कुलुस्सी 4 - Surgujia Bible

¹ ए मालीक मन, अपन दास मन कर संगे सही नियाओ अऊ बढ़िहां बेवहार करा, काबरकि एला जानथा कि सरग में तुमनोच कर एगोट मालीक हवे।

पराथना करे बर अपन मन ला लगावा

² सचेत होए के धनबाद कर संगे, पराथना में लगे रहा।

³ अऊ हमर बर पराथना करा कि परमेस्वर हर सुघर बचन सुनाए बर, हमर बर दुरा ला उघारे, तेमेकि हमन मसीह कर, ओ भेद कर परचार कएर सकी, जेकर चलते मंए जेहल में हवों।

⁴ पराथना करा कि मंए एला फरी-फरी बताए सकों, जेकस मोके करे बर चाही।

⁵ सबेच मोका कर सही उपयोग कएर के अबिस्वासी मन कर संगे बुईधमानी ले बेवहार करा।

⁶ तुमन कर गोएठ हर हमेसा आसीस ले भरल रहे, अऊ मन ला मोहेदार होए, तेमेकि तुमन ए जाएन लेआ कि सबेच झन ला सही जबाब कईसे देहे बर चाही।

आखरी जोहार

⁷ तुखिकुस भाई हर तुमन के मोर बारे में सबेच बात ला बताही, ओहर एगोट दुलरुवा भाई लागे अऊ परभू में बिस्वास लाएक मोर संगी सेवक लागे।

⁸ एकरे चलते मंए ओके तुमन जग भेजथों कि तुमन जाएन लेआ कि हमरे कईसना हवन अऊ ओहर तुमन के उत्साहित करे।

⁹ ओकर संगे उनेसिमुस भाई ला भेजत हन, ओहर हमर बिस्वास लाएक अऊ दुलरुवा भाई लागे, जेहर तुमन में ले एक झन हवे, ओहर एजग कर सबेच हाल-चाल ला तुमन के बताही।

¹⁰ अरिसत्रखुस भाई, जेहर मोर संगे जेहल में हवे; तुमन के अपन जोहार कहथे अऊ ओहीच कस मरकुस, जेहर बरनबास कर भाई हवे; तुमन के अपन जोहार कहथे, (जेकर बारे में तुमन के ए कहल गए रहीस कि अगर एहर तुमन जग आही, त ओकर सवागत करीहा।)

¹¹ भाई यीसू, जेके ला यूसतुस कथें तुमन के जोहार कहथे। यहूदी बिस्वासी में ले सिरीप एहीच मन, परमेस्वर कर राएज बर मोर संगे सेवा करोईया लागें अऊ एमन कर चलते मोके सांती मिलथे।

¹² मसीह ईसू कर एगोट सेवक इपफरास भाई, जेहर तुमन में ले एक झन हवे, तुमन के जोहार कहथे, ओहर सगर दिन बड़े उत्साह कर संगे, तुमन बर पराथना करथे, तेमेकि तुमन परमेस्वर कर ईछा में बजर अऊ सिद्ध होए जावा अऊ ओमे पूरा-पूरा बिस्वास करा।

¹³ मंए ओकर गवाह लागों कि इपफरास भाई तुमन बर अऊ जेमन लौदीकिया सहर अऊ हियरापुलीस सहर में हवें; ओ सबेच झन बर ढेरेच मेहनत करथे।

¹⁴ हमर दुलरुवा भाई बएध लूका अऊ भाई देमास, दुनों झन तुमन के जोहार कहथें।

¹⁵ लौदीकिया सहर कर भाई अऊ बहिन मन ला अऊ बहिन नुमफास अऊ ओ कलीसिया, जेमन ओकर घरे जुटथें, ओ सबेच झन ला मोर जोहार कईहा।

¹⁶ ए चिट्ठी ला पढ़े कर पाछू, एला लौदीकिया सहर कर कलीसिया में पहुंचाए देईहा, तेमेकि ओमन एला पढ़ें अऊ पलटा में ओ चिट्ठी जेहर लौदीकिया सहर ले आथे, ओला तुमन पढ़िहा।

¹⁷ अरखिपुस भाई ला कहा कि जे सेवा कर काम, परभू जग ले मिलीसे, ओला ओहर जरूर पूरा करे।

¹⁸ मंए पौलुस, अपन हाथ ले तुमन के ए जोहार लिखथों। सूरता राखीहा कि मंए जेहल में हवों। तुमन कर ऊपरे परमेस्वर कर किरपा होवत रहे। आमीन।