गलातियों 3 - Surgujia Bible

बिस्वास ले परमेस्वर फुरमा होथे

¹ ए मुरुख गलाती मन! कोन तुमन ला मोएह लेहीस हवे? ईसू मसीह ला कोन कस कुरूस में चघाल गईस, ओकर पूरा मतलब ला तो, तुमन के फरी-फरी बताल गईस हवे।

² मंए तुमन जग ले बस एतनेच जाने बर चाहत हों कि तुमन पबितर आत्मा ला, का मूसा कर कानहूंन ले पाए रहा अखीर बिस्वास कर सुघर खभेर ले पाए रहा?

³ का तुमन अईसन मुरुख होए गए हवा कि जे जिनगी ला तुमन पबितर आत्मा कती ले ओर करे हवा, ओला अब अपन जांगर ले खतम करीहा?

⁴ तुमन एतेक दुख ला, का अनभनिया भोगे हवा? ओहर तो कभों अनभनिया नईए।

⁵ परमेस्वर तुमन ला पबितर आत्मा देथे अऊ तुमन कर मझारे सामर्थ कर काम करथे, का ओहर मूसा कर कानहूंन कर बिधी ला मानथे तेकर ले अईसना करथे? आखिर जे सुघर खभेर ला तुमन सुने हवा अऊ ओमे बिस्वास करे हवा, तेकर ले अईसना करथे का?

⁶ परमेस्वर कर किताब में एही कस लिखल हवे कि अबराहम हर परमेस्वर कर ऊपरे बिस्वास करीस, तेकर चलते परमेस्वर हर ओके निरदोस ठेहराईस।

⁷ त एला जाएन लेआ कि जेहर बिस्वास करथे, ओही मन अबराहम कर सचा बंस लागें।

⁸ पबितर किताब में आगूवेच ले बताल रहीस कि परमेस्वर हर गैर यहूदी मन ला, बिस्वास कर द्वारा निरदोस ठहराही। आगूवेच ले अबराहम ला परमेस्वर हर, ए सुघर खभेर ला सुनाए देहे रहीस, “तोर चलते सबेच जाति कर मईनसे मन आसीस पाहीं।”

⁹ एकर चलते जेमन बिस्वास करथें, ओमन बिस्वास करोईया अबराहम कर संगे आसीस पाथें।

¹⁰ एकरले जेतना झेमन मूसा कर कानहूंन कर ऊपरे भरोसा राखथें, ओ सबेच झेमन सराप कर कबजा में हवें, काबरकि लिखल हवे, “जे कोनो मूसा कर कानहूंन कर किताब में लिखल, सबेच बात मन ला, मन लगाए के पालन नई करही, त ओकर ऊपरे सराप परही।”

¹¹ बकिन ए बात हर तो एकदम फरी हवे, कि कानहूंन कर जरिए परमेस्वर कर नजेर में कोनो निरदोस नई ठहरहीं, काबरकि परमेस्वर ला फुरमा करोईया मन, बिस्वास ले जीयत रहीं।

¹² बकिन कानहूंन ला माने बर बिस्वास कर जरुरत नईए, काबरकि जे कोनो हर कानहूंन कर पालन करही, ओकर चलते ओहर जीयत रही।

¹³ मसीह हर खुद हमर सराप ला लेके, हमके ला मूसा कर कानहूंन कर सराप ले, दाम देके छोंड़ाए लेहीस। काबरकि लिखल हवे “जे कोनो ला कठवा कर ऊपरे ठोंएक के टांगल जाथे, ओहर सरापीत हवे।”

¹⁴ एहर एकर बर होईस कि अबराहम कर आसीस, मसीह ईसू कर द्वारा गैर यहूदी मन जग पहुंचे, तेमेकि बिस्वास कर जरिए हमरे ओ पबितर आत्मा ला पाबो, जेकर बात जबान करल गईस हवे।

अबराहम कर बंस बर बात-जबान

¹⁵ ए भाई-बहिन मन, मंए मईनसे मन कर चाल-सहूर ले एगोट उदाहरन बताथों, कि जब मईनसे मन कर कोनो करार हर पका होए जाथे, त कोनो ओला नई टाएल सके अऊ कोनो ओमे कांही बड़हाए नई सके।

