परेरीत 10 - Surgujia Bible

कुरनेलियुस पतरस ला बलाथे

¹ कैसरिया सहर में कुरनेलियुस नांव कर एगोट मईनसे रहीस। ओहर सेना कर ओ दल कर सुबेदार रहीस, जेला इतालियानी कहत रहीन।

² ओहर परमेस्वर कर भगत रहीस अऊ अपन घराना मन कर संगे परमेस्वर कर माएन-मरजाद करत रहीस अऊ यहूदी मन ला ढेरेच दान देहत रहीस अऊ हमेसा परमेस्वर ले पराथना करत रहीस।

³ ओहर जुअरहा करीबन तीन बजे, एगोट दरसन देखीस कि परमेस्वर कर एगोट दूत हर, ओकर जग भीतरी आए के चिकरीस, “ए कुरनेलियुस।”

⁴ ओहर ढेरेच डराए गईस अऊ ओके एक ढींट देख के पूछीस, “ए परभू, एहर का हवे?” तब सरगदूत हर ओके ला कहीस, “तोर पराथना हर परमेस्वर जग पहुंचीस हवे अऊ गरीब मन ला दान देथस ओला परमेस्वर जानथे।

⁵ अझेर याफा इलाका में तनिक मईनसे मन ला भेज के, समोन जेला पतरस कथें, ओके बलाए लान।”

⁶ ओहर चाम कर धंधा करोईया समोन कर घरे पहुना गईस हवे, जेकर घर हर समूंदर कर धरी में हवे।

⁷ जे घनी ओ सरगदूत, जेहर ओकर जग गोठियाए रहीस, ओहर चएल देहीस, तब कुरनेलियुस हर अपन दुई झन सेवक अऊ अपन देख रेख करोईया में ले, परमेस्वर कर एगोट भगत सिपाही ला बलाईस।

⁸ तब ओमन ला सब गोएठ ला बताए के याफा इलाका में भेजीस।

पतरस दरसन देखथे

⁹ दूसर दिन जे घनी ओमन रेंगत-रेंगत सहर कर ठांवें पहुंचीन, त जुअरहा घरी पतरस हर पराथना करे बर छत में गईस।

¹⁰ ओही घरी ओके भूख लागीस अऊ ओहर कांही खाए बर करत रहीस, बकिन जे घनी ओमन खाना तियारी करत रहीन, ते घनी ओके झपकी आए गईस।

¹¹ ओहर देखीस कि अगास हर उघेर गईस हवे अऊ एगोट बड़खा चदर सहींक, चाएरो कोनहा ले गठीयाल भुईयां कती उतरत हवे।

¹² जेमे भुईं कर सबेच मधे कर चाएर गोड़वा अऊ पेट कर बल रेंगोईया जीव अऊ अगास कर चराई मन रहीन।

¹³ ओके ला एगोट अईसन गोएठ सुनाई देहीस, “ए पतरस! उठ, मार अऊ खा।”

¹⁴ बकिन पतरस हर कहीस, “नहीं परभू, कभों नहीं, काबरकि मंए कभों कांही अपबितर आखिर, असुध चीज ला नई खाए हों”

¹⁵ फेर दूसर दाएर ओके गोएठ सूनाई देहीस, “जेला परमेस्वर हर सुद्ध ठहराईस हवे, ओला तंए असुध झईन कह।”

¹⁶ तीन दाएर एहीच कस होईस, तेकर तुरतेंच ओ चदर ला अगास में उठाए लेहल गईस।

¹⁷ जे घनी पतरस हर अपन मन में सोंचत रहीस कि ए दरसन जेला मंए देखें, ओकर का मतलब हवे, त ओ मईनसे मन जेला कुरनेलियुस हर भेजे रहीस, समोन कर घर ला खोएज के दुरा में, आए के ठड़होईन,

¹⁸ अऊ ओमन चिकेर के पूछे लागीन, “समोन जेला पतरस कथें, का इहें ला पहुना आईस हवे?”

¹⁹ जे घनी पतरस हर ओ दरसन कर बारे में सोंचतेच रहीस, ओही घरी पबितर आत्मा हर ओकर जग कहीस, “सुन, तीन झन मईनसे मन तोके खोजत हवें।

²⁰ तेकर ले हालू उईठ के खालहे जा, अऊ बिगर संका करे ओमन कर संगे होए ले, काबरकि मंए ओमन ला भेजे हों।”

²¹ तेकर पतरस हर खालहे आए के ओ मईनसे मन ला कहीस, “सुना जेके ला तुमन खोजत हवा, ओ मंही लागों, तुमन का काम बर आए हवा?”

²² ओमन कहीन, “हमके कुरनेलियुस सुबेदार हर भेजीस हवे, जेहर धरमी अऊ परमेस्वर कर भगत हवे अऊ सबेच यहूदी जाति में नामी मईनसे हवे, ओहर एक ठे पबितर सरगदूत ले ए अगियां पाईस कि तोके अपन घरे बलाए के तोर जग ले बचन सुने।”

²³ तब पतरस हर ओमन ला भीतरी बलाए के, ओमन कर सेवा-सतकार करीस।

परमेस्वर सब के उद्धार देथे

²⁴ दूसर दिन ओहर ओमन कर संगे गईस अऊ याफा इलाका कर भाई मन ले, तनिक झेमन ओकर संगे गईन। ओमन दूसर दिन कैसरिया सहर में पहुंचीन, अऊ कुरनेलियुस हर अपन घराना अऊ अपन खास संगता मन ला जूटाए के, ओमन के अगुरत रहीस।

²⁵ जब पतरस हर भीतरी आवत रहीस, त कुरनेलियुस हर ओकर जग भेंट करीस, अऊ गोड़े गिर के ओके जोहारीस।

²⁶ बकिन पतरस हर ओके उठाए के कहीस, “ठड़होए जा, मंहूच तो एगोट मईनसे लागों।”

²⁷ अऊ ओकर संगे गोठियात भीतरी गईस अऊ ढेरेच झेमन ला जूटल देखीस,

²⁸ त पतरस हर ओमन ला कहीस, “तुमन जानथा कि गैर यहूदी मन कर संगे रहे बर, आखिर ओकर घर जाए बर यहूदी कानहूंन कर अनुसार मना करल गईसे, बकिन परमेस्वर हर मोके बताईस हवे कि कोनो मईनसे ला अपबितर, आखिर असुध झईन कह।

²⁹ एकरले जब मोके बलाया, त बिगर कांही कहे रेंगत आए गएं, अब मंए पूछथों कि मोके का काम बर बलाए हआ?”

