परेरीत 4 - Surgujia Bible

यहूदी महा सभा कर आगू में पतरस अऊ यूहन्ना

¹ जब पतरस अऊ यूहन्ना मईनसे मन जग गोठियावत रहीन, तब याजक मन अऊ मंदिर कर मुखिया अऊ तनिक सदूकी दल कर मईनसे मन ओमन जग आईन।

² ओमन ढेरेच गुसा होईन, एकरले कि पतरस अऊ यूहन्ना, मईनसे मन ला सिखावत रहीन अऊ ईसू, कर मरल में ले, जी उठे कर बारे में परचार करत रहीन।

³ ओमन पतरस अऊ यूहन्ना ला धएर के, दूसर दिन तक जेहल-खाना में राखीन, काबरकि सांझ होए गए रहीस।

⁴ बकिन परचार कर सुनोईया में ले, ढेरे झेमन बिस्वास करीन अऊ ओमन कर गिनती हर पांच हजार सवांग कर करीबन होए गईन।

⁵ दूसर दिन अईसना होईस कि ओमन कर अधिकारी, अगुवा अऊ यहूदी कानहूंन कर सिखोईया मन यरूसलेम में जूटीन,

⁶ महायाजक हना, अऊ ओकर घराना कर काइफा, यूहन्ना, सिकंदर अऊ सबेच झन ओजग जूटे रहीन।

⁷ त ओमन पतरस अऊ यूहन्ना ला मझारे ठड़हुवाए के पूछे लागीन, कि तुमन ए काम ला काकर सक्ति अऊ काकर नांव ले करे हवा?

⁸ तब पतरस हर पबितर आत्मा ले भरपूर होए के, ओमन ला कहीस, “ए मईनसे मन कर मुखिया अऊ अगुवा मन,

⁹ ए लंगड़ा मईनसे बर, जे भलाई कर काम ला हमन करे हन, एकरे बर तुमन अगर पूछताछ करत हवा कि ओहर कईसे ठीक होईस?

¹⁰ त तुमन अऊ सब इसराएली मन एला जाएन लेआ, कि नासरत कर ईसू मसीह, जेला तुमन कुरूस उपरे चघाए के, माएर मरुवाया अऊ परमेस्वर हर, ओके मरल में ले जीयाईस, ओकरे नांव में ए लंगड़ा मईनसे हर तुमन कर आगू में भला चंगा ठड़होईस हवे।

¹¹ ए ईसू कर बारे में परमेस्वर कर किताब में एकस लिखल हवे, जे पखना ला तुमन राएज मिसतिरी मन बेकार समझा, ओही हर कोनहा कर मुख पखना बएन गईस।

¹² अऊ कोनो दूसर झन कर द्वारा उद्धार नई मीले, काबरकि अगास कर खालहे मईनसे में ले अऊ कोनो दूसर नांव नई देहल गईसे, जेकर द्वारा हमन उद्धार पाए सकी।”

¹³ जे घनी पतरस अऊ यूहन्ना कर हिमेत ला ओमन देखीन, अऊ ए जानीन कि एमन अनपढ़ अऊ सधारन मईनसे हवें, त ओमन अचमहों होईन। फेर ओमन चिन गईन कि एमन ईसू कर संगे रहीन।

¹⁴ ओमन पतरस अऊ यूहन्ना कर बिरोध में कुछ कहे नई सकीन, काबरकि चंगा होवल मईनसे ला ओमन कर संगे ठड़होवल देखीन।

¹⁵ बकिन ओमन पतरस अऊ यूहन्ना ला, सभा ले बाहरी जाए कर अगियां देहीन, अऊ आपस में बिचार करे लागीन,

¹⁶ “हमरे ए मईनसे मन कर संगे का करी? काबरकि यरूसलेम कर सबेच रहोईया मन जानत हवें कि एमन नामीक चमत्कार कर काम देखाईन हवें, अऊ हमन ओकर इनकार करे नई सकन।

¹⁷ बकिन हमरे एमन ला घुड़काएन कि एमन ईसू कर नांव ले फेर, कोनो मईनसे जग झईन गोठियावें तेमेकि ए बात हर मईनसे मन में अऊ बगरा झईन फईले।”

¹⁸ तेकर ओमन पतरस अऊ यूहन्ना ला बलाईन अऊ चेत चघाए के कहीन, “ईसू कर नांव में कांहीच झईन गोठियाईहा अऊ कांहीच झईन सिखईहा।”

¹⁹ बकिन पतरस अऊ यूहन्ना ओमन ला जबाब देहीन, “तुंही मन बतावा कि का एहर परमेस्वर कर देख में बढ़िहां हवे कि हमन परमेस्वर कर बात ले बगरा, तुमन कर बात ला मानी?

