परेरीत 26 - Surgujia Bible

राजा अगरिपा जग पौलुस हर अपन बारे में बताथे

¹ राजा अगरिपा हर पौलुस जग कहीस, “तोके अपन बारे में कहे कर पूरा छूट हवे।” तब पौलुस हर अपन हाथ बढ़ाए के जबाब देहे लागीस,

² “ए राजा अगरिपा, मंए अपन-आप ला धन्य समझथों, काबरकि आएज तोर आगू में मोर उपरे दोस लगोईया, यहूदी मन कर बिरोध में जबाब देहथों।

³ खास कएर के तंए यहूदी मन कर सब रीती-रीवाज अऊ बंहसा-बंहसी कर गोएठ ला जानथस, एकरले मंए तोर जग बिनती करथों, कि धीरज धईर के मोर गोएठ ला सुन।”

⁴ “नानबड़ ले मोर चाल-चलन हर मोर जाति मन कर मझार में अऊ यरूसलेम में कईसना रहीस, ओला सबेच यहूदी मन जानथें।”

⁵ ओमन मोके ला ढेरेच दिन ले जानथें अऊ गवाही दे सकथें कि मंए फरीसी दल कर रहें, जेमन सबले कटर झूंड हवें।

⁶ परमेस्वर हर हमर पूरखा मन जग बात-जबान करे रहीस, ओकर उपरे पका असरा करे कर चलते, मोर मुकदमा चलत हवे।

⁷ ओही बात-जबान कर पूरा होए कर पका असरा में, हमर बारह गोती कर मईनसे मन अपन पूरा मन लगाए के, राएत दिन परमेस्वर कर सेवा करत आईन हवें, ए राजा, एही पका असरा कर चलते, यहूदी मन मोर उपरे दोस लगाथें।

⁸ परमेस्वर हर मरल मन ला जीयाथे, त तुमन ए गोएठ ला काबर बिस्वास कर लाएक नई समझा?

⁹ “मंहूच एला पका समझत रहें कि ईसू नासरी कर नांव कर बिरोध में, जे जाएत मोर ले होए सकथे, मोके करे बर चाही।”

¹⁰ मंए यरूसलेम में एहीच कस करे रहें, अऊ मुख याजक मन ले अधिकार पाए के, ढेरेच बगरा ईसू में बिस्वास करोईया मन ला जेहल-खाना में डालें अऊ जब ओमन ला मरुवाए देहत रहीन, त मंहूच ओमन कर बिरोध में सहमती देहत रहें;

¹¹ अऊ मंए सबेच यहूदी धरम सभा कर घर मन में जाए के, ओमन ला दंड देके, ईसू कर जबरजसती निंदा करुवात रहें अऊ रीस कर मारे बाहरी सहर मन में जाए के ओमन के सतात रहें।

पौलुस अपन मन कर बात मन ला बताथे

¹² “जब मंए मुख याजक मन कर अधिकार अऊ अगियां ले चिट्ठी ला लेके दमिसक में जात रहें।”

¹³ त ए राजा, मझेनी जुआर डगर में अगास ले बेर चमकथे, ओकरो ले बगरा इंजोर हर मोर अऊ मोर संगे रेंगोईया मन कर चाएरो कती चमकत दिखीस।

¹⁴ जब हमन सबेच कोनो भुईयां में गिर गएन, त मंए इबरानी भासा में ए गोएठ ला कहत सुने, “ए साऊल, ए साऊल, तंए मोके ला काबर सताथस? पएना में लात माएर के अपन आप ला काबर नुकसान पहुंचात हस?”

