इबरानी 11 - Surgujia Bible

बिस्वास कर खास बात

¹ अऊ बिस्वास कर मतलब, ए हवे कि ओ बात हर पका होए जाही, जेकर असरा हमरे करथी अऊ एहर ओ चीज मन कर बारे में पका सबूत हवे, जेला हमरे नई देखी।

² एही बिस्वास कर कारन, परमेस्वर हर हमर पूरखा मन कर बारे में बढ़िहां गवाही देहीस हे।

³ बिस्वासेच कर चलते हमरे जानथी कि जे चीज ला परमेस्वर हर सिरजीस हे, ओ सब चीज हर ओकर गोएठ ले सिरजल गईसे अऊ जे चीज हर दिखथे, ओहर बिना देखल चीज ले बनीस हवे।

⁴ बिस्वासेच कर चलते हाबील हर, कैन ले बढ़िहां बलिदान परमेस्वर ला चघाईस, एकर चलते परमेस्वर हर ओकर भेंट ला अपनाए के, ओकर बारे में बढ़िहां गवाही देहीस कि ओहर परमेस्वर ला खुस करीस हे, ओहर तो मएर गईस बकिन बिस्वास कर चलते ओहर जे कुछ करीस, ओकर चलते हमके आजीयोच ले बढ़िहां सिक्छा मिलथे।

⁵ बिस्वासेच कर चलते हनोक हर उठाए लेहल गईस अऊ ओकर मिरतु नई होईस। फेर ओके कोई नई देखीन, काबरकि परमेस्वर हर खुद ओके उठाए लेहे रहीस। हनोक कर उठाए जाए ले पहिले, ओकर बारे में गवाही देहल गए रहीस कि ओहर परमेस्वर ला खुस करीस।

⁶ बिगर बिस्वास कर परमेस्वर ला कोनो खुस करे नई सके, काबरकि जेहर परमेस्वर कर ठावें आथे, ओके ए बिस्वास करे बर जरूरी हवे कि परमेस्वर हवे अऊ ओहर ओमन ला इनाम देथे, जेमन ओकर खोज में लगे रथें।

⁷ जब परमेस्वर हर नूह ला, ओ बात मन कर बारे में बताए के चेताईस, जेहर ओ समय नई देखत रहीस, त बिस्वासेच कर चलते ओहर परमेस्वर कर पबितर भय में चएल के, अपन परिवार ला बचाए बर एगोट पानी जहाज बनाईस। अपन बिस्वास कर चलते, जे कुछ नूह हर करीस, ओकर चलते संसार ला दोसी ठहराईस अऊ ओकर बिस्वास कर अनुसार, परमेस्वर हर ओके धरमी मईनसे ठहराए देहीस।

⁸ जब परमेस्वर हर, अबराहम ला एगोट जघा में जाए बर कहीस अऊ ओहर नई जानत रहीस कि ओहर कहां जाथे, तबो ले बिस्वासेच कर चलते, ओहर परमेस्वर कर गोएठ ला मानीस अऊ ओ जघा चएल देहीस, जे जघा ला ओहर पाछू वारिस कर रूप में पवईया रहीस।

⁹ बिस्वासेच कर चलते ओहर ओ भूईया में अपन घर ला बनाईस, जे भूईया ला परमेस्वर हर ओके देहूं कहिके, बात-जबान करे रहीस अऊ ओहर एगोट परदेसी कस, ओ आने देस में थोरहें दिन बर रहीस। ओहर तंबू मन में रहीस अऊ ओही कस इसहाक अऊ याकूब दुनो झेमन करीन, जेमन अबराहम कर संगे बात-जबान कर वारिस रहीन।

¹⁰ अबराहम हर अईसना करीस, काबरकि ओहर ओ पका नेंव दार सरग कर सहर कर बाट जोहत रहीस। ओ सहर कर नकसा बनोईया अऊ गढ़ोईया परमेस्वर लागे।

¹¹ अबराहम हर बुढ़ाए गए रहीस अऊ ओकर परानी सारा हर खुद बांझ रहीस, तबो ले बिस्वास कर चलते ही, ओ दुनों झेला एगोट बेटा होए कर ताकत मिलीस, काबरकि ओमन बिस्वास करीन कि जेहर ओमन जग वायदा करीस हे, ओहर बिस्वास कर लाइक हवे।

