परेरीत 3 - Surgujia Bible

लंगड़ा भिखारी ला चंगाई मिलथे

¹ एक दिन पतरस अऊ यूहन्ना, जुअरहा करीबन तीन बजे, पराथना कर जुआर में, परमेस्वर कर मंदिर में जात रहीन।

² त मईनसे मन एगोट जनम कर लंगड़ा ला लानत रहीन, ओ मंदिर में सुंदर नांव कर एगोट दुरा रहीस, ओ दुरा में ओमन ओके सगर दिन बईठाए देहत रहीन कि ओहर मंदिर में जवईया मन जग ले भीख मांगत रहीस।

³ जे घनी ओ लंगड़ा हर पतरस अऊ यूहन्ना ला मंदिर में जात देखीस, तब ओमन जग भीख मांगीस।

⁴ तब पतरस हर यूहन्ना कर संगे ओकर कती ला एक ढींट देख के कहीस, “हमर कती ला देख।”

⁵ एकरले लंगड़ा हर ओमन जग ले कांही पाए कर असरा में, ओमन कती ला ताके लागीस।

⁶ तब पतरस हर कहीस, “चांदी अऊ सोना तो मोर जग नईए, बकिन मोर जग जे जाएत हवे, ओला मंए तोके ला देहत हों, ईसू मसीह नासरी कर नांव ले तंए रेंग बूल।”

⁷ अऊ पतरस हर ओकर जवनी हाथ ला धएर के उठाईस, अऊ तुरतेंच ओकर गोड़ अऊ ठेहुना में बल आए गईस।

⁸ त ओहर उछेल के ठड़होए गईस, अऊ रेंगे बूले लागीस, त रेंगत अऊ कुदत अऊ परमेस्वर कर इस्तुती करत, ओमन कर संगे मंदिर में गईस।

⁹ जे घनी सब मईनसे मन ओ लंगड़ा ला रेंगत, अऊ परमेस्वर कर इस्तुती करत देखीन,

¹⁰ तब ओके चिन गईन अऊ कहीन, “एहर तो ओही मईनसे लागे, जेहर मंदिर कर सुंदर नांव कर दुरा में, बईठ के भीख मांगत रहीस” ओकर संगे जे जाएत होए रहीस, ओला देख के ओमन अचमहों होए गईन।

पतरस हर परचार करथे

¹¹ जब ओ लंगड़ा हर पतरस, अऊ यूहन्ना कर संगे रहीस, तब सब मईनसे मन ढेरेच अचमहों करत, ओ जघा में कुदत-कुदत आईन, जेला सुलेमान कर ओसरा कहत रहीन।

¹² एला देख के पतरस हर मईनसे मन ला कहीस, “ए इसराएली मन, तुमन ए मईनसे ला देख के काबर अचमहों करत हा, तुमन हमर कती ला काबर अईसना देखत हा कि हमीच मन, अपन सक्ति, अऊ भक्ति ले ए लंगड़ा ला, रेंगे बूले लाएक बनाए देहे हवन।

¹³ अबराहम, इसहाक, अऊ याकूब कर परमेस्वर, मनेकि हमर पूरखो मन कर परमेस्वर हर, अपन सेवक ईसू कर महिमा करीस, जेके तुमन जान से मरुवाए बर धरुवाए देहा, अऊ जब राएजपाल पीलातूस हर ओके छोंएड़ देहे कर बिचार करीस, तबो ले तुमन ओकर आगू में ईसू कर इनकार कएर देहा।

¹⁴ ओहर पबितर, अऊ धरमी रहीस बकिन तुमन ओकर इनकार कर देहा, अऊ पीलातूस जग एकस मांग करे लागा कि एगोट जनमरवा ला तुमन बर छोंएड़ दे,

¹⁵ अऊ तुमन तो, अमर जिनगी कर डगर देखोईया ला माएर दारा, बकिन परमेस्वर हर मरल में ले ओके फेर जीयाईस, अऊ हमरे ए बात कर गवाह हवन।

¹⁶ ईसू कर नांव में ए मईनसे हर बिस्वास करीस, एकर चलते चंगाई पाईस, एकर बारे में तुमन आगूवेच ले जानत हवा कि एहर केतना मान अबरहा रहीस कि तुमन कर देखतेच भर में, एहर ईसू कर ऊपर बिस्वास करीस, अऊ एके ला पूरा-पूरा चंगाई मिलीस।”

¹⁷ अब ए भाई मन, मंए जानथों कि तुमन ए काम ला बिगर जाने करे हवा, अऊ ओहीच कस तुमन कर मुखियोच मन करीन।

¹⁸ बकिन जे बात मन ला परमेस्वर हर, सबेच अगमजानी मन कर द्वारा, तईहा जुग ले कहे रहीस कि ओकर मसीह दुख उठाही, ओहर अपन बात ला एही नियर अझेर पूरा करीस।

¹⁹ एकरले तुमन अपन पाप मन ला मेटाए बर, मन ला फिराए के परमेस्वर कती आवा, तेमेकि तुमन कर पाप हर धोवाए जाए, एकस करीहा त परभू जग ले आनंद कर दिन आही,

²⁰ अऊ परमेस्वर हर, तुमन बर आगू ले ठहराल मसीह ला भेजीस, जेहर ईसू लागे।

²¹ ओके ला ओ घरी तक सरग में रहे बर जरूरी हवे, जब ले कि ओहर सब बात मन ला सुधाएर के नांवा नई कएर लेही, जेकर बारे में परमेस्वर हर, अपन पबितर अगमजानी मन कर द्वारा, ढेरेच आगू ले बताए देहे रहीस।

²² मूसा हर कहे रहीस, “परभू, परमेस्वर हर तुमन अपन मईनसे मन ले, मोर कस एक झन अगमजानी ला ठहराही, ओहर जे जाएत तुमन ला कही, ओला जरूर सुनीहा।

²³ बकिन जे मईनसे हर ओ अगमजानी कर बात ला नई सुनही, ओहर अपन मईनसे मन ले पूरा तरह ले नास करल जाही।

²⁴ फूरोंच में समूएल अगमजानी अऊ ओकर पाछू अवईया सबेच अगमजानी मन, एहीच दिन मन कर बारे में घोंसना करीन हवें।

²⁵ तुमन अगमजानी मन कर संतान अऊ ओ करार कर संतान हवा, जेला परमेस्वर हर तुमन कर पूरखा मन कर संगे करे रहीस। काबरकि ओहर अबराहम जग कहीस कि तोर संतान कर द्वारा, धरती कर सबेच बंस मन आसीस पाहीं।

²⁶ एकर चलते परमेस्वर हर अपन सेवक ईसू ला जीयाईस, त ओके आगू तुमन जग भेजीस, तेमेकि ओहर तुमन में ले हर एक झन ला, ओकर बुराई ले बचाए के आसीस दे।”