गलातियों 6 - Surgujia Bible

एक दूसर कर मदेत करा

¹ ए भाई बहिन मन, अगर कोनो मईनसे हर अपराध करत धराए जाए, त जेमन आत्मिक हवा, नरम सुभाव कर संगे अईसना मईनसे मन ला सही डगर में फिराए लाना अऊ अपन आप में सवाचेती रहा कि तुंहू मन ओ परीछा में झईन पड़ा।

² तुमन एक दूसर कर बोझ उठावा अऊ एही कस मसीह कर कानहूंन ला पूरा करा।

³ अगर कोनो हर कांही ना हवे, तबोले अपन-आप ला कांही समझथे, त ओहर खुदेच अपन-आप ला धोखा देहत हवे।

⁴ बकिन सबेच झन अपनेच काम ला जाएंच ले, एकस करे ले ओके दूसर झन कर तुलना करे बर नई परही, बकिन अपनेच बारे में संतोस करे कर ओके मोका मिलही।

⁵ काबरकि सबेच मईनसे मन अपनेच जिमेदारी कर बोझ ला उठाहीं।

⁶ जेहर बचन कर सिक्छा पाथे, ओहर अपन सिखोईया ला सबेच बढ़िहां चीज मन में साझी करे बर चाही।

⁷ धोखा झईन खईहा, परमेस्वर ला कोनो बोया बनाए नई सके, काबरकि तुमन जे जाएत ला बुनिहा, ओहीच ला काटिहा।

⁸ काबरकि जेहर अपन देंह कर पाप कर सुभाव बरीक कांही जाएत करथे, त ओहर अपन ओही सुभाव कर जरिए नास होए जाही अऊ जेहर पबितर आत्मा कर सुभाव कर अनुसार करथे, ओहर पबितर आत्मा कर जरिये, अमर जिनगी ला पाही।

⁹ हमू मन भलाई कर बूता करे बर हिमेत नई छोंड़ी, काबरकि हमरे अगर भलाई करे में नई थकबो, त ठीकेच घनी में ओकर फल पाबो।

¹⁰ एकर बर जब कभों हमके मोका मिलही, ते घनी सब कर संगे भलाई करबो, खास कएर के बिस्वासी मन जग भलाई करबो।

सबले खास बात हवे नांवा सिरजल

¹¹ देखा, मंए अपनेच हाथ ले कईसना बड़खा-बड़खा अछर में तुमन बर लिखे हों।

¹² जे मईनसे मन अपन-आप ला बढ़िहां देखाए बर चाहथें, ओही मन तुमन कर खतना करुवाए बर तुमन के दबाव डालथें। ओमन सिरीप एकर बर अईसना करथें, तेमेकि मसीह कर कुरूस कर कारन ओमन ऊपरे सताव झईन आवे।

¹³ काबरकि जेमन खतना करुवाए बर कथें, ओमन खुदेच मूसा कर कानहूंन ला पूरा तरह ले पालन नई करें, बकिन तुमन कर खतना एकरले करुवाए बर चाहथें कि तुंहू मन ओकर चेला बन गए हवा, तेकर ले ओमन घमंड करथें।

¹⁴ परभू ईसू मसीह कर कुरूस कर छोंएड़, मंए तो कोनो आने बात में घमंड नई करों। ओकर कुरूस कर जरिए ए दुनिया कर मोर जे इछा हवे, ओहर कुरूस में ठोंकल हवे अऊ ए दुनिया कर जे इछा मोर ऊपरे हवे, ओहू हर कुरूस में ठोंकल हवे

¹⁵ काबरकि खतना करे ले चाहे खतना नई करे ले कोनो बड़े बात नईए। बलकि बड़े बात तो नांवा सिरजल बने ले हवे।

¹⁶ जेतना झेमन ए नियम कर अनुसार चलहीं, त ओमन कर ऊपरे परमेस्वर कर सांती अऊ दया होवत रही। एही मन परमेस्वर कर सचा इसराएली मन लागें

¹⁷ जे दाग मोर ऊपरे लगीस हवे, ओहर ए देखाथे कि मंए ईसू कर दास लागों, एकरले अब कोनो ए खतना कर बारे में मोके तंग झईन करे।

¹⁸ ए भाई-बहिन मन, हमर परभू ईसू मसीह कर किरपा तुमन कर आत्मा कर संगे रहे। आमीन।