इबरानी 12 - Surgujia Bible

परमेस्वर अपन संतान मन कर ताड़ना करथे

¹ तेकर ले जब हमर चाएरो कती, अईसना ढेरेच बगरा गवाह मन छेंकिन हवें, त आवा, हमरे हर एक ओ रोकोईया बोझ अऊ फंसाए लेवईया पाप ला छोंएड़ के, ओ दऊड़ ला धीरज कर संगे दऊड़ी, जेहर हमर आगू में राखल हवे।

² आवा, हमरे बिस्वास कर सुरू करोईया अऊ बिस्वास ला पका करोईया ईसू कती अपन धियान ला लगाए रही, जेहर अपन आगू में राखल आनंद बरीक लाज कर कुछ चिंता नई कएर के, कुरूस कर दुख ला सहीस। एकर चलते परमेस्वर कर सिंहासन कर जवनी कती बईठ गईस।

³ तेकर ले ईसू कर उपरे अपन मन ला लगावा, जेहर पापी मईनसे मन ले एतना बगरा बिरोध सहीस, ताकि तुमन निरास होए के हिमेत झईन हारा।

⁴ पाप कर बिरुद्ध लड़ाई करे में अझर ले, तुमन ला अपन लहू बहाए बर नई पड़ीस।

⁵ तुमन ला बेटा मन सहींक समेझ के, परमेस्वर कर द्वारा देहल, उपदेस कर ए बचन ला तुमन भुलाए गए हवा? “ए मोर बेटा, परभू कर ताड़ना ला अनभनिया झईन समझ, अऊ जब ओहर तोके डांटथे, त हिमेत झईन हार,

⁶ काबरकि परभू हर, जेकर ठन मया करथे, ओकर ताड़ना भी करथे अऊ जेके ला ओहर बेटा माएन लेथे, ओके ला सजा भी देथे।”

⁷ दुख ला ताड़ना समेझ के सएह लेआ; परमेस्वर हर तुमन ला अपन बेटा जाएन के, तुमन संगे एकस बरताव करथे। काबरकि का अईसना कोनो बेटा हवे, जेकर ताड़ना ओकर दाई-दाऊ नई करें?

⁸ सबेच झन कर ताड़ना होथे, अगर तुमन कर ताड़ना नई होईसे, त तुमन ओकर असली बेटा ना लागा, बलकि नजायज संतान कस हवा।

⁹ हमर सबेच झन कर सारीरिक दाऊ हवे। ओमन हमर ताड़ना करथें अऊ हमरे ओमन कर आदर करथी। तब हमके ला हमर आत्मिक दाऊ कर अधीन में अऊ बगरा रहे बर चाही, ताकि हमरे परभू कर संगे हमेसा जीयत रही।

¹⁰ हमर सारीरिक दाऊ मन अपन समझ कर अनुसार तनीक जुआर बर हमर ताड़ना करथें, बकिन आत्मिक दाऊ परमेस्वर हर, हमर भलाई बर ताड़ना करथे, ताकि हमरे ओकर पबितरता में भागीदार होए जाई।

¹¹ कोनोच मधे कर ताड़ना हर, ताड़ना पाए घरी बढ़िहां नई लागे; बकिन दुख देथे। तबोले जे मईनसे मन ए ताड़ना ला सएह के सिक्छा पाईन हवें, ओमन पाछू परमेस्वर कर नजर में, सांती कर संगे एगोट सही जिनगी जी सकत हवें।

¹² एकरले अपन कमजोर हाथ मन ला अऊ कमजोर ठेहूंना मन ला बजर करा।

¹³ अपन गोड़ बर डगर मन ला समतल करा, ताकि खोरा हर गिर झईन जाए, बलकि ओहर रेंगे लागे।

परमेस्वर कर इनकार करोईया मन बर चेत्तावनी

¹⁴ सबो मईनसे मन कर संगे, सांती ले रहे कर अऊ पबितर बने कर भी पूरा कोसिस करा, काबरकि बिगर पबितरता कर कोनो मईनसे हर परभू ला नई देख सके।

¹⁵ सवाचेती रईहा कि कोनो मईनसे हर परमेस्वर कर किरपा ले छुएट झईन जाए अऊ ओमन में कोनो मधे कर करू जएर झईन पनपे, जेकर जरिये ढेरेच दुख-पीरा होथे अऊ ढेरेच झेमन ला असुध कएर देथे।