³⁰ कुरनेलियुस हर कहीस, “चाएर दिन कर आगू एही घरी जुअरहा कर तीन बजे मंए अपन घरे पराथना करत रहें, त अचाकन देखें कि एगोट मईनसे हर झलकत ओढ़ना पहिरल, मोर आगू में आए ठड़होईस,

³¹ अऊ कहे लागीस, ए कुरनेलियुस, तोर पराथना हर परमेस्वर जग पहुंचीस हवे अऊ गरीब मन ला दान देथस, ओला परमेस्वर जानथे।

³² एकरे बर कोनो ला याफा इलाका में भेज के समोन जेला पतरस कथें, ओके ला बलाओ ओहर समूंदर कर धरी में चाम कर धंधा करोईया समोन कर घरे पहुना गईस हवे।

³³ तेकर मंए हालूच के तोर जग मईनसे मन ला भेजें अऊ तंए ठीक करे कि आए गए, अझेर इहां सब झन परमेस्वर कर आगू में हवन, काबरकि जे जाएत ला परभू हर तोर जग कहीसे, ओला हमके सुना।”

पतरस कर परचार

³⁴ तेकर पतरस हर कहीस, “अब मंए पका जाएन गएं कि परमेस्वर ककरो मूंह देखी नई करे,

³⁵ बल्कि सब जाति में जेमन ओके ला डराथें अऊ ओकर आगू में सचा काम करथें, परमेस्वर ओमन ला अपनाथे।

³⁶ जे सुघर खभेर ला परमेस्वर हर इसराएली मन जग भेजीस, ओ सुघर खभेर हर एही हवे कि ओमन अऊ परमेस्वर कर मझारे ईसू मसीह कर द्वारा सांती हवे, ओही ईसू मसीह सब झन कर परभू लागे।

³⁷ ओ बात ला तंए जानथस, जेहर यूहन्ना बतिस्मा देवईया कर परचार कर पाछू, गलील जिला ले सुरू होए के, सब एहूदिया जिला में बगेर गईस।

³⁸ तुमन ईसू, जेहर नासरत गांव कर लागे, ओकर बारे में तुमन जानथा कि परमेस्वर हर कोन किसीम ले, ओके पबितर आत्मा अऊ सामर्थ देके ठहराईस, ओहर भलाई करत रहीस अऊ सबेच दुस्टआत्मा कर सतावल मन ला चंगा करत रहीस, काबरकि परमेस्वर ओकर संगे रहीस।

³⁹ हमन ओ सब काम मन कर गवाह हवन, जेला ओहर एहूदिया जिला अऊ यरूसलेम सहरोच में करीस अऊ यहूदी अगुवा मन ओके कुरूस में लटकाए के माएर देहीन।

⁴⁰ बकिन परमेस्वर हर ओके ला तीसर दिन में जीयाईस अऊ सबेच मईनसे मन कर आगू में परगट भी करीस।

⁴¹ बलकि ओ गवाह मन जग परगट करीस, जेमन ला परमेस्वर हर आगू ले चुने रहीस, मनेकि जेमन ओकर मरल में ले जी उठे कर पाछू, ओकर संगे खाईन-पीन,

⁴² अऊ परमेस्वर हर हमके अगियां देहीस कि मईनसे मन जग परचार करा अऊ साबित करा कि एहर ओही लागे जेके ला परमेस्वर हर जीयत, अऊ मरल मन कर नियाओ करोईया ठहराईस हवे।

⁴³ सबेच अगमजानी मन ओकर गवाही देहत रहीन कि जे कोनो ओकर उपरे बिस्वास करही, ओके ओकर नांव कर चलते पाप कर छमा मिलही।”

गैर यहूदी मन कर उपरे पबितर आत्मा आथे

⁴⁴ पतरस हर ए बात ला कहतेच रहीस, त पबितर आत्मा हर, बचन कर सबेच सुनोईया मन कर उपरे उतेर आईस।

⁴⁵ तब जेतना यहूदी बिस्वासी मन पतरस जग आए रहीन, ओमन सब झन अचमहों में पएर गईन कि गैर यहूदी मन कर उपरे भी पबितर आत्मा कर दान उंडेलल गईस हवे।

⁴⁶ काबरकि ओमन अनजान भासा मन ला गोठियात रहीन, अऊ परमेस्वर कर बड़ाई करत सुनीन, एकरले पतरस हर कहीस,

⁴⁷ “का अब ए मईनसे मन ला पानी ले बतिस्मा लेहे ले, कोनो मना कर सकत हवे? काबरकि एहू मन हमर सहींक पबितर आत्मा पाईन हवें।”

⁴⁸ तेकर ले पतरस हर अगियां देहीस कि ओमन ला ईसू मसीह कर नांव ले बतिस्मा देहल जाए, तेकर ओमन पतरस जग बिनती करीन कि ओहर तनिक अऊ दिन ओमन कर संगे रहे।