परेरीत 21 - Surgujia Bible

पौलुस हर यरूसलेम सहर में जाथे

¹ हमरे इफिसूस सहर कर अगुवा मन ले अलग होए के, पाछू पानी जहाज में चएघ के, सोज डगर में कोस नांव कर टापू में गएन अऊ दूसर दिन रुदुस टापू में पहुंचेन अऊ उहां ले पतरा सहर में गएन।

² ओजग एगोट पानी जहाज हर फीनीके कती जात भेंटाईस, त हमरे ओमे चएघ के चएल देहेन।

³ जब साईपरस टापू ला देखेन, त हमरे ओला डेरी हाथ कती छोड़ेन अऊ सीरिया में ले जाए के सूर में उतरेन, काबरकि ओजग पानी जहाज कर समान ला उतारे बर रहीस।

⁴ चेला मन जग भेंटाए के हमरे ओजग सात दिन ले रहेन, ओमन पबितर आत्मा कर अगुवाई ले पौलुस ला कहीन, “यरूसलेम सहर में गोड़ ला झईन मढ़ाबे।”

⁵ सात दिन हर पूईर गईस, त हमन ओजग ले चएल देहेन अऊ सबेच झेमन अपन परानी अऊ लईका मन कर संगे, हमन ला गांव कर बाहरी तक पहुंचाईन अऊ हमन समूंदर कर धरी में ठेहुनाए के पराथना करेन।

⁶ तब एक दूसर झन ले बिदा होए के, हमन तो पानी जहाज में चएघ गएन अऊ ओमन अपन-अपन घरे फिर गईन।

⁷ तब हमन सूर सहर ले निकेल के पतुलिमयिस सहर में पहुंचेन अऊ भाई मन जग जोहार भेंट कएर के, ओमन कर संगे एक दिन रहेन।

⁸ दूसर दिन हमन उहां ले रेंग के कैसरिया सहर में गएन। उहां फिलीपुस नांव कर सुघर खभेर कर परचार करोईया जग जाए के ओकर घरे रहेन, ओहर यरूसलेम मसीह मंडली में ले चुनल, सातो सेवक में ले एक झन रहीस।

⁹ ओकर चाएर झन कुंवारी बेटी मन रहीन, जेमन अगमबानी करत रहीन।

¹⁰ जब हमन उहां ढेरेच दिन ले रएह धारेन, त अगबुस नांव कर एक झन अगमजानी हर, एहूदिया जिला ले आईस।

¹¹ ओहर हमर जग आए के पौलुस कर कनिहां पटा ला लेहीस अऊ अपन हाथ गोड़ ला बाएंध के कहीस, “पबितर आत्मा हर एकस कहथे कि जे मईनसे कर, ए कनिहां पटा हर लागे, ओला यरूसलेम में एही कस यहूदी कर मुखिया मन बांधही अऊ गैर यहूदी मन कर हाथ में जिमा दे देहीं।

¹² जब हमन ए गोएठ ला सुनेन, त हमन अऊ उहां कर मईनसे मन पौलुस जग बिनती करेन कि यरूसलेम में झईन जाए।”

¹³ बकिन पौलुस हर जबाब देहीस, “तुमन का करथा कि रोए-रोए के मोर मन ला छोटे करथा? मंए तो परभू ईसू कर नांव बर यरूसलेम में, सिरीप बंधाए बर नहीं, बलकि मरे बर भी तियार हों।”

¹⁴ जब पौलुस हर हमर गोएठ ला नई मानीस, तब हमरे एकस सोंएच के चुप होए गएन, “परभू कर इछा पूरा होए।”

पौलुस हर याकूब जग भेंटाथे

¹⁵ एकर पाछू हमन तियार होएन अऊ यरूसलेम में चएल देहेन।

¹⁶ कैसरिया सहर ले भी तनिक चेला मन हमर संगे गईन अऊ हमन मनासोन नांव कर एक झन मईनसे कर घरे गएन कि ओजग हमन रईह सकी। ओहर साईपरस कर रहोईया एक झन पुराना चेला रहीस।

¹⁷ जे घनी हमन यरूसलेम सहर में पहुंचेन, त भाई मन ढेरेच खुसी कर मारे हमर संगे भेंटाईन।

¹⁸ दूसर दिन पौलुस हर, हमन ला लेके याकूब जग गईस; जिहां कलीसिया कर सबेच अगुवा मन जूटे रहीन।

¹⁹ पौलुस हर ओमन ला जोहारीस अऊ जे-जे काम ला परमेस्वर हर ओकर सेवकाई कर चलते, गैर यहूदी मन में करे रहीस, ओला ओरे-ओर सब झन ला बताईस।

²⁰ ओमन एला सुईन के परमेस्वर कर महिमा करीन, फेर ओहर कहीस, “ए भाई, तंए देखथस कि यहूदी जाति कर हजारो मईनसे मन बिस्वास करीन हवें अऊ सबेच झन मूसा कर कानहूंन बर धुन लगाईन हवें।

²¹ ओमन ला तोर बारे में एकस बताल गईस हवे कि गैर यहूदी मन कर मझारे रहोईया यहूदी मन ला, मूसा कर कानहूंन ला छोंएड़ देहे बर सिखाथस अऊ कथस कि अपन लईका मन कर खतना झईन करुवावा अऊ रीती-रीवाज में झईन चला।

²² ओमन ला जरूर पता चएल जाही कि तंए एजग हवस, अब हमरे का करी?

²³ एकरले जेला हमन तोके कथन, ओला तंए कर हमर जग चाएर झन मईनसे हवें, जेमन मनत मांगीन हवें।

²⁴ ओमन ला लेके जा अऊ अपन-आप ला सुध कर अऊ ओमन ला पईसा दे कि ओमन जाए के मूड़ मूड़वाएं, तब सबेच झन जाएन जाहीं कि तोर बारे में जे गोएठ ला गोठियाईन हवें, ओमे कांहीच हर सही ना हवे अऊ तंए तो खुद मूसा कर कानहूंन ला मानथस।

²⁵ बकिन हमन एकस फईसला कएर के लिख के भेजे हवन कि गैर यहूदी में ले जेमन बिस्वास करीन हवें, ओमन मूरती कर आगू में चघावल मांस, लहू, ढेंटू अईट के मारल मांस अऊ बेभिचार ले दुरीहां रहें।”

²⁶ तब पौलुस हर ओ मईनसे मन ला लेके, दूसर दिन ओमन कर संगे सुद्ध होए कर पाछू, मंदिर में गईस अऊ ओजग बताए देहीस कि सुद्ध होए कर दिन हर कब पूरा होही अऊ सबेच झन बर चढ़ावा कब चघावल जाही।

मंदिर में पौलुस ला धईर लेथें

²⁷ जे घनी सात दिन हर पूरा होए बर रहीस, त एसिया कर तनिक यहूदी मन पौलुस ला मंदिर में देखीन। ओमन सबो मईनसे मन ला बहकाईन अऊ एकस किरलाए के ओके धरीन,

²⁸ “ए इसराएली मन मदेत करा, एहर ओही मईनसे लागे, जेहर मईनसे मन कर अऊ कानहूंन कर अऊ एजग कर बिरोध में, सब जघा में मईनसे मन ला बताथे अऊ यूनानीयो मन ला मंदिर में लाएन के, ओहर ए पबितर जघा ला अपबितर कएर देहीस हवे।”

²⁹ एकर आगू ओमन इफिसूस कर रहोईया तुरफिमुस ला, ओकर संगे सहर में देखे रहीन, ओमन के लागत रहीस कि पौलुस हर ओके मंदिर में लानीस हवे।

³⁰ ते घनी पूरा सहर में हला मएच गईस अऊ मईनसे मन कुईद के आईन अऊ एक जघा जूटीन, तेकर पौलुस ला धएर के, मंदिर ले बाहरी घिसलावत ले गईन अऊ मंदिर कर दुरा ला तुरतेंच ढांएक देहीन।

³¹ जे घनी ओमन ओके मरुवाए बर होवत रहीन, ओही घनी सिपाही मन कर मुखिया ला आरो मिलीस कि यरूसलेम में हलचल मचीस हवे।

³² तेही घनी ओहर उहां तूरतेंच सिपाही अऊ सुबेदार मन कर संगे खालहे उतरीस अऊ ओमन सिपाही अऊ सिपाही कर मुखिया मन ला देख के, पौलुस ला मारे-पीटे बर छोंएड़ देहीन।

³³ तब सिपाही मन कर मुखिया हर ठांवें आए के, ओके धरीस अऊ संखरी में बांधे बर कहिके पूछीस, “एहर कोन लागे अऊ का करीस हवे?”

³⁴ बकिन भीड़ में कोई कांही कस किरलावत अऊ कोई दूसर कस किरलावत रहीस अऊ किरलाई कर मारे सिपाही हर सही बात ला नई जाएन पाईस, तेकर ले ओहर पौलुस ला अपन गढ़ में ले जाए बर कहीस।

³⁵ जे घनी ओहर सीढ़ी में पहुंचीस, त एकस होईस कि भीड़ कर ढकलाईक मारे, सिपाही मन ओके डोएह के ले गईन।

³⁶ काबरकि मईनसे मन कर भीड़ हर ओकर पाछू, एकस कहिके परे रहीन, “ओके ला मरुवाए देआ।”

³⁷ जब पौलुस ला गढ़ में लेजोईया रहीन, ओही घनी पौलुस हर सिपाही मन कर मुखिया ला पूछीस, “का मंए तोके कांही कएह सकत हों?” ओहर कहीस, “का तंए यूनानी भासा जानथस?

³⁸ का तंए ओ मिसर देस कर रहोईया ना लागस, जेहर तनिक दिन कर आगू, बिरोधी बएन के चाएर हजार आतंकवादी मईनसे मन ला सुनसान जघा में ले गए रहे?”

³⁹ पौलुस हर कहीस, “नहीं, मंए तो तरसुस गांव कर यहूदी जाति कर मईनसे लागों अऊ जाने-माने किलिकिया सहर कर रहोईया लागों, मंए तोर ठन बिनती करथों कि मोके ला ए मईनसे मन जग गोठियाए दे।”

⁴⁰ जब ओहर अगियां देहीस, त पौलुस हर सीढ़ी में ठड़होए के हाथ में इसारा करीस अऊ ओमन चुप होए गईन, ओही घनी पौलुस हर इबरानी भासा में गोठियाए लागीस: