परेरीत 6 - Surgujia Bible

सात झन सेवक मन के ठहराथे

¹ ओ दिन में जब चेला मन कर गिनती हर ढेरेच बढ़े लागीस, यूनानी भासा बोलोईया यहूदी मन, इबरानी भासा बोलोईया यहूदी मन कर बिरोध में, बरबराए लागीन कि सगर दिन कर खाना देवाई में, हमर अदावेंन मन कर धियान नई देहल जात हवे।

² तब ओ बारहों परेरीत मन, अपन चेला मन कर मंडली ला अपन कती बलाए के कहीन, “ए ठीक नईए कि हमन, परमेस्वर कर बचन सुनाए कर काम ला छोंएड़ के, खवाए पीयाए कर काम में लगे रही।

³ एकरे बर, ए भाई-बहिन मन, अपन मंडली ले सात झन इमानदार सवांग मन ला जेमन पबितर आत्मा अऊ बुधी ले भरपूर हवें, चुईन लेआ कि हमरे ओमन कर हाथ में ए काम ला सोंएप देई।

⁴ बकिन हमरे तो पराथना अऊ परमेस्वर कर बचन कर सेवा में लगे रहबो।”

⁵ ए बात हर सब मंडली ला बढ़िहां लागीस अऊ ओमन इस्तिफनुस नांव कर एक झन सवांग ला चुनीन, जेहर बिस्वास अऊ पबितर आत्मा ले भरल पूरल रहीस, एकर संगे ओमन फिलीपुस, पुरखुरुस, निकानोर, तीमोन, परमिनास अऊ अंताकिया कर रहोईया जेहर यहूदी धरम कर अपनोईया नीकुलाउस रहीस, ओ सब झन ला चुईन लेहीन।

⁶ एमन ला परेरीत मन कर आगू में लानीन, परेरीत मन ओमन कर उपरे हाथ राएख के पराथना करीन।

⁷ अऊ परमेस्वर कर बचन हर फईलते गईस, यरूसलेम सहर में चेला मन कर गिनती ढेरेच बढ़त गईस अऊ याजक मन ले ढेरेच झेमन, ए बिस्वास कर मनोईया बएन गईन।

इस्तिफनुस ला धरथें

⁸ इस्तिफनुस हर परमेस्वर कर किरपा अऊ सामर्थ ले भरपूर होए के, मईनसे मन कर मझारे, ढेरेच चिन्ह चमत्कार देखावत रहीस।

⁹ बकिन एक दिन तनिक मईनसे मन, यहूदी धरम सभा जेला लिबिरतीनो कहत रहीन, ओमे ले उईठ के इस्तिफनुस जग बंहसा-बंहसी करे लागीन। एमन सब यहूदी रहीन अऊ कुरएनी, सिकंदरिया, किलिकिया अऊ एसिया ईलाका कर रहोईया रहीन।

¹⁰ बकिन ओमन ओकर गियान कर सामना करे नई सकीन, काबरकि ओ पबितर आत्मा कर सामर्थ ले गोठियात रहीस।

¹¹ तब ओमन तनिक झेमन ला, कले-कले अपन कती कएर लेहीन, जेमन ला एकस कहवाईन, “हमरे एके ला मूसा अऊ परमेस्वर कर बिरोध में निंदा कर बात करत सुने हवन।”

¹² त ओमन मईनसे मन ला अऊ अगुवा मन ला अऊ यहूदी कानहूंन कर सिखोईया मन ला बहकाईन अऊ ओमन इस्तिफनुस ला धईर के, महा सभा में ले गईन।

¹³ अऊ ओमन झूठा गवाह मन ला ठड़हुवाईन, जेमन एकस कहीन, “ए मईनसे हर, ए पबितर मंदिर अऊ मूसा कर कानहूंन कर बिरोध में, गोठियाए बर नई छोंड़े।

¹⁴ काबरकि हमरे एके ला, एकस कहत सुने हवन कि एही ईसू नासरी हर ए जघा ला नास कएर देही अऊ ओ रीती-रीवाज मन ला बदेल देही, जेला मूसा हर हमन ला सोंपीस हवे।”

¹⁵ तब जे मईनसे मन महा सभा में बईठे रहीन, ओमन इस्तिफनुस ला, एक ढींट देखीन, त ओकर चेहरा हर सरगदूत कर चेहरा सहींक दिखीस।