¹⁵ तब मंए पूछें, “ए परभू तंए कोन लागस?” त परभू हर कहीस, “मंए ईसू लागों, जेके ला तंए सताथस।

¹⁶ बकिन तंए उठ अऊ ठड़होए जा, काबरकि मंए तोके ला एकरले दरसन देहे हों कि तोके ए गोएठ कर सेवक अऊ गवाह बनाओं, जेला तंए देखे हस अऊ जेला मंए तोके आगूवो देखाहूं।

¹⁷ मंए तोके तोर मईनसे अऊ गैर यहूदी मन ले बचाहूं, जेमन जग मंए तोके भेजत हों;

¹⁸ मंए तोके एकर बर भेजत हों कि, तंए ओमन कर आंएख ला उघार, अऊ ओमन ला अंधार ले इंजोर कती अऊ सैतान कर अधिकार ले परमेस्वर कती फिराए के लान, तेमेकि पाप कर छमा पाएं, अऊ ओ मईनसे मन कर संगे हक पाहीं, जेमन मोर उपरे बिस्वास कएर के पबितर होईन हवें।”

¹⁹ “एकरले ए राजा अगरिपा, सरग ले पावल ए दरसन कर बात ला मंए पूरा तरह से माएन लेहें,

²⁰ बकिन आगू मंए दमिसक कर फेर यरूसलेम सहर कर, अऊ एहूदिया इलाका कर सब रहोईया अऊ गैर यहूदी मन ला समझावत रहें कि अपन पाप ला छोंएड़ के, परमेस्वर कती अपन मन ला फिरावा, तेला बढ़िहां काम कएर के साबित करा।

²¹ एही गोएठ कर चलते, यहूदी मन मोके ला मंदिर में धएर के, मरुवाए देहे कर कोसिस करत रहीन।

²² बकिन परमेस्वर कर मदेत ले, मंए आएज ले बढ़िहां हों अऊ छोटे-बडे़ सब कर आगू में गवाही देहथों, मंए ओ गोएठ कर छोंएड़ अऊ कांही गोएठ ला नई कहों, जेला अगमजानी मन, अऊ मूसा हर भी कहीस हवे कि ए गोएठ हर पूरा होए बर हवे,

²³ कि मसीह ला दुख उठाए बर परही, अऊ ओही सबले आगू मरल में ले जी उठही अऊ हमर मईनसे में अऊ गैर यहूदी मन में, परमेस्वर कर इंजोर कर परचार करही।”

²⁴ जब पौलुस हर एकस जबाब देहत रहीस, तब फेसतुस हर रोसे किरलाए के कहीस, “ए पौलुस, तंए बउराहा हवस, तोर ढेरेच पढ़ाई हर तोके ला बउराहा कएर देहीसे।”

²⁵ बकिन पौलुस हर कहीस, “ए बड़खा राजा फेसतुस, मंए बऊराहा ना लागों, बकिन सचाई अऊ बुद्धी कर बात मन ला कहत हों।

²⁶ राजा हर भी ए गोएठ ला जानथे, जे गोएठ ला मंए बिगर डराए ओकर आगू में गोठियात हों, अऊ मोके ला बिस्वास हवे कि, ए गोएठ मन ले कोनो गोएठ हर ओकर जग ले लुकाल नईए, काबरकि ए घटना हर, कोनो कोनहा में नई होईसे।

²⁷ ए राजा अगरिपा, का तंए अगमजानी मन कर बिस्वास करथस? हओ, मंए जानथों कि तंए बिस्वास करथस।”

²⁸ तब अगरिपा राजा हर पौलुस ला कहीस, “तंए का सोंचथस कि तनिक समय में मोके ला मसीह बनाए लेबे?”

²⁹ पौलुस हर कहीस, “परमेस्वर ले मोर पराथना ए हवे कि तनिक नहीं, तो बगरा समय में तंहूच नहीं, बलकि मोर गोएठ सुनईया सबेच झेमन आजीएच मोर नियर होए जाहीं, बकिन मोर कस कैदी नई रहीं।”

³⁰ तब राजा, राएजपाल अऊ बिरनीके अऊ ओमन कर संगे बईठोईयो मन उईठ ठड़होईन,

³¹ अऊ अलगे जाए के एक दूसर ठन गोठियाए लागीन, “ए मईनसे हर अईसना कांहीच काम नई करीस हवे, जेकर चलते एहर मरुवाए लाएक आखिर जेहल में हुरके लाएक हवे।”

³² अगरिपा राजा हर फेसतुस ला कहीस, “अगर ए मईनसे हर कैसर महाराजा कर आगू में, अपन बयान लेहे बर बिनती नई करे रहतीस, त एके छोंएड़ सकत रहेन।”