परेरीत 11 - Surgujia Bible

पतरस हर अपन दरसन ला फरी-फरी बताथे

¹ तेकर परेरीत मन अऊ भाई मन जेमन एहूदिया जिला में रहत रहीन, सुनीन कि गैर यहूदीयो मन परमेस्वर कर बचन ला माएन लेहीन हवें।

² बकिन जे घनी पतरस हर यरूसलेम सहर में आईस, तब यहूदी बिस्वासी मन ओकर जग बंहसा-बंहसी करे लागीन,

³ “तंए काबर गैर यहूदी मन कर घरे जाए के खाए?”

⁴ तब पतरस हर ओमन ला सुरू ले सबेच बात मन ला कएह सुनाईस,

⁵ “मंए याफा में पराथना करत रहें, त मोके झपकी आए गईस, तब एगोट दरसन ला देखें कि एगोट बड़खा चदर सहींक, कांही जाएत हर चाएरो कोनहा ले गठीयावल, अगास ले उतेर के मोर जग आईस।

⁶ जे घनी मंए ओला धियान से देखें त भुईं कर चाएर गोड़वा जानवर मन, जंगल कर जानवर, पेट कर बल रेंगोईया जीव अऊ अगास कर चराई मन ला देखें,

⁷ अऊ एहूच गोएठ ला सुने, ‘ए पतरस! उठ, मार अऊ खा।’

⁸ बकिन मंए कहें, ‘नहीं परभू, नहीं, काबरकि कांही खराब, अऊ असुध चीज ला मंए कभों नई खाए हों।’

⁹ बकिन अगास ले दूसर दाएर गोएठ सुनाईस, ‘जे चीज ला परमेस्वर हर सुद्ध ठहराईस हवे, ओला तंए असुध झईन कह।’

¹⁰ तीन दाएर एही कस होईस, तेकर ओ सब जाएत ला फेर अगास में ऊठाए लेहीस।

¹¹ तेकर तुरतेंच तीन झन मईनसे, जेमन ला कैसरिया सहर ले मोर जग भेजल गए रहीस, जे घर में मंए रहें, ओ घर कर दुरा में आए के ठड़होए गईन।

¹² तेकर पबितर आत्मा हर मोके ओमन कर संगे, बिगर संका कर जाए बर कहीस। ए छव भाईयो मन मोर संगे होए लेहीन अऊ हमरे ओ मईनसे कर घरे गएन।

¹³ त ओहर हमके ला बताईस कि एक झन सरगदूत ला अपन घरे ठड़होवल देखीस, जेहर ओकर जग कहे रहीस, ‘याफा में एक झन मईनसे ला भेज के समोन, जेला पतरस कथें बलूवाए ले।

¹⁴ ओहर तुमन जग एकस गोएठ कही, जेकर चलते तंए अऊ तोर घर कर मईनसे मन उद्धार पाहीं।’

¹⁵ जे घनी मंए गोठियावत रहें, त पबितर आत्मा हर ओमन कर उपरे ओही कस उतरीस, जेकस सुरू में हमर उपरे उतरे रहीस।

¹⁶ तब मोके परभू कर ए कहल बचन कर सुरता आईस, यूहन्ना हर तो पानी ले बतिस्मा देहे रहीस, बकिन तुमन पबितर आत्मा ले बतिस्मा पईहा।

¹⁷ अगर परमेस्वर हर ओहू मन ला ओही दान देहीस, जेला हमके परभू ईसू मसीह में बिस्वास करे ले मिले रहीस, त मंए कोन होथों कि परमेस्वर ला रोएक सकों?”

¹⁸ एला सुईन के ओमन कले-कस रहीन अऊ परमेस्वर कर बड़ाई कएर के कहत रहीन, “तब तो परमेस्वर हर गैर यहूदीयो मन ला पाप ले मन फिराए के, अमर जिनगी पाए कर दान देहीस हवे।”

अंताकिया कर कलीसिया

¹⁹ इस्तिफनुस कर मरे कर पाछू जे सताव हर होवत रहीस, ओकर चलते तनिक बिस्वासी मन इते-ऊते होए गईन, त ओमन फिरत-फिरत फीनीके, साईपरस अऊ अंताकिया सहर में पहुंचीन, बकिन यहूदी मन कर छोंएड़ कोनो आने झेमन ला बचन नई सुनात रहीन।

²⁰ बकिन ओमन में ले तनिक झेमन साईपरस अऊ कुरेनी कर रहोईया रहीन। ओमन अंताकिया में आए के, यूनानियों मन ला परभू ईसू कर सुघर खभेर कर गोएठ मन ला सुनावत रहीन।

²¹ परभू कर सामर्थ ओमन कर संगे रहीस, अऊ ढेरेच मईनसे मन बिस्वास कएर के, परभू कती फिरीन।

²² जे घनी ओमन कर चरचा यरूसलेम कर कलीसिया में पहुंचीस, त ओमन बरनबास ला अंताकिया सहर में भेजीन।

²³ त ओहर उहां पहुंच के, परमेस्वर कर किरपा ला देख के, ढेरेच फुरमा होईस अऊ सबेच झन ला उत्साहित करत रहीस कि तन-मन लगाए के परभू में बने रहा।

²⁴ बरनबास हर एगोट बढ़िहां मईनसे रहीस, ओहर पबितर आत्मा अऊ बिस्वास ले भरल पूरल रहीस। फेर ढेरेच मईनसे मन परभू में आए मिलीन।

²⁵ तेकर बरनबास हर साऊल ला खोजे बर, तरसुस सहर में चएल देहीस।

²⁶ जे घनी ओकर जग भेंटाईस, त ओके ला अंताकिया सहर में लानीस, अऊ एकस होईस कि बरनबास अऊ साऊल एक बछर तक कलीसिया में मिलत रहीन अऊ ढेरेच मईनसे मन ला सीखावत रहीन। चेला मन सबले आगू अंताकिया सहर में “मसीही” कहाईन।

²⁷ ओही घनी तनिक अगमजानी मन, यरूसलेम ले अंताकिया आईन।

²⁸ ओमन में ले अगबुस नांव कर एक झे मईनसे हर, पबितर आत्मा कर अगुवाई ले ठड़होए के बताईस कि सबेच जघा में ढेरे अकाल परही। ओ अकाल हर महाराजा, कलोदियुस कर राएज कर समय में परीस।

²⁹ तेकर चेला मन बिचार करीन कि सब झे अपन-अपन अवसान कर अनुसार, एहूदिया में रहोईया भाई मन कर मदेत करे बर कांही भेजा।

³⁰ त ओमन एहीच कस करीन; बरनबास अऊ साऊल कर हाथ में अगुवा मन जग भेंट ला भेज देहीन।