गलातियों 2 - Surgujia Bible

आने परेरीत मन पौलुस कर आदर करथें

¹ मंए चऊदा बछर कर पाछू, बरनबास कर संगे फेर यरूसलेम सहर में गएं अऊ तीतुस ला भी अपन संगे लेते गएं।

² मोके परभू कर परकासन मिलीस, तेकर ले मंए उहां गएं; मोर ए घनी कर आखिर, पाछू घनी कर कुदा-धांवा हर अनभनिया झईन होए जाए, तेकर ले जे सुघर खभेर ला मंए गैर यहूदी मन जग परचार करथों, ओही ला मंए ओमन के बताए देहें, बकिन यरूसलेम कलीसिया कर मुखिया मन ला बताए घरी सिरीप महिंच रहें।

³ अऊ ओमन मोर बात ला माएन लेहीन, तेकर ले तीतुस भाई ला भी जेहर मोर संगे-संगे रहीस अऊ ओहर यूनानी लागे, तबोले ओके खतना करुवाए बर जिधाई नई करीन।

⁴ ए सब बात हर ओ ठगलबरा भाई मन कर कारन उठीस हवे, जेमन मसीह ईसू में जे आजादी हर हमके मिलीसे, ओकर भेद लेहे बर हमर मझारे कले-कस मेराए गए रहीन; तेमेकि हमके गुलाम बनाए सकें।

⁵ बकिन हमरे तो एको घरी ओमन कर कबजा में नई रहेन, काबरकि सुघर खभेर कर सचाई हर तुमन में बनल रहे।

⁶ बकिन यरूसलेम कलीसिया कर मुखिया मन, मोर परचार कर बारे में कांही नई कहीन, (ओमन चाहे कईसनोच रहीन, मोके ओमन ले कांही मतलब नईए, काबरकि परमेस्वर हर ककरो मूंह देखी नई करे)

⁷ बलकि ओमन देखीन कि जेकस यहूदी मन ला, सुघर खभेर सुनाए बर पतरस ला सोंपल गईस हवे, ओईसनेच गैर यहूदी मन ला सुघर खभेर सुनाए बर, परभू हर मंहू के सोंपीस हवे।

⁸ (काबरकि जे परमेस्वर हर पतरस ला खतना करल यहूदी मन बर, परेरीत कर रुप में काम करे कर सक्ति देहीस, ओही हर मंहूच के गैर यहूदी मन बर परेरीत कर रुप में काम करे कर सक्ति देहीस)

⁹ अऊ जब याकूब, पतरस अऊ यूहन्ना जेमन कलीसिया कर खूंटा मानल जात रहीन, ओ किरपा ला जाएन गईन, जेहर मोके मिले रहीस, त ओमन मोके अऊ बरनबास भाई के अपन संगे राखीन कि हमरे गैर यहूदी मन जग काम करबो अऊ ओमन यहूदी मन कर मझारे काम करहीं।

¹⁰ ओमन एतनेच कहीन कि गरीब मन ला झईन भुलईहा अऊ एहीच काम ला करे बर, मंए खुदेच उत्सुक रहें।

पौलुस पतरस ला डांटीस

¹¹ बकिन जब पतरस हर अंताकिया सहर में आईस, त मंए खुल के ओकर सामना करें, काबरकि ओहर गलती करे रहीस।

¹² एकरले जब पतरस हर पहिलो दाएर आईस, त गैर यहूदी मन कर संगे खात पीयत रहीस। बकिन जब याकूब कर इहां ले तनिक झेमन आईन, त यहूदी मन ले डराए के, पतरस हर पाछू घुचे लागीस अऊ ओमन जग ले अलगे होए लागीस, काबरकि ओमन कहत रहीन कि सबेच बिस्वासी मन ला, खतना करुवाए बर जरूरी हवे।

¹³ ओकर संगे-संगे आने यहूदी मन, ए कपट में पतरस कर साथ देहीन अऊ इहां तक कि बरनबास भाई हर भी ओमन कर कपट में पएर गईस।

¹⁴ जब मंए देखें कि ओमन सुघर खभेर कर सचाई कर अनुसार नई चलत हें, त मंए सब झे कर आगू में पतरस ला कहें, “जब तंए यहूदी होए के भी गैर यहूदी मन कस जिनगी जीयत हस, त फेर गैर यहूदी मन ला यहूदी मन कस चले बर, तंए जोर जबरजसती काबर करथस?”

बिस्वास करे ले उद्धार मिलथे

¹⁵ हमरे तो जनम ले यहूदी हवन; अऊ पापी गैर यहूदी मन ले नई हवन।

¹⁶ तबो ले हमन एला जानथन कि मूसा कर कानहूंन कर बिधी ला पालन करे ले, कोनो हर निरदोस नई होए सके, बलकि केवल मसीह ईसू कर ऊपरे बिस्वास करे ले, निरदोस होए सकत हवे। हमू मन निरदोस होए बर खुद मसीह में बिस्वास करे हवन, बकिन कानहूंन कर विधी ले नहीं; काबरकि कानहूंन कर विधी ले ककरो जीव हर निरदोस नई होए सकही।

¹⁷ अगर हमरे मसीह कर ऊपरे बिस्वास कएर के निरदोस ठहरे बर चाहत हवन, अऊ हमरे खुदेच पापी कहाबो, त का मसीह हर पाप कर बढ़ोईया हवे? कभों नहीं।

¹⁸ जेला मंए एक दाएर छोंएड़ दारे हों, अगर मंए ओला फिरेच अपनाहुं, त मंए खुदेच अपन आप ला अपराधी ठहराथों।

¹⁹ काबरकि मंए तो मूसा कर कानहूंन कर पालन करे कर कोसिस करत रहें, त मोके समझ में आईस कि एकर पालन करे ले, मंए परमेस्वर कर नजेर में निरदोस नई ठहेर सकों, बकिन ओही कानहूंन कर अधीन ले मंए निकेल आएं, तेमेकि मंए परमेस्वर बरीक जीयत रहों।

²⁰ मंए मसीह कर संगे कुरूस कर ऊपरे चघाल गए हों, अब मंए नई जीयत हों, बकिन मोर में मसीह जियत हवे; अऊ मंए जेहर अझेर देंह में जीयत हों, त सिरीप ओ बिस्वास ले जीयत हों, जे बिस्वास हर परमेस्वर कर बेटा ऊपरे हवे; जेहर मोर ठन मया करीस अऊ मोर बर अपन-आप ला दे देहीस।

²¹ मंए परमेस्वर कर किरपा ला अनभनिया नई ठहराओं; काबरकि अगर कानहूंन कर जरिए, परमेस्वर कर संगे मेल-मिलाप होतीस, त मसीह कर मिरतु हर अनभनिया होतीस।