¹⁶ सवाचेती रईहा कि कोई छिनारी झईन करे अऊ एसाव कस अधरमी झईन होए, जेहर एक जुआर कर भात बर अपन पहिलोठा कर अधिकार ला बेच देहीस।

¹⁷ तुमन जानथा कि पाछू, जब ओहर ए आसीस ला पाए बर चाहीस, त ओहर ओकर लाएक समझल नई गईस, तबोले ओहर रोए-रोए के, अपन दाऊ कर आसीस ला पाए कर कोसिस करीस, बकिन फेर ओके पसताए कर मोका नई मिलीस।

¹⁸ इसराएली मन तो ओ पहार जग पहुंचे रहीन, जेला छुई सकत रहीन। उहां आगी बरत रहीस, अंधार, करिया बदरी अऊ आंधी-तूफान रहीस,

¹⁹ अऊ उहां तुरही कर अवाज अऊ एक झन कर अईसना गोठियाए कर अवाज आवत रहीस, जेला सुईन के मईनसे मन बिनती करे लागीन कि परमेस्वर फेर ओमन जग झईन गोठियाए।

²⁰ काबरकि ओमन ओ अगियां ला सुईन के घबराए गईन, जेमें एकस कहल गए रहीस, “अगर कोई जानवर हर भी ओ पहार ला छुही, त ओला पखना में माएर के मरुवाए देहल जाही।”

²¹ ओ पहार में इसराएली मन कर दरसन हर अईसना डरडरावन रहीस, जेला मूसा हर कएह भरीस, “मंए डर कर मारे कांपत हों।” बकिन तुमन तो ओ इसराएली मन कस, एगोट पहार जग नई पहुंचे हा, जेला छुई सकत हा।

²² बकिन तुमन सियोन पहार अऊ जीयत परमेस्वर कर सहर, स्वरगीय यरूसलेम में आए गए हवा। तुमन आनंद मनोईया हजारों सरगदूत मन जग आए गए हवा,

²³ अऊ ओ पहिलोठा मन कर सभा अऊ कलीसिया में आए गए हवा, जेमन कर नांव सरग में लिखल हवे, तुमन परमेस्वर जग आए गए हवा, जेहर सबो मईनसे मन कर नियाओ करथे अऊ तुमन ओ धरमी मन कर आत्मा मन जग आए गए हवा, जेमन सिद्ध बनाल गईन हवें।

²⁴ तुमन ईसू जग आए गए हवा, जेहर एगोट नांवा करार कर अगुवा-मझुवा लागे अऊ तुमन ओ छिंटल लहू जग आए गए हवा, जेहर हाबील कर लहू ले भी बढ़िहां बात मन ला कथे।

²⁵ सवाचेती रईहा कि जेहर गोठियाथे, ओकर गोएठ ला सुना, काबरकि ओ मईनसे मन बांचे नई सकीन, जेमन ओकर बात ला नई सुनीन, जेहर ओमन ला धरती में चेतावनी देहत रहीस, त फेर हमरे कईसे बांएच सकबो, अगर हमरे ओकर गोएठ ला नई सुनबो, जेहर हमके ला सरग ले चेतावनी देथे?

²⁶ जब परमेस्वर सीनै पहार ले वायदा करीस, त ओकर अवाज हर धरती ला हिलाए देहीस, बकिन अब ओहर वायदा करीसे, “एक दाएर फेरेच मंए सिरीप धरती ला ही नहीं, बलकि अगास मन ला भी हिलाहूं।”

²⁷ ए सब्द मन “एक दाएर फेर” ए बात ला बताथे कि जे चीज मन हिलाल जाथें, ओमन ला हटाल जाही, काबरकि एमन सिरजल चीज लागें अऊ जे चीज मन ला हिलाए नई जाएं ओमन अटल बने रहीं।

²⁸ तेकर ले जब हमके ला एगोट अईसना राएज मिलत हवे, जेला हिलाए नई जाए सके, त आवा, हमरे धनबाद देई अऊ आदर अऊ भक्ति कर संगे परमेस्वर कर अईसना अराधना करी, जेकर ले ओहर खुस होथे।

²⁹ काबरकि हमर परमेस्वर हर भसम करोईया आगी कस हवे।