परेरीत 9 - Surgujia Bible

साऊल ईसू मसीह ला अपनाथे

¹ साऊल अझेर ले परभू कर चेला मन ला, माएर दारे कर धमकी देहत रहीस, ओहर महायाजक ठन गईस,

² त दमिसक सहर में जेतना धरम सभा कर घर मन रहीन, ओकर नांव में चिट्ठी मांगीस। काबरकि उहां कर सवांग, सवांगीन जेमन ए झूंड कर हवें, ओमन ला बंदी बनाए के यरूसलेम ले आने।

³ बकिन जात-जात जब ओहर दमिसक कर ठांवें पहुंचीस, त अचाकन बदरी ले ओकर चाएरो कती, एगोट इंजोर चमकीस;

⁴ अऊ ओहर भुईं में गिर परीस अऊ ए गोएठ ला सुनीस, “ए साऊल, ए साऊल, तंए मोके काबर सताथस?”

⁵ साऊल हर पूछीस, “ए परभू, तंए कोन लागस?” त ओहर कहीस, “मंए ईसू लागों, जेके ला तंए सताथस।

⁶ बकिन अझेर उईठ के सहर में जा अऊ जेला तोके करे बर हवे, ओला उहां तोके बताल जाही।”

⁷ जे आदमी मन ओकर संगे रहीन, ओमन सन माएर देहींन, काबरकि ओमन अवाज ला तो सुनत रहीन, बकिन कोनो ला नई देखत रहीन।

⁸ तेकर साऊल हर भुईयां ले उठीस अऊ जब ओहर आंएख ला उघारीस, त ओके कांही जाएत हर नई दिखीस, त ओकर संगता मन ओकर हाथ ला धएर के दमिसक सहर में ले गईन।

⁹ ओहर तीन दिन ले देखे नई सकीस अऊ कांही नई खाईस पीस।

¹⁰ अब दमिसक सहर में हनन्याह नांव कर एक झन चेला रहीस, ओके परभू हर दरसन में बलाईस, “ए हनन्याह!” ओहर कहीस, “हओ, परभू।”

¹¹ तब परभू हर ओकर जग कहीस, “उईठ के ओ गली में जा, जेहर ‘सोज’ कहाथे, अऊ यहूदा कर घरे जाए के, तरसुस सहर कर रहोईया साऊल नांव कर एगोट मईनसे कर बारे में पूछ, काबरकि ओहर अझेर पराथना करत हवे,

¹² अऊ ओहर दरसन में हनन्याह नांव कर एक झे मईनसे ला भीतरी आवत अऊ अपन ऊपरे हाथ राखत देखीस कि ओहर फेर देखे लागे।”

¹³ हनन्याह हर कहीस, “ए परभू, मंए ए मईनसे कर बारे में ढेरेच झन ले सुने हों कि एहर यरूसलेम में तोर पबितर मईनसे मन ला, ढेरेच सताईस हवे,

¹⁴ अऊ इहोंच ला ओके, मुख याजक मन कती ले अधिकार मिलीस हवे कि जे मईनसे मन तोर नांव लेथें, ओ सबेच झन ला बंदी बनाए के ले आने।”

¹⁵ बकिन परभू हर हनन्याह ला कहीस, “तंए चएल दे, काबरकि ओहर तो गैर यहूदी मन बर अऊ राजा मन बर अऊ इसराएली मन कर आगू में मोर नांव कर, परचार करे बर चुनल भांड़ा लागे।

¹⁶ अऊ मंए ओके बताहूं कि मोर नांव बरीक ओके कईसना-कईसना दुख उठाए बर परही।”

¹⁷ तेकर हनन्याह हर उईठ के साऊल कर घरे गईस अऊ ओकर उपरे हाथ राएख के कहीस, “ए भाई साऊल, परभू ईसू, जेहर ओ डगर में जेमे ले तंए आए हस, तोके देखार देहे रहीस, ओही मोके भेजीस हवे कि तंए फेर देखे लाग, अऊ पबितर आत्मा ले भरपूर होए जा।”

¹⁸ अऊ तुरतेंच साऊल कर आंएख ले छिलका सहींक कांही गिरीस अऊ ओहर देखे लागीस अऊ उईठ के बतिस्मा लेहीस, फेर खाना खाए के बल पाईस।

दमिसक सहर में साऊल परचार करथे

¹⁹ साऊल हर कईयो दिन ले ओ चेला मन कर संगे दमिसक में रहीस;

²⁰ अऊ ओहर तुरतें यहूदी मन कर ढेरे धरम सभा कर घर मन में परचार करे लागीस कि ईसू हर, परमेस्वर कर बेटा लागे।

²¹ सबेच सुनोईया मन चकित होए के पूछे लागीन, “का एहर ओही मईनसे लागे, जेमन यरूसलेम में ए नांव ला लेहत रहीन, ओमन ला मारत रहीस अऊ इहोंच ला ओकरे बरीक आए रहीस कि ओमन ला बाएंध के मुख याजक मन जग ले जाए?”

