परेरीत 7 - Surgujia Bible

इस्तिफनुस हर महा सभा में परचार करथे

¹ तब महायाजक हर इस्तिफनुस ला पूछीस, “का तोर ऊपर लगावल ए दोस हर सही हवे?”

² इस्तिफनुस हर जबाब देहीस, “ए भाई अऊ सियान मन, सुईन लेआ, हमर पूरखा अबराहम हर हारान देस में बसे कर आगू, मेसोपोटामिया में रहत रहीस, ते घनी महिमामय परमेस्वर हर ओके ला दरसन देहीस,

³ अऊ ओके ला कहीस, ‘तंए अपन देस अऊ कुटुंब ला छोंएड़ के ओ देस में चले जा, जेला मंए तोके देखाहूं।’

⁴ तब ओहर कसदी मन कर देस ले निकेल के, हारान देस में जाए के बएस गईस, ओकर दाऊ कर मरे कर पाछू, परमेस्वर हर ओके उहां ले लाएन के ए देस में बसाईस, जिहां तुमन अब रहत हवा।

⁵ परमेस्वर हर इहां अबराहम ला कांहीच हक नई देहीस, ओके गोड़ मढ़ाएयोच कर जघा नई मिलीस, बकिन ओ घरी अबराहम कर कोई लईका नई रहीन, तबोले परमेस्वर हर ओकर जग बात जबान करीस कि मंए ए देस ला तोर अऊ तोर पाछू, तोर बंस कर हक में कएर देहूं।

⁶ परमेस्वर हर ओके कहीस, तोर संतान मन दूसर देस में परदेसी होहीं अऊ ओजग कर मईनसे मन ओमन ला गुलाम बनाहीं, अऊ चार सवो बछर ले ओमन ला सताहीं।”

⁷ फेर परमेस्वर हर कहीस, “जे जाति कर ओमन गुलाम होहीं, ओ जाति ला मंए सजा देहूं अऊ एकर पाछू ओमन, ओ देस ले निकेल के अऊ एही जघा में रहिके मोर अराधना करहीं।

⁸ तेकर परमेस्वर हर अबराहम जग करार करीस, तेकर चिन्हा बर खतना करुवाईस अऊ अबराहम ले इसहाक हर एही देस में जनमीस अऊ ओकर जनम कर आठ दिन में, ओकर खतना करल गईस अऊ इसहाक ले याकूब अऊ याकूब ले हमर बारह गोती कर मुखिया मन जनमीन।”

⁹ ए मुखिया मन यूसुफ ले इसगा करे लागीन अऊ ओके ला मिसर देस जवईया मन कर हाथ में, गुलाम कर रूप में बेंचीन बकिन परमेस्वर हर ओकर संगे रहीस,

¹⁰ अऊ परमेस्वर हर यूसुफ ला सब दुख तकलीफ ले छोंड़ाईस अऊ मिसर कर राजा फिरोन कर आगू में बूईधमान बनाईस अऊ ईसूफ हर फिरोन राजा कर मन ला जीत लेहीस, अऊ फिरोन राजा हर ओके मिसर देस, अऊ अपन सब घराना में सासन करोईया ठहराईस।

¹¹ तेकर मिसर देस अऊ कनान कर सबेच देस में अकाल परीस, एकर चलते मईनसे मन कर उपरे ढेरेच बड़खा संकट आए गईस, अऊ हमर पूरखा मन ला खायो बर नई मिलत रहीस।

¹² तेकर ले याकूब हर जब एला सुनीस कि मिसर देस में अनाज हवे, त ओहर हमर पूरखा मन ला सुरू दाएर उहां भेजीस।

¹³ जब ओमन दूसर दाएर गईन, त यूसुफ हर ओकर भाई मन ला अपन पहिचान बताईस अऊ फिरोन राजा हर, यूसुफ कर परिवार कर बारे में जाएन गईस।

¹⁴ फेर यूसुफ हर अपन दाऊ याकूब अऊ अपन सब परिवार मन ला, जेमन पचहतर झे मईनसे रहीन, अपन जग मिसर देस में बलाए बर भेजीस।

