इफिसियों 5 - Surgujia Bible

इंजोर कर लईका बना

¹ तुमन परमेस्वर कर दुलरुवा लईका मन हवा, एकरले परमेस्वर कर सुभाव नियर होए बर कोसिस करा।

² जईसने मसीह हर हमर जग मया करीस अऊ हमर बर अपन जीव ला देहीस अऊ मह-महावत बली बएन के परमेस्वर कर आगू में भेंट चघाए देहीस, वईसने मया कर संगे जिनगी जीया।

³ तुमन कर मझारे बेभिचार अऊ कोनो मधे कर असुध काम अऊ लोभ-लालच झईन होए। अईसना काम हर पबितर मईनसे मन ला नई फबे।

⁴ तुमन में घिनक सोंच कर बात झईन होए, बोया कर बात अऊ घिनक हंसी-ठठा कर बात झईन होए। अईसना बात हर तुमन के नई फबे, बलकि तुमन कर मूंह ले परमेस्वर बर धनबाद होवत रहे।

⁵ काबरकि तुमन जानथा कि कोनो बेभिचारी चाहे, असुध मईनसे, चाहे लोभीया मईनसे, जेमन मूरती पूजा करोईया कर बरोबर हवें, ओमन बर मसीह अऊ परमेस्वर कर राएज में हक नईए।

⁶ कोनो हर तुमन के बेकार कर बात कएर के झईन ठएग दारे, काबरकि एही काम-बूता कर चलते, परमेस्वर कर दंड हर अगियां नई मनोईया मन कर ऊपरे भमेक जाथे।

⁷ तेकर ले ओमन कर संगे कोनो नाता झईन राखा।

⁸ काबरकि तुमन तो आगू अंधार में भरे रहा, बकिन अब तो परभू कर इंजोर लागा। तेकर ले परमेस्वर कती ले इंजोर कर लईका मन कस जिनगी बितावा।

⁹ काबरकि जे इंजोर तुमन कर भितरी हवे ओमे ले भलाई, सत अऊ जे जाएत हर परमेस्वर ला फबथे ओ सब हर जामथे।

¹⁰ एहू ला तजबीजत रईहा कि परभू ला काहर सूहाथे?

¹¹ अंधार कर अबिरथा काम-बूता में मेरवा झईन होवा, बलकि अईसना काम मन कर खराबी ला परगट करा।

¹² काबरकि जे काम ला ओमन लुकाए के करथें, ओकर बारे में गोठियाईयो ले लाज कर बात हवे।

¹³ बकिन जब इंजोर हर आथे, त ओकर सब घिनक काम-बूता हर परगट होए जाथे,

¹⁴ काबरकि इंजोर हर सब जाएत ला देखे लाएक बनाथे। तेकरे ले भजन संहिता कर किताब में एकस लिखल हवे, “ए सूतईया, जाएग जा अऊ मरल में ले जी उठ, त मसीह कर इंजोर हर तोर ऊपरे जगमगाही।”

¹⁵ तेकर ले सवाचेती होए के देखत रहा कि तुमन कईसना जिनगी जियत हवा, गंवार मन कस झईन चला, बलकि बूईधमान मन कस चला।

¹⁶ जे मोका मिलीस हवे, ओला पूरा-पूरा काम में लानीहा, काबरकि ए जबाना हर ढेरेच घिनक हवे।

¹⁷ तेकर ले गंवार कस मन झईन रईहा, बलकि धियान लगाए के खोझिहा कि परभू कर तुमन बर का ईछा हवे।

¹⁸ मंद पीके मतवार झईन बने रहा, काबरकि अईसना करे ले लूचा-लफंगई होवत रथे। बलकि पबितर आत्मा में भरपूर होए जावा।

¹⁹ अऊ जब तुमन जूठिहा, त परभू बरीक भजन, इस्तुती गीत अऊ आत्मा में भएर के गीत ला गावत रईहा अऊ अपन-अपन मन में ओकर इस्तुती करत रईहा।

²⁰ अऊ सबेच घनी सबेच बात बर हमर परभू ईसू मसीह कर नांव ले, परमेस्वर दाऊ कर धनबाद करत रहा।

घरदारीन अऊ घरदार मन बर उपदेस

²¹ मसीह ला आदर करे कर चलते, एक दूसर कर अधीन रईहा।

²² ए घरदारीन मन, जईसने तुमन परभू कर अधीन में रथा वइसने अपन-अपन घरदार कर अधीन में रईहा।

²³ काबरकि घरदार हर, घरदारीन कर मूड़ी लागे, जईसने कि मसीह हर कलीसिया कर मूड़ी लागे। अऊ कलीसिया हर ओकर देंह अऊ ओहर खुद कलीसिया कर उद्धार करोईया लागे।

²⁴ जईसने कलीसिया हर मसीह कर अधीन में रथे, वइसने घरदारीन मन सबेच बात में, अपन-अपन घरदार कर अधीन में रहें।

²⁵ ए घरदार मन, अपन-अपन घरदारीन जग ढेरेच मया करीहा, जईसना कि मसीह हर कलीसिया ला मया करीस अऊ अपन-आप ला ओकर बर दे देहीस।

²⁶ ओहर अईसना एकरले करीस कि अपन कलीसिया ला बचन कर जरिये पानी ले फरियाए के पबितर बनाए।

²⁷ तेमेकि ओला एगोट जगमगावत कलीसिया बनाए के अपन बर पेस करे, अऊ ओमे दाग झईन रहे अऊ ओहर झुरावल झईन रहे अऊ कोनो दूसर दोस ओमे झईन रहे, बलकि पबितर अऊ निरदोस रहे।

²⁸ एही नियर घरदार मन ला अपन-अपन घरदारीन जग, अपन देंह कर बरोबर मया करे बर चाही। जेमन अपन घरदारीन जग मया करथें, ओमन अपन आप ले मया करथें।

²⁹ कोनो हर कभों अपन देंह कर संगे बैर नई करे, बलकि ओकर पालन पोसन करथे, जेकस मसीह हर कलीसिया बर करथे।

³⁰ काबरकि हमरे ओकर देंह कर अंग मन लागी।

³¹ पबितर किताब में लिखल हवे, “एकरे कारन मईनसे हर अपन दाई-दाऊ ला छोंएड़ के अपन घरदारीन जग मेराए जाही। अऊ ओमन दुनों झे एकेच देंह कस होए जाहीं।”

³² एकर भीतरी ढेरेच बात हर लुकाईस हवे, बकिन मंए एला मसीह अऊ कलीसिया कर बारे में कहथों।

³³ तुमन में ले सबेच कोनो हर अपन घरदारीन जग, अपने कस मया करे अऊ घरदारीन ला अपन घरदार कर माएन-मरजाद करे बर चाही।