²² बकिन साऊल हर अऊ सामर्थी होवत गईस अऊ “ईसू ही मसीह लागे” ए बात कर सबूत दे देके, दमिसक सहर में रहोईया यहूदी मन कर मूंह ला चुप करत रहीस।

²³ जब ढेरेच दिन बीत गईस, त यहूदी मन मिल के साऊल ला मारे कर उपाय करीन।

²⁴ बकिन ओमन कर उपाय हर साऊल ला पता चएल गईस, ओमन ओके माएर दारे बर राएत दिन, दसमीक कर दुरा में घात लगाए के बईठे रहत रहीन।

²⁵ बकिन राती ओकर चेला मन, ओके पथिया में बईठाईन अऊ सहर कर दिवाल ले लटकाए के उताएर देहीन।

साऊल यरूसलेम सहर में वापिस आथे

²⁶ जे घनी साऊल यरूसलेम में पहुंचीस, त चेला मन जग भेंटाए कर कोसिस करीस, बकिन सबेच झन ओके डरावत रहीन, काबरकि ओमन ला बिस्वास नई होवत रहीस कि ओहू हर चेला बएन गईस हवे।

²⁷ बकिन बरनबास हर साऊल ला, अपन संगे परेरीत मन जग ले जाए के, ओमन ला बताईस कि एहर कईसे परभू ला डगर में देखीस अऊ परभू ओकर जग गोठियाईस, फेर दमिसक में एहर कईसे हिमेत धएर के ईसू कर नांव ले परचार करीस।

²⁸ तेकर ले साऊल हर ओमन कर संगे यरूसलेम सहर में आत-जात रहीस अऊ निडर होए के, परभू कर नांव कर परचार करत रहीस;

²⁹ अऊ युनानी भासा बोलवईया यहूदी मन कर संगे गोएठ बात अऊ बहंसा-बहंसी करत रहीस, बकिन ओमन साऊल ला माएर दारे कर कोसिस करे लागीन।

³⁰ एला जाएन के बिस्वासी भाई मन ओके, कैसरिया सहर में ले गईन अऊ ऊहां ले तरसुस सहर में भेज देहीन।

³¹ एही कस सबेच एहूदिया, गलील अऊ सामरिया जिला कर मसीह मंडली मन ला सांती मिलीस अऊ ओमन बजर होवत गईन अऊ ओमन परभू कर डर अऊ पबितर आत्मा कर सांती में चलत गईन अऊ ओमन कर गिनती हर बढ़त गईस।

पतरस कर द्वारा चिन्ह चमत्कार होथे

³² फेर पतरस हर सबेच जघा ले घूमत फिरत, लूदा सहर कर बिस्वासी मन जग मिले बर पहुंचीस।

³³ ऊहां ओके एनियास नांव कर एगोट लकवा मारल मईनसे जग मिलीस, जेहर आठ बछर ले खटिया में परल रहीस।

³⁴ त पतरस हर ओकर जग कहीस, “ए एनियास, ईसू मसीह तोके चंगा करत हवे, उठ अपन डसना ला डसाए ले।” तेकर ओहर तुरतेंच ठड़होए गईस।

³⁵ तेकर लूदा अऊ सारोन कर सबेच रहोईया मन, ओके देख के परभू कती फिरीन।

³⁶ याफा सहर में तबीता नांव कर एक झे बिस्वासी सवांगीन रहत रहीस, जेकर दूसर नांव दोरकास रहीस। ओहर ढेरेच भलाई कर काम करत रहीस अऊ गरीब मन ला दान देहत रहीस।

³⁷ ओही घनी ओहर बेमार परीस अऊ मएर गईस, अऊ ओमन ओकर लास ला असनान करुवाए के, छत कर ऊपरे बईंगरा में राएख देहीन।

³⁸ लूदा सहर याफा कर ठांवें रहीस, जब बिस्वासी मन एला सुनीन कि पतरस हर लुदा सहर में हवे, त दुई झन मईनसे मन ला ओकर जग भेजीन अऊ ओमन ओकर जग जाए के बिनती करीन, “हमर जग हालू चल।”

³⁹ तेकर पतरस उईठ के, ओमन कर संगे होए लेहीस अऊ जे घनी ओहर पहुंचीस, त ओमन ओके ला छत कर ऊपरे बईंगरा में ले गईन। सबेच अदावेंन मन रोवत ओकर जग आए ठड़होईन अऊ कमीज अऊ ओढ़ना ला दोरकास हर अपन जीयत घरी बनाए रहीस, ओ सबेच ला पतरस के देखाए लागीन।

⁴⁰ तेकर पतरस हर सबेच झन ला ओ बईंगरा ले बाहरी निकाएल देहीस अऊ ठेहुनाए के पराथना करीस अऊ लास ला देख के कहीस, “ए तबीता, उठ!” तेकर ओहर अपन आंएख ला खोलीस, अऊ पतरस ला देख के उईठ बईठीस।

⁴¹ पतरस हर हाथ ला धएर के ओके उठाईस अऊ बिस्वासी, अऊ अदावेंन मन ला बलाए के, ओके जीयत देखाईस।

⁴² ए गोएठ हर सबेच याफा सहर में फईल गईस अऊ ढेरे झेमन परभू कर उपरे बिस्वास करीन।

⁴³ पतरस हर याफा में समोन नांव कर चाम कर धंधा करोईया कर घरे, ढेरेच दिन ले रुके रहीस।