¹² एकर चलते एकेच झन ले जेहर बुढ़ाए के मुरदा कस रहीस, मनेकि अबराहम ले अगास कर तरईया अऊ समुंदर कर धरी कर बालू कस अनगिनत संतान होईन।

¹³ ए सब मईनसे मन बिस्वास में रहत मएर गईन; अऊ ओमन ओ बात-जबान कर फल ला नई पाईन, जेकर वायदा परमेस्वर हर करे रहीस, बकिन ओमन ओ बात-जबान कर फल ला दुरिहां ले देखीन अऊ ओकर सवागत करीन। ओमन अपन-आप ला ए धरती में परदेसी अऊ बाहरी मानत रहीन।

¹⁴ जे मईनसे मन अईसना बात कथें, ओमन एला सफा-सफा बताथें कि ओमन अपन खुद कर एगोट देस कर बाट जोहथें।

¹⁵ जे देस ला ओमन छोंएड़ के आए रहीन, अगर ओ देस कर बारे में सुरता करतीन, त ओमन ला उहां वापिस जाए कर मोका रहीस।

¹⁶ बकिन ओमन एगोट अऊ बढ़िहां देस, मनेकि स्वरगीय देस कर बाट जोहत रहीन, एकरले परमेस्वर ला ओमन कर परमेस्वर कहाए में लाज नई लागे, काबरकि परमेस्वर हर तो ओमन बर एगोट सहर तियार करीसे।

¹⁷ जब परमेस्वर हर अबराहम ला परखीस, त बिस्वास कर द्वारा, अबराहम हर इसहाक ला बलिदान करे बर सोंएप देहीस, एही अबराहम ले परमेस्वर हर बात-जबान करे रहीस, तबोले ओहर अपन एकेच ठन बेटा ला बलिदान चघाए बर तियार होए गए रहीस।

¹⁸ अऊ परमेस्वर हर ओके ला कहे रहीस, “इसहाक कर जरिये तोर बंस हर चलही।” तबोले अबराहम हर अपन एकेच ठन बेटा ला बलिदान चघाए बर तियार होए गए रहीस।

¹⁹ अबराहम हर ए मानत रहीस कि परमेस्वर हर सामर्थी हवे अऊ ओहर मरल मईनसे मन ला भी जीयाए सकथे। हमरे ए कएह सकत ही कि अबराहम हर चिन्हा कर रूप में, इसहाक ला मिरतु में ले जीयत फेर पाए गईस।

²⁰ बिस्वास कर द्वारा इसहाक हर अपन बेटा, याकूब अऊ एसाव ला, ओमन कर अवईया बात मन कर बारे में आसीस देहीस।

²¹ बिस्वास कर चलते ही, याकूब हर अपन मरत जुआर अपन लाठी कर मुठीया कर सहारा निहुर के, यूसुफ कर दुनो बेटा ला आसिरवाद देहीस अऊ परमेस्वर कर अराधना करीस।

²² जब यूसुफ हर मरोईया रहीस, तब बिस्वास कर चलते ही, ओहर इसराएली मन कर बारे में कहीस कि ओमन मिसर देस कर गुलामी ले निकेल जाहीं। ओहर ए अगींया भी देहीस कि जब ओमन जाहीं, त ओकर हाड़ा मन ला अपन संगे लेते जाहीं।

²³ जब मूसा हर जनमीस, त ओकर दाई-दाऊ मन, देखीन कि लईका हर देखे में ढेरेच सुघर हवे, त बिस्वास कर चलते ही ओमन ओ लईका ला तीन महीना तक लुकाए के राखीन अऊ ओमन राजा कर अगियां ला नई डराईन।

²⁴ जब मूसा हर बाएड़ गईस, त बिस्वास कर चलते ही, ओहर फिरोन कर नाती कहाए बर इनकार कएर देहीस।

²⁵ पाप में थोरहें समय कर सुख भोगे कर बदले, ओहर परमेस्वर कर मईनसे मन कर संगे, दुख भोगई ला ढेरेच बढ़िहां समझीस।

²⁶ मूसा हर मिसर देस कर धन संपती ले, मसीह बर अपमान सहाई ला बड़खा धन समझीस, काबरकि ओहर अवईया समय में अपन इनाम ला पाए बर अगुरत रहीस।