¹⁵ तब याकूब हर मिसर देस में गईस, जिहां ओहर अऊ हमर पूरखा मन मएर गईन।

¹⁶ तेकर ओमन ला गाड़े बर, सकेम सहर में पहुंचाए देहीन, अऊ ओ मठ में राखीन, जेला अबराहम हर सकेम में, हमोर कर बेटा मन जग ले चांदी कर पईसा देके बेसाए रहीस।

¹⁷ जब ओ बात जबान कर पूरा होए कर समय हर ठांवें आईस, जेला परमेस्वर हर अबराहम जग करे रहीस, त ओ मिसर देस में हमर मईनसे मन ढेरेच बएढ़ गए रहीन।

¹⁸ तब मिसर देस में एक झन दूसर राजा हर राएज करे लागीस, जेहर यूसुफ कर बारे में नई जानत रहीस।

¹⁹ त ओ राजा हर हमर मईनसे मन ले, छल-कपट कएर के हमर पूरखा मन कर ऊपरे ढेरेच अतियाचार करीस, अऊ जबरजसती करीस कि ओमन अपन नांवा जनमल बेटा लईका मन ला मरे बर बाहरी फेंक दें।

²⁰ ओही घरी में मूसा कर जनम होईस अऊ ओहर परमेस्वर कर नजेर में ढेरेच सुघर रहीस अऊ ओके तीन महीना तक अपन दाऊ कर घर में, पोसल गईस।

²¹ बकिन जब मूसा ला फेंक देहीन, त फिरोन कर बेटी हर ओके ले लानीस अऊ अपन बेटा बनाए के ओकर पालन-पोसन करीस।

²² मूसा ला मिसर देस कर सब गियान, सिखावल गईस अऊ ओहर सामर्थ कर संगे गोएठ बात अऊ काम करत रहीस।

²³ जब मूसा हर करीबन चालीस बछर कर होईस, त अपन मन में कहीस कि मंए अपन इसराएली भाई मन जग भेंट करों।

²⁴ मूसा अपन एक झन भाई कर उपरे अनियाए होवत देख के, ओके बचाईस अऊ ओहर मिसर देस कर मईनसे ला माएर के पलटा लेहीस।

²⁵ मूसा हर सोंचीस कि मोर जाति कर भाई मन समझहीं कि परमेस्वर हर मोर द्वारा, ओमन कर उद्धार करही, बकिन ओमन नई समझीन।

²⁶ दूसर दिन जब दुई झन इसराईली मन आपस में लड़त रहीन, त मूसा हर ओजग आईस, अऊ ए कहिके ओमन के मेल-मिलाप करे बर समझाईस, “ए मईनसे मन, तुमन तो भाई-भाई हवा, तुमन एक दूसर ले काबर लड़त हवा?”

²⁷ बकिन जे इसराएली हर दूसर उपरे अनियाए करत रहीस, ओहर एकस कहिके मूसा ला हटाए देहीस, “तोके कोन हर हमर उपरे हाकीम अऊ नियाओ करे बर ठहराईस हवे?

²⁸ का तंए जईसना काएल एक झन मिसर देस कर मईनसे ला माएर दारे, ओइसने मोके ला माएर दारे बर चाहत हस?”

²⁹ ए बात ला सुईन के मूसा हर, उहां ले भागीस अऊ मिदयान देस में जाए के, परदेसी कस होए के रहे लागीस अऊ उहां ओकर दुई ठे लईका होईन।

³⁰ “जब मूसा ला मिदयान देस में रहत, चालीस बछर बीत गईस, त एगोट सरगदूत हर सीने पहार कर जंगल में, मूसा ला बरत झाड़ी में आगी कर मझारे दरसन देहीस।

³¹ मूसा हर ओ दरसन ला देख के अचमहों होईस, अऊ जब मूसा ओला देखे बर ठांवें गईस, त परभू कर ए अवाज ला सुनीस,

