदा नई होईस।

¹⁰ हमरोच एगोट बेदी हवे, जेमन पबितर तंबू में सेवा करथें, ओमन ला ए बेदी में ले खाए कर अधिकार नईए।

¹¹ महायाजक हर जानवर मन कर लहू ला, पापबली बरीक सबले पबितर जघा में ले जाथे, बकिन ओमन कर देंह हर डेरा कर बाहरी लेसल जाथे।

¹² तेकर ले ईसू हर भी सहर कर दुरा कर बाहरी, दुख भोगीस कि ओहर अपन खुदेच कर लहू ले मईनसे मन ला पबितर करे।

¹³ त आवा, जे निंदा ला ईसू हर सहीस, ओही निंदा ला सएह के हमरे डेरा कर बाहरी ओकर ठन जाई।

¹⁴ काबरकि ए धरती में हमर बर हमेसा रहेदार कोनो सहर नईए, बकिन हमरे ओ सहर कर डगर देखत ही, जेहर अवईया हवे।

¹⁵ एकरले आवा, हमरे ईसू कर जरिये, परमेस्वर ला हमेसा इस्तुती कर बलिदान चघाई अऊ ए बलिदान हर परमेस्वर कर नांव कर महिमा करोईया हमर ओंठ मन कर फल लागे।

¹⁶ भलाई करे बर अऊ आने झेमन कर मदेत करे बर झईन भुलावा, काबरकि एकस बलिदान ले परमेस्वर खूस होथे।

¹⁷ अपन अगुवा मन कर अगियां ला माना अऊ ओमन कर अधीन में रहा, काबरकि ओमन तुमन कर आत्मा मन बर जागत रथें कि ओमन ला एकर लेखा देहे बर परही, ओमन बर ए काम हर एगोट बोझा कस नहीं, बकिन एगोट आनंद कर बात होए बर चाही, नहीं तो, ओहर तुमन कर कुछ फयदा कर नई होही।

¹⁸ हमर बर पराथना करत रहा। हमरे जरूर जानथी कि हमर बिवेक हर सफा हवे, काबरकि हमरे हर बात में सही चाल चले बर चाहथी।

¹⁹ मंए तुमन जग खास कएर के बिनती करत हवों कि तुमन पराथना करत रहा, ताकि मंए तुमन जग हालू फिर के आए सकों।

²⁰ सांती देवईया परमेस्वर हर, हमेसा कर करार कर लहू कर द्वारा हमर परभू ईसू ला, जेहर भेंड़ी मन कर महान चरवाहा लागे, मरल में ले जियाईस।

²¹ ओहर तुमन कर जिनगी ला सबो बढ़िहां चीज मन ले भएर दे, ताकि तुमन ओकर ईछा ला पूरा करा अऊ जे बात हर ओके बढ़िहां लागथे, ओहर ओ बात ला ईसू मसीह कर जरिये हमर में पैदा करे, ईसू मसीह कर महिमा जुग-जुग ले होवत रहे। आमीन।

²² ए भाई-बहिन मन, मंए तुमन जग बिनती करथों कि उत्साह कर मोर ए बचन ला धीरज धएर के सुना, काबरकि ए चिट्ठी में मंए थोरहें अकन लिखे हों।

²³ मंए तुमन के बताए बर चाहथों कि हमर भाई तीमुथियुस हर जेहल ले छुईट गईस हवे, अगर ओहर इहां हालू आही, त मंए ओकर संगे तुमन जग भेंट करे बर आहूं।

²⁴ अपन सबो अगुवा अऊ परमेस्वर कर सबो मईनसे मन ला, मोर जोहार कईहा। इटली देस कर मईनसे मन तुमन ला जोहार कथें।

²⁵ तुमन सबो झन कर उपरे परमेस्वर कर किरपा होवत रहे। आमीन।