²⁷ बिस्वास कर चलते ही, मूसा हर मिसर देस ला छोएड़ देहीस। ओहर फिरोन कर कोरोध ले नई डराईस, बलकि ओहर बजर बने रहीस, माना कि ओहर परमेस्वर ला देखीस, जेहर नई दिखे।

²⁸ बिस्वास कर चलते ही, मूसा हर फसह कर तिहार ला मानीस अऊ चौंखट मन में लहू छिंटे कर अगियां देहीस, ताकि मिरतु कर दूत हर इसराएली मन कर पहिलोठा बेटा मन ला झईन मारे।

²⁹ बिस्वास कर चलते ही इसराएली मईनसे मन, लाल समुंदर में ले अईसनेच पार होए गईन, जेकस कि झुरा भूईयां में पार होथें, बकिन जब मिसर देस कर मईनसे मन, पार होए कर कोसिस करिन, त ओ सब झन बूईड़ मरीन।

³⁰ इसराएली मन, बिस्वास कर चलते ही, सात दिन तक यरीहो सहर कर दिवाल कर चकर लगाईन, त ओ दिवाल हर गिर गईस।

³¹ बिस्वास कर चलते ही राहाब नांव कर बेसीया हर, भेद लेवईया मन ला अपन घर में लुकाए रहीस, तेकर ले ओहर परमेस्वर कर अगियां नई मानोईया मन कर संगे मारल नई गईस।

³² अब मंए अऊ का कहों? गिदोन, बाराक, सीमसोन, ईफतह, दाऊद, समूएल अऊ अगमजानी मन कर बारे में, चरचा करे बर मोर जग समय नईए।

³³ बिस्वास ही कर चलते, ओमनेच कस अऊ मईनसे मन देस मन ला जितीन, नियाओ कर अनुसार राएज करीन अऊ ओ बात-जबान कर फल ला पाईन, जेकर वायदा परमेस्वर हर करे रहीस। बिस्वास ही कर चलते ओमन सिंह मन कर मूंह ला बंद कएर देहीन,

³⁴ धधकत आगी ला बितुवाए देहीन अऊ तलवाएर कर मार ले बांएच गईन, ओमन कमजोर होए के भी बलवान बएन गईन, ओमन लड़ाई में बीरता देखाईन अऊ बिदेसी सेना मन ला माएर के कुदाए देहीन।

³⁵ बिस्वास ही कर चलते, सवांगीन मन अपन मरल लोग मन ला फेर जीयत पाए गईन, कईयो झेमन ढेरेच दुख अऊ पीरा सहीन अऊ ओमन एकरले छुटे बर नई चाहीन, ताकि ओमन ला जी उठे कर पाछू, एगोट बढ़िहां जिनगी मिले।

³⁶ बिस्वास ही कर चलते, तनीक झेमन तो मजाक उड़ाई, कोड़ा कर मार खवाई, संकरी में बंधाई अऊ जेहल में डलाई, ए सब कुछ ला सएह लेहीन।

³⁷ ओमन ला पखना में मारीन, ओमन कर देंह ला आरी में चीर के दुई भाग कएर देहीन, ओमन तलवाएर ले माएर देहल गईन। ओमन भेंड़ी अऊ बोकरा कर चमड़ा कर ओढ़ना पहिर के ईते-ऊते मारे मारे फिरीन, ओमन गरीबी में रहीन अऊ सतावल गईन अऊ ओमन कर संगे गलत बरताव करल गईस।

³⁸ ओमन जंगल, पहार अऊ भूईंया कर खोह अऊ माड़ा में भटकत रहीन। बिस्वास ही कर चलते, ओमन ए सब जाएत ला सएह लेहीन। संसार हर ओमन कर लाएक नई रहीस!

³⁹ बिस्वास ही कर चलते, ए सबो झन कर बारे में परमेस्वर हर बढ़िहां गवाही देहीस, तबोले ओमन में ले कोनो हर ओ बात-जबान कर फल नई पाईन, जेकर वायदा परमेस्वर करे रहीस।

⁴⁰ काबरकि परमेस्वर हर हमर बर आगूवेच ले, एगोट अऊ बढ़िहां योजना बनाए रहीस, ताकि ओहूच मन हमर संगे सिद्ध होए जाएं।