³² मंए तोर पूरखा, अबराहम, इसहाक अऊ याकूब कर परमेस्वर लागों, त एला सुईन के मूसा हर, डर कर मारे कांपे लागीस अऊ फेर ओला देखे कर हिमेत नई रहीस।

³³ तब परभू हर मूसा ला कहीस, अपन गोड़ कर पनही ला उताएर दे, काबरकि तंए जे जघा में ठड़होए हवस, ओहर पबितर भुईंया हवे।

³⁴ मंए फूरोंच में मिसर देस में अपन मईनसे मन कर, बिपेत ला देखे हों अऊ ओमन कर दुख अऊ कलपाई ला सुने हों, एकर बर मंए ओमन ला छोंड़ाए बर उतरे हों, अब तंए आओ, मंए तोके मिसर देस में भेजहूं।”

³⁵ “जे मूसा ला इसराईली मन, ए कहिके इनकार करे रहीन, तोके कोन हर हमर उपरे हाकीम अऊ नियाओ करोईया बनाईस हवे? एहर ओही लागे, जेला परमेस्वर हर इसराएल कर मईनसे मन बर हाकीम अऊ छोंड़ईया ठहराए के, ओ सरगदूत कर द्वारा भेजीस, जेहर ओके ला झाड़ी में दरसन देहे रहीस।

³⁶ एही मूसा हर मिसर देस अऊ लाल समूंदर अऊ रेगिसतान में चालीस बछर ले, चिन्ह चमत्कार देखाए-देखाए के, ओमन ला गुलामी ले निकाएल के ले आनीस।

³⁷ ए होही मूसा लागे, जेहर इसराएली मन ले कहे रहीस, परमेस्वर हर तुमन कर मईनसे मन ले, तुमन बर मोर कस एक झन अगमजानी उठाही।

³⁸ ए ओही मूसा लागे, जेहर रेगिसतान में झूंड कर मझारे हमर पूरखो मन कर संगे रहीस, जे घनी ओहर सरगदूत ठन सीने पहार में गोठियाईस, त एही मूसा हर हमन ला देहे बर, परमेस्वर कती ले ए जीयत बचन ला पाए रहीस।

³⁹ बकिन हमर पूरखा मन मूसा कर बात ला नई मानीन, अऊ ओकर बात ला नकाएर के अपन मन ला मिसर देस कती लगाईन।”

⁴⁰ ओमन हारून ला कहीन, “हमर बर एकस देंवता बना, जेहर हमर आगु-आगु चले, काबरकि ए मूसा जेहर, हमन ला मिसर देस ले निकाएल के लानीस, हमरे नई जानी कि ओके का होईस?”

⁴¹ ओही दिन में ओमन एगोट बछवा कर मूरती बनाईन, ओ मूरती कर आगू में बली चघाईन अऊ ओमन अपन हाथ कर काम ले ढेरेच खुस होए लागीन।

⁴² बकिन परमेस्वर हर ओमन जग ले मूंह मोएड़ लेहे रहीस, ओमन ला अगास कर बेर, जोन अऊ तरईया मन कर पूजा करे बर छोंएड़ देहे रहीस, जेकस कि अगमजानी मन कर किताब में लिखल हवे, “ए इसराएली कर परिवार कर मईनसे मन, का तुमन रेगिसतान में चालीस बछर ले, पसू कर बली अऊ अनबली मोहीं के चघावत रहा।

⁴³ तुमन मोलेक कर तंबू अऊ रीफान देंवता कर तरईया ला लेके फिरत रहा, ओ मूरतीयो मन ला ले गए जेला, तुमन पूजा करे बर बनाए रहा, एकरले मंए तुमन ला बेबीलोन सहर कर बाहरी ले जाए के दुरीहां बसाहूं।”

⁴⁴ गवाही कर पबितर तंबू हर, रेगिसतान में हमर पूरखा मन कर संगे रहीस, परमेस्वर हर मूसा जग कहे रहीस, “तंए जे नमूना ला देखे हवस, ओकरे कस एला बनाबे” जेकस ओहर बताए रहीस, ओही कस मूसा हर बनाईस