¹⁶ ओही कस जे बात-जबान अबराहम अऊ ओकर बंस कर बेटा ला देहल गईस हवे, ओला कोनो नई टाएल सके अऊ कोनो ओमे कांही बड़हाए नई सके। पबितर किताब हर एला नई कहे कि, “संतान मन ला” जेकस कि ढेरेच झन कर बारे में कथे, बकिन एकेच झन कर बारे में कहीस हवे “संतान ला” अऊ ओही हर मसीह लागे।

¹⁷ मोर कहे कर मतलब ए हवे कि जे करार ला परमेस्वर हर, आगूवेच ले पका कएर देहीस हवे, ओ करार कर चाएर सौ तीस बछर कर पाछू, परमेस्वर हर मूसा ला कानहूंन देहीस, अऊ ए कानहूंन हर परमेस्वर कर बात-जबान ला टारे नई सके कि ओकर बात-जबान हर अनभनिया होए जाए।

¹⁸ काबरकि अगर हक हर मूसा कर कानहूंन ले मिलीस हवे, त बात जबान ले नई मिल सके। बकिन अबराहम ला परमेस्वर हर ए हक ला बात-जबान कर जरिए सेंथिया देहे रहीस।

¹⁹ त फेर मूसा कर कानहूंन ला काबर देहल गईस हवे? ओला तो पाप कर कारन पाछू देहे रहीस, तेमेकि जे बंस कर बेटा बर बात-जबान देहे रहीस, ओकर आवत ले ओ कानहूंन हर बनल रहे। ओ कानहूंन हर सरगदूत कर जरिए एगोट अगुवा-मझुवा जग ठहराल गईस।

²⁰ अगुवा-मझुवा तो दुई झन कर मझारे होथे, बलकि परमेस्वर तो एकेच झन हवे।

²¹ त का मूसा कर कानहूंन हर परमेस्वर कर बात-जबान कर बिरोध करथे? कभों नहीं! काबरकि अगर अईसना कानहूंन देहे रतीस, जेहर जीवन दे सकतीस, त सहीच में ओ कानहूंन ले परमेस्वर ला फुरमा कएर सकत हवे।

²² बकिन पबितर किताब हर एला बताईस हवे, कि सबेच झेमन पाप कर कबजा में हवें, तेमेकि ओ बात-जबान हर ईसू मसीह में बिस्वास करे ले हमके मिलथे।

²³ अऊ ए बिस्वास कर आए कर आगूवेच ले, मूसा कर कानहूंन हर हमर देख-रेख करत रहीस, अऊ ओ बिस्वास जेहर परगट होए बर रहीस, ओकर आवत ले हमरे कानहूंन कर कबजा में रहेन।

²⁴ एकर बर मूसा कर कानहूंन हर मसीह ठन पहुंचाए बर, हमर देख-रेख करोईया बनीस, तेमेकि हमरे बिस्वास ले निरदोस ठहरी।

²⁵ बकिन जब ए बिस्वास हर आए गईस, त अब हमरे ए देख-रेख करोईया कर कबजा में नई हवन।

परमेस्वर कर लईका-छऊआ मन

²⁶ काबरकि मसीह ईसू में बिस्वास कर जरिए तुमन सबेच झन परमेस्वर कर लईका-छऊआ लागा।

²⁷ अऊ तुमन में ले जेतना झन मसीह में बतिस्मा लेहीन हवें, ओमन मसीह ला पहिर लेहीन हवें, मनेकि मसीह कर सुभाव ला अपनाए लेहीन हवें।

²⁸ अब कोनो यहूदी नईएं अऊ गैर यहूदी नईएं, कोनो गुलाम नईएं अऊ अजाद नईएं, कोनो सवांग नईएं अऊ सवांगीन नईएं, काबरकि तुमन सबेच झन मसीह ईसू में एक हवा।

²⁹ अऊ अगर तुमन मसीह कर हवा, त अबराहम कर संतान अऊ बात-जबान कर हकदार भी हवा।