गलातियों 5 - Surgujia Bible

हमेसा अजाद रहा

¹ मसीह हर हमके अजाद करीस, तेमेकि हमरे आजादी कर आनंद ले सकी। एकरले एही में माढ़े रहा अऊ गुलामी कर जुवा कर बोझ ला झईन उठावा।

² सुना, मंए पौलुस तुमन ठे कहत हों कि अगर खतना करुवाए के तुमन परमेस्वर ला फुरमा करे बर चाहथा, त तुमन के मसीह ले कांही फयदा नई होही।

³ मंए सबेच झन ला चेताए देहत हों, कि अगर तुमन खतना करुवाथा, त मूसा कर कानहूंन कर सबेच बिधी ला पालन करे बर परही।

⁴ तुमन में ले जेतना झेमन कानहूंन कर पालन कएर के, परमेस्वर ला फुरमा करे बर चाहत हवा, त मसीह ले अलगे होए गए हवा! तुमन परमेस्वर कर किरपा ले दुरिहां होए गए हवा।

⁵ हमर पका असरा एहर हवे कि परमेस्वर हमन ला निरदोस ठहराही अऊ एकरे बर पबितर आत्मा कर जरिए, हमन बिस्वास ले डगर जोहत हवन।

⁶ जब हमरे मसीह ईसू में बिस्वास करथी, त खतना करुवाए ले आखीर खतना नई करुवाए ले कांही फयदा नईए। बलकि सबले बड़खा परमेस्वर कर ऊपरे हमर बिस्वास हवे अऊ जेमन ओकर ऊपरे बिस्वास करथें, ओमन परमेस्वर अऊ आने मईनसे मन ला मया करहीं।

⁷ तुमन तो ढेरेच बढ़िहां ले मसीह जिनगी जियत रहा। अब सच ला माने ले कोन हर तुमन के रोएक देहीस।

⁸ त ए सच ला रोकोईया सिक्छा हर तुमन कर बलोईया कती ले नईए।

⁹ ए झूठा सिक्छा हर चटिक अकन जोरन कस हवे, जेहर सबेच सानल पिसान ला अमट कएर देथे।

¹⁰ मंए तुमन कर बारे में परभू कर ऊपरे भरोसा राखथों कि तुमन कोनो गलत सिक्छा ला नई अपनईहा; बलकि जेहर तुमन के भरमाए देथे, चाहे ओहर कोनोच होए ओके परमेस्वर जरुर सजा देही।

¹¹ ए भाई-बहिन मन, अगर मंए आएज तक खतना करुवाए कर परचार करत हों, त मंए काबर सताए जात हों? अगर मंए अझरो ले खतना कर परचार करत हों, त फेर मसीह कर कुरूस कर कारन, जे ठोकर मोके मिलत हवे, ओहर तो खतम होए जातीस।

¹² मंए तो चाहथों कि जेहर तुमन के हुलुक-डुबूर करथे, ओहर अपन आप ला बधिया कएर दारे।

¹³ ए भाई-बहिन मन, तुमन तो अजाद रहे बर बलाए गए हवा। बकिन ए आजादी ला देंह कर इछा ला, पूरा करे कर जरिया झईन बनावा, बलकि मया ले एक दूसर झन कर सेवा करा।

¹⁴ काबरकि मूसा कर कानहूंन कर सबेच कानहूंन हर, एकेच बात में पूरा होए जाथे, “तंए अपन परोसी जग अपनेच कस मया कर।”

¹⁵ अऊ अगर तुमन एक दूसर झन ला चाबे-कोंथे कस झगरा करथा, त सवाचेती रईहा कि तुमन एक दूसर झन कर नास झईन कएर देईहा।

पबितर आत्मा कर द्वारा जिनगी

¹⁶ बकिन मंए कहत हों कि पबितर आत्मा कर अगुवाई कर अनुसार चलिहा, त तुमन देंह कर पाप करे कर ईछा ला पूरा नई करीहा।

¹⁷ काबरकि देंह हर पाप करे कर ईछा करथे, तबे ओहर पबितर आत्मा कर बिरोध में हवे अऊ पबितर आत्मा हर ओकर बिरोध में ईछा करथे, अऊ एक दूसर कर संगे एमन कर पटरी नई खाए, एकरले तुमन जेला करे बर चाहत हा, ओला झईन करे पावा।

¹⁸ अऊ अगर तुमन पबितर आत्मा कर अनुसार चलथा, त फेर मूसा कर कानहूंन कर कबजा में नई रहा।

¹⁹ त देंह कर सुभाव कर काम तो जहिरा हवे, मने की बेभिचार, घिनक काम, लूचा-लफंगा,

²⁰ मूरती पूजा, टोनहा-टोटका, बैर, झगरा, इसगा, रीस, बिरोध, फूट, गुटबाजी,

²¹ डाह, मतवारी, गलत रिज-रंग अऊ अईसनेच काम ढेरेच हवे। जेकस मंए आगूवेच ले एमन कर बारे में कहे दारे रहें, ओहीच कस मंए फेर तुमन ला आगू ले कईह देहत हों कि अईसना-अईसना काम करोईया मन, परमेस्वर कर राएज कर हकदार नई होहीं।

²² बलकि पबितर आत्मा कर फल हर मया, आनंद, सांती, कयास, किरपा, भलाई, बिस्वास,

²³ नरम सुभाव अऊ माढ़ल जीव हवे; अईसना-अईसना काम हर पबितर आत्मा कती ले आथे, अऊ ओकर बिरोध में कांही कानहूंन नईए।

²⁴ अऊ जेमन मसीह ईसू कर अपन लागें, ओमन अपन देंह कर पाप करे कर ईछा ला, ओकर सबेच लोभ-लालच अऊ भोग-बिलास कर संगे कुरूस कर ऊपरे चघाए देहीन हवें।

²⁵ अगर हमन पबितर आत्मा कर द्वारा जीवन पाए हवन, त पबितर आत्मा कर अनुसार चलबो करी।

²⁶ हमरे घमंडी झईन बनी। एक दूसर ला तंग झईन करी, अऊ एक दूसर ले इसगा झईन करी।