इफिसियों 6 - Surgujia Bibleदाई-दाऊ अऊ लईका-छऊवा मन बर उपदेस 1 ए लईका मन, तुमन परभू में अपन दाई-दाऊ कर बात ला माना। काबरकि एहर सही लागे। 2 अपन दाई अऊ दाऊ कर माएन-मरजाद करीहा (एही हर पहिलो अगियां लागे, जेकर संगे बात जबान भी हवे) 3 ताकि तुमन कर भला होए अऊ तुमन ए धरती में ढेरेच दिन ले जीयत-खात रईहा। 4 ए दाऊ मन अपन-अपन लईका मन ला रीस झईन देवईहा, बकिन परभू ले मिलल सिक्छा अऊ उपदेस ला देके ओमन कर पालन पोसन करीहा। गोंसिया अऊ गुलाम बर उपदेस 5 ए गुलाम मन, जईसने मसीह कर बात ला मानथा, वईसने ए संसार में जेमन तुमन कर गोंसियां लागें, ओमन कर बात ला आदर अऊ डर कर संगे, बिगर कपट कर हिरदय ले मानीहा। 6 मईनसे मन ला फुरमा करोईया मन कस देखउटी बर कोनो सेवा झईन करीहा, बकिन मसीह कर गुलाम कस अपन हिरदय ले, परमेस्वर कर ईछा ला पूरा करे बर ओमन कर सेवा करीहा। 7 हरक दिल ले एगोट सेवक कर रूप में अईसना काम करीहा जेकस माएन लेआ कि तुमन मईनसे मन कर नहीं बलकि परभू कर सेवा करत हवा। 8 काबरकि तुमन जानथा कि जे कोनो हर जईसना बढ़िहां काम-बूता करथे, चाहे ओहर ककरो गुलाम रहे चाहे झईन रहे, परभू जग ले ओहर ओईसनेच फल पाही। 9 ए गोंसियां मन, तुंहू मन डराए-धमकाए बर छोंएड़ के ओमन कर संगे बढ़िहां बेवहार करा, काबरकि तुमन जानथा कि ओमन कर अऊ तुमन कर दुनो कर गोंसिया हर सरग में हवे अऊ ओहर ककरो मूंह देखी नई करे। आत्मिक युद्ध कर हथियार 10 तेकरे ले कहथों कि परभू में अऊ ओकर सामर्थ कर सक्ति में बजर होए जावा। 11 परमेस्वर कर सबेच हथियार ला साएज के धएर लेआ, ताकि तुंहूच मन सैतान कर सबेच उपाए कर आगू ठड़होए सका। 12 काबरकि हमर लड़ाई हर हाड़ा अऊ मांस कर बनल मईनसे कर संगे नई होवत हे, बलकि एहर तो सासन करोईया मन ले अऊ अधिकारी मन ले अऊ अंधार संसार कर सक्ति मन ले अऊ दुस्ट आत्मिक सेना जेमन अगास में हवें, ओमने संगे होवथे। 13 तेकर ले कहथों कि परमेस्वर कर सबेच हथियार ला साएज के धएर लेआ, तेमेकि जब दुस्ट सैतान तुमन ऊपरे हमला करही, ते घनी ओकर मुकाबला कएर सका, तब लड़ाई कर पाछूओ माढ़े रईहा। 14 तेकर ले सत ले अपन कनिहां ला बाएंध के अऊ परमेस्वर ला फुरमा करे कर सुभाव कर झिलम पहिन के, 15 अऊ अपन गोड़ में सांती कर सुघर खभेर सुनाए कर पनही पहिर के तियार रहा। 16 बकिन ए सब कर संगे बिस्वास कर ढाल ला धएर के माढ़े रईहा, जेकर ले ओ दुस्ट सैतान कर सबो आगी कर बान ला बितुवाए सका। 17 अऊ उद्धार कर टोपी अऊ आत्मा कर तलवाएर, जेहर परमेस्वर कर बचन लागे ओला धएर लेआ। 18 सबेच घनी पबितर आत्मा में भरपूर होए के पराथना अऊ बिनती करत रईहा अऊ एकर बर जागत रहा कि सब परमेस्वर कर मईनसे मन बर धीरज कर संगे बिनती करत रहा। 19 अऊ मोरो बर पराथना करीहा कि जब मंए गोठियाए बर सुरू करों, ते घनी मोके सही गोएठ मिले तेमेकि निडर होए के, मंए सुघर खभेर कर लुकाल बात ला बताए सकों। 20 ए सुघर खभेर बर मंए राजदूत लागों, जेकर बर मंए कैद में बंधाए हवों। पराथना करीहा कि मंए ए सुघर खभेर ला निडर होए के सुनाओं जेकस मोके करे बर चाही। परेरीत पौलुस कर आखरी जोहार 21 तुखिकुस हर हमर दुलरुवा भाई अऊ परभू में बिस्वास लाएक सेवक लागे। ओहर तुमन ला मोर बारे में सब बात ला बताही, तेमेकि तुमन जाएन लेआ कि मंए का करत हों अऊ मोर हालत कईसना हवे 22 ओके ला मंए तुमन जग एकरले भेजे हों कि तुमन हमर हालत ला जाएन जावा अऊ ओहर तुमन कर हिरदय में ढाढस दे सके। 23 परमेस्वर दाऊ अऊ परभू ईसू मसीह कती ले हमर सबो भाई अऊ बहिन मन ला सांती अऊ बिस्वास कर संगे मया मिलत रहे। 24 ओ सबो झन ऊपरे किरपा होवत रहे, जेमन हमर परभू ईसू मसीह ले अईसना मया करथें, जेहर कभों नई सिराए। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.