⁴⁵ ओही पबितर तंबू ला हमर पूरखा मन, सुरूच ले पाए के यहोसू कर संगे एजग ले आनीन, जे घनी ओमन ओ आने जाति मन कर उपरे अधिकार पाईन, जेमन ला परमेस्वर हर, हमर पूरखा मन कर आगू ले निकाएल देहीस अऊ ओ पबितर तंबू हर, दाऊद राजा कर समय तक ओजग रहीस।

⁴⁶ ओकर उपरे परमेस्वर हर किरपा करीस अऊ दाऊद राजा हर बिनती करीस कि ओहर याकूब कर परमेस्वर बर रहे बरीक घर बनाही।

⁴⁷ बकिन सुलेमान राजा हर परमेस्वर बर घर बनाईस।

⁴⁸ बकिन सबले ऊंच में रहोईया परमेस्वर हर, मईनसे कर हाथ कर बनाल घर में नई रहे, जेकस कि अगमजानी हर कहीसे,

⁴⁹ “परभू हर कहथे, सरग हर मोर सिंहासन अऊ धरती हर मोर गोड़ मड़हाए कर चौकी हवे, मोर बर तुमन कोन कस घर बनईहा? अऊ मोर बिसोए कर जघा कहां होही?

⁵⁰ का ए सबेच चीज हर मोर हाथ कर बनाल ना हवे?”

⁵¹ “ए जिदहा मईनसे मन, तुमन सत ला सूईन के नई अपनावा, काबरकि तुमन कर मन अऊ कान हर, गैर यहूदी मन सहींक परमेस्वर कर आगू में असुध हवे अऊ तुमन हमेसा पबितर आत्मा कर बिरोध करथा, जेकस तुमन कर पूरखा मन करत रहीन।

⁵² अगमजानी मन ले काके ला, तुमन कर पूरखा मन नई सताईन? ओमन ओ खभरीहा मन ला माएर दारीन, जेमन ओ धरमी जन कर आए कर खभेर ढेरे आगू देहे रहीन अऊ अब तंहूच मन ओकर धरोईया अऊ मरोईया हवा।

⁵³ तुमन तो सरगदूत कर द्वारा लानल कानहूंन ला तो पाए हवा, बकिन ओकर अनुसार नई चला।”

इस्तिफनुस ला पखना में माएर मरुवाथें

⁵⁴ ए बात ला सुईन के ओमन गुसाए गईन अऊ इस्तिफनुस बर, दांत चाबे लागीन।

⁵⁵ बकिन इस्तिफनुस हर पबितर आत्मा ले भरपूर होए के, सरग कती ला देखत रहीस अऊ परमेस्वर कर महिमा अऊ ईसू ला परमेस्वर कर जवनी कती ठड़होवल देखीस,

⁵⁶ अऊ कहीस, “देखा, मंए सरग ला खुलल, अऊ मईनसे कर बेटा ला, परमेस्वर कर जवनी कती ठड़होवल देखत हवों।”

⁵⁷ तब ओमन जोर से किरलाए के, अपन कान मन ला मूईंद लेहीन अऊ ओमन सब झन ओकर उपरे झपाए गईन,

⁵⁸ अऊ ओके घिसलावत, सहर ले बाहरी ले गईन अऊ उहां ओके पखना में मारे लागीन अऊ गवाह मन अपन-अपन ओढ़ना ला, साऊल नांव कर जवान मईनसे कर, गोड़ जग उताएर के मड़हाए देहीन।

⁵⁹ ओमन जब इस्तिफनुस ला पखना में मारतेच रहीन, तब ओहर पराथना करीस, “ए परभू ईसू! मोर आत्मा ला अपनाए ले।”

⁶⁰ तब ओहर ठेहुनाए के जोर से किरलाईस, “ए परभू, ए पाप ला ओमन कर उपरे झईन लगा” अऊ ए कहिके ओहर मएर गईस।