कुलुस्सी 2 - Surgujia Bible

¹ मंए चाहथों कि तुमन ला ए पता चएल जाए कि तुमन बर, लौदीकिया सहर में रहोईया मन बर अऊ ओ सबेच झन बर, जेमन मोर चेहरा ला नई देखीन हवें, ओमन बर मंए ढेरेच मेहनत करथों,

² मंए ए मेहनत ला एकरले करथों कि ओमन मया में एक होए के उत्सुक रहें, तेमेकि ओमन पूरा समझ ले आसीस पाएं अऊ परमेस्वर कर भेद ला, मनेकि मसीह ला जाने।

³ ओमे बुद्धि अऊ गियान कर सबेच भंडार लुकाल हवे।

⁴ मंए तुमन के ए गोएठ ला एकर बर कहथों, तेमेकि कोनो तुमन के लोभाए मधे गोएठ गोठियाए के, धोखा देहे झईन सके।

⁵ काबरकि मंए देंह में तुमन ठे ले दुरिहां हवों, बकिन आत्मा में मंए तुमन कर संगे हवों। तुमन बढ़िहां तरिका ले जिनगी जीयथा अऊ मसीह में तुमन कर बिस्वास हर बजर हवे, मंए एला देख के ढेरेच खूस होथों।

झूठा सिक्छा ले सवाचेती

⁶ एकरे ले जेकस तुमन मसीह ईसू ला परभू माएन लेहे हवा, ओहीच कस मसीह कर संगे जिनगी जीयत रहा।

⁷ ओहीच में जएर धरके बढ़त जावा अऊ जेकस तुमन के सिखावल गईस हे, ओहीच कस अपन बिस्वास में बजर होते जावा अऊ हमेसा तुमन कर हिरदय में धनबाद भरल रहे।

⁸ सचेत रहा कि कोनो बेकार कर गियान अऊ फालतू गोएठ में तुमन के, अपन कती झईन कएर ले, जेहर मईनसे मन कर रीती कर अनुसार अऊ ए संसार कर नियम कर अनुसार तो हवे, बकिन मसीह कर अनुसार नईए।

हमन ला मसीह में जीत मिलीस

⁹ काबरकि परमेस्वर कर सुभाव कर सबेच भरपूरी हर, मईनसे कर रूप में मसीह में बसथे।

¹⁰ मसीह में बने रहे ले तुमन सिद्ध हो गए हवा, ओहर सबेच सासन करोईया अऊ अधिकार कर मुखिया हवे।

¹¹ जे घनी तुमन मसीह में आया, त तुमनो कर खतना होईस, ए खतना हर मईनसे मन कर हाथ ले नहीं, बलकि मसीह कर द्वारा, तुमन कर पापी सुभाव ला काएट छांएट के अलग करीसे।

¹² मसीह कर संगे तुमन बतिस्मा में गाड़ल गए हवा अऊ तुमन ओकर संगे जी उठे हवा, काबरकि तुमन परमेस्वर कर सामर्थ में बिस्वास करे हवा, जेहर मसीह ला मरल में ले जीयाईस।

¹³ तुमन अपन अपराध में अऊ अपन पापी सुभाव, जेहर बिगर खतना कस हवे, ओमे तुमन मएर गए रहा, तबोले परमेस्वर हर तुमन कर सबेच अपराध ला छमा कएर के, मसीह कर संगे जीयाईस।

¹⁴ परमेस्वर हर कानहूंन कर ओ लिखल नियम ला, जेहर हमर बिरोध में रहीस, ओला मेटाए देहीस अऊ ओके कुरूस में कांटी ठोंएक के, हमर मझार ले हटाए देहीस।

¹⁵ अऊ मसीह हर सैतान कर खालहे काम करोईया, सब सासक अऊ अधिकारी मन कर हथियार ला लूएट लेहीस अऊ हरुवाए देहीस अऊ कुरूस में एमन कर ऊपरे जीत पाए के एमन ला सब कर आगू में लजुवाए देहीस।

¹⁶ एकरले तुमन कर खवाई, पीयायई, धारमिक तिहार, नांवा जोन कर खुसी, चाहे पबितर दिन कर बारे में, तुमन कोनो के दोस लगाए कर मोका झईन देआ।

¹⁷ काबरकि ए सब हर अवईया बात मन कर छाएं लागे, बकिन सही बात हर मसीह में दिखथे।

¹⁸ कोनो हर झूठ-मूठ कर नरम सुभाव ला धेखाए के अऊ सरगदूत मन कर पूजा कएर के, तुमन ला धोका झईन दे अऊ तुमन कर दऊड़ कर इनाम ला पाए ले झईन रोके; एकस मईनसे हर आगू कर बात ला देखथों कहिके डिंग मारथे, बकिन ओ सब बात हर बेकार हवे, काबरकि ओहर अपन सोच-बिचार में घमंड कएर के फूलथे।

¹⁹ ओमन मूड़ी जेहर मसीह लागे, ओमे जूड़े नई रहें। ओ मसीह ले सबेच देंह कर पालन पोसन होथे, अऊ देंह कर जोड़ अऊ नस मन एके संगे मसीह में जूटे रथें अऊ जेकस परमेस्वर चाहथे, ओहीच कस बढ़त जाथे।

गलत सिक्छा देवईया मन ले सवाचेती रईहा

²⁰ अगर तुमन मसीह कर संगे मएर गए हवा अऊ ए संसार कर आगू कर सिक्छा ले छुटकारा पाए गए हवा, त फेर तुमन काबर एकस जिनगी जीयथा, जेकस कि अझेर ले तुमन संसार कर हवा? तुमन काबर एकर बिधी बिधान ला मानथा

²¹ जेकस कि ‘दुरीहां रहा,’ ‘एला झईन चिखा’ अऊ ‘एला झईन छूआ?’

²² ए सबेच जाएत हर काम में आवत-आवत नास होए जाही, काबरकि एहर मईनसे मन कर बनावल नियम अऊ सिक्छा हवे।

²³ ए नियम में अपन इछा कर अनुसार बनावल भक्ति हवे, अऊ झूठ-मूठ कर नरम सुभाव हवे अऊ अपन देंह ला दुख देहे कर देखावा भी हवे, त एला देखे ले अईसना लागथे कि एमे ढेरेच गियान हवे, बकिन ए नियम हर देंह कर ईछा ला रोके में कांही काम नई आवे।