²⁰ काबरकि जेला हमरे देखे अऊ सुने हन, ओला बिगर कहे हमरे नई रएह सकी।”

²¹ तेकर ओमन पतरस अऊ यूहन्ना ला, अऊ धमकाए के छोंएड़ देहीन अऊ मईनसे मन कर चलते, ओमन ला दंड देहे कर कोनो मोका नई पाईन, काबरकि जे अलहन हर होए रहीस, ओकर चलते सब मईनसे मन परमेस्वर कर बड़ाई करत रहीन।

²² काबरकि जे मईनसे कर ऊपरे चंगाई कर चमत्कार होए रहीस, ओहर चालीस बछर ले बगरा उमर कर रहीस।

बिस्वासी मन कर पराथना

²³ पतरस अऊ यूहन्ना उहां ले छुईट के, अपन लोग मन कती आईन, अऊ जे बात ला मुख याजक अऊ अगुवा मन, ओमन ला कहे रहीन, ओला ओमन अपन लोग मन जग सूनाईन।

²⁴ जे घनी ओमन एला सुनीन, त एक मन होए के जोर-जोर से परमेस्वर जग कहीन, “ए मालीक, तंए ओही लागस, जेहर अगास अऊ धरती अऊ समूंदर अऊ जे जाएत ओमे हवे, ओ सब ला बनाए।

²⁵ तंही पबितर आत्मा कर द्वारा, अपन सेवक हमर पूरखा दाऊद कर मूंह ले कहे, ‘गैर यहूदी मन ढेरेच गुसा काबर करीन? अऊ देस-देस कर मईनसे मन काबर बेकार बात सोंचीन?

²⁶ परभू अऊ ओकर मसीह कर, बिरोध में धरती कर राजा मन ठड़होईन, अऊ मुखिया मन, एक संगे जुईट गईन।’

²⁷ काबरकि फुरोंच में तोर पबितर सेवक ईसू, जेला तंए अभिसेक कएर के ठहराए हवस, ओकर बिरोध में हेरोदेस राजा अऊ राएजपाल पुंनतियुस पीलातूस अऊ गैर यहूदी मन अऊ इसराएली मन, ए सहर में जूटीन,

²⁸ बकिन जे जाएत ला ओमन करीन, ओहर आगू ले तोर सामर्थ, अऊ इछा ले ठहरावल रहीस।

²⁹ ए परभू, अझेर ओमन कर धमकी ला सुन, अऊ अपन सेवक मन ला एकस बरदान दे कि तोर बचन ला बड़े हिमेत कर संगे सुनाएं।

³⁰ चंगा करे बर, तोर हाथ ला लमाओ कि चिन्ह चमत्कार तोर पबितर सेवक ईसू कर नांव ले करें।”

³¹ जब ओमन मन पराथना कएर दारीन, त ओ जघा हर जिहां ओमन जूटे रहीन, हील गईस अऊ ओमन सब झन पबितर आत्मा ले भरपूर होए गईन अऊ परमेस्वर कर बचन ला, हिमेत कर संगे सुनाए लागीन।

बिस्वासी मन मिल-जूईल के रथें

³² सब बिस्वास करोईया मन एक मन कर रहीन, तेकर ले कोनो हर अपन संपती ला अपन नई कहत रहीस, बकिन सब संपती हर सब झन कर सझीयारा रहीस।

³³ अऊ परेरीत मन ढेरेच सामर्थ ले, परभू ईसू कर जी उठे कर, गवाही देहत रहीन, अऊ ओमन सब झन कर उपरे परभू कर ढेरेच किरपा रहीस।

³⁴ ओमन में ले ककरो जग कांही जाएत कर कमी घटी नई रहीस, काबरकि जेमन जग जमीन अऊ घर रहीस, ओला बेंच देहत रहीन, अऊ ओ बेंचल समान कर पईसा ला लाएन के,

³⁵ परेरीत मन कर गोड़ जग मड़हाए देहत रहीन, अऊ जेतना जेके जरूरत रहत रहीस, ओही कस ओमन ला बांएट देहत रहीन।

³⁶ लेवी गोती कर यूसुफ नांव कर एगोट मईनसे रहीस, ओहर साईपरस टापू कर रहीस, जेकर नांव परेरीत मन बरनबास राखे रहीन, एकर मतलब हवे, “उत्साह कर बेटा।”

³⁷ ओकर तनिक जमीन रहीस, तेला बेंच के पईसा लानीस, अऊ परेरीत मन कर गोड़ जग मड़